Sak 81

B le makame n na n kʋ a Zezi

SẼN da yaa waood wẽndã, a Zezi ra kẽnda zĩig ning sẽn yɛgd wẽnd-doogã b sẽn boond t’a Salomo zãongã. Beenẽ, Zʋɩf rãmb gũbg-a lame n sɩng n yetẽ: “Yãmb na n kɩtame tɩ tõnd sãmb n ta dabʋre? Yãmb sã n yaa Kirist, bɩ y togs tõnd vẽenega.”

T’a Zezi leoke: “Mam togsa yãmba, la yãmb ka reeg ye.” A Zezi ra zɩ n togs-b vẽeneg tɩ yẽ la Kiristã, wa a sẽn da togs Samari poakã bulgẽ wã ye. Baasgo, a ra zoe n togs-b-la a sẽn yaa ned ninga, a sẽn da wilg-b t’a yita yĩngri, la tɩ sẽn deng t’a Abrahaam wa a ra beeme wã.

La a Zezi ra ratame tɩ neba bãng b toor tɩ yẽ la Kiristã, n mak a tʋʋmã ne bũmb nins Biiblã sẽn da reng n togs tɩ Kiristã na n pidsame wã. Yaa rẽ yĩng la a Zezi sẽn da zoe n yeel a karen-biisã tɩ b ra togs ned ba a yembr tɩ yẽ la Kiristã. Leb n yaa rẽ me yĩng la a sẽn da yeel Zʋɩf kãensã sẽn tugd beem ne-a wã woto masã wã: “Tʋʋm nins mam sẽn maand ne m Ba yʋʋra kɩta mam kaseto, la yãmb ka reeg ye.”

Bõe yĩng tɩ b ka reege? Yaa kaset sẽn da ka be n wilgdẽ t’a Zezi la Kiristã yĩng bɩ? Ayo, la wa a Zezi sẽn yeel-bã, yaa woto yĩnga: “Yãmb sẽn ka be mam piisa sʋka yĩnga. Mam piisa wʋmda mam koɛɛga. Mam mii bãmba, la bãmb tũuda maam. Mam kõta bãmb vɩɩm sẽn ka sɛta, la bãmb kõn sãam abada. La ned ka tõe n deeg bãmb mam nugẽ ye. M Ba sẽn kõ maam bãmbã, b yɩɩda bũmb fãa. La ned ka tõe n deeg bãmb m Ba nugẽ ye.”

Rẽ poore a Zezi wilgame tɩ zems-n-taar n be yẽ ne a Ba wã sʋk sõma, n yeele: “Maam ne m Ba yaa yembre.” Sẽn mik t’a Zezi ra bee tẽng zug t’a Ba wã be saasẽ wã, yaa vẽeneg t’a ra ka rat n yeel ka tɩ yẽ ne a Ba wã sɩd lagem n fãooga tãab yĩn-yɛng pʋgẽ ye. La a ra rat n wilgame bal tɩ b raabã yaa yembre, bɩ tɩ b tara zems-n-taare.

A Zezi goamã yika Zʋɩf rãmbã sũyã, tɩ b wʋk kug n na n lob-a n kʋ, wa b sẽn da tʋlg n maan Zãn Kibsẽ wã. Ne raoodo a Zezi yeela neb nins sẽn da rat n kʋ-a wã: “Mam wilga yãmb tʋʋm sõama wʋsg sẽn yit m Ba nengẽ. Tʋʋm-kãens sʋka, tʋʋm-bʋg yĩng la yãmb lobd maam ne kuga?”

Tɩ b leoke: “Tõnd ka lobd yãmb ne kug tʋʋm sõng yĩng ye, yaa tʋʋsga yĩnga, yãmb sẽn yaa ninsaala n maand y meng tɩ yɩ wa Wẽnnaama yĩnga.” A Zezi zɩ n yeel t’a yaa Wẽnnaam ye. La bõe yĩng masã tɩ Zʋɩf rãmbã ra yet woto?

Vẽenega ya a Zezi sẽn da yet t’a tara tõod bãmb sẽn tẽed tɩ yaa Wẽnnaam bal n segd n tallã yĩnga. Wala makre, sẽn pa kaoose, a Zezi ra yeela “piisa” wɛɛngẽ tɩ: “Mam kõta bãmb vɩɩm sẽn ka sɛta.” Woto yaa bũmb ninsaal sẽn ka tõe n maan ye. La Zʋɩf rãmbã yĩmame t’a Zezi ra sak n deegame tɩ ya a Ba wã n kõ-a tõogã.

A Zezi wilgame t’a ka ta Wẽnnaam ye, bala rẽ poore, a sokame: “B ka gʋls yãmb Tõogã pʋgẽ [Yɩɩll Sõamyã 82:6], ‘Mam yeelame: “Yãmb yaa wẽnnaam dãmba” ’? A sã n bool tɩ ‘wẽnnaam dãmb’ b rãmb nins Wẽnnaam Gomdã sẽn wa n na n kɩɩsã, . . . yãmb yeta maam Ba wã sẽn sõms la a tʋm dũniyã pʋgẽ wã tɩ, ‘Fo tʋʋsdame,’ mam sẽn yeel tɩ mam yaa Wẽnnaam Biriblã yĩng bɩ?”—NW.

Sẽn mik tɩ Gʋlsg Sõamyã boola bʋ-kaoodb sẽn yaa ninsaalb sẽn ka tɩrs tɩ ‘wẽnnaam dãmbã,’ bõe taal la Zʋɩf kãensã ra tõe n ning a Zezi a sẽn yeel tɩ “mam yaa Wẽnnaam Biriblã”? A Zezi paasame: “Mam sã n ka maand m Ba tʋʋma, bɩ y ra tẽ maam ye. La mam sã n maand-ba, baa yãmb sã n ka tẽed maam, tẽ-y tʋʋmã, sẽn na yɩl tɩ y tõog n wa bãng la y ket n bãngdẽ tɩ Ba wã bee zems-n-taar pʋgẽ ne maam tɩ mam be zems-n-taar pʋgẽ ne Ba wã.”—NW.

A Zezi sẽn yeel dẽ, Zʋɩf rãmbã le makame n na n yõk-a. La wa a Zezi sẽn da maan Zãn Kibsẽ wã pĩndã, a zoeeme n põse. A yii Zerizalɛm n kẽng Zʋrdẽ Kʋɩlgã rʋʋnde, zĩig ning a Zã sẽn da lisd neb yʋʋm a naas la woto wã. Yaa wala zĩ-kãng ra ka zãr ne Galile Mogrã goabg rʋʋnd ye, sẽn da zems rasem a yiib kẽnd ne Zerizalɛmã.

Neb wʋsg waa a Zezi nengẽ zĩ-kãnga, n sɩng n yetẽ: “A Zã ka maan bõn-bãnd ba a yembr ye, la a Zã sẽn da gom dao kãngã yell ne bũmb ninga fãa yaa sɩda.” Dẽ, neb wʋsg n tẽ a Zezi beenẽ. Zã 10:22-42; 4:26; 8:23, 58; Matɩe 16:20.

▪ Wãn-wãn la a Zezi ra rat tɩ b bãng tɩ yẽ la Kiristã?

▪ Wãn to la a Zezi ne a Ba wã ra yaa yembre?

▪ Bõe yĩng tɩ Zʋɩf rãmbã ra yetẽ t’a Zezi ra maanda a meng wa wẽnnaam?

▪ Wãn-wãn la Yɩɩl Sõamyã goam nins a Zezi sẽn togsã wilgd t’a ra ka yet tɩ yẽ zema Wẽnnaam?