Zãmsg 13

Wãn-wãn la y tõe n bãng sɩd tũudmã n welge?

Yaa tũudmã fãa n tat Wẽnnaam yam bɩ, bɩ yaa a ye bala? (1)

Bõe yĩng tɩ neb nins sẽn yet tɩ b yaa kiris-nebã tũudum welg toor-toore? (2)

Wãn-wãn la y tõe n bãng kiris-neb hakɩkã n welge? (3-7)

1. Yaa kiris-neb tũudum a yen tãa la a Zezi lugl-yã. Rẽ n so tɩ rũndã-rũndã me, yaa Wẽnnaam a Zeova balemdb hakɩk sull a ye bal n segd n beẽ. (Zã 4:23, 24; Efɛɛz rãmba 4:4, 5) Biiblã yetame tɩ yaa neb sõor sẽn paood bal n tũud so-bãanegã sẽn tar n debd vɩɩm zĩigẽ wã.—Matɩe 7:13, 14.

2. Biiblã pĩnd n togsame t’a Zezi tʋm-tʋmdbã kũum poore, ziri zãmsg la tʋʋm sẽn pa zems ne kiris-nedemdã ra na n kẽe kiris-neb tigingã pʋgẽ bilf-bilfu. Neb n da na n yik n tudg tẽedb kẽer tɩ b bas Kiristã n tũ-ba. (Matɩe 7:15, 21-23; Tʋʋma 20:29, 30) Yaa rẽ n kɩt tɩ rũndã-rũndã, tũudum wʋsg yetẽ tɩ b tũuda Kiristã. La wãn-wãn la d tõe n bãng kiris-neb hakɩkã n welge?

3. Pipi bũmb ning sẽn kɩtd tɩ b bãngd kiris-neb hakɩkã n welgã yaa nonglem ning b sẽn tar ne taabã. (Zã 13:34, 35) B pa zãmsd-b tɩ b tags tɩ b yaa sõma n yɩɩd buud a taab neb bɩ neb nins yĩn-kõbg sẽn yaa toorã ye. B leb n pa zãmsd-b tɩ b kisg tẽns a taabã neb ye. (Tʋʋma 10:34, 35) Rẽ n so tɩ b pa kẽesd b mens tẽnsã zab pʋsẽ wã. Kiris-neb hakɩkã geta taab wala saam-biisi.—1 Zã 4:20, 21.

4. Bũmb a to me sẽn kɩtd tɩ b bãng sɩd tũudmã n welgã yaa a nebã sẽn nand Biiblã wʋsgã. B sakame t’a yaa Wẽnnaam Gomde, la b tẽed a sẽn yet bũmb ningã. (Zã 17:17; 2 Tɩmote 3:16, 17) Ne bãmba, Wẽnnaam Gomdã sẽn yetã n tar yõod wʋsg n yɩɩd ninsaalb tagsa la b minimdu. (Matɩe 15:1-3, 7-9) Daar fãa, b modgdame n tũud Biiblã noyã. Woto yĩnga, b pa moond bal ye, b tũuda bũmb ning b sẽn moondã me.—Tɩt 1:15, 16.

5. Sɩd tũudmã segd n waooga Wẽnnaam yʋʋrã me. (Matɩe 6:9) A Zezi kɩtame tɩ nebã bãng Wẽnnaam yʋʋrã sẽn yaa Zeova wã. Yaa woto la kiris-neb hakɩkã me segd n maane. (Zã 17:6, 26; Rom dãmba 10:13, 14) Tũudum bʋg neb n be yãmb tẽngẽ wã n wilgd nebã Wẽnnaam yʋʋrã?

6. Kiris-neb hakɩkã segd n moona Wẽnnaam Rĩungã. Yaa woto la a Zezi maan-yã. A ra gomda Wẽnnaam Rĩungã yell wakat fãa. (Luk 8:1) A kõo a karen-biisã me noor tɩ b moon Rĩung kãng koɛɛgã dũniyã gill zugu. (Matɩe 24:14; 28:19, 20) Kiris-neb hakɩkã kɩsa sɩd tɩ yaa Wẽnnaam Rĩungã bal n na n wa ne laafɩ la bãan hakɩk tẽngã zugu.—Yɩɩl Sõamyã 146:3-5.

7. A Zezi karen-biisã pa segd n yɩ dũni wẽng kãngã rẽnd ye. (Zã 17:16) B pa kẽesd b toog dũniyã politik yɛl bɩ a nebã tak-tɩ-m-takã pʋgẽ ye. B lakda b mens ne minimd la yel-manesem wẽnsã sẽn wɛ dũniyã pʋgẽ wã. (Zak 1:27; 4:4) Rẽ yĩnga yãmb mii tũudum sẽn be yãmb tẽngẽ wã, t’a nebã manesem zems ne bũmb nins b sẽn sõdg ka wã sẽn kɩtd tɩ b bãng kiris-neb hakɩkã bɩ?

[Foto rãmba, seb-neng 26, 27]

Kiris-neb hakɩkã nonga taaba, b nanda Biiblã wʋsgo, la b moond Wẽnnaam Rĩungã