Sak 76

Fariziẽ n bool a Zezi t’a wa rɩ a yiri

A ZEZI rag n leokda a sãbsdbã sẽn da pa sak tɩ tõog ning a sẽn paam n sãoog rao wã sẽn da yaa mukã yita Wẽnnaam nengẽ wã. Rẽ poore Fariziẽ n bool-a t’a wa rɩ a yiri. Fariziẽ rãmbã ra minim n pɛgsda b nus n tɩ ta kãntɩɩs n yaool n dɩ. B ra maanda woto me rɩɩbã poore, baa rɩɩb ne a to sʋk menga. Yaa sɩd tɩ rog-n-mik a woto pa kɩɩsd Wẽnnaam Tõogã ye, la a yaa n zʋʋga Wẽnnaam sẽn baood tɩ b maan sẽn na yɩl n yɩ yɩlemd tũudmã wɛɛngẽ wã.

A Zezi sẽn ka tũ rog-n-mik kãngã wã, linga Fariziẽ wã, la a ka gom ye. A Zezi bãnga rẽ, n yeele: “Yãmb Fariziẽ dãmba, yãmb nedgda wamd ne lengr poore, la yãmb pʋsa yaool n pida ne wagdem la wẽng ratem. Yalemba! Ka sẽn naan-a poorã n naan pʋga me la?”

Woto a Zezi puka Fariziẽ rãmbã bãongo, bala b tũuda minungã n pɛgsd b nusi, la b ra ka pekd b sũyã n yiis wẽnemã ye. A sagl-b-la woto: “Dɩk-y y sũura sẽn gãd bũmb ningã n maan wẽn-kosgo tɩ sẽn keta fãa na yɩ yɩlgemde y yĩnga.” (Sebr Sõngo) Yaa sũur sẽn pid ne nonglem n da segd n kɩt tɩ b kõ kũuni, la b ka segd n tʋll n dɩ yʋʋr neb a taabã taoor n maand wa b yaa tɩrs ye.

A Zezi paasame: “Fariziẽ dãmba, yãmb na paam toogo. Tɩ bõe, yãmb yãkda piig pʋɩɩr ne mant la ru la ne zẽed buud fãa, la yãmb ka get Wẽnnaam tɩrlmã ne b nonglmã ye. Yaa bãmb la yãmb tog n maane la y ra bas bũmb a taaba me ye.” Tõogã Wẽnnaam sẽn kõ Israɛllã ra baoodame tɩ b yãk b koodã biis n yao piig pʋɩɩre, bɩ dʋr a yembr piig zugu. Mantã la ru wã yaa zẽ-vãad bɩ zẽ-biis b sẽn dɩkd n maand noosdo. Fariziẽ rãmbã ra gũusda neer n yaood zẽ-kãensã yõod sẽn ka waoog wʋsgã dʋr a yembr piig zugu. La a Zezi ning-b-la taale, b sẽn bas n ka tũ noy sẽn tar yõod n yɩɩda sẽn yaa wilg nonglem, yɩ nin-sõng la tall sik-m-mengã.

A Zezi leb n ning-b-la taal n yeele: “Fariziẽ dãmba, yãmb na paam toogo. Tɩ bõe, yãmb nonga naam zĩndg zĩisẽ karen-dot pʋse, la yãmb nonga neb pʋʋsg raas pʋse. Yãmb na paam toogo. Tɩ bõe, yãmb wẽnda yaad sẽn sarem tɩ neb kẽnd b zut n ka mi ye.” B rẽgdã pa bũmb nif sẽn ne ye. Fariziẽ rãmbã tũudum ka bark ye, bala a yaa maan tɩ neb yã tũudum. A ra yaa pʋ-lika.

Tõog karen-saamb a yembr sẽn yaa Tõogã mita, n da kelgd a Zezi sẽn ningd Fariziẽ rãmbã taalã. A wilga a sũ-pa-noom n yeele: “Karensaamba, yãmb sẽn gomd woto wã, yãmb paoogda tõnd me.”

A Zezi ninga Tõogã mitb taal me, n yeele: “Tõog karen-saam dãmba, yãmb me na paam toogo. Tɩ bõe, yãmb tʋkda neb zɩɩb sẽn yaa zɩsgo, la yãmb mens ka sɩɩsd-a ne y nug-bil ye. Yãmb na paam toogo. Tɩ bõe, yãmb meta Wẽnnaam no-rɛɛsdba yaado, la yaa yãmb yaab rãmba n da kʋ bãmba.”

Zɩɩb ning yell a Zezi sẽn gomd ka wã yaa rog-n-mikã noyã b sẽn taas noor ne noorã. La tõog karen-saam-kãensã ra pa na n sak n bas baa yaa noor a yembr tɩ lʋɩ, sẽn na yɩl n yols nebã ye. A Zezi vẽneg n togsame tɩ b tol n saka b sẽn da kʋ no-rɛɛsdbã n keoog-b woto: “Wẽnnaam no-rɛɛsdba fãa zɩɩm sẽn daag hal dũniyã sɩngre tɩ ta masã wã [na] zĩnd zamaan kãngã neba zutu, hal sẽn sɩng ne a Abɛll zɩɩm tɩ ta a Zakari zɩɩm b sẽn kʋ tẽn-kugra ne Wẽnnaam dooga sʋkã. N-ye, mam yeta yãmba tɩ fãa na n zĩnda zamaan kãngã neba zutu.”

Yaa ne a Ãdem la a Hawa kambã la ninsaalb nins b sẽn tõe n fãagã dũni sɩng-yã. Rẽ n so t’a Abɛll vɩɩmd ‘dũniyã sɩngrẽ.’ A Zakari kʋʋbã poore, Siiri sodaas n wa n sãam Zida. La a Zezi reng n togsame tɩ sãoong sẽn yaa wẽng n yɩɩd n da gũud yẽ zãmaana neba, b wẽnemã sẽn yaa kãseng n yɩɩda yĩnga. Sãoong a woto sɩd waa yʋʋm 38 loogr poore, yʋʋmd 70 wã pʋgẽ.

A Zezi leb n ning-b-la taal n yeele: “Tõog karen-saam dãmba, yãmb na paam toogo. Tɩ bõe, yãmb yiisa bãngr kʋɩlen-biiga. Yãmb ka rat n kẽ ye, la y ka rat n bas neb nins sẽn dat n kẽ wã me tɩ b kẽ ye.” Ra yaa Tõogã mitb n segd n zãms nin-buiidã Wẽnnaam Gomdã, n wilg-b a võore. La b ka maan dẽ ye. B pa tol n kõ neba sor meng tɩ b wʋm a võor ye.

Fariziẽ rãmbã la Tõogã mitb sũy yika ne a Zezi, a sẽn puk b bãongã yĩnga. A Zezi sẽn yi zakẽ wã, b wa n gũm-a lame, n pig-a ne sogsgo. B ra baoodame n dat t’a yeel bũmb tɩ b tõog n tũnug ne rẽ n kɩt tɩ b yõk-a. Luk 11:37-54; Tõodo 14:22; Miise 6:8; 2 Kibaya 24:20-25.

▪ Bõe yĩng t’a Zezi ning Fariziẽ rãmbã la Tõogã mitb taale?

▪ Zɩɩb bʋs la tõogã karen-saam dãmb zɩlg nebã?

▪ ‘Dũniyã sɩngr’ yɩɩ wakat bʋgo?