Sak 110

A Zezi baasa a moonegã wẽnd-doogẽ wã

A ZEZI yaoolem waoong wẽnd-doogẽ wã la woto. Yɛl nins sẽn da na n maan ratãt-n-daarã sẽn yɩ a bʋʋdã la a kʋʋbã raarã sẽn yãk b toogo, ra ya a Zezi tʋʋmdã tẽng zug baasg la woto. Masã, a Zezi kell n kẽnga taoor ne gʋlsdbã la Fariziẽ rãmbã taal ningri.

Naoor a tãabo a leb n zẽka a koɛɛg n yeele: “Gʋlsdba ne Fariziẽ dãmba, zãmb dãmba, yãmb na paam toogo.” Pipi a yeelame tɩ b na paam toogo, bala bãmb nedgda “wamde la lengr poore, la bãmb pʋsa pida ne fãabo la yĩng ratem sakre.” Dẽ a yeelame: ‘Deng-y n nedg wamda ne lengra pʋga tɩ b poɛya me yɩ yɩlma.’

Rẽ poore a yeelame tɩ gʋlsdba la Fariziẽ rãmbã na paam toogo, bala b pida ne rẽgdo n baoodẽ n na n solg rẽ, n maand wa b yaa wẽn-zoɛtba. A yeelame: “Yãmb wẽnda yaad sẽn pelge tɩ b yɩng yaa neere, la b pʋsa pid ne kũum kõaba la bõn-dẽgd fãa.”

Sẽn na n baase, sẽn wilgd tɩ b yaa pʋ-lik rãmbã yaa b sẽn sakd n met Wẽnnaam no-rɛɛsdba yaad la b nagsd-b sẽn na yɩl tɩ neba yã n tẽ tɩ b yaa yel-sõm-maandba. La wa a Zezi sẽn vẽneg n togsã, b “yaa neb nins sẽn kʋ Wẽnnaam no-rɛɛsdba kamba.” Sɩd me, ned ning fãa sẽn na n deem n puk b bãong fãa, yẽ soab paam yelle!

A Zezi kẽnga taoor ne a taal ningr goam nins sẽn tall pãng n yɩɩdã, n yeele: “Yãmb wẽnda wiis sẽn yaa wag-toos buudu. Yãmb na n yɩɩ wãn n põs [Zeyɛnnã sɩbgre]?” Zeyɛn yaa long b sẽn dɩk tɩ yaa Zerizalɛm tãmpʋʋre. Dẽ, a Zezi ra yetame tɩ gʋlsdbã la Fariziẽ rãmbã sã n ka bas b wẽnemã, b na n paama sãoong wakat sẽn-kõn-sa yĩnga.

A Zezi yeela woto neb nins a sẽn tʋmd tɩ b tɩ moonã wɛɛngẽ: “Yãmb na n kʋʋ kẽere la y ka kẽer kũum [da-lugs] zutu, yãmb na n pãba kẽer ne kalwaas yãmb karen-dot pʋsẽ, la yãmb na n namsa bãmb tẽng-tẽnga, tɩ nin-tɩrs fãa zɩɩm sẽn daag dũniyã zug zĩnd yãmb zut sẽn sɩng ne nin-tɩrg a Abɛll zɩɩm hal tɩ ta a Baraki [b sẽn bool tɩ Zehoyada, Yiib soab Kɩbaya pʋgẽ wã] biig a Zakari zɩɩm, yãmb sẽn kʋ yẽ Wẽnnaam dooga ne tẽng-kugrã sʋkã. Mam yeta yãmb sɩda tɩ bõn-kãens fãa na n zĩnda zãmaan kãngã neba zutu.”

A Zakari sẽn zab Israɛll taoor dãmba yĩngã, “neb sɩɩga taab noor n tɩ kʋ-a. La rĩma kɩtame tɩ b lob-a kug Zusoaba rooga zak pʋgẽ.” La wa a Zezi sẽn da reng n togsã, b na n sɩbga Israɛlle, b sẽn daag nin-tɩrs a woto fãa zɩɩmã yĩnga. Sɩbg-kãng sɩd waa yʋʋm 37 zugẽ yʋʋmd 70 wã pʋgẽ, Rom tãb-biisã sẽn wa n sãam Zerizalɛm, tɩ Zʋɩf rãmb sẽn yɩɩd milyõ ki wã.

