Sak piig la a nii
“B ka dũniyã rẽnd ye”
1. a) Sẽn deng a kũumã, a Zezi pʋʋs n kosa bõe a karen-biisã yĩnga? b) Bõe yĩng tɩ tar yõod wʋsg tɩ d ra yɩ ‘dũniyã rẽnda’?
YƲNG ning sẽn deng tɩ b kʋ a Zezi wã, a pʋʋsa a karen-biisã yĩnga. A sẽn da mi t’a Sʋɩtãan na n nams-b-la wʋsgã yĩnga, a Zezi yeela a Ba wã tɩ: “Mam ka kot yãmb tɩ y yiis bãmb dũniyã pʋgẽ ye, m kotame tɩ y gũ-b tɩ wẽng soaba ra tõog-b ye. Bãmb ka dũniyã rẽnd wa mam sẽn ka dũniyã rẽndã.” (Zã 17:15, 16) Bõe yĩng tɩ tar yõod wʋsg tɩ d welg d mens ne dũniyã? Bala ya a Sʋɩtãan la dũni kãngã naabã. La kiris-nebã pa rat n yɩ a Sʋɩtãan dũniyã rẽnd ye.—Luk 4:5-8; Zã 14:30; 1 Zã 5:19.
2. Wãn to la a Zezi ra pa dũniyã rẽnda?
2 A Zezi sẽn da pa dũniyã rẽndã ra pa rat n yeel t’a ra pa nong neb a taabã ye. A sãooga bãad dãmba, a vʋʋga kũum, la a zãmsa nebã Wẽnnaam Rĩungã. A kõo a vɩɩmã meng ãdem-biisã yĩnga. La a ra pa nong wẽn-kɩɩsg tagsa la tʋʋm nins neb nins sẽn da tar a Sʋɩtãan dũniyã yam wẽngã sẽn da maandã ye. Woto, a keooga nebã tɩ b gũus ne yɛl wala yoob tʋlsem, laog nonglem la yʋ-baoorã. (Matɩe 5:27, 28; 6:19-21; Luk 20:46, 47) Rẽnd a Zezi sẽn zãag a meng ne dũniyã naamã pa lingr ye. Baa ne a sẽn da yaa Zʋɩfã, a pa kẽes a toog zab nins sẽn da maand Rom dãmbã ne Zʋɩf rãmbã sʋkã ye.
‘Mam rĩungã ka dũni kãngã rẽnd ye’
3. a) Zʋɩf rãmbã tũudum nanambs rõda a Zezi bõe zug a Pɩlat taoore, la bõe yĩnga? b) Bõe n wilgd t’a Zezi ra pa rat n yɩ rĩm tẽng zugu?
3 Ges-y bũmb ning sẽn maane, Zʋɩf rãmbã tũudum nanambs sẽn da wa n yõk a Zezi n tall n kẽng a Põns Pɩlat sẽn yaa Rom naab a ye taoorã. Sɩda-sɩda, bũmb ning sẽn da pa noom taoor dãmb kãensã wã ya a Zezi sẽn da puk b zãmbã yĩnga. Sẽn na yɩl n paam tɩ naabã maan a Zezi wẽnga, b rõd-a lame n yeele: “Tõnd yãa rao kãngã tɩ b rãmbd tõnd soolma n yetẽ tɩ neba ra yao Sezaar yõor yaood ye. La b yetame tɩ bãmb meng yaa Kirist la rĩma.” (Luk 23:2) Vẽenega, woto ra yaa ziri, bala yʋʋmd sẽn deng rẽ, nin-buiidã sẽn da wa n dat n kɩt t’a Zezi lebg rĩmã, a zãgsame. (Zã 6:15) A ra miime tɩ beoog-daare, a ra na n wa yɩɩ Rĩm saasẽ. (Luk 19:11, 12) Sẽn paas me, ra ya a Zeova n da na n zĩnig a Zezi naamã geer zugu, la pa ninsaalbã ye.
