Tall-y yam, n beool beoogo

A Zeezi wẽe yel-bũnd n gom biig sẽn menem yelle, sẽn na yɩl tɩ yaood deegdbã ne tõog karen-saam-dãmbã la Fariizẽ-rãmbã bãng tɩ ned sã n tek yam, Wẽnnaam kõt-a-la sugri. (Luk 15:1-7, 11) Masã, a gomda ne a karen-biisã. A rɩka makre, n gom arzɛk soab a ye yelle, sẽn wʋm t’a tʋʋmã taoor soab pa maand sɩd ne-a ye.

A Zeezi yeelame tɩ b togsa arzɛk soabã t’a tʋʋmã taoor soab sãamda a paoongã. A boola tʋʋmã taoor soab n yeel-a t’a na n bas-a-la tʋʋma. La tʋʋmã taoor soab yeela a meng woto: “Mam zu-soabã sẽn dat n yiis maam tʋʋmdẽ wã, mam na n maana bõe? Koobo? Mam ka tar pãng n na n ko ye, la bõsg yaa yãnd ne maam.” A wa n baas n yeelame: “Mam mii m sẽn na n maanega, tɩ b sã n wa n yiis maam m tʋʋmdẽ wã, bɩ neb deeg maam b yiyã.” Tao-tao bal t’a boola neb nins sẽn tar a zu-soabã samdã, n sok ned fãa woto: “Fo tara mam zu-soaba samd wãna?”—Luk 16:3-5.

Pipi soabã leokame: “Kaam rʋg-bɛd koabga [sẽn zems litr 2200].” Tõe tɩ nin-kãng ra tara oliiv tiis pʋʋgo, bɩ a ra koosda kaam. La tʋʋmã taoor soab yeel-a lame t’a “reeg a sebrã n zĩnd tao-tao n gʋls tɩ pis-nu [sẽn zems litr 1100].”—Luk 16:6.

Tʋʋmã taoor soab soka a to yaa: “La fo yẽ samdã yaa wãna?” A leokame tɩ “kood yond kobs-nu.” A yeel-a lame t’a “reeg a sebrã n gʋls tɩ kobs-naase.” A booga rao-kãng me samdã wʋsgo.—Luk 16:7.

Sẽn mik tɩ yaa yẽ n ket n get a zu-soabã ligd yellã, a tara sor n boog samã nebã sẽn da segd n yao a zu-soabã. Tʋʋmã taoor soab sẽn boog nebã samã, a paama zo-rãmb sẽn tõe n sõng-a, a zu-soabã sã n wa rig-a tʋʋma.

Zu-soabã wa n wʋma a tʋʋmã taoor soab sẽn maanã. Yaa sɩd tɩ tʋʋmã taoor soab “sẽn ka tɩrgã” sẽn maanã booga a zu-soabã paoongã. Baasgo, a zu-soabã pẽg-a lame, a sẽn “maan yamã” yĩnga. A Zeezi paasa woto: “Dũni-kãnga neb maanda yam ne taaba, n yɩɩd vẽenem kambã.”—Luk 16:8.

A Zeezi pa rat n yeel tɩ tʋʋmã taoor soab sẽn maanã yaa sõma ye. A pa rat me n wilg tɩ ned sã n tʋm pʋ-lik tʋʋmã pa wẽng ye. Bõe la a ra rat t’a karen-biisã bãnge? A yeel-b lame: “Mam yeta yãmb tɩ y rɩk dũni paoongã n bao zo-rãmba, tɩ paoongã sã n wa n sɛ n bas yãmba, bɩ Wẽnnaam reeg yãmb yiy sẽn paad wakat sẽn kõn sa wã pʋgẽ.” (Luk 16:9) Sɩd me, kiris-nebã segd n talla yam, la b yɩ neb sẽn tagsd beoog yelle. Wẽnnaam nin-buiidã sẽn yaa “vẽenem kambã” segd n talla yam, n dɩk b paoongã n maan bũmb nins sẽn na n sõng-b tɩ b ket n tagsd vɩɩm sẽn ka sɛtã yelle.

Yaa Wẽnnaam a Zeova ne a Biigã bal n tõe n kõ ned sor t’a kẽ saasẽ soolmã pʋgẽ, bɩ n paam n vɩɩmd arzãnã pʋgẽ tẽngã zugu. Rẽ n so tɩ d segd n modg n bao b zoodo. Yaa d sã n dɩk d paoongã n teel Rĩungã tʋʋm la d tõe n paam b zoodo. Woto, baa d sã n wa pa le tar sãnem bɩ wanzur wall bũmb a taab me sẽn yaa arzɛka, d kɩsa sɩd tɩ d na n paama vɩɩm sẽn kõn sa.

A Zeezi yeelame me tɩ ned sã n get a paoong yell sõma la a maand pʋ-peelem, b sã n bobl-a tʋʋm sẽn tar yõod wʋsgo, a na n tʋma sõma la ne pʋ-peelem. A yeela woto: “Yãmb sã n ka maan sɩd ne dũniyã arzegse, ãndã n na n dɩk paoong sɩd-sɩd [wa Wẽnnaam Rĩungã tʋʋma] n gũnug yãmba?”—Luk 16:11.

A Zeezi ra ratame t’a karen-biisã bãng tɩ b sã n dat n paam tɩ ‘Wẽnnaam reeg bãmb yiy sẽn paad wakat sẽn kõn sa wã pʋgẽ,’ tʋʋm nins b sẽn na n bobl-bã me na n yɩɩ wʋsgo. Ned ka tõe n tũud Wẽnnaam ne a sũur fãa, la a le pʋgd dũniyã arzɛgs ye. A Zeezi baasa a gomdã n yeel woto: “Tʋmtʋmd baa a ye ka be n tõe n sak zu-soben-dãmb a yiib ye. Bala, yẽnda na n kisga a yembr la a nong a to wã, wall a waoog a yembr la a paoog a to wã. Yãmb ka tõe n sak Wẽnnaam la ligd me ye.”—Luk 16:9, 13.