Sak 125

A Zezi namsgã ra-lukã zugu

FÃADB a yiib la b tall n na n tɩ naag a Zezi n kʋ. Neba tek n yalsa zĩig sẽn ka zãr ne galʋ-tẽngã, tɩ b boondẽ tɩ Golgota, bɩ Zu-wang Zĩiga.

B piida neb nins b sẽn na n kʋ wã futu. Rẽ poore b kalma divẽ ne tɩɩm n kõ-b tɩ b yũ. Wõnda yaa Zerizalɛm pagbã n segl-a n wa ne, la Rom dãmbã ka gɩdgd tɩ b ra kõ neb nins b sẽn na n kʋ wã tɩ-kãngã sẽn kʋʋd yĩng zabdmã ye. La a Zezi sẽn lemb-a n gese, a zãgsame t’a kõn yũ ye. Bõe yĩnga? Yaa vẽeneg t’a ra ratame t’a yamã vẽen sõma, a sã n wa be a tẽebã makr ning sẽn yaa kãseng n yɩɩdã pʋgẽ.

Masã b gãnega a Zezi n tũnug ne raoogã woglem, n ning a nusã zugẽ. Rẽ poore sodaasã rɩka põent bɛd n mag a nusã ne raoogã n ka, la b mag a nao wã me ne raoogã n ka. Põent rãmbã sẽn da wa n kõsd nemsã la gĩinã n poodẽ wã, toogã kɩtame t’a Zezi ra tɩrdẽ. B sẽn da wa n doogd raoogã, toogã ra ka tõe n bãng n bilg ye, bala yĩngã sẽn zɩsã ra takda põent rãmbã tɩ sãmpogrã yãsgd n paasdẽ. Ne rẽ fãa, a Zezi ka gom Rom sodaasã wẽng ye, a pʋʋsa b yĩng woto: “M Ba, kõ-y bãmb sugri, tɩ b ka mi b sẽn maand bũmb ninga ye.”

A Pɩlat gʋlsa bãnd n ning ra-lukã zugu, tɩ ra yet woto: “Nazarɛt dao a Zezi sẽn yaa Zʋɩf rãmba rĩma.” Wõnda a sẽn gʋls woto wã, ka sẽn na yɩl n wilg t’a waoogda a Zezi bal ye, yaa sẽn na yɩl n wilg a sũ-pa-noaang ne Zʋɩf rãmbã sẽn modg-a t’a kao a Zezi bʋʋd tɩ b kʋ-a wã. A Pɩlat gʋlsa bãndã ne buud-goam a tãab sẽn na yɩl tɩ neba fãa tõog n karme. Gom-kãens yaa hebre, latẽ, la gɛrk ning nin-buiidã sẽn da gomdã.

Woto sãama a Kayɩf ne a Ann la maan-kʋʋdba kãsem dãmb a taab sũy wʋsgo. Gʋlsem kãngã sẽn pẽgd a Zezi wã kɩtame tɩ b raabã fãa ka pids ye. Rẽ n so tɩ b ra zabd n yetẽ: “Bɩ y ra gʋls tɩ Zʋɩf rãmbã rĩm ye. Bɩ y gʋls tɩ bãmb yeelame: Mam yaa Zʋɩf rãmba rĩma.” Maan-kʋʋdbã sẽn tũnug ne a Pɩlat n pids b raabã kãbga a sũur wʋsgo, hal t’a leok-b ne pa-nandem woto: “Bũmb ninga mam sẽn gʋlsã, mam gʋlsame.”

Masã maan-kʋʋdbã ne kʋʋng sẽn yaa kãseng n da tigim kʋʋbã zĩigẽ, tɩ maan-kʋʋdbã ra kɩɩsd kaset ning sẽn gʋls bãndã zugã. B leb n togsa ziri kaset ning b sẽn dag n kõ bʋʋdã zĩigẽ Sãnedrẽ wã n yɩlem. Woto yĩnga, ka lingr tɩ loaagdbã me ra tʋʋda, la b gird b zut la b paoogd-a ye. B ra yetame: “Yãmb sẽn tõe n sãam Wẽnnaam doog n leb n me-a rasem a tãab pʋgẽ, bɩ y fãag y menga. Yãmb sã n yaa Wẽnnaam Biiga, bɩ y wa n sig kũum [da-luka] zugu.”

