Sak 119

A Ann nengẽ, la a Kayɩf nengẽ

B SẼBA a Zezi wa bi-bɛɛg n tall-a n kẽng a Ann sẽn da yaa maan-kʋʋd kãsem pĩnda, la sẽn ket n tar naam wʋsgã nengẽ. Wakat ning a Zezi sẽn da wa n tar yʋʋm 12 t’a bãngrã ling karen-sãam dãmbã wẽnd-doogẽ wã, tɩ ra ya a Ann n yaa maan-kʋʋd kãsma. Kaoosg zugẽ, a Ann komdibli kẽer lebga maan-kʋʋd kãsem dãmba, la masã ra ya a rɛɛmb a Kayɩf n yaa maan-kʋʋd kãsma.

Tõeeme tɩ b sẽn deng n tall a Zezi n kẽng a Ann zakẽ wã, yaa maan-kʋʋdb kãsem kãngã yʋʋr sẽn yi wʋsg Zʋɩf rãmbã tũudum pʋgẽ hal sẽn kaoosã yĩnga. B sẽn yals a Ann nengẽ wã kõo maan-kʋʋd kãsem a Kayɩf sẽk t’a tõog n tigim Sãnedrẽ wã neba, la ziri kaset rãmba. Sãnedrẽ wã yaa Zʋɩf rãmbã bʋ-kaoodb sul-kãsenga, sẽn tar neb 71.

Masã, maan-kʋʋdb kãsem a Ann soka a Zezi a karen-biisã la a zãmsgã zugu. La a Zezi leokame: “Mam goma vẽenes ne dũniyã rãmb fãa. Daar fãa mam karma karen-dot pʋse la Wẽnnaam doogã pʋgẽ, zĩis nins Zʋɩf rãmbã sẽn tigmã. Mam ka soos n gom bũmb ye. Yaa bõe tɩ yãmb le sokd maam? Bɩ y sok neb nins sẽn wʋmã mam sẽn yeel bãmb bũmb ninga. Bãmb mii mam sẽn yeel bũmb ninga fãa.”

Dẽ, gard a yembr sẽn da yas a Zezi sɛɛgẽ wẽ-a-la pɛka, n yeele: “Yaa bõe tɩ yãmb leokd maan-kʋʋdba kãsem woto?”

Woto a Zezi leok-a lame: “Togs bũmb ninga mam sẽn gom tɩ yaa wẽnga. La a sã n yaa sɩda, yaa bõe tɩ fo wẽ maam?” Sõs-kãngã poore, a Ann kɩtame tɩ b tall a Zezi n kẽng a Kayɩf nengẽ.

Wakat kãng masã tɩ maan-kʋʋdba kãsem dãmb la nin-buiidã kãsem dãmbã ne gʋlsdbã fãa, sẽn dat n yeel tɩ Sãnedrẽ wã tõr neb ra zoe n tigimdame. Wõnda ra ya a Kayɩf yirã la tigisgã. Yaa vẽeneg tɩ ned bʋʋb woto Pakã yʋng yaa bũmb sẽn kɩɩsd Zʋɩf rãmbã tõogo. La rẽ pa gɩdg tũudmã taoor dãmb tɩ b ka pids b bõn-datl wẽngã ye.

A Lazaar vʋʋgrẽ wã, semen a wãn sẽn deng rẽ, Sãnedrẽ wã neb ra zoe n dɩka sard tɩ b tog n kʋ a Zezi. Sẽn paase, yɩ tɩ rabɩtẽ bala, arba raare, tũudmã taoor dãmb leb n sɩɩga taab noore, n na n maan sɩlem n yõk a Zezi n kʋ. Tags-y n gese, sɩd-sɩda b ra zoe n yeelame t’a Zezi zemsa ne kũum tɩ b nan ka bʋ-a ye!

