Arzãnã kolgame!

Bõn-wẽns nins sẽn maand masã tẽng zugã wilgdame tɩ arzãnã kolgame. Biiblã yeelame tɩ d na n yãa wakat tood tɩ Arzãnã yaool n wa. Tõnd vɩɩ wakat kãng masã! Ad yɛl kẽer Biiblã sẽn yet tɩ ra na n waame wã:

Zab-bɛda. “Buud a yembr na n yika zabr ne buud a to.” (Matɩe 24:7) Bãngr-gom-kãngã pidsame. Yʋʋmd 1914 tɛkã, dũni gill zab a yiib la zab-bõones wʋsg n zĩndi. Neb milyõ rãmb n ki b pʋsẽ.

Bãas sẽn piuugdi. ‘Bã-longds na n zĩnda zĩig-zĩiga.’ (Luk 21:11) Yɩɩ woto bɩ? N-yẽe. Kãnsɛɛr bãaga, sũur bãase, kõs-kʋdgo, weoogã, SIDA wã, la bãas a taab kʋʋ neb milyõ rãmba.

Komã. Dũniyã gill zugu, neb n be n pa paamd n dɩtẽ tɩ sekd-b ye. Koma kʋʋda neb milyõ rãmb yʋʋmd fãa. Woto yaa bãnd a to sẽn wilgd tɩ Arzãnã na n waa ka la bilfu. Biiblã yetame: “La kom na n zĩndame.”—Mark 13:8.

Tẽn-digimdgu. “Tẽn-digimdug na n zĩnda zĩig-zĩiga.” (Matɩe 24:7) Rẽ me sɩd zĩnda tõnd masã zãmaanã. Sẽn yɩɩd neb milyõ n ki tẽn-digimdgã pʋsẽ yʋʋmd 1914 tɛkã.

Nin-wẽnsã. Nebã na n yɩɩ “ligd noangdba,” la “beed dãmba.” B na n yɩɩ neb sẽn “nong dũniyã sũ-noog n yɩɩd Wẽnnaam.” Kambã na n yɩɩ “ba rãmba la ma rãmb kɩɩsdb[a].” (2 Tɩmote 3:1-5) Y pa ne tɩ neb wʋsg n wõnd woto rũndã-rũndã sɩda? B pa waoogd Wẽnnaam baa bilfu, la b namsd neb nins sẽn modgd n dat n bao n bãng Wẽnnaamã.

Bi-beelmã. “Tõogã kɩɩsg paasg” me ra yaa bũmb sẽn da na n zĩndi. (Matɩe 24:12, NW ) Y fãa sɩd neeme tɩ bi-beelmã wẽnem yɩɩda yʋʋm sẽn loogã. Sẽn yaẽ zĩig ning fãa b tõe n zu-f lame, n belg-f n dɩ bɩ n maan-f wẽnga.

Bõn-kãensa fãa wilgdame tɩ Wẽnnaam Rĩungã kolgame. Biiblã yetame: “Yãmb sã n yã tɩ bõn-kãens beeme, bɩ y bãng tɩ Wẽnnaam soolem [Rĩungã, NW ] kolgame.” (Luk 21:31) Wẽnnaam Rĩungã yaa bõe? Yaa Wẽnnaam yĩngr goosneema wã sẽn na n wa ne Arzãn tẽn-kãngã zugu. Wẽnnaam Rĩungã na n ledga ninsaalbã goosneem dãmba.—Daniɛll 2:44.