4. A Zezi tagsg ra yaa bõe ne yõor yaoodã yaoobo?
4 Rasem a tãab bal sẽn deng a Zezi yõkrã, Fariziẽ rãmbã makame n na n yõk-a a goamẽ yõor yaoodã wɛɛngẽ. La a yeel-b lame: “Bɩ y wilg maam ligd a yembre [Rom lagfo]. Maasma ne gʋlsma yaa ãnda rẽnda?” Bãmb sẽn leok tɩ: “Yaa Sezaar dẽnda,” a leok-b lame: “Bɩ y kõ Sezaar bũmb nins sẽn yaa Sezaar dẽnda la y kõ Wẽnnaam bũmb nins sẽn yaa Wẽnnaam dẽnda.”—Luk 20:20-25.
5. a) Bõe la a Zezi zãms a karen-biisã a yõkrã wakate? b) Wãn to la a Zezi wilg bũmb ning sẽn kɩt t’a maan woto wã? d) B kaoa a bʋʋdã wãn to?
5 A Zezi pa zãms nebã tɩ b tõdg tẽn-soaadbã ye. Sodaas la neb a taab sẽn wa n na n yõk a Zezi wã, a Pɩɛɛr wõoga a sʋʋg n kɛ rao a yembr n fiuug a tʋbre. La a Zezi yeel-a lame: “Sui f sʋʋga a wʋʋgẽ, tɩ bõe, neb nins fãa sẽn zãad sʋʋsã, yaa sʋʋg n na n kʋ-ba.” (Matɩe 26:51, 52) Vẽk-n-beoogã, a Zezi wilga a Pɩlat bũmb ning sẽn kɩt t’a maan woto wã n yeele: “Mam soolem ka dũniyã rẽnd ye. Mam soolem sã n da yaa dũniyã rẽnda, mam tʋm-tʋmdba ra na n zabame tɩ b ra yõk maam n kõ Zʋɩf rãmba ye.” (Zã 18:36) A Pɩlat sak n deegame t’a “ka yã bõn-wẽng” a Zezi nengẽ ye. La a Pɩlat basame tɩ nin-buiidã tus-a t’a sak tɩ b ka a Zezi ra-luk zugu.—Luk 23:13-15; Zã 19:12-16.
Karen-biisã rɩkda a Zezi togs-n-taare
6. Wãn to la pipi kiris-nebã wilg tɩ b ra lakda b mens ne dũniyã yam wẽnga, la tɩ b ra nonga nebã?
6 Woto, a Zezi karen-biisã bãnga ra yɩ dũniyã rẽndã sẽn dat n yɛɛlga. A ra rat n yeelame tɩ b lak b mens ne dũniyã wẽn-kɩɩsg yam la a manesem, wa reem nins sẽn tɩ loe ne nen-kɛglmã la yoobã sẽn da maand Rom deem zĩisẽ wã. Rẽ wã kɩtame tɩ b ra yetẽ t’a Zezi karen-biisã ra kisa nebã. La karen-biisã ra pa kis b taaba ye. B ra tʋmda wʋsg n sõngd b taabã tɩ b rɩt segls nins Wẽnnaam sẽn maan fãagrã yĩngã nafa.
7. a) B sẽn pa dũniyã rẽndã yĩnga, bõe n paam pipi kiris-nebã? b) Wãn to la b ra get tẽngã nanambsã la yõor yaoodã yaoobo, la bõe yĩnga?
7 B ra namsda a Zezi karen-biisã wala b sẽn da nams yẽ mengã. Naoor wʋsgo, yaa tẽn-soaadbã sẽn wʋmd kɩbay sẽn pa sɩd a Zezi karen-biisã zutã n kɩt tɩ b namsd-ba. La yʋʋmd 56 sẽnẽ, tʋm-tʋmd a Poll gʋlsa kiris-nebã sẽn be Romã, n sagl-b tɩ b “sak nanambsa noyã, tɩ bõe, [naam] ka be a sã n ka Wẽnnaam sẽn kɩt t’a zĩnd ye.” Pa rat n yeel tɩ ya a Zeova n lugl dũniyã nanambs ye, la a basame tɩ b beẽ, hal t’a Rĩungã a yen tãa wa soog tẽngã. Wa sẽn zemse, a Poll sagla kiris-nebã tɩ b waoog tẽngã nanambs la b yao yõor yaoodã.—Rom dãmba 13:1-7; Tɩt 3:1, 2.
