Arzɛk soab sẽn yaa naab yãka sẽn pa sõma
ARZƐK soab kãngã ra yaa bi-bɩɩg sẽn yaa naaba. A ra yaa pʋlem soab la wẽn-tuuda, sẽn da sakd Wẽnnaam ne sik-m-menga. Raar a yembre, a wa n yĩgimda a Zezi taoor n sok woto: “Karensaam sõngo, mam na n maana bõe n paam vɩɩm sẽn ka sɛta?”—Mark 10:17
A Zezi leok-a lame tɩ sẽn na yɩl n paam vɩɩm sẽn ka sɛtã, a segd n tũu Wẽnnaam noyã. La a kosa a Zezi t’a wilg a gomdã sẽn dat n yɛɛlga, t’a Zezi leok-a woto: “Da kʋ ye, da yo ye, da zu ye, da kɩs kaset ziri ye, waoog f ba la f ma, la nong f yak wa f menga.” No-kãensã ra yaa kãsems a Moiiz Tõogã pʋgẽ. Raoã yeela a Zezi woto: “Mam saka bãmb fãa. La bõe n keta?”—Matɩe 19:16-20.
A Zezi ra nonga raoã wʋsgo, la a yeel-a lame yaa: “Bũmb a ye n paoog foom. Kẽng n koos bũmb nins fo sẽn tarã n kõ naong rãmba, la fo na paam paoong [saasẽ]. La wa tũ maam.”—Mark 10:18-21.
Zĩig pʋgẽ wã, rakãagrã ra segd n yãka a sẽn na n maanega, la ra pa nana ne-a ye. Bõe la a na n maane? A na n sak n basa a arzɛkã n tũ a Zezi bɩ, bɩ a na n kell n talla a arzɛkã? A na n baoa arzɛk dũniyã zug bɩ, bɩ a na n baoa arzɛk saasẽ? Tõe tɩ yɩɩ toog ne raoã t’a yãk a sẽn na n maanega. Yaa vẽeneg t’a sɩd ra nonga Wẽnnaam, bala a ra sɩng n tũuda a noyã hali n da rat n bãng a sẽn segd n maaneg n tõog n ta a yam n paase. La bõe la a maan-yã? A ‘looga ne sũ-sãoongo; tɩ bõe, a ra tara arzɛk wʋsgo.’—Mark 10:22.
Bi-bɩ-kãngã sẽn da yaa naabã pa yãk yãk-sõng ye. A sã n da sak n tũ a Zezi, a ra tõe n paama vɩɩm sẽn ka sɛtã a sẽn da baoodã. Yaa sɩd tɩ Biiblã pa wilg bũmb ning sẽn wa n paam ra-kãng ye, la d miime tɩ yʋʋm 40 poore, Rom sodaasã wa n sãama Zerizalɛm la Zide. Zʋɩf rãmb wʋsg arzɛgs yɩɩ bõne, la wʋsg me kiime.
La tʋm-tʋmd a Pɩɛɛr ne a Zezi karen-biis a taab pa maan wa rakãagrã ye. B sak n ‘basa bũmb fãa n tũ a Zezi.’ Yaa vẽeneg tɩ b sẽn yãk yam n maan bũmb ningã sɩd naf-b-la hal wʋsgo! A Zezi yeel-b lame tɩ b sẽn na n paam bũmb ninsã na n yɩɩga b sẽn basã naoor wʋsgo. Sẽn paase, b na n paama vɩɩm sẽn ka sɛtã. B ra pa na n tol n wa maan b bãngẽ yam-yãkr ning b sẽn maanã poorẽ ye.—Matɩe 19:27-29.