M maanda wãn n bãng tũudum hakɩɩkã?

Biiblã sẽn yete

Biiblã pʋgẽ, b rɩka makr n wilg welgr ning sẽn be neb nins sẽn tũud tũudum hakɩɩkã ne sẽn pa tũud-bã sʋka. Ad b sẽn yeele: “Biis nins bãmb sẽn womdã n na n kɩt tɩ yãmb bãng-ba. . . . Tɩ-sõng fãa womda bi-sõama, la tɩ-wẽng fãa womda bi-yoodo.” (Matye 7:16, 17) Rẽ yĩnga, yãmb pa tõe n bãng tɩ-sõng ne tɩ-yook n bak sɩda? Woto me, yaa tũudum hakɩɩkã biisẽ la d tõe n bãng-a n welg ne tũudum ning sẽn pa tat Wẽnnaam yamã. Ad bũmb a wãn sẽn tõe n sõng-yã.

1. Tũudum hakɩɩkã sẽn zãmsd nebã bũmb ningã tika Biiblã zugu, la pa tik ninsaalb bãngr bɩ filozofi-rãmb zug ye. (Zã 4:24; 17:17) Wala makre, tũudmã hakɩɩkã zãmsda nebã sɩdã sɩɩgã wɛɛngẽ la b wilgdẽ tɩ b tõe n wa paam n vɩɩmda wakat sẽn kõn sa arzãna pʋgẽ tẽngã zugu. (Yɩɩn-sõamyã 37:29; Ezayi 35:5, 6; Ezekɩyɛll 13:18) Sẽn paase, tũudum hakɩɩkã lukda tũudum nins sẽn pa tat Wẽnnaam yamã bãongo.​—Matye 15:9; 23:27, 28.

2. Tũudum hakɩɩkã neb sõngda neb a taabã tɩ b bãngd Wẽnnaam, la b bãngd a yʋʋrã sẽn yaa Zeova wã. (Yɩɩn-sõamyã 83:18, Bible de Crampon; Ezayi 42:8; Zã 17:3, 6) B pa zãmsd nebã tɩ Wẽnnaam yaa dem-deme, bɩ t’a toog kae ne-b ye. B wilgda nebã tɩ Wẽnnaam ratame tɩ b paam a zoodo.​—Zak 4:8.

3. Tũudum hakɩɩkã neb wilgdame tɩ yaa ne a Zeezi Kirist maasem bal la Wẽnnaam na n fãag ninsaalbã. (Tʋʋma 4:10, 12) B sakda noy nins a Zeezi sẽn kõ wã, la b maood n dɩkd a togs-n-taare.​—Zã 13:15; 15:14.

4. Tũudum hakɩɩkã neb kɩsa sɩd tɩ yaa Wẽnnaam Rĩungã bal n na n welg ninsaalbã zu-loeese. B leb n gomda Rĩungã yell ne yẽesem.​—Matye 10:7; 24:14.

5. Tũudum hakɩɩkã wilgda nebã tɩ b tog n nonga taaba. (Zã 13:35) B zãmsda nebã tɩ b nong nebã fãa, baa ne b minimã, b buud-gomdã la b sẽn yit tẽng ningã sẽn yaa a soaba. (Tʋʋma 10:34, 35) B nonglmã yĩnga, b pa kẽesd b toog zab pʋsẽ ye.​—Miise 4:3; 1 Zã 3:11, 12.

6. Tũudum hakɩɩkã neb pa tar taoor dãmb sẽn deegd yaoodo, b leb n pa kõt sẽn lʋɩt-b taoorã waoogr yʋy ye.​—Matye 23:8-12; 1 Pɩyɛɛr 5:2, 3.

7. Tũudum hakɩɩkã neb pa kẽesd b toog baa bilf politikã yɛlẽ ye. (Zã 17:16; 18:36) La b sakda b tẽngã neb nins sẽn tar zu-sobendã, la b waoogd-b wa sẽn zems Biiblã sẽn yetã. Ad Biiblã sẽn yeele: “Lebs-y rĩm a Sezaar [rat n yeel tɩ pãn-soaadbã] bũmb nins sẽn yaa rĩm a Sezaar dẽnda, la y lebs Wẽnnaam bũmb nins sẽn yaa Wẽnnaam dẽnda.”​—Mark 12:17; Rom dãmbã 13:1, 2.

8. Tũudum hakɩɩkã neb pa tũud Wẽnnaam rok-m-zugẽ ye. B tũuda Biiblã noyã b vɩɩmã nens fãa pʋgẽ. (Efɛɛz rãmbã 5:3-5; 1 Zã 3:18) La rẽ pa kɩt tɩ b yaa dem-dem ye. B tara sũ-noogo, bala b tũuda Wẽnnaam sẽn yaa “sũ-noog buud fãa yẽgrã.”​—1 Tɩmote 1:11, Sebr Sõngo.

9. Tũudum hakɩɩkã neb sõor pa na n yɩ wʋsg ye. (Matye 7:13, 14) Nebã wae n pa nand tũudum hakɩɩkã neb ye. B yaand-b lame la b namsd-ba, b sẽn maand Wẽnnaam daabã yĩnga.​—Matye 5:10-12.

Tũudum hakɩɩkã pa tũudum ning sẽn ‘ta mam yam ye’

D sã n baood tũudum sẽn tat d raab bala, tõe n waa ne yelle. Biiblã pĩnd n togsame tɩ wakat n wat tɩ nebã “na n bao [tũudum] karen-saam dãmb wʋsg sẽn na n togs koɛɛg sẽn noom bãmb bala.” (2 Tɩmote 4:3, Wẽnnaam Sebre, 1983) Sẽn paase, a wilgdame tɩ “Ba a Wẽnnaam taoore,” tũudum n be n yaa “yɩlemde, n ka tar wada.” A sagend-d lame tɩ d tũ tũudum-kãnga, baa neb wʋsg pa nong-a.​—Zak 1:27; Zã 15:18, 19.