8. a) Hal sẽn ta zĩ-bʋg la kiris-nebã segd n sak nanambsã? b) Wãn to la pipi kiris-nebã rɩk a Zezi togs-n-taare?
8 La tõnd sẽn sakd tẽngã nanambsã yaa sakr sẽn tar koaka, lakae pa sakr zãng-zãng ye. A Zeova noyã ne ninsaalbã noy sã n wa kɩɩsd taaba, neb nins sẽn balemd a Zeova wã sakda yẽ noyã. Ges-y sebr a yembr (Sur le chemin de la civilisation — Histoire du monde, ãngil.) sẽn gomd pipi kiris-nebã yell woto wã: “Kiris-nebã ra zãgsdame tɩ b pa na n tʋm tʋʋm kẽer Rom tẽng-n-biisã sẽn da segd n maan ye. Kiris-nebã . . . gesame tɩ sodaar kõom yaa bũmb sẽn kɩɩsd b tẽebã. B ra pa sakd politik naam ye. B ra pa balemd Rom soolmã naab ye.” Zʋɩf rãmbã bʋ-kaoodb sul-kãseng sẽn wa n yeel karen-biisã tɩ b bas moonegã, b leokame: “A zemsame tɩ tõnd sak Wẽnnaam n yɩɩd nebã.”—Tʋʋma 5:27-29.
9. a) Bõe yĩng tɩ kiris-nebã zoe n yi Zerizalɛm yʋʋmd 66? b) Wãn to la rẽ yaa mak-sõng sẽn tar yõod wʋsg ne tõndo?
9 A Zezi karen-biisã pa kẽes b toog politikã la zabã pʋsẽ baa bilf ye. Yʋʋmd 66, Zide Zʋɩf rãmbã yikame n tõdg a Sezaare, tɩ Rom tãb-biisã yɩ tao-tao n gũbg Zerizalɛm n dat n zab ne. Bõe la kiris-neb nins sẽn da be pʋgẽ be wã maan-yã? B tẽega a Zezi sẽn da sagl-b tɩ b zoe n yi galʋ-tẽngã. Rom sodaasã sẽn wa n lebg n loog wakat bilf yĩngã, kiris-nebã zoeeme n pasg Zʋrdẽ kʋɩlgã n kẽng Pela tãensẽ wã. (Luk 21:20-24) B sẽn pa kẽes b toogã yaa mak-sõng n kõ kiris-neb nins sẽn yaa sakdbã sẽn da na n wa bãmb poorẽ wã.
Yaoolem day kãensã, kiris-nebã yaa pa-kẽesd-m-toog rãmba
10. a) Tʋʋm bʋg la a Zeova Kaset rãmbã ket n tʋmd wʋsgo, la bõe yĩnga? b) Bõe pʋgẽ la b pa kẽesd b toogo?
10 Tõnd wakatã yɛl wilgdame tɩ yaoolem day kãensã, neb sull n kell n pa kẽes b toog baa bilf dũniyã yɛlẽ wa pipi kiris-nebã bɩ? N-ye, a Zeova Kaset rãmbã maana woto. B ket n moondame tɩ yaa Wẽnnaam Rĩungã bal n na n wa ne bãan sẽn kaoosde, bark la sũ-noog n kõ neb nins sẽn nong tɩrlmã. (Matɩe 24:14) La b pa kẽes b toog mo-yõsã sẽn be tẽnsã ne taab sʋkã pʋsẽ baa bilf ye.
11. a) Wãn to la a Zeova Kaset rãmbã sẽn yaa pa-kẽesd-m-toog rãmbã manesem yaa toor fasɩ ne tũudmã taoor dãmb manesem? b) A Zeova Kaset rãmbã tagsg yaa wãn to ne neb a taabã sẽn maand bũmb ning politikã wɛɛngẽ wã?
11 La dũni kãngã tũudmã taoor dãmb kẽesa b toog politikã yɛlẽ hal wʋsgo. Tẽns sãnda pʋsẽ, b modgame n bao neb sẽn na yɩl tɩ b zĩnd na-baoodb poorẽ, bɩ sẽn na yɩl n kɩɩs-ba. Tũudum taoor dãmb sãnda reega naam menga. A taab pẽdga politikã taoor dãmb tɩ b maan yɛl sẽn noom bãmb mense. La a Zeova Kaset rãmbã yẽ pa kẽesd b toog politikã yɛlẽ ye. B leb n pa gɩdgd neb a taabã tɩ b ra kẽ parti politik pʋgẽ, tɩ b ra bao naam bɩ b ra vot ye. A Zezi yeelame t’a karen-biisã pa segd n yɩ dũniyã rẽnd ye, yaa rẽ n so t’a Zeova Kaset rãmbã pa maand politik ye.
