Sak 109

A Zezi ninga a bɛɛbã taale

A ZEZI gom n luba a bɛɛbã hal tɩ b ra yɛɛsd n ka leb n dat n sok-a bũmb ye. Dẽ a Zezi yãka yam n na n puk-b bãong n wilg tɩ b yaa zɩtba. A sokame: “Yãmb tagsda bõe ne Kirist yelle? Bãmb yaa ãnda biiga?”

Tɩ Fariziẽ rãmbã leok tɩ ya “a Davɩɩd biiga.”

Ba a Zezi sẽn pa kɩɩs tɩ Kiristã bɩ Mesi wã ya a Davɩɩd yagengã, a sokame: “Dẽ, yaa wãn t’a Davɩɩd gom ne [vʋʋsem sõng] pãng [Yɩɩl Sõamyã 110 pʋgẽ] n bool bãmb tɩ Zusoaba, n yeele: ‘[A Zeova] yeela mam Zusoaba yaa: Bɩ f zĩnd mam dɩtgo hal tɩ m maan f bɛɛba tɩ yɩ f nao roagendga.’ Woto yĩnga, a Davɩɩd sã n bool bãmb tɩ Zusoaba, bãmb na n le yɩɩ wãn n yɩ a Davɩɩd biiga?”

Fariziẽ rãmbã ra yaa sɩɩ, bala b ra ka mi Kiristã, bɩ b sẽn zae a soabã sẽn sɩd yaa ned ning ye. Wõnda Fariziẽ rãmbã ra tagsdame tɩ Mesi wã ra na n yɩɩ a Davɩɩd yageng sẽn yaa ninsaal bala. La pa woto ye, Mesi wã reng n zĩnda saasẽ, tɩ rẽ kɩt t’a ra yɩɩd a Davɩɩde, bɩ a ya a Zusoaba.

A Zezi wẽnemd n goma ne kʋʋngã la ne a karen-biisã, n keoog-b tɩ b gũus ne gʋlsdbã la Fariziẽ rãmbã. Sẽn mik tɩ bãmb “zĩ a Moiiz zĩigẽ” n zãmsd nebã Wẽnnaam Tõogã, a Zezi kõ-b-la sagl-kãngã: “Bɩ y maane la y sak bũmb nins bãmb sẽn yeel yãmb tɩ y maanã.” La a paasame: “Ra togs[-y] bãmb tʋʋma ye. Tɩ bõe, bãmb yetame la b ka maand ye.”

B yaa zãmb dãmba. Dẽ, a Zezi gomame n ning-b taale, wa a sẽn da gom to-to a sẽn da wa n dɩt Fariziẽ zakẽ kiis a wãn sẽn loogã. A yeelame: “Bãmb maanda b tʋʋma fãa neba nin gesg yĩnga.” La a rɩka makr n yeele:

“Bãmb maanda bãmb [sɛb gãna] tɩ yɩ yalemse.” Seb-gãn kãensã b sẽn da loet b rĩyẽ bɩ b kamsẽ wã tara Tõogã zĩis a naase: Yikri 13:1-10, 11-16, la Tõodo 6:4-9; 11:13-21. La Fariziẽ rãmbã ra paasda seb-gãn kãens yalem sẽn na yɩl tɩ neba yã n tags tɩ bãmb tũuda tõogã ne yẽesem.

A Zezi leb n yeelame tɩ b “paasda b fut zerd woglem.” Sõdbo 15:38-40 pʋgẽ, b kõo Israɛll neba noor tɩ b ning b fut noy zerdo, la Fariziẽ rãmbã ra paasda b rẽndã woglem tɩ yɩɩgd neba fãa rẽnda. B ra maanda bũmba fãa neb gesg yĩnga! A Zezi yeelame: “Bãmb nonga naam zĩndg zĩisi.”

