Sak 82

A Zezi leb n teesda Zerizalɛm

PA KAOOS la a Zezi leb n dɩk sor yɛsa, n zãmsd nebã tẽng-tẽnga. Yaa vẽeneg t’a ra bee Peere babgã, tɩ f sã n be Zide bɩ yaa Zʋrdẽ Kʋɩlgã rʋʋnde. La a ra rabda Zerizalɛm.

Zʋɩf rãmbã ra tara zãmsg sẽn yet tɩ neb sõor bilf bal n zems ne fãagre. Tõe tɩ yaa rẽ n kɩt tɩ rao a yembr soke: “Zusoaba, yaa neb bilf bal n na n paam fãagr bɩ?” A Zezi leokrã pʋgẽ, a kɩtame tɩ neba tags n bãng bũmb ning b sẽn segd n maan n paam fãagrã: “Bɩ y mao [sẽn dat n yeel tɩ, nang pãnga, bɩ modg wʋsg] n kẽ zak noor sẽn yaa sẽka.”

B segd n maana modgr wʋsg tao-tao, bala a Zezi leb n yeelame “tɩ neb wʋsg na n maoome n dat n kẽ, la bãmb ka na n tõog ye.” Bõe yĩng tɩ b ka na n tõoge? A wilgame tɩ ‘yira soab sã n wa yik n pag kʋɩlengã tɩ neb ket yɩnga, n sɩng n wẽed kʋɩlengã n yetẽ: Zusoaba, Zusoaba, pak-y tɩ d kẽ, a na n leoka bãmba: Mam ka mi yãmb sẽn yi zĩig ninga ye. Loog n bas-y maam, yãmb fãa yaa tʋʋm-wẽns maandba!’

Wõnda b rãmb nins b sẽn pag n bas yɩngã waa wakat ning sẽn zems ne bãmb mens raabã bala. La wakat kãnga b na n mikame tɩ sor ning bãmb sẽn da tar n tõe n kẽ wã pagame. B sã n da rat n kẽẽ b ra segd n deng n waẽ-la pĩnda, baa wakatã sã n da ka zemsẽ ne bãmb raabã. Sɩda, baas wẽng n gũud neb nins sẽn ka rɩkd a Zeova balengã n lʋɩɩs taoor b vɩɩmã pʋgẽ, n viigd-a n ningd nindaarã!

Zʋɩf rãmb nins nengẽ b sẽn tʋm a Zezi t’a tɩ moonã, wʋsg ka sak zu-no-kãseng ning Wẽnnaam sẽn kõ-b sẽn na yɩl tɩ b paam fãagrã ye. Dẽ a Zezi yeelame tɩ b na n lob-b-la yɩng tɩ lebg wiisg la yẽn wãbre. Yaa neb sẽn yit “goabg la rɩtg la poorẽ la taoore,” n na n zĩnd Wẽnnaam Rĩungã pʋgẽ.

A Zezi paasame: “Poorẽ dãmb [sẽn pa-b Zʋɩf rãmb b sẽn pa nandã, la Zʋɩf rãmb nins b sẽn namsdã me] bee be n na n lebg taoor dãmba, la taoor dãmb [Zʋɩf rãmb nins sẽn tar arzɛgs la b be taoor tũudmã wɛɛngẽ wã] bee be n na n lebg poorẽ dãmba.” Nin-kãensã sẽn na n zĩnd poorẽ wã rat n yeelame tɩ bãmb sẽn yaa kʋɩɩmba, la b ka tar mi-beoogã ka na n kẽ Wẽnnaam Rĩungã pʋgẽ abada.

Masã Fariziẽ rãmbã waa a Zezi nengẽ n yeel-a: “Yi ka n looge, tɩ bõe, Herood [Ãntipas] dat n kʋʋ yãmba.” Tõeeme tɩ ya a Herood mengã n sɩng kɩbarã sẽn na yɩl n kɩt t’a Zezi zoe n yi b zãmaanã. Tõeeme t’a Herood ra yɛɛsda a na wa kẽes a meng Wẽnnaam no-rɛɛs a to kʋʋb pʋgẽ, wala a sẽn da maan to-to lisd a Zã kʋʋbẽ wã. La a Zezi yeela Fariziẽ rãmbã: “Kẽng n tɩ yeel-y waag kãng yaa: Gese, mam digda zĩn dãmba la m maagda bãas rũnda ne beoogo, la rasem a tãab daare, mam na [n] maaname n baase.”

A Zezi sã n da baas a tʋʋmdã be, a na n kẽnga Zerizalɛm, bala wa a sẽn da wilgã, “b ka tõe n kʋ Wẽnnaam no-rɛɛs kɛɛnga, tɩ ka Zerizalɛm ye.” Bõe yĩng tɩ b ra segd n tẽ t’a Zezi kʋʋbã na n yɩɩ Zerizalɛm? Bala Zerizalɛm n yaa na-tẽngã. Leb n yaa be me la Sãnedrẽ wã sẽn yaa Zʋɩf rãmbã bʋ-kaoodb sul-kãseng sẽn tar neb 71 wã be. Yaa be me la b maand rũmsã maando. Woto yĩnga, ka yɩtẽ bũmb sẽn sakda, tɩ b kʋ “Wẽnnaam Pebila” zĩig a to tɩ ka Zerizalɛm ye.

A Zezi kʋma Zerizalɛm woto: “Zerizalɛm, Zerizalɛm, sẽn kʋʋd Wẽnnaam no-rɛɛsdba la f lobd neb nins b sẽn tʋm fo nengẽ wã kuga. Naoor wʋsgo mam da rat n tigma fo kamba wa no-yãang sẽn põgend a kamba a pɩgsẽ, la fo ka sak ye. Gese, b na n basa fo rooga ne foo zaalem.” Buudã sẽn zãgs tɩ b kõn sak Wẽnnaam Biriblã yĩngã, b ka na n põs sãoong ye!

A Zezi sẽn da ket n togd sor n debd Zerizalɛmã wakate, Fariziẽ rãmbã naab a yembr n bool-a. Ra yaa vʋʋsg daare, la neba ra gũusda a Zezi. Tɩ bõe, bala rao n da be be n tar bã-motga, sẽn yaa ned karg bɩ a nug zĩig sẽn mii n yãk n wuk ne koomã. A Zezi soka Fariziẽ rãmbã la tõogã mitb sẽn da be be wã woto: “A zemsa tõogo tɩ maag ned vʋʋsg raar bɩ, bɩ a ka zemse?”

Ned ba a ye ka leok-a tɩ bũmb ye. Dẽ a Zezi sãoogã rao wã n yeel-a t’a looge. La a sok woto: “Yãmb ned a ye biig bɩ a yikaar sã n lʋɩ bulgẽ vʋʋsg raare, a kõn zoe tao-tao n tɩ yiis-a sɩda?” Ka me, ned ba a yembr ka leok-a tɩ bũmb ye. Luk 13:22–14:6; Zã 1:29.

▪ A Zezi yeelame tɩ b segd n maana bõe n paam fãagre, la bõe yĩng tɩ b pag kʋɩlengã n bas neb wʋsg yɩnga?

▪ Ãnd dãmb la “poorẽ dãmb” sẽn lebgd taoor dãmbã, la “taoor dãmb” sẽn lebgd poorẽ dãmbã?

▪ Tõeeme tɩ yaa bõe n kɩt tɩ b yeel t’a Herood da rat n kʋʋ a Zezi wã?

▪ Bõe yĩng tɩ b pa tõe n kʋ no-rɛɛs zĩig a to tɩ ka Zerizalɛm?