Masã b ra modgdame n na n yã kaset rãmb sẽn na n wa kõ ziri kaseto, tɩ b tõog n tik rẽ zug n ning a Zezi taale. La b ka tõog n yã kaset soab ba a yembr t’a kasetã zems ne ned a to rẽnd ye. La neb a yiib n wa n baas n kolg n yeele: “Tõnd wʋma bãmb sẽn yeele: Mam na n sãama Wẽnnaam do-kãngã sẽn me ne ninsaalb nusã, la rasem a tãab pʋgẽ mam na n le me a to sẽn ka me ne ninsaalb nus ye.”

Dẽ a Kayɩf soka a Zezi: “Yãmb ka leokd tɩ bũmb la? Yaa bõe tɩ b kɩt yãmb kaset woto?” La a Zezi ka leok tɩ bũmb ye. Yɩɩ yãnd ne Sãnedrẽ wã neba, rõatbã kaset sẽn ka tũud taabã. Dẽ, maan-kʋʋd kãsma maka sɩlem a to.

A Kayɩf ra miimi tɩ ned sã n yeel t’a yaa Wẽnnaam meng biriblã, yikda Zʋɩf rãmbã sũy wʋsgo. Pĩnda, naoor a yiibu, b ra yeelame t’a Zezi yaa wẽn-tʋʋs n segd n ki, b sẽn da ka wʋm a goamã võor n tagsdẽ t’a yetame tɩ yẽ zema Wẽnnaamã. Ne sɩlem, a Kayɩf kõo a Zezi noor n yeele: “Bɩ y zoe Wẽnnaam sẽn vɩ tɩ y sã n yaa Kirist Wẽnnaam Biiga bɩ y togs tõndo.”

A Zezi sɩd yaa Wẽnnaam Biribla, baa Zʋɩf rãmbã sẽn tagsd a soab fãa. Woto a Zezi sã n sĩndi, yɩta wa a sakame tɩ pa yẽ la Kiristã ye. Rẽ n so t’a Zezi leok ne raood woto: “Mam yaa bãmba. La yãmb na yã Ninsaal Biiga sẽn zao Wẽnnaam sẽn yaa Pãng-soaba rɩtgo, la sẽn be sawat zut n watẽ.”

Dẽ, a Kayɩf kẽesa a futã hal tɩ yɩ gesr menga, la a zẽk a koɛɛg n yeele: “Bãmb tʋʋsa Wẽnnaam. Tõnd data bõe kaset n paase? Gese, masã bala yãmb wʋma bãmb tʋʋsgo. Yãmb tagsda bõe?”

Tɩ Sãnedrẽ wã neb zẽk b koees n yeele: “Bãmb zemsa kũum.” Rẽ poore b sɩngame n yaand-a, la b tʋʋd-a. B pãb-a-la pɛgs la b tʋbs-a nengã kolkoodo. Neb a taab ra luta a nengã la b pãbd-a ne b nug-gila, n yet woto n paoogd-a: “Kirist, bɩ y togs bãngr-goama n wilg ned ninga sẽn wẽ yãmbã.” Yaa manesem a woto sẽn yaa wẽng la sẽn kɩɩsd Zʋɩf rãmbã Tõogã n zĩnd bʋʋdã b sẽn kao ne yʋngã sasa. Matɩe 26:57-68; 26:3, 4; Mark 14:53-65; Luk 22:54, 63-65; Zã 18:13-24; 11:45-53; 10:31-39; 5:16-18.

▪ Yɛ la b reng n tall a Zezi n kẽnge, la bõe la b maan-a be?

▪ Zĩ-kãng poore, yɛ la b tall a Zezi n kẽnge, la bõe yĩnga?

▪ Wãn to la a Kayɩf tõog n kɩt tɩ Sãnedrẽ wã moon t’a Zezi zemsa ne kũum?

▪ Manesem bʋg sẽn yaa wẽng la sẽn kɩɩsd Tõog n zĩnd bʋʋdã sasa?