Fariizẽ n bool a Zeezi a yiri

A Zeezi ra keta Zʋʋde. Fariizẽ n bool-a a yir t’a wa rɩ. (Luk 11:37, 38) Fariizẽ-rãmbã sã n da na n dɩ, b ra minim n pɛgsda b nusã n tãag kãntɩɩsã. La a Zeezi pa maan wa bãmb ye. (Matye 15:1, 2) B sẽn da maandã pa kɩɩsd Wẽnnaam tõogã ye. La pa Wẽnnaam n kõ-b no-kãng ye.

A Zeezi sẽn pa tũ Fariizẽ-rãmbã minungã ling-b lame. A bãnga rẽ, n yeel-b yaa: “Yãmb Fariizẽ-dãmbã, yãmb nedgda wamã ne laasã poaya, la yãmb pʋsã pida ne fãab la wẽnga. Ka-yam-dãmba, ka sẽn maan-a yɩngã n maan pʋgẽ wã me la?”—Luk 11:39, 40.

Pa Fariizẽ-rãmbã sẽn pɛgsd b nus n yaool n dɩ wã la yellã ye. Yaa b sẽn yaa zãmb-dãmbã. Bãmb ne neb a taab ra maaname tɩ nusã pɛgb lebg wa minung sẽn yaa tɩlɛ, n yaool n da pa yɩlgd b sũyã ye. Rẽ n so t’a Zeezi sagl-ba, n yeele: “Kõ-y naong rãmbã ne y sũyã fãa, la bũmbã fãa na n yɩɩ yolgemd yãmb yĩnga.” (Luk 11:41) A Zeezi gomdã yaa sɩda! D sã n na n kõ d to kũuni, segd n yɩɩ d sẽn nong-a yĩnga, la pa d sẽn dat tɩ nebã yã n pẽg-do, n yeel tɩ d yaa nin-tɩrg ye.

Pa yet tɩ Fariizẽ-rãmbã ra pa kõatb ye. A Zeezi meng yeela woto: “Yãmb yaooda mant ne ru la zẽ-vãad buudã fãa piig-pʋɩyã, n yaool n basd tɩrlem la Wẽnnaam nonglem. Yaool n yaa bõn-kãensã la yãmb tog n maane, la y ra bas sẽn ketã me ye.” (Luk 11:42) Wẽnnaam tõogã wilgame tɩ ned fãa yãk a koodã pʋɩɩr a ye piig fãa zug n kõ yẽ. (Tõodo 14:22) Mant ne ru wã me ra naagame. Yaa zẽ-vãad buud sẽn paasd rɩɩb yũug noom. Fariizẽ-rãmbã ra sakd n yãkda mant ne ru wã pʋɩɩr a ye piig fãa zug n kõtẽ, n yaool n pa tũud tõogã noy nins sẽn tar yõod n yɩɩdã ye. Wala makre, b ra segd n maana sẽn yaa tɩrga, la b sik b mens n sak Wẽnnaam.—Miise 6:8.

A Zeezi paasa woto: “Yãmb Fariizẽ-dãmbã, y na paam toogo! Bala, yãmb nonga pipi zaoog karen-dotẽ wã, la y nong nebã sẽn pʋʋsd yãmb daasẽ wã. Yãmb na paam toogo! Bala, yãmb yaa wa yaado, bũmb sẽn ka wilgd b zĩiga, tɩ neb tabd n ka miẽ ye.” (Luk 11:43, 44) Sɩd me yaoog sã n sarme, ned tõe n kẽna a zug n ka bãng ye. La baa a sẽn pa bãngã, a lebga rẽgd wa tõogã sẽn wilgã. A Zeezi rɩka mak-kãngã n na n wilg tɩ Fariizẽ-rãmbã rẽgdã yaa bũmb nebã sẽn pa ne.—Matye 23:27.

Tõog karen-saamb a ye n zĩnd be n yeel a Zeezi yaa: “Karen-saamba, yãmb sẽn gomd a woto wã, yãmb paoogda tõnd me.” Tõog karen-saam-dãmbã ra segdẽ lame n bãng tɩ b pa sõngd nebã ye. A Zeezi yeela woto: “Yãmb tõog karen-saam-dãmbã me na n paama toogo! Bala, yãmb dɩkda zɩɩbo, a tʋkr sẽn yaa toog n tʋkd nebã, tɩ yãmb mensã yaool n ka sɩɩsd-b ne y nug-bil ye. Yãmb na paam toogo! Bala, yãmb meta Wẽnnaam no-rɛɛsdbã yaado, tɩ yaool n yaa yãmb ba-rãmbã n kʋ-ba.”—Luk 11:45-47.

Yaa ninsaalbã minundã, n paas Fariizẽ-rãmbã sẽn golem tõogã noy tɩ lebg dem-demã la a Zeezi sẽn bool tɩ zɩɩbã. Nin-kãensã ra kɩtame tɩ nebã vɩɩm lebg toog wʋsgo. B ra modgda nebã fãa tɩ b tũud bãmb raabã sẽn da lebg zɩɩb wʋsgã. Bãmb ba-rãmbã n kʋ Wẽnnaam no-rɛɛsdbã, sẽn sɩng ne a Abɛlle, tɩ bãmb mensã met no-rɛɛs-kãens yaado, tɩ yaa wa b waoogd-b lame. Yaool n wilgdame tɩ b rɩkda b ba-rãmbã togs-n-taare. B baoodame meng n na n kʋ Wẽnnaam no-rɛɛs-kãsengã. A Zeezi wilg-b lame tɩ Wẽnnaam na n ninga b zãmaanã taale. Sɩd yɩɩ woto yʋʋm 38 poore, rat n yeel tɩ yʋʋmd 70 soabã.

A Zeezi le yeela woto: “Yãmb tõog karen-saam-dãmbã, yãmb na paam toogo! Bala, yãmb feooga bãngr kʋɩlen-bilã. Yãmb mens ka rat n kẽ ye, la y gɩdgda neb nins sẽn dat n kẽ wã tɩ b ka tõe n kẽ ye.” (Luk 11:52) Bãmb n da segd n sõng nebã tɩ b wʋm Wẽnnaam Gomdã võore, la b pa maan woto ye. B pʋd n da kɩtame tɩ nebã pa paamd n wʋm Wẽnnaam Gomdã võor ye.

Fariizẽ-rãmbã ne tõog karen-saam-dãmbã manesem yɩ wãna? B sũyã yikame. A Zeezi sẽn wa n dat n loogã, b sɩngame n sokd-a sogsg wʋsgo. La pa b sẽn da rat n bãng n paas ye. B ra rat n bẽda a Zeezi a goamã pʋgẽ, n paam n yõk-a.