Sak 78

Segl-y y mense!

A ZEZI keooga kʋʋngã tɩ b ra yɩ rat-tɩ-loog rãmba, la a yeel a karen-biisã tɩ b gũus n da maan yɩɩr tɩ loog laogã wɛɛngẽ ye. Rẽ poore a kenga b pels woto: “[Bãg-bila], ra zoe-y rabeem ye, tɩ bõe, yãmb Ba sũur yaa noog tɩ b kõt yãmb b [Rĩungã].” Woto a ra wilgdame tɩ neb sõor sẽn paood bala, (tɩ b wa bãng kaoosg zugẽ tɩ yaa neb 144 000) n na n paam saasẽ Rĩungã. Bãmb sẽn yãk b toogo, neb nins sẽn na n paam vɩɩm sẽn-kõn-sa wã na n yɩɩ Rĩungã nin-buiid sẽn na n vɩɩmd tẽng zugu.

Ad Rĩungã yaa kũun sẽn tar dasãnd tɛkẽ! A Zezi bilga a karen-biisã sẽn segd n deeg Rĩungã to-to tɩ zemse, n yeele: “Bɩ y koos y sẽn tarã n kõ nimbãan dãmba.” N-ye, b segd n kɩtame tɩ b paoongã naf neb a taabã tẽebã wɛɛngẽ, tɩ ne woto bɩ b tõog n paam “paoong sẽn ka menemd” saasẽ.

Rẽ poore a Zezi sagla a karen-biisã tɩ b segl a lebgrã yĩnga. A yeelame: “Bɩ yãmb sẽb y sẽbdse la y tugl y fɩtl dãmba n yɩ wa neb sẽn gũud b zu-soaba t’a yi yi-kãadem kibs n wa wẽ kʋɩleng tɩ b pak n kõ-a t’a kẽ. Bark bee tʋm-tʋmdb kãens zutu b zu-soaba sẽn na n wa mik tɩ bãmb gũudame. Mam yeta yãmb sɩda tɩ b zu-soaba na n sẽba a sẽbdga n yeel bãmb tɩ b zĩnd n dɩ, yẽ na n talla rɩɩb n wa n kõ bãmba.”

Mak kãngã pʋgẽ, sõgen dãmbã manesem wilgame tɩ b zu-soabã lebgame n wa mik tɩ b segla b mens n gũud-a. B wilga rẽ ne b sẽn kolem b fu-wogdã n sẽb b seesẽ ne b sẽbdse, la b kell n tʋm b tʋʋmã n tɩ tãag yʋngo, ne fɩtl dãmb vẽenemã. A Zezi wilgame: ‘B na paam sũ-noogo, sã n mik tɩ b zu-soaba wa gũub wakat a yiib soaba pʋgẽ [yʋng wakat a wɛ n ta yʋʋn-sʋka], baa gũub wakat a tãab soabã pʋgẽ [yʋʋn-sʋk tɛk n ta yibeoog wakat a tãabo], n mik tɩ b segl n sa!’—NW.

Zusoabã keoa a karen-biisã ne manesem sẽn ling-ba. A kɩtame tɩ b zĩnd taablẽ wã t’a na n kõ b rɩɩbo. A ra ka maand wala b yaa yembs ye, la yaa wala zo-rãmb hakɩka. Ad yaa keoor sẽn yaa sõma meng la b paam-yã, b sẽn kell n maan b zu-soabã tʋʋmd yʋngã tõr n gũud a waoongã! A Zezi yeela woto n baase: ‘La yãmb me, bɩ y segle, tɩ bõe, Ninsaal Biiga wata wakat ninga yãmb sẽn ka tẽeda.’

A Pɩɛɛr soka woto masã: “Zusoaba, yaa tõnd bal la yãmb wẽed yel-bũn-kãng bɩ, bɩ yaa neba fãa?”

A Zezi pa leok-a vẽeneg ye, a rɩka makr a to. A sokame: “Dẽ, ãnda n yaa tʋm-tʋmd sẽn tũud sɩda la sẽn tar yam, t’a zu-soaba kõ a noore t’a ges a zaka yelle n moeneg a zaka wa sẽn zemse? Bark bee tʋm-tʋm-kãng zugu, a zu-soaba sẽn na n wa mik t’a maanda woto. Mam yeta yãmb sɩda t’a zu-soaba na n kõo yẽ noore t’a ges a [paoonga] fãa yelle.”

Yaa vẽeneg tɩ “zu-soaba” ya a Zezi Kirist. Ka wã ‘tʋm-tʋmdã’ makda karen-biis nins b sẽn boond tɩ ‘bãg-bilã,’ fãa sẽn naag taaba. La “zaka” me leb n bilgda sul-kãng neba, sẽn yaa neb 144 000 sẽn paamd Rĩungã. La gom-kãngã sẽn tadgd bũmb ning zugã yaa tʋʋmdã bãmb yembr-yembr sẽn maandã. ‘Paoongã’ b sẽn yãk tʋm-tʋmd sẽn tũud sɩdã t’a gesã yaa zu-soabã paoong sẽn be tẽng zugã, wala Rĩungã tẽng zug nin-buiidu.

A Zezi kẽnga taoor ne a makrã n wilg tɩ tõeeme tɩ ka yɩ tʋm-tʋmdã sull neb fãa n na n yɩ sakdb ye. A yeelame: “La tʋm-tʋmd kãng sã n yeel a sũur pʋgẽ: Mam zu-soaba kaoosda waoongo, n sɩng n pãb tʋm-tʋmd doapã ne tʋm-tʋmd-pogsã n dɩ la a yũ rãam t’a neng yilimdẽ, tʋm-tʋm[d] kãng zu-soab na n waa daar ninga a sẽn ka gũud-a . . . , la a na n sɩbga yẽnda.”

A Zezi wilgame tɩ yẽ waoongã kɩtame tɩ yɛlã wɩng Zʋɩf rãmbã sʋka. Bala bãmb kẽer saka a zãmsgã tɩ pɛdb zãgs-a. A Zezi sẽn deeg lisg yɩɩda yʋʋm a tãab woto. La masã a lisgã kũum pʋgẽ wã kolgda saabo, la wala a sẽn yeelã: “Yaa toog ne maam hal t’a maan n sɛ.”

A Zezi sẽn yeel a karen-biisã woto n sa, a leb n goma ne kʋʋngã. A wilga a sũ-sãanga, b sẽn tõdg tɩ b kõn sak kaset vẽeneg ning sẽn wilgd yẽ sẽn yaa ned ningã, la kaset kãng võorã. A yeelame: “Yãmb sã n yã sawadg sẽn yik taoore, yãmb yeta tao-tao bal tɩ saag watame, la a yɩta woto. La yãmb sã n yã tɩ sobg yit goabga, yãmb yetame tɩ zĩiga na n yɩɩ tʋʋlga, la a yɩta woto. Zãmb dãmba, yaa bõe tɩ yãmb mi yĩngri ne tẽng yɛla n yaool n ka mi wakat sẽn be masã yelle?” Luk 12:32-59.

▪ “Bãg-bilã” neb sõor yaa b wãna, la bõe la b paamda?

▪ Wãn to la a Zezi wilg vẽeneg t’a sõgen dãmbã segd n segla b mense?

▪ A Zezi makrã pʋgẽ, ãnda bɩ bõe la “zu-soabã,” “tʋm-tʋmdã,” ‘zakã,’ la ‘paoongã’ makda?