Maan-kʋʋdbã kãsem dãmb ne b poorẽ dãmbã me ra naagame n yetẽ: “Bãmb fãaga neb a taaba, la b ka tõe n fãag b meng ye. Bãmb sã n yaa Israɛll dĩma, bɩ b sig kũum [da-luka] zugu, la tõnd na tẽ bãmba. Bãmb da teega Wẽnnaam, bɩ Wẽnnaam fãag bãmb masã, b sã n nong bãmba. Tɩ bõe, b ra yeelame tɩ b yaa Wẽnnaam Biiga.”

Sẽn lebg woto wã, sodaasã me naaga nebã n yaand a Zezi. Wãn to? Yaa wala b ra rɩkda rã-miising n pẽnegd a no-bɩmsã ko-yũudã sẽn kʋɩɩsã, la b ka sakd t’a lemb ye. B ra yeta woto n yaand-a: “Yãmb sã n yaa Zʋɩf rãmba rĩm bɩ y fãag y menga!” Baa fãadbã b sẽn da ka a goabg la a rɩtgã ra yaand-a lame. Yãmb wee n tagse! Zãmaan fãa nin-kãseng sẽn ka to wã, n-ye, a soab ning sẽn naag Wẽnnaam a Zeova n naan bũmb fãa wã, la b ra yaand woto!

Sodaasã rɩka a Zezi zugẽ futã n welg zĩis a naase. B maana bãnd n na n bãng b rãmb nins sẽn na n soog-bã. La tẽngr fuugã sẽn da ka tar sẽnesmã ra yaa fu-sõng wʋsgo. Dẽ sodaasã yeela taaba: “Bɩ d da kẽeg-a ye. Bɩ d maan bãnd n bãng ned ninga sẽn na n paam-a.” Dẽ b pidsa Gʋlsg Sõamyã sẽn yet woto wã n ka bãng ye: “Bãmb pʋɩɩ mam fut ne taaba. La bãmb maana bãnd ne mam fuug a yembre.”

Ned a yembr fãadb a yiibã sʋk n wa n bãng t’a Zezi sɩd tog n yaa rĩma. Rẽ n so t’a zab a bi-be-taagã n yeel-a: “Fo ka zoet Wẽnnaam la? B kaoo fo bʋʋd wa bãmba. Tõnd bʋʋd zemsame, tɩ bõe, tõnd paama yaood sẽn zems tõnd tʋʋm wẽnse, la rao kãng ka maan bũmb sẽn yaa wẽng ye.” Rẽ poore a goma ne a Zezi n kos-a woto: “Yãmb sã n wa reeg y naama, bɩ y tẽeg mam yelle.”

A Zezi leokame: “Sɩd-sɩda mam yeta foo rũndã, fo na n zĩnda ne maam Arzãna pʋgẽ.” (NW ) Kãab kãngã na n wa paama pidsg wakat ning a Zezi sẽn na n wa rɩt naam saasẽ wã. Wakat kãng la a na n vʋʋg wẽng maand kãng sẽn tek yam n kos sugrã Arzãnã pʋgẽ tẽngã zugu. Yaa Arzãn kãng la Armagedõ põsdbã la neb a taabã sẽn na n zĩnd be ne-bã na n paam zu-noog n ges a yelle. Matɩe 27:33-44; Mark 15:22-32; Luk 23:27, 32-43; Zã 19:17-24.

▪ Bõe yĩng t’a Zezi zãgs t’a kõn yũ divẽ wã b sẽn kalem ne tɩɩmã?

▪ Wõnda yaa bõe yĩng n kɩt t’a Pɩlat gʋls bãndã n ning a Zezi ra-lukã zugu, la rẽ waa ne kɩɩs-bʋg a Pɩlat ne maan-kʋʋdbã kãsem dãmb sʋka?

▪ Yaal-bʋg yɛs la b le yaal a Zezi ra-lukã zugu, la yaa bõe n wa ne rẽ?

▪ Wãn to la b sẽn maan a Zezi futã bũmb ningã pids bãngr-gomde?

▪ Yam tekr bʋg la fãad a yembrã maan-yã, la wãn-wãn la a Zezi na n sak a kosgã?