Sak 95

Zãmsg kãadem kaoobã la kamb nonglmã zugu

A ZEZI ne a karen-biisã ra bee sorẽ n debd Zerizalɛm n na n tɩ maan yʋʋmd 33 Pakã. B rʋʋga Zʋrdẽ Kʋɩlgã n dɩk sor ning sẽn yit Peere babgã. Semen a wãn sẽn denge, a Zezi ra bee Peere. La a zoa a Lazaar pa-keemã yĩnga, b ra lebg n bool-a-la Zide. A Zezi sẽn da wa n be Peere wakat kãngã, a goma ne Fariziẽ rãmbã kãadem kaoobã yelle, la masã b leb n waa gomdã zugu.

Fariziẽ rãmbã ra tara zãmsg toɛy-toɛy kãadem kaoobã zugu. A Moiiz ra yeelame tɩ rao tõe n kaoo kãadem ne a paga a sã n yã “t’a maana yãnde.” Kẽer da tagsdame tɩ woto teka yoob bala. La neb kẽer ra getame tɩ beeg-bõones me naaga ‘maan yãndã’ pʋgẽ. Dẽ Fariziẽ rãmbã soka a Zezi woto sẽn na yɩl n mak-a: “A zemsa tõog tɩ rao bas a pag bũmb fãa yĩng bɩ?” B ra kɩsa sɩd t’a Zezi sẽn leok tɩ bũmb ning fãa, rẽ na n wẽe a zug ne Fariziẽ rãmb nins tagsg sẽn yaa toorã.

A Zezi bãnga sokrã leokr sõma, n pa tik ninsaal tagsg zug ye, la a tika Wẽnnaam raabã sẽn tɩ loe ne kãadmã hal a sɩngrẽ wã zugu. A sokame: “Yãmb nan ka karem tɩ Naanda naana bãmb daoa la paga hal sɩngre, la tɩ bãmb yeelame: A yaa woto yĩnga dao na bas a ba ne a ma n zĩnd ne a paga, la bãmb b yiiba fãa na n yɩɩ yĩng a yembr bɩ? Woto yĩnga, bãmb ka leb n ya a yiib yɛs ye, b yaa yĩng a yembre. Dẽ yĩnga, bɩ ned da welg bũmb nins Wẽnnaam sẽn lagem ne taaba ye.”

Sɩngrẽ wã, Wẽnnaam sẽn da rat ne kãadmã yaa tɩ kẽed-n-taasã kell n pa ne taab n da kao b kãadmã ye. Sẽn mik tɩ yaa woto wã, Fariziẽ rãmbã leokame: “Dẽ yaa bõe t’a Moiiz yeel tɩ b kõ pag basg sebre n bas-a?”

T’a Zezi leoke: “Yaa yãmb sũyã sẽn yaa kegemsa yĩng n kɩt t’a Moiiz sak tɩ yãmb bas y pagba. Hal sɩngr wẽnde ra ka woto ye.” Sɩd me, Edɛn zẽedẽ wã Wẽnnaam sẽn dag n lugl kãadmã noy meng-mengã, a ka geel tɩ kãadem kaoob na n wa zĩndame ye.

A Zezi leb n yeela Fariziẽ rãmbã woto: “La mam yeta yãmba tɩ ned sã n basd a paga tɩ ka yoob [porneya ne Gɛrk buud goama] yĩnga n dɩk a to a maanda yoobo.” Woto a ra wilgdame tɩ yaa porneya, sẽn yaa yoobã zug bal la Wẽnnaam sak tɩ b tõe n tik n kao kãadem.

Karen-biisã sẽn bãng tɩ kãadem segd n yɩɩ zĩnd-n-taar sẽn kaoosd yõor tɛka, tɩ yaa yoob zug bal la b tõe n tik n kao-a wã, rẽ kɩtame tɩ b yeele: “Dao ne pag yell sã n ya woto, dall ka neer tɩ b maan kãadem ye.” Yaa vẽeneg tɩ ned ning fãa sẽn geend n na n kẽ kãadem segd n tagsa kãadmã sẽn yaa yõor tɛk bũmbã yell neere!

A Zezi kell n goma rakõtã yelle. A wilgame tɩ rap kẽer rogame n ka tõe n kẽ kãadem, b raoolmã sẽn ka vɩyã yĩnga. Rap a taab yaa neb a taab n maand-b pʋ-toog n kɩsg-b tɩ b ka tõe n kẽ kãadem ye. Sẽn na n baase, neb kẽer tõogame n dĩ kãadem kõom la pag ne rao lageng tʋlsmã sẽn na yɩl n tõog n kẽes b mens zãng saasẽ Rĩungã yɛl pʋsẽ. Dẽ a Zezi baasa woto: “Sẽn tõe n kõ-a weer [rakõtã] yĩng bɩ a kõ weer rẽ yĩnga.”—NW.

Masã neba sɩngame n wat ne b kom-bõonegã a Zezi nengẽ. La karen-biisã ra zabda kambã n baood n na n dig-b tɩ b bao zĩiga. Sik kae tɩ b ra ratame tɩ kambã ra wa tiis a Zezi zaalem ye. La a Zezi yeelame: “Bas-y kom-bõonega tɩ b wa mam nengẽ n da gɩdg bãmb ye, tɩ bõe, Wẽnnaam [Rĩungã] yaa neb nins sẽn wẽnd wa bãmba yĩnga. Mam yeta yãmb sɩda, tɩ ned ninga fãa sẽn kõn deeg Wẽnnaam [Rĩungã] wa bi-bilfu, a kõn kẽ be ye.”

Ad sɩd yaa zãmsg sẽn yaa sõma meng la a Zezi kõ kaanẽ! D sã n dat n paam Wẽnnaam Rĩungã, d tog n dɩka kom-bõoneg togs-n-taar n yɩ sik-m-mens rãmb la neb sẽn sakd zãmsgo. La a Zezi sẽn maanã wilgdame tɩ tara yõod wʋsg tɩ d bao sẽk n zĩnd ne kambã, sẽn yɩɩd fãa roagdbã. Masã a Zezi wilgame t’a nonga kom-bõonegã, n dɩk-b n pẽgen la a ning-b barka. Matɩe 19:1-15; Tõodo 24:1; Luk 16:18; Mark 10:1-16; Luk 18:15-17.

▪ Tags-bʋs sẽn yaa toɛy-toɛy la Fariziẽ rãmbã ra tar kãadem kaoobã zugu, la rẽ kɩtame tɩ b mak a Zezi wãn-wãna?

▪ Fariziẽ rãmbã sẽn modg n na n mak a Zezi wã, a manesem yɩɩ wãn-wãna, la a yeelame tɩ bõe zug bal la b tõe n tik n kao kãadem?

▪ Bõe yĩng t’a Zezi karen-biisã yeel tɩ ka neer tɩ ned kẽ kãadem, la sagl-bʋg la a Zezi kõ-yã?

▪ A Zezi manesmã ne kom-bõonegã zãmsda tõnd bõe?