Manesem nins b sẽn tũnugd ne n moond koe-noogã

B KÕO kiris-nebã noor tɩ b “maan neba buud fãa tɩ b yɩ . . . karem-biisi.” La woto pa rat n yeel tɩ b modg neb a taabã n tuub-b ne pãng ye. A Zezi tʋʋmdã ra yaa “togs naong rãmba koe-noogo,” n “bels sũ-sãoong rãmba.” (Matɩe 28:19; Ezai 61:1, 2; Luk 4:18, 19) A Zeova Kaset rãmbã baoodame n na n maan woto n togsd koe-noog ning sẽn yit Biiblã pʋgẽ wã. Wala no-rɛɛs a Ezekɩɛll sẽn maan to-to pĩnd wẽndẽ wã, rũndã-rũndã me, a Zeova Kaset rãmbã modgdame n na n yã neb nins sẽn “wõosd n yãbd bõn-wẽns nins sẽn maand tẽnga pʋgẽ wã yĩnga.”—Ezekɩɛll 9:4.

Manesem sẽn yaa sõma n yɩɩd b sẽn tũnugd ne n yãt neb nins sẽn namsd masã zu-loeesã yĩngã yaa b sẽn kẽnd zak-zakã. Woto, b modgda sõma n moond zãma wã wa a Zezi sẽn maane, a sẽn ‘saag tẽn-bɛd ne tẽn-bõoneg fãa n moon Wẽnnaam soolem koe-noogã.’ A pipi karen-biisã me maana woto. (Luk 8:1; 9:1-6; 10:1-9) Rũndã-rũndã, sã n tõeyã, a Zeova Kaset rãmbã modgdame n leb n tɩ moon zak fãa naoor wʋsg yʋʋmd pʋgẽ. B baoodame n na n sõs ne zakã neb minit a wãn bal n tik gom-zug bɩ yɛl sẽn pak sakã neb bɩ nebã fãa. B tõe n karma verse a yembr bɩ a yiibu. La koɛɛgã sã n noom nedã, Kaset rãmbã tõe n seglame n lebg n wa wakat sẽn zems sasa n kẽng taoor ne sõsgã. Biibl dãmb la sɛb sẽn tik Biiblã zug beeme. Rẽ, nedã sã n data, b zãmsda Biiblã ne-a tɩ pa tũ ne ligd yaoob ye. B zãmsda Biiblã woto ne neb milyõ rãmb la ne zags neb gill wakat fãa dũniyã gill zugu.

B leb n tũnugda ne tigissã b sẽn maand Rĩungã Rotẽ wã n moond neb a taabã ‘Wẽnnaam soolmã koe-noogã.’ Kaset rãmbã maanda tigissã be semen fãa. Tigisg a yembr yaa sõsg sẽn wɛgsd gom-zug sẽn pak nebã. Rẽ poore, yaa Gũusg Gasgã la b tũnugd ne n zãms Biiblã gom-zug bɩ a bãngr-gomde. Tigisg a to yaa lekoll sẽn kõt Kaset rãmbã zãmsg tɩ b yɩ neb sẽn mi koe-noogã mooneg sõma n yɩɩda. Rẽ poore, yaa tigisg a to sẽn gomd kasetã kũun tigingã mooneg zĩigẽ wã yelle. Sẽn paase, rasem a yopoe fãa, Kaset rãmbã tigimda saam-biis zagsẽ, n yaa sul-bõoneg n zãmsd Biiblã.

Nebã fãa tõe n kẽnga tigis-kãense. B pa kot watbã tɩ b kõ ligd ye. Tigis-kãensã bee nafr ne nebã fãa. Biiblã yetame: “D yik taab ratem tɩ maan nonglem la tʋʋm sõama. Bɩ d da bas taab tiging wa neb kẽer sẽn maanda ye. La bɩ d sagl taaba, la bɩ d sagl n yɩɩda tõnd sẽn yã tɩ daar kolgdame wã yĩnga.” Tara yõod wʋsg tɩ tõnd zãms Biiblã la d maan vaeesg d toore. La d sã n tigimd ne neb a taabã paasda d yẽesmã. “Yam dɩkda zoa yir wa b sẽn dɩkd kut n saas a to wã.”—Hebre dãmba 10:24, 25; Yelbũna 27:17.

