Sak 60

Yãab sẽn yaa reng-n-lɛmbg ne Kirist Rĩungã ziiri

AZEZI waa Filip Sezaare wã babg pʋgẽ, n zãmsd kʋʋngã ne a tʋm-tʋmdbã. A togs-b-la koe-lingdem kãngã: “Mam yeta yãmb sɩda tɩ yãmb neb kẽer sẽn be ka na n yãa Ninsaal Biiga sẽn wat ne bãmb naam tɩ b nan ka ki ye.”

Tʋm-tʋmdbã ra tog n sokda b mense: ‘Bõe la a Zezi ra rat n yeele?’ Sẽn zems rasem a yopoe loogr poore, a Zezi peega a Pɩɛɛre, a Zak, la a Zã n tɩ rʋ tãn-luglug zugu. Tõeeme tɩ ra yaa yʋngo, bala karen-biisã ra suusdame. A Zezi pʋʋsgã wakate, a tedga bãmb taoore. A nengã sɩngame n pɩnd wa wĩntoogo, t’a futã peelem lebg wa vẽenem.

Dẽ neb a yiib b sẽn bilg tɩ ya “a Moiiz ne a Eli” n puk n sɩng goam ne a Zezi a ‘loogrã sẽn da segd n zĩnd Zerizalɛmã’ (NW ) yelle. Yaa vẽeneg tɩ loog-kãng tɩ loee ne a Zezi kũumã la a vʋʋgrã sẽn na n pʋglã. Woto, sõs-kãngã wilgdame t’a kũumã sẽn na n yɩ yãnd kũumã ka bũmb a sẽn tõe n gili, wa a Pɩɛɛr sẽn da tʋllã ye.

Karen-biisã ra neka masã n getẽ la b kelgdẽ, la b sẽn kelgd bũmb ningã yɛɛs-b-la wʋsgo. Baa sẽn yaa yãabã, ra wõnda yɛl sẽn maand sɩd-sɩda, hal t’a Pɩɛɛr kẽ sõasgã pʋgẽ. A yeelame: “Zusoaba, yaa neere tɩ tõnd zĩnd ka. Yãmb sã n data, mam na n tilga fu-rot a tãab ka, a yembr yãmb yĩnga, a yembr a Moiiz yĩnga, la a yembr a Eli yĩnga.”

A Pɩɛɛr sẽn da gomdã wakate, sawad-pɩndg n lud-ba, la koɛɛg n yi sawadgẽ wã n yeele: “Yõ wã yaa mam Bi-nongre, mam sẽn nong ne m sũur fãa zãnga. Bɩ y kelg-a!” Karen-biisã sẽn wʋm dẽ wã b fõgna b nens tẽnga. La a Zezi yeel-b lame: “Yik-y-yã, da zoe-y rabeem ye!” B sẽn yikã b ka yã ned ba a yembr tɩ sã n ka a Zezi ye.

Vẽk-n-beoogã b sẽn da wa n sigd tãngã, a Zezi kõo karen-biisã noor n yeele: “Da sak n togs-y ned ba a yembr bõn-makr kãng ye, sĩnd-y hal tɩ Ninsaal Biiga wa vʋʋge.” Karen-biisã sẽn yã a Eli wã, rẽ waa ne sokr b yamẽ. B soka woto: “Yaa bõe tɩ gʋlsdba yetẽ t’a Eli n na n deng n wa?”

T’a Zezi leoke: “A Eli waame, la b ka bãng-a ye.” La a Zezi ra gomda Lisd a Zã yelle, bala yẽ me maana tʋʋmd sẽn wõnd a Eli rẽndã. Wala a Eli sẽn segl sor a Eliize yĩngã, a Zã me segla sor Kiristã yĩnga.

Ad yãab kãngã sɩd keng a Zezi ne a karen-biisã raoodo! Yãab kãngã yaa Kirist Rĩungã ziir reng-n-lɛmbga. Wala a Zezi sẽn da kãab-b semen ning sẽn da loogã, karen-biisã sɩd yãa “Ninsaal Biiga sẽn wat ne bãmb naam.” A Zezi kũumã poore, a Pɩɛɛr gʋlsame n gom b ‘nin sẽn yã Kirista naam b sẽn da be ne-a tãn-sõngã zugã’ yelle.

Fariziẽ rãmbã ra kosa a Zezi bãnd sẽn wilgd tɩ yaa yẽ la b sẽn da kãab Gʋlsg Sõamyã pʋgẽ tɩ Wẽnnaam na n yãk-a lame t’a yɩ Rĩma. B ka paam ye. La a Zezi karen-biisã paam n yãa a Zezi tedgrã, tɩ wilgdẽ tɩ Rĩungã bãngr-goam yaa sɩda. Rẽ n so t’a Pɩɛɛr gʋls kaoosg zugẽ woto: “Woto yĩnga, tõnd tara bãngr-goamã b sẽn maan tɩ yaa sɩd n yɩɩda.”—NW. Matɩe 16:13, Matɩe 16:28 Matɩe 17:13; Mark 9:1-13; Luk 9:27-37; 2 Pɩɛɛr 1:16-19.

▪ Wãn to la neb kẽer yã Kirist sẽn wat ne a naam tɩ b nan pa ki?

▪ Yãabã pʋgẽ, a Moiiz ne a Eli ra gomda ne a Zezi bõe yelle?

▪ Bõe yĩng tɩ yãab kãngã keng karen-biisã raood hal wʋsgo?