Sak 68
A leb n zãmsa neb rasem a yopoe raarã
RA KET n yaa Zãn Kibsã rasem a yopoe raare, a yaoolem daarã. A Zezi ra zãmsda neba wẽnd-doogã zĩig ning b sẽn boond tɩ “ligda ningr zĩigẽ” wã pʋgẽ. Wõnda yaa Pagbã Samandẽ, zĩig ning kogend sẽn be tɩ neb tõe n ning b kũunã.
Kibsã wakate, yʋng fãa vẽenem sẽn yaa kãseng n yãgd wẽnd-doogã zĩ-kãnga. Fɩtl dogends bɛd a naas la b tilg be, tɩ fɩtl fãa tar tʋg-bɛd a naas sẽn pid ne kaam. Kaamã sẽn be tʋgd 16 pʋsẽ wã n yõogd tɩ fɩtl kãens bugmã kõt vẽenem sõma. Vẽenem kãng ra yaa kãseng wʋsg hal tɩ sek a na vẽneg vɩʋʋgã n zãag zĩig yʋngo. A Zezi sẽn yet bũmb ning masã wã segd n tẽega a kɛlgdbã vẽenem kãng yelle. A Zezi mooname: “Mam yaa dũniyã vẽenem. Ned ninga sẽn tũud maam, a kõn kẽn lik pʋgẽ ye, la a na paam vɩɩm vẽenem.”
Fariziẽ rãmbã kɩɩsame n yeele: “Yãmb kɩta y meng kaseto. Yãmb kaset ka sɩd ye.”
A Zezi leokame: “Baa mam sã n kɩt m meng kaseto, mam kaseta ket n yaa sɩda, tɩ bõe, mam mii mam sẽn yi zĩig ninga la mam sẽn dabd zĩig ninga. La yãmb ka mi mam sẽn yi zĩig ninga la mam sẽn dabd zĩig ninga ye.” A paasame: “Mam kɩta m meng kaseto, la m Ba sẽn tʋm-a maama me kɩta mam kaseto.”
“Yãmb Ba bee yɛ?” woto la Fariziẽ rãmbã sok-yã.
T’a Zezi leoke: “Yãmb ka mi maam wala m Ba me ye. Yãmb sã n da bãng maam, yãmb da na n bãnga m Ba me.” Baa ne Fariziẽ rãmbã sẽn ket n dat tɩ b yõk a Zezi wã, ned ba a yembr ka sɩɩs-a ye.
“Mam na n loogame,” a Zezi sẽn leb n yeele. “Mam sẽn dabd zĩig ninga, yãmb ka tõe n kẽng be ye.”
Dẽ, Zʋɩf rãmbã sɩngame n sokd b mens yaa: “B na n kʋʋ b meng bɩ? B sẽn yeel tɩ: Mam sẽn dabd zĩig ninga yãmb ka tõe n kẽng be” wã.
A Zezi wilgame: “Yãmb yii tẽnga, la mam yii yĩngri. Yãmb yaa dũni kãngã rẽnda, la mam ka dũni kãngã rẽnd ye.” La a paase: “Yãmb sã n ka tẽ tɩ mam yaa bãmba, yãmb na ki y yel-wẽna pʋga.”
Yaa vẽeneg t’a Zezi ra gomda sẽn deng t’a yɩ ninsaalã, la a sẽn yaa Mesi bɩ Kiristã b sẽn kãabã yelle. Baasg zãnga, b soka ne paoogr wʋsg woto: “Yãmb yaa yɛ neda?”
B sẽn pa tẽed-a wã, a Zezi leokame: “Bõe yĩng tɩ mam pʋd n gomd ne yãmb menga?” (NW ) Baasg zãngã, a leb n yeelame: “Sẽn tʋm-a maama yaa sɩd soaba. La bũmb nins mam sẽn wʋm bãmb nengẽ wã, mam togsda dũniyã rãmba.” A Zezi paasame: “Wakat ninga yãmb sẽn na n wa zẽk Ninsaal Biigã, yãmb na bãng tɩ mam yaa bãmba, la tɩ mam ka maand bũmb ne m meng pãng ye. La yaa m Ba sẽn zãms maam bũmb ninga bal la m gomda. Sẽn tʋm-a maama bee ne maam. Bãmb ka bas maam m yembr ye, tɩ bõe, mam sẽn maand bũmb ninsa tata bãmb yam daar fãa.”
A Zezi sẽn togs bõn-kãensã, neb wʋsg tẽ-a lame. A yeela nin-kãens woto: “Yãmb sã n tall mam goama, yãmb yaa mam karen-biis hakɩka. Yãmb na bãng sɩda, la sɩda na kõ yãmb lohorem [“paam-m-menga,” NW ].”
Rẽ la a kɩɩsdbã kẽ goamẽ wã n yeele: “Tõnd ya a Abrahaam yagense, la tõnd ka ned yembs abada ye. Yaa wãn tɩ yãmb yeel tɩ: Yãmb na paam lohorem?”
Naoor wʋsgo tẽn-zẽms n soog Zʋɩf rãmbã. Baa ne rẽ, b zɩ n sak tɩ wɛoogd ba a yembr yaa b zu-soab ye. B zãgsame tɩ b kõn bool-b tɩ yembs ye. La a Zezi wilgame tɩ b sɩd yaa yembse. Wãn-wãn to? A Zezi yeelame: “Mam yeta yãmb sɩd-sɩda tɩ ned ninga fãa sẽn maand yel-wẽna, a yaa yel-wẽna yamba.”
Zʋɩf rãmbã sẽn ka sak tɩ b yaa yel-wẽnd yembsã b kẽesa b mens yell pʋgẽ. A Zezi wilgame: “La yamb ka paad yir daar fãa ye, la zaka soab biig paada be daar fãa.” Yamb ka tar sor n tõe n paam rogem-pʋɩɩr zakã pʋgẽ ye. Rẽ kɩtame tɩ wakat fãa bɩ b tõe n dig-a n yiisi. Yaa zakã biiga, bɩ ned zakã rãmb sẽn deeg wa b meng biig bal n paad be “daar fãa,” sẽn dat n yeel t’a yõor tɛka.
A Zezi paasame: “Woto yĩnga, Biriblã sã n kɩt tɩ yãmb paam y mense, yãmb sɩd na n paama y mense.” (NW ) Dẽ, sɩd ning sẽn kõt neba paam-m-mengã yaa sɩd ning sẽn tɩ loe ne Biriblã, sẽn ya a Zezi Kiristã. Yaa ne a ninsaal vɩɩm sẽn zems zãngã maoong maasem bal la ned tõe n paam a meng ne yel-wẽnã sẽn wat ne kũumã. Zã 8:12-36.
▪ Yɛ la a Zezi zãms neba rasem a yopoe raarã? Bõe n maand be yʋng-yʋngo, la wãn-wãn la rẽ tar loees ne a Zezi zãmsgã?
▪ A Zezi yeelame t’a yita yɛ, la vẽnegr bʋg la rẽ kõt a Zezi sẽn ya a soabã wɛɛngẽ?
▪ Wãn-wãn la Zʋɩf rãmbã yaa yembse, la yaa sɩd bʋg n tõe n kõ-b paam-m-menga?