Kaset rãmbã leb n tũnugda ne soay nins b sẽn paam fãa n togsd koe-noogã neb nins b sẽn yãtã. Wala makre b tõe n sõsa bilf ne yaka, bɩ ne ned so-toak sasa mobill bɩ sɩlg pʋgẽ. Sõsgã tõe n yɩɩ wok n yɩɩg woto ne zoa bɩ ne roagda, bɩ ne tʋmd-n-taag vʋʋsg wakate. A Zezi sẽn da wa n be tẽng zugã, a tũnuga ne sor a sẽn paam fãa n kõ kasetã wʋsgo. A ra moonda nebã mogr noore, tãng sɛɛgẽ, a sã n dɩt ned roogẽ, n kẽng kãadem kibsẽ, bɩ a sẽn togd sor ne zĩm yẽeb koglg Galile Mogrã zugu. A zãmsa nebã karen-dotẽ wã la wẽn-dotẽ wã Zerizalɛm. A sẽn da be zĩig ning fãa, a yãa soay n moon Wẽnnaam Rĩungã. A Zeova Kaset rãmbã me modgdame n na n tũ a nao rẽ wɛɛngẽ.—1 Pɩɛɛr 2:21.

B MOONDA NE MAK-SÕNGO

Koe-noogã b sẽn togsd yãmb ne manesem kãensa wã ba a yembr da pa na n tall yõodo, ned ning sẽn togsd-a yãmbã meng sã n da pa tũudẽ zãmsgã ye. F sã n yeel bũmb n yaool n maan bũmb a to sẽn yaa lebend ne rẽ, yaa zãmbo, la zãmbã tũudmã wɛɛngẽ kɩtame tɩ neb milyõ rãmb pa sak Biiblã ye. B pa tõe n ning Biiblã taal rẽ yĩng ye. Gʋlsdbã la Fariziẽ dãmbã ra tara Hebre Gʋlsg Sõamyã, la a Zezi puka b bãong n yeel tɩ b yaa zãmb rãmba. A yeelame tɩ b ra karemda a Moiiz Tõogã, la a togsa a karen-biisã n paas tɩ: “Bɩ y maane la y sak bũmb nins bãmb sẽn yeel yãmb tɩ y maanã, la y ra togs bãmb tʋʋma ye. Tɩ bõe, bãmb yetame la b ka maand ye.” (Matɩe 23:3) Kiris-ned sẽn kõt mak-sõng n tar vɩɩm sẽn yaa tɩrg n são lɛɛr dãmb f sẽn dɩk tɩ yaa mooneg bala. Woto ra yaa sagls b sẽn kõt kiris-nin-pogs nins sɩdb sẽn da pa tẽedbã: “Tɩ kẽer sẽn ka sakd Wẽnnaam koɛɛga na sak Wẽnnaam bãmb pagba yel-manesem yĩnga, tɩ goam toor kaẽ ye, tɩ bõe, bãmb na n yãame tɩ yãmb maanda neere la y yõkda y mense.”—1 Pɩɛɛr 3:1, 2.

Woto, a Zeova Kaset rãmbã modgame n na n wilg tɩ koe-noogã zemsa ne sakr woto me: Yaa b sẽn kõt mak-sõng kiris-ned manesmã wɛɛngẽ wã la b tusd neb a taabã me tɩ b maan woto. B modgdame n na n ‘maan neba wa bãmb sẽn dat tɩ neba maan bãmb bũmb ningã.’ (Matɩe 7:12) B modgdame n na n maan woto ne nebã fãa, la pa ne Kaset rãmb a taabã, b zo-rãmbã, b yagsã bɩ b roagdbã bal ye. B sẽn pa zems zãngã yĩnga, pa wakat fãa la b maand tɩrg ye. La b tʋllame n maan nebã fãa neere, pa b sẽn na n togsd-b Rĩungã koe-noogã bal ye, la yaa b sẽn na n sõng-b me, tɩ sã n tõeyã.—Zak 2:14-17.

[Foto, seb-neng 19]

Hawai

[Foto, seb-neng 19]

Venezuela

[Foto, seb-neng 19]

Yugoslavi

[Foto, seb-neng 20]

Rĩungã Rot meeb zemsame, tɩ b zãmsd Biiblã be

[Foto rãmba, seb-neng 21]

Kaset rãmbã modgda ne b sũyã fãa n tũud bũmb nins b sẽn moondã, b manesmã ne b zakã neb la ne neb a taabã pʋgẽ