Zu-bʋko, rat-taoor yam a woto kẽe a karen-biisã menga. Rẽ n so t’a Zezi sagl-b woto: “La yãmba, ra kɩt-y tɩ neba boond yãmb tɩ karen-saamb ye. Bala, yãmb karen-saamb yaa a yen tãa, la yãmb fãa yaa ba-biisi. Da bool-y ned baa a yen tãa dũni ka tɩ ba ye. Bala, ned a ye tãa n yaa yãmb ba, a soab ning sẽn be-a saasẽ wã. Da kɩt-y tɩ nebã bool yãmb tɩ taoor dãmb ye, bala, ned a yen tãa n yaa taoor soaba, yaa Kirist.” Karen-biisã ka segd n dat tɩ yaa bãmb la taoor ye! A Zezi sagl-b-la woto: “Sẽn ya-a kãseng n yɩɩd yãmb sʋkã, bɩ a yɩ yãmb tʋm-tʋmda.”—Kãab-paalgã Koe-noogo.

Rẽ poore, a togsa tood toɛy-toɛy sẽn segd n paam gʋlsdbã la Fariziẽ rãmbã, n bool-b tɩ zãmb dãmb n yɩlem. A yeelame tɩ b ‘pagda saasẽ Rĩungã tɩ neb ra kẽ ye,’ la tɩ “bãmb deegda pʋg-kõap paoongo la b maanda pʋʋs-wogd n belgd neba.”

A Zezi leb n yeelame: “Sor-wilgdb sẽn yaa zõense, yãmb na paam toogo.” A ninga Fariziẽ rãmbã taal b sẽn ka tar naneb ne tẽebã yɛlã, n maand bagsg sẽn ka tar tikrã. Wala makre, b yeelame ‘tɩ yaa zaalem, ned sã n wẽen ne Wẽnnaam doogã, la tɩ ned sã n wẽen ne sãnemã sẽn be Wẽnnaam doogẽ wã yaa tɩlae t’a pidsi.’ B sẽn da get tɩ wẽnd-doogã sãnem tara yõod n yɩɩd wẽnd-doogã meng sẽn yaa baleng zĩigã, wilgdame tɩ b yaa zoens tẽebã wɛɛngẽ.

Rẽ poore, wa a sẽn da maan pĩndã, a ninga Fariziẽ rãmbã taal b sẽn bas “bũmb nins sẽn yaa neer n yɩɩda tõog pʋgẽ sẽn yaa tɩrlem la nimbãan-zoeere la sɩda,” la b gũusd neer n yaood zẽ-biis yõod sẽn paood yembr piig zugã, bɩ piig pʋɩɩrã.

A Zezi boola Fariziẽ rãmbã tɩ “sor-wilgdb sẽn yaa zõense sẽn yaagd rũmpigli n yaool n vend yʋgma!” B yoogda b rãama n kokd rũmpigli wã, la ka b sẽn yaa bõn-yɩgd bi wã yĩng bal ye, yaa Tõogã sẽn da yet tɩ b yaa rẽgdã yĩnga. La b sẽn yaool n basd tõogã yɛl nins sẽn tar yõod n yɩɩdã, yaa wa yʋgemd la b venda, bala rũm-kãng me yaa rẽgd sã n yaa ne Tõogã. Matɩe 22:41–23:24; Mark 12:35-40; Luk 20:41-47; Maankʋʋre 11:4, 21-24.

▪ Bõe yĩng tɩ Fariziẽ rãmbã ra yaa sɩɩ a Zezi sẽn sok-b bũmb ning a Davɩɩd sẽn yeel Yɩɩl Sõamyã 110 pʋgẽ wã wɛɛngẽ?

▪ Bõe yĩng tɩ Fariziẽ rãmbã ra paasd b seb-gãna yalem la b futã zerd woglem?

▪ Sagl-bʋg la a Zezi kõ a karen-biisã?

▪ Bags-bʋs sẽn ka tikr la Fariziẽ rãmbã ra maanda, la wãn-wãn la a Zezi ning-b taal b sẽn basd bũmb nins sẽn tar yõod n yɩɩdã yĩngã?