Sak 96

A Zezi ne na-poll sẽn yaa arzɛk soaba

A ZEZI sẽn da wa n pãrgd Peere soolma n debd Zerizalɛmã, bi-bɩɩg n zoe n seg-a n yĩgimd a taoorã. B boola rao wã tɩ naaba. Tõe tɩ woto rat n yeelame t’a yaa zĩ-kãng karen-doogã taoor soab a yembr bɩ Sãnedrẽ wã ned menga. A ra leb n tara arzɛk wʋsg me. A sokame: “Karensaam sõngo, mam na n maana bõe n paam vɩɩm sẽn ka sɛta?”

T’a Zezi leok-a: “Yaa wãn tɩ fo boond maam tɩ sõngo? Ned ka be sẽn yaa sõngo sã n ka Wẽnnaam bala.” Bi-bɩɩgã ra rɩka gom-bil ning sẽn yaa ‘sõngã’ wala naam yʋʋre, rẽ n so t’a Zezi togs-a tɩ yaa Wẽnnaam bal la b segd n bool ne naam yʋʋr woto.

A Zezi paasa woto: “Fo sã n dat n paam vɩɩm, sak tõodo.”

Tɩ rao wã soke: “Tõod bʋse?”

A Zezi sõdga noy a nu Noy Piigã sʋk n leoke: “Da kʋ ye, da yo ye, da zu ye, da kɩs kaset ziri ye, waoog f ba la f ma.” La a paas noor sẽn tar yõod n yɩɩd meng n yeele: “Nong f to n wẽnd f menga.”—Sebr Sõngo.

Dẽ, rao wã leoka ne pʋ-peelem: “Mam saka bãmb fãa hal m yãadem wakate tɩ ta masã. La bõe n keta?”

A Zezi sẽn kelg rao wã sẽn pelg a pʋg ne a sũur fãa n kos woto wã, a talla nonglem ne-a. La a yãame tɩ rao wã ra nonga laog wʋsgo. Rẽ n so t’a wilg bũmb ning sẽn ket tɩ rao wã maanã, n yeele: “Bũmb a ye n paoog foom. Kẽng n koos bũmb nins fo sẽn tarã n kõ naong rãmba, la fo na paam paoong [saasẽ]. La wa n tũ maam.”

Rao wã sẽn wʋm woto wã a yikame n lebg n loogd ne sũ-sãanga. Sik sẽn kae, a Zezi sẽn da get-a wã a nimbãaneg ra tar-a lame. A paoongã ra luda a yamã t’a ra ka leb n ne arzɛk hakɩkã yõod ye. A Zezi yeela woto ne sũ-sãanga: “Neb nins sẽn tar arzɛgsã Wẽnnaam [Rĩungã] kõom na n yɩɩ toogo.”

A Zezi goama linga a karen-biisã. La leb n yɩɩ lingr ne-b n paas meng a Zezi sẽn togs no-kãngã wã: “Tɩ bõe, yʋgemd sã n dat n tũ fu-pĩim yõorẽ n yi, yaa naana n yɩɩd arzɛk soaba sẽn na n dat n kẽ Wẽnnaam [Rĩungã] pʋgẽ.”

T’a karen-biisã soke: “Sã n yaa woto, ãnda n tõe n paam fãagre?”

A Zezi zẽka a neng n ges-ba, n leoke: “Neb ka tõe bõn-kãng ye, la ka woto ne Wẽnnaam ye, tɩ bõe, Wẽnnaam tõee bũmb fãa.”

Dẽ, a Pɩɛɛr wilgame tɩ bãmb maana yãkr sẽn yaa toor fasɩ ne na-poll sẽn yaa arzɛk soabã yãkre, n yeele: “Gese, tõnd basa bũmb fãa n tũ yãmba.” Rẽ n so t’a soke: “Woto, yaa bõe la tõnd na n deege?”

A Zezi pʋlma woto: “Mam yeta yãmb sɩda tɩ bũmb fãa manegr wakat sã n ta Ninsaal Biiga sẽn na n zĩnd bãmb naam geer zugu, yãmb me sẽn tũ maama na n zĩnda gɛya piig la a yiiba zutu n kao Israɛll buud piig la a yiiba bʋʋdo.” N-ye, a Zezi wilgame tɩ b na n manega tẽng zug yɛlã sẽn na yɩl tɩ lebg n yɩ wala b sẽn da yaa to-to Edɛn zẽedẽ wã. La a Pɩɛɛr ne karen-biis a taabã na n paama bark ning sẽn yaa rɩ naam ne Kiristã Arzãnã sẽn na n pid tẽngã gillã zugu. Sãmbg sẽn ka be, keoor sẽn yaa kãseng woto seka b na maan modgr bɩ mong-m-meng buud fãa n paam-a!

Baasg zãngã, baa masã mengã keoor n be, wa a Zezi sẽn yeel vẽenegã: “Ned ka be sẽn na n bas a yiri walla ba-bi-raopa walla a ba-bi-pogse walla a ma walla a ba walla a kamba walla a pʋt mam yĩnga ne Koe-nooga yĩnga, sẽn kõn paam yiri la ba-bi-raopa la ba-bi-pogse la ma rãmba la kamba la pʋto naoor koabg ye, la baoosgo, a na paam namsg masã zãmaan kãngã pʋgẽ. La dũniyã sẽn wata, a na paam vɩɩm sẽn ka sɛta.”

Wa a Zezi sẽn yeelã, dũniyã pʋgẽ a karen-biisã sẽn kẽngẽ fãa b tara zems-n-taar ne b tẽed-n-taasã. Zems-n-taar kãng tara pãng la a tar yõod n yɩɩd zems-n-taar buud fãa b sẽn tõe n tall ne b meng roagdba. Wõnda na-poll sẽn yaa arzɛk soabã konga bark kãngã, la vɩɩm sẽn kõn sa Wẽnnaam saasẽ Rĩungã pʋgẽ.

Rẽ poore a Zezi paasame: “La taoor dãmb wʋsg na n lebga poorẽ dãmba, la poorẽ dãmb wʋsg na n lebga taoor dãmba.” Woto võor yaa bõe?

A ra rat n yeelame tɩ neb wʋsg sẽn yaa “taoor dãmb” b sẽn tar zu-sobend tũudmã pʋgẽ wala na-poll sẽn yaa arzɛk soabã, ka na n kẽ Rĩungã pʋgẽ ye. B na n yɩɩ “poorẽ dãmba.” La neb wʋsg na n lebga “taoor dãmba.” Bãmb ya a Zezi karen-biisã sẽn yaa sik-m-mens rãmbã, la neb nins Fariziẽ rãmbã sẽn yaa tɩrs b mens nifẽ wã sẽn paoogd n yet tɩ b yaa tẽng tom neb bɩ amhaarɛts rãmbã. B sẽn na n lebg “taoor dãmba” rat n yeelame tɩ b na n paama zu-noog n naag Kiristã n dɩ naam Rĩungã pʋgẽ. Mark 10:17-31; Matɩe 19:16-30; Luk 18:18-30.

▪ Vẽenega, bi-bɩɩg sẽn yaa arzɛk soabã yaa na-bʋg buudu?

▪ Bõe yĩng t’a Zezi ra ka sak tɩ b bool-a tɩ sõngo?

▪ Wãn-wãn la na-pollã kɩbar wilgd tɩ ned sã n yaa arzɛk soaba tõe n yɩɩ yelle?

▪ Bark bʋs la a Zezi kãab a karen-biisã?

▪ Wãn to la taoor dãmb lebgd poorẽ dãmba, tɩ poorẽ dãmb lebgd taoor dãmba?