SAK 10
Y maanda wãn n bãng tũudum hakɩkã?
1. Tũudmã fãa yaa sõma bɩ?
“Gũus-y yãmb mens ne zãmb bãngdbã.”—MATƖE 7:15.
A Zezi lugla tũudum a ye tãa. Rẽ la tũudum hakɩkã. A mak-a-la ne so-buk sẽn debd vɩɩm sẽn kõn sa zĩigẽ, la a yeel t’a “yãtb yaa bilfu.” (Matɩe 7:14) Yaa tũudum ning neb sẽn sakd Biiblã sẽn yetã bal n tat Wẽnnaam yam. Tũudum hakɩkã nebã sẽn tẽed bũmb ninsã fãa yaa a ye.—Karm-y Zã 4:23, 24; 14:6; Efɛɛz rãmb 4:4, 5.
Ges-y video wã Tũudmã fãa tata Wẽnnaam yam bɩ?
2. A Zezi ra pĩnd n keooga kiris-nebã ne bõe?
“B yetame tɩ b mii Wẽnnaam, la ne bãmb tʋʋmã bãmb kɩɩsda Wẽnnaam.”—TƖT 1:16.
A Zezi ra keooga kiris-nebã tɩ b gũus tɩ neb n na n wa yik n zãmsd b taabã yɛl sẽn pa sɩda. Nin-kãensã maanda wa b yaa kiris-neba. B yetame tɩ b tũuda Kiristã. La y sã n ges neere, y bãngdame tɩ b pa kiris-neb hakɩk ye. Bõe yĩnga? Bala yaa tũudum hakɩkã bal n sõngd nebã tɩ b toeemd b zʋgã la b manesmã, tɩ ned fãa tõe n yã.—Karm-y Matɩe 7:13-23.
3. Wãn to la y tõe n bãng kiris-neb hakɩkã n bake?
Ad bũmb a nu sẽn tõe n sõng-yã:
Kiris-neb hakɩkã kɩsa sɩd tɩ Biiblã yaa Wẽnnaam Gomde. B modgd n tũuda Biiblã sẽn yetã. Woto yĩnga, tũudum hakɩkã pa zãmsd nebã ninsaalb tagsa ye. (Matɩe 15:7-9) Kiris-neb hakɩkã tũuda bũmb nins b sẽn zãmsd nebã. B pa yet n yaool n pa tũudẽ ye.—Karm-y Zã 17:17; 2 Tɩmote 3:16, 17.
Kiris-neb hakɩkã waoogda Wẽnnaam yʋʋrã sẽn yaa Zeova wã. A Zezi ra waoogda Wẽnnaam yʋʋrã, bala a wilg-a-la nebã. A zãmsa nebã tɩ b bãng Wẽnnaam, la a yeel-b tɩ b pʋʋs t’a yʋʋrã paam waoogre. (Matɩe 6:9) Yãmb sẽn beẽ wã, yaa tũudum bʋg n wilgd nebã Wẽnnaam yʋʋrã?—Karm-y Zã 17:26; Rom dãmb 10:13, 14.
Kiris-neb hakɩkã moonda Wẽnnaam Rĩungã koɛɛga. Wẽnnaam tʋma a Zezi t’a wa moon Rĩungã koe-noogo. Yaa Wẽnnaam Rĩungã bal n yaa ãdem-biisã zu-loees tɩɩm. A Zezi kell n goma Rĩungã yell n tãag a kũumã. (Luk 4:43; 8:1; 23:42, 43) A yeelame t’a karen-biisã na n moona Rĩungã koɛɛgã. Ned sã n yeel-y t’a rat n taas-y-la Wẽnnaam Rĩungã koɛɛga, y na n zoe n tagsame tɩ yaa tũudum bʋg neda?—Karm-y Matɩe 24:14.
Kiris-neb hakɩkã pa kẽesd b toog dũniyã yɛlẽ ye. B sẽn pa kẽesd b toog politikã la zabã pʋgẽ wã yĩnga, y tõe n bãng-b lame n bake. (Zã 17:16; 18:36) Sẽn paase, b pa wõnd dũni-kãngã nebã sẽn tar manesem la zʋg-wẽnsã ye.—Karm-y Zak 4:4.
Kiris-neb hakɩkã nonga taaba. B sẽn tũud Biiblã kɩtame tɩ bu-welsg pa be b sʋk ye. Naoor wʋsgo, ziri tũudmã rãmb kẽesda b toog tẽnsã zabẽ, la kiris-neb hakɩkã yẽ pa maand woto abada. (Miise 4:1-3) B pʋd n dɩkda b sẽkã la b tarmã n sõngd nebã la b kengd b raoodo.—Karm-y Zã 13:34, 35; 1 Zã 4:20.
4. Y na n tõog n bãnga tũudum hakɩkã n bak bɩ?
Tũudum bʋg n be, t’a sẽn zãmsd nebã bũmb ninsã fãa yit Biiblã pʋgẽ, t’a nebã waoogd Wẽnnaam yʋʋrã, la b moond tɩ yaa Wẽnnaam Rĩungã bal la ãdem-biisã zu-loees tɩɩm? Tũudum bʋg neb n nong taaba, la b pa kẽesd b toog tẽnsã zabẽ? Yaa bʋgo?—Karm-y 1 Zã 3:10-12.