Sak 91

A Lazaar vʋʋgrã

A ZEZI ne neb nins sẽn da yãagd-a wã taa a Lazaar yaoogẽ wã masã. Ra yaa bok tɩ b pag a noorã ne kugri. A Zezi yeelame: “Bɩ y lak kugrã.”

La a Mart ra ka rat n sak ye, bala a ra nan ka mi a Zezi sẽn dat n maan bũmb ning ye. A yeelame: “Zusoaba, yẽ zoe n põogame, tɩ bõe, yaa rasem a naas masã la a ki-yã.”

La a Zezi sok-a lame: “Mam ka yeel foo tɩ fo sã n tẽ f na yã Wẽnnaam waoogr sɩda?”

Dẽ b laka kugrã. Rẽ poore a Zezi naka yĩngr n pʋʋs woto: “M Ba, mam pʋʋsda yãmb barka, yãmb sẽn leok maama yĩnga. Mam yẽ miimi tɩ yãmb leokda maam daar fãa. La yaa neb nins sẽn yas ka wã yĩng la mam yeel woto, tɩ bãmb tõe n tẽ tɩ yãmb n tʋm maam.” A Zezi ra pʋʋsda zãma wã sʋka, sẽn na yɩl tɩ neba bãng tɩ bũmb ning a sẽn da segend n na n maanã yaa ne tõog ning Wẽnnaam sẽn kõ-a wã maasem. Rẽ poore a zẽka a koɛɛg n yeele: “Lazaare, yi!”

Dẽ a Lazaar yiimi. A nusã ne a nao wã ra ket n loee ne pɛɛla, tɩ peend ra lud a nengã. T’a Zezi yeele: “Bɩ y vilg pɛɛlã n bas-a t’a kẽnge.”

Zʋɩf rãmbã wʋsg sẽn da wa n na n bels a Maari ne a Martã sẽn yã yel-solemdã, b tẽe a Zezi. La neb a taab n kẽng n tɩ togs Fariziẽ rãmbã bũmb ning sẽn maanã. Tao-tao bala bãmb ne maan-kʋʋdba kãsem dãmb tigma Zʋɩf rãmba bʋ-kaoodb sull kãsengã sẽn yaa Sãnedrẽ wã neba.

Maan-kʋʋd kãsem a Kayɩf, n paas Fariziẽ rãmb la Sadiseẽ rãmba, maan-kʋʋdba kãsem dãmba, ne sẽn da yɩ-b maan-kʋʋd kãsem dãmbã, bãmba fãa n da yaa Sãnedrẽ wã neba. Nin-kãensã wilga b sũ-sãang woto: “Tõnd na n maana bõe? Tɩ bõe, dao kãng maanda bõn-bãn wʋsgo. Tõnd sã n bas bãmba, neba fãa na n tẽe bãmba. La Rom dãmba na n wa sãama tõnd Wẽn-dooga ne tõnd buudã.”

Baa tũudmã taoor dãmb sẽn sak n deeg t’a Zezi ‘maanda bõn-bãn wʋsgã,’ sẽn pak-b n yɩɩdã yaa b ziirã la b naamã bala. Sẽn yɩɩd fãa a Lazaar vʋʋgrã yɩɩ yãnd meng-meng n kõ Sadiseẽ rãmbã, bala bãmb da ka tẽed tɩ vʋʋgr beeme ye.

Tõe t’a Kayɩf ra yaa Sadiseẽ. A yeela masã: “Yãmb ka mi baa fɩ ye. Yãmb ka mi tɩ yaa neer yãmb yĩng tɩ rao a yembr ki neba yĩng tɩ tõnd buuda fãa ra sãam la?”

Yaa Wẽnnaam n kɩt t’a Kayɩf yeel woto, bala kaoosg zugẽ tʋm-tʋmd a Zã gʋlsame: “La [a Kayɩf] ka gom woto ne a meng pãng ye.” Sɩd-sɩda, a Kayɩf sẽn da rat n yeel bũmb ningã yaa tɩ b segd n kʋʋ a Zezi sẽn na yɩl t’a ra leb n boog naam la tõog ning bãmb sẽn tar neba zutã pãng ye. La sã n yaa ne a Zã, ‘a Kayɩf togsa bãngr-goam n yeel t’a Zezi ra tog n kiimi, ka bãmb buuda yĩng bal ye, la yaa sẽn na yɩl n tigim Wẽnnaam kambã.’ Sɩd me Wẽnnaam daab yaa t’a Biriblã ki tɩ yɩ rond n yao neba fãa yĩnga.

A Kayɩf tõogame n kɩt tɩ Sãnedrẽ wã neb segl a Zezi kʋʋbo. A Zezi bãnga rẽ n yi zĩ-kãng n looge. La tõeeme tɩ ya a Nikodɛm sẽn yaa Sãnedrẽ wã ned n leb n ya a Zezi zoa wã n wɩdg-a yellã. Zã 11:38-54.

▪ Bõe yĩng t’a Zezi pʋʋs zãma wã sʋk n yaool n vʋʋg a Lazaare?

▪ Neb nins sẽn maan kaset ne vʋʋg-kãngã wã manesem yɩɩ wãn-wãna?

▪ Bõe n wilgd tɩ Sãnedrẽ wã neb yaa wẽnem dãmba?

▪ Bõe la a Kayɩf ra tʋll n maane, la bãngr-gom bʋg la Wẽnnaam kɩt t’a togse?