Sak 83

Fariziẽ n deeg a Zezi a yiri

AZEZI ra ket n bee Fariziẽ kãsengã zakẽ, la a ra nan sãooga rao sẽn da tar bã-motga. A Zezi yãame tɩ b sẽn bool b rãmb tɩ b wa rɩ wã ra yãkda naam zĩisi. Dẽ, a Zezi kõo zãmsg sik-m-mengã wɛɛngẽ.

A Zezi wilgame: “Ned sã n bool foom tɩ f wa yi-kãadem kibsa, fo sã n ta bɩ f ra zĩnd naam zĩndg zĩigẽ ye. Daar ninga, b boola ned sẽn tar naam n yɩɩd foom, la ned ninga sẽn bool yãmb y yiiba fãa wã na [n] wa n yeela foom: Yik n kõ rao kãngã zĩiga. La fo na n yaool n zĩnda paoogr zĩigẽ ne yãnde.”

Dẽ a Zezi kõo neba sagl-kãngã: “Ned sã n bool foom, bɩ f kẽng n zĩnd paoogr zĩigẽ, tɩ ned ning sẽn bool foomã sã n wa, a na n yeela foom: M zoa, wa n zĩnd naam zĩigẽ. Dẽ, fo na n paama waoogr neb nins sẽn zĩ n dɩt ne fooma sʋka.” A Zezi baasa woto: ‘Tɩ bõe, ned ninga fãa sẽn waoogd a menga a na paam paoogre, la ned ninga fãa sẽn sikd a menga a na paam waoogre.’

Rẽ poore, a Zezi goma ne Fariziẽ wã sẽn bool-a wã n wilg a sẽn tõe n kõ neb rɩɩb to-to tɩ sɩd tall bark Wẽnnaam nifẽ. A yeelame: “Yãmb sã n na n segl kibs rɩɩbo wĩntoogo bɩ yʋngo, bɩ y ra bool y zo-rãmbã walla y saam-biisi walla y roagdba walla y yags sẽn yaa arzɛgs rãmba ye. Yãmb sã n maan woto daar ninga bãmb me na n le boola yãmba, la a na n yɩɩ yãmb keoore. Yãmb sã n maan kibsa, bɩ y bool naong rãmba la koms rãmba la põeyã ne zõense. La yãmb na paam barka bãmb sẽn ka tõe n keo yãmba yĩnga.”

Ned sã n kõ nin-talsã rɩɩb woto, a paamda sũ-noogo, bala wa a Zezi sẽn togs a gãag soabã, “b na n keoo yãmb nin-tɩrsa vʋʋgr wakate.” A Zezi sẽn bilg rɩɩb sẽn tar bark a woto wã tẽega ned a yembr rɩtba sʋk rɩɩb buud a to yelle. Nin-kãng yeelame: “Ned ninga sẽn na n paam n dɩ rɩɩb Wẽnnaam [Rĩung] pʋgẽ wã na n paama sũ-noog wʋsgo.” Baasg zãnga, ka neba fãa n nand saagr kãnga wa sẽn segdã ye. A Zezi tũnuga ne makr n wilg rẽ.

“Dao a ye n da maan kibs kãsenga yʋngo n bool neb wʋsgo. Dɩɩba wakat sẽn ta a tʋma a tʋm-tʋmda t’a tɩ yeel neb nins yẽ sẽn da boola yaa: Wa-y tɩ bũmb fãa seglame n sɛ masã. La bãmb fãa sɩngame n bao bũmb n dõde. Pipi soaba yeela yẽnda: Mam daa pʋʋgo, la yaa tɩlae tɩ m kẽng n tɩ gese. Mam kota foo tɩ b bas maam taale. La a to wã yeelame: Mam daa nag-koods piiga, la mam dabdame n na n tɩ mak bãmb n gese. Mam kota foo tɩ b bas maam taale. La a to wã me yeelame: Mam peega m pag paalem, woto yĩnga, mam ka tõe n wa ye.”

Ad yaa padeng tɛkẽ! Naoor wʋsgo, ned rengd n tɩ gesa pʋʋg bɩ naaf n yaool n da-a. Dẽ, ka leb n yaa yãgb t’a tɩ ges-b raabã poor ye. Woto me, pʋg-paal peegr ka segd n kɩt tɩ ned zãgs booll sẽn tar yõod woto ye. Dẽ, zu-soabã sẽn wʋm b padengã, a sũurã yikame t’a kõ a yambã noor n yeele:

“Kẽng tao-tao n ta raas pʋse la tẽnga soɛy zutu n peeg naong rãmba ne koms rãmba la zõens ne põeyã n wa ka. Tʋm-tʋmda yeelame: Zusoaba, mam maana wa yãmb sẽn togsã, la weer ketame. La zu-soaba yeela a tʋm-tʋmda yaa: Kẽng soɛya zutu la yeg yãga la fo sẽn yã neb nins fãa, bɩ f pẽdg bãmb tɩ b wa, tɩ mam yira pidi. . . . Mam sẽn da bool b rãmbã, ned ba a yembr kõn lemb mam dɩɩba ye.”

Bõe yell la mak-kãngã bilgda? ‘Zu-soab’ sẽn kõt rɩɩbã makda Wẽnnaam a Zeova. “Tʋm-tʋmda” sẽn togsd boollã ya a Zezi Kirist. ‘Kibs kãseng yʋngã’ yaa sor b sẽn kõ tɩ b tõe n paam n kẽ saasẽ Rĩungã pʋgẽ.

Sẽn yɩɩd fãa, neb nins b sẽn deng n bool pipi tɩ b wa kẽ Rĩungã pʋgẽ wã yɩɩ a Zezi wakatẽ Zʋɩf rãmbã tũudum taoor dãmba. La bãmb zãgsa boollã. Woto, sẽn sɩng ne yʋʋmd 33 Pãntekotã, b taasa Zʋɩf rãmbã buudã nin-tals b sẽn pa nandã booll a yiib-n-soaba. La neb nins sẽn sakã sõor ka sek b na pid Wẽnnaam saasẽ Rĩungã zĩis 144 000 ye. Rẽ n so tɩ yʋʋm a tãab la pʋɩ-sʋk poore, sẽn yaa yʋʋmd 36, b taas neb nins sẽn pa kẽ bãongã yaoolem boollã sẽn yaa booll a tãab soabã. La nin-kãens tigisg kell n kẽnga taoor n wa tãag tõnd wakatã. Luk 14:1-24.

▪ Bõe la a Zezi zãms neba sik-m-mengã wɛɛngẽ?

▪ Wãn to la ned tõe n kõ rɩɩb sẽn tar bark Wẽnnaam nifẽ, la bõe yĩng tɩ rẽ na n kõ-a sũ-noogo?

▪ Bõe yĩng tɩ b rãmb nins b sẽn boolã leokr ra yaa padengo?

▪ Bõe la a Zezi ‘kibs kãseng yʋngã’ kɩbar ra makda?