Sak 87
Segl-y y beoog-daarã ne yam
A ZEZI ra nan togsa kʋʋngã biribl sẽn yaa laog-sãamdã kɩbare. A Zezi karen-biisã, yõor yaood dɛɛgdb la yel-wẽn bɛd maandb a taaba, n paas gʋlsdb la Fariziẽ rãmb n da be kʋʋn-kãng sʋka. Masã, a Zezi goma ne a karen-biisã, n togs-b kɩbar sẽn tɩ loe ne rakãagr b sẽn togs t’a tʋm-tʋmd sẽn ya a zak yel-gɛt ka maand a tʋʋmdã sõma ye.
A Zezi wilgame tɩ rakãagrã boola a zak yel-gɛtã n yeel-a t’a na n yiis-a-la tʋʋma. “M zu-soaba sẽn dat n yiis maam tʋʋmdã, m na n maana bõe?” woto la zak yel-gɛtã sok a menga. “Koob bɩ? Mam ka tõe n ko ye. Bõosg bɩ? Bõosg yaa yãnd ne maam. Mam mii m sẽn na n maan bũmb ninga, tɩ b sã n yiis maam tʋʋmdẽ wã bɩ neba reeg maam b yiya.”
Bõe la zak yel-gɛtã geend n na n maan masã? A boola neb nins sẽn da tar a zu-soabã samdã, n soke: “Fo samd yaa wãna?”
Tɩ pipi soabã leok tɩ ‘kaam rʋg bɛd koabga.’
T’a yeel-a: ‘Deeg fo sebrã n zĩnd tao-tao n gʋls pis-nu.’
A soka ned a to wã: ‘Masã foom, fo samd yaa wãna?’
T’a leok tɩ ‘ki peoog koabga.’
‘Deeg fo sebra n gʋls pis-nii.’
Yaa zak yel-gɛtã n da ket n get zu-soabã ligd yelle, dẽ a tara sor n tõe n boog sama nebã sẽn da segd n yao a zu-soabã. A sẽn boog neba sama, a baoo zo-rãmb sẽn tõe n wa maan-a yel-sõmd n lebse, b sã n wa rig-a n yiis tʋʋmdẽ wã poore.
Zu-soabã sẽn wʋm yellã yɩ-a-la noog hal t’a ‘pẽg tʋm-tʋmd ninga sẽn ka tɩrgã a sẽn maan yama yĩnga.’ A Zezi sɩd paasame: “Dũni kãngã kamba maanda yam ne taaba n yɩɩd vẽenem kamba.”
Masã, a Zezi wilga a karen-biisã kɩbarã yõodo, n sagl-b woto: “La mam yeta yãmba tɩ y rɩk dũniyã paoongo n bao zo-rãmb sẽn be yĩngri, tɩ yãmb arzɛgsã sã n wa n sɛ, Wẽnnaam na reeg yãmb zĩis nins sẽn paad wakat sẽn ka sɛtã.”
A Zezi ka pẽg zak yel-gɛtã a tʋʋm wẽngã yĩng ye, la ya a sẽn yaa bɛoondã, a sẽn maan yama yĩnga. Naoor wʋsgo, ne sɩlem, ‘dũni kãngã kamb’ tũnugda ne b ligdã bɩ ne b naam n maandẽ tɩ neb nins sẽn tõe n wa maan-b yel-sõmd n lebsã yɩ b zo-rãmba. Dẽ, Wẽnnaam sõgen dãmbã sẽn yaa “vẽenem kamba” me segd n dɩka b laogã, sẽn yaa b ‘dũniyã paoongã’ n tʋm ne yam tɩ naf-ba.
La wa a Zezi sẽn yeelã, b segd n dɩka b arzɛg-kãens n maan tɩ neb nins sẽn tõe n deeg-b ‘zĩis nins sẽn paad wakat sẽn ka sɛt’ pʋsẽ wã yɩ b zo-rãmba. Ne bãg-bilã neba, zĩ-kãens yaa saasẽ, la ne ‘piis a taabã’ yaa Arzãna pʋgẽ tẽng zugu. Yaa Wẽnnaam a Zeova la a Biriblã n tõe n deeg neb zĩ-kãense. Sẽn mik tɩ yaa woto wã, d segd n modga sõmb-sõmb n tũnug ne ‘dũniyã paoong’ d sẽn tar fãa n maan tɩ b yɩ d zo-rãmba, n dɩk arzɛg-kãens n sõng ne Rĩungã tʋʋma. Dẽ, arzɛg-kãens sã n wa paoog bɩ b wa sa, la b sɩd na sa me, bɩ mik tɩ beoog-daar vɩɩm sẽn-kõn-sa wã lebga waazib ne-do.
A Zezi kell n paasame tɩ neb nins sẽn maand sɩd ne bũmb bilfã, sẽn dat n yeel tɩ arzɛg-kãensã zãabo, na n maana sɩd ne bũmb nins sẽn tar yõod n yɩɩd zãab me. A paasame: “Dẽ yĩnga, yãmb sã n ka maan sɩd ne dũniyã arzɛgse, ãnda n na n ning arzɛgs sɩd-sɩda yãmb nugẽ [sẽn dat n yeel tɩ tẽebã bɩ Rĩungã yɛla]? La yãmb sã n ka maan sɩd ne ned a to rẽnda [Rĩungã yɛl Wẽnnaam sẽn bobl a sõgen dãmbã], ãnda n na n kõ yãmb y meng rẽnda [keoorã sẽn yaa vɩɩma zĩis nins sẽn paad wakat sẽn ka sɛtã]?”
Tõnd ka tõe n yaa Wẽnnaam sõgen dãmb hakɩk la d leb n yaa dũniyã arzɛgs yembs ye. Sɩd me a Zezi yeelame: “Tʋm-tʋmd ka be sẽn tõe n sak zu-soben dãmb a yiib ye. A na kɩɩs a yembre la [a] nong a to, walla a na waoog a yembre la a paoog a to. Yãmb ka tõe n sak Wẽnnaam la arzɛgs yiib fãa ye.” Luk 15:1, 2; 16:1-13; Zã 10:16.
▪ Wãn to la zak yel-gɛtã yell b sẽn gom a Zezi makrã pʋgẽ wã bao zood ne b rãmb nins sẽn tõe n wa sõng-a nindaarã?
▪ ‘Dũniyã paoong’ yaa bõe, la wãn to-to la d tõe n tũnug ne-b n maan zo-rãmba?
▪ Ãnd rãmb n tõe n deeg tõnd “zĩis nins sẽn paad wakat sẽn ka sɛtã” pʋsẽ, la zĩ-kãens yaa bõe?