A Zezi sẽn tags yel-beed a woto yellã, a sũurã sãamame. T’a leb n zẽk a koɛɛg n yeele: “Zerizalɛm, Zerizalɛm, naoor wʋsgo mam da rat n tigma fo kamba wa no-yãang sẽn põgend a kamba a pɩgsẽ, la fo ka sak ye. Gese, b na n basa fo roog ne foo zaalem.”

Rẽ poore a Zezi paasame: “Sẽn sɩng ne masã, fo kõn leb n yã maam hal tɩ ta daar ninga fo sẽn na n yeele: ‘Bark bee sẽn wat-a ne [a Zeova] yʋʋra zugu!’ ” Wakat kãng ra na n yɩɩ Kiristã belem sasa, sẽn yaa wakat ning a sẽn na n wa a saasẽ Rĩungã pʋgẽ tɩ neb nin yã-a tẽebã wɛɛngẽ wã.

Masã a Zezi kẽnga zĩig ning a sẽn da tõe n yã wẽnd-doogã ligd kogendo, la nebã sẽn da ningd ligdã b pʋsẽ wã. Rakãagbã ra ningda ligd wʋsgo. La rẽ poore pʋg-kõor n wa n ning ligd bõoneg a yiib yõod sẽn paood wʋsgo.

Dẽ, a Zezi boola a karen-biisã n yeel-ba: “Mam yeta yãmb sɩda tɩ pʋg-kõ-kãngã sẽn yaa naong soaba kõ n yɩɩda neba fãa sẽn ning ligd ligda ningr zĩigẽ wã.” B ra tog n sokda b mens ligd bõoneg a yiib sẽn tõe n yɩɩg ligd wʋsg to-to. Dẽ n so t’a yeele: ‘A taaba yãka b sẽn pa tõe n dɩ n sɛ pʋgẽ n kɩse, paga kɩsa a fãa-fãa, a rɩɩb ligd zãnga.’ (Sebr Sõngo) A Zezi sẽn yeel bõn-kãensã poore, a yii wẽnd-doogẽ wã n loog n ka na n tol n le wa be ye.

Wẽnd-doogã bedrem la a neerem yɛɛsa a Zezi karen-biig a yembr t’a zẽk a koɛɛg n yeele: “Karensaamba, ges-y kug ninsi la rot nins sẽn be ka wã.” Sɩd me b yeelame tɩ kugã woglem yɩɩda metr 11, tɩ b yalmã yɩɩd metr a 5, tɩ b zãntlmã yɩɩd metr a 3!

La a Zezi leok-b-la woto: “Yãmb yãa ro-kãsems kãens fãa bɩ? Kugr ba a ye kõn zĩnd a to zugu b sẽn kõn lub ye.”

A Zezi sẽn yeel woto poore, yẽ ne a tʋm-tʋmdbã dʋʋga Sedrõ Longã n dʋ oliiv tɩɩs tãngã. B ra tõe n zĩnda be masã n ges wẽnd-doogã sẽn tar dasãndã sẽn be tẽngrã. Matɩe 23:25–24:3; Mark 12:41–13:3; Luk 21:1-6; 2 Kibaya 24:20-22.

▪ Bõe la a Zezi maan a sẽn da wa n be wẽnd-doogẽ wã a yaoolmã?

▪ Wãn-wãn la gʋlsdbã la Fariziẽ rãmbã pʋ-lik ra pukd vẽenega?

▪ ‘Zeyɛnnã sɩbgr’ võor yaa bõe?

▪ Bõe yĩng t’a Zezi yeel tɩ kũunã pʋg-kõorã sẽn kõ wã yɩɩda rakãagbã rẽnda?