12. Bõe n maane, dũni kãngã tũudum sẽn kẽes b toog dũniyã yɛlẽ wã?
12 Wa a Zezi sẽn da reng n togsã, tẽnsã zaba ne taab naoor wʋsgo. Tẽnsã pʋsẽ menga, neb sul n yikd n zabd taaba. (Matɩe 24:3, 6, 7) Wakat fãa la bala, tũudmã taoor dãmb sõnga tẽng a yembr bɩ sull a yembr t’a zab ne a to, la b sagend b tũudmã neb tɩ b maan woto. La rẽ waa ne bõe? Rẽ kɩtame tɩ tũudum a yembr neb kʋ taab zabã pʋsẽ, b tẽnsã bɩ b buudã sẽn yaa toɛy-toɛyã yĩnga. Woto kɩɩsda Wẽnnaam daabã.—1 Zã 3:10-12; 4:8, 20.
13. Bõe la yɛlã wilgd a Zeova Kaset rãmbã pa kẽesd-m-toogã wɛɛngẽ?
13 Baasgo, zaba fãa pʋsẽ, a Zeova Kaset rãmbã yẽ pa kẽes b toog baa bilf ye. Yʋʋmd 1939 sɩpaolg kiuug pipi daar Gũusg Gasgã (ne ãngilindi) yeelame: “Sẽn be-b Soaalã poorẽ wã fãa pa na n kẽes b toog tẽnsã zab pʋsẽ ye.” Tẽnsã fãa pʋsẽ, sẽn yaa yɛl nins fãa pʋsẽ, a Zeova Kaset rãmbã ket n tara manesem kãngã. B pa basd tɩ zabã la politikã sẽn welgd dũniyã sãam saam-biir ning b sẽn tar ne taab dũniyã gill zugã ye. B ‘rɩka b sʋʋsã n kud wãgse, la b rɩk b kãna n kud goeto.’ B sẽn yaa pa-kẽesd-m-toog rãmbã yĩnga, b pa zãmsd zabr yɛs ye.—Ezai 2:3, 4; 2 Korẽnt dãmba 10:3, 4.
14. A Zeova Kaset rãmbã sẽn welg b mens ne dũniyã yĩnga bõe n paamd-ba?
14 B sẽn yaa pa-kẽesd-m-toog rãmbã wata ne bõe b zutu? A Zezi yeelame: “Yãmb ka dũniyã rẽnd ye, . . . yaa woto n kɩt tɩ dũniyã kis yãmba.” (Zã 15:19) A Zeova Kaset rãmb wʋsg la b kẽes bãens roto, b sẽn yaa Wẽnnaam sõgen dãmbã yĩnga. B namsa sãnda tɩ loog nugu, hali n kʋ-ba, wala sẽn yɩ to-to ne pipi kiris-nebã. Rẽ fãa ya a Sʋɩtãan sẽn yaa ‘dũni kãngã wẽnnaamã’ sẽn kɩɩsd a Zeova sõgen dãmbã, sẽn pa a dũniyã rẽndã yĩnga.—2 Korẽnt dãmba 4:4; Wilgri 12:2.
15. a) Yɛ la tẽnsã fãa rebda? b) Bõe yĩng tɩ tar yõod wʋsg tɩ d welg d meng ne dũniyã?
15 A Zeova sõgen dãmbã sũy nooma b sẽn pa dũniyã rẽndã yĩnga, bala dũniyã tẽns fãa rebda b saab zĩigẽ Armagedõ. (Daniɛll 2:44; Wilgri 16:14, 16; 19:11-21) Baas-wẽng kãngã kõn paam tõnd ye, bala d welgda d mens ne dũniyã. D sẽn yaa nin-buiid sẽn lagem taab dũniyã gill zugã, d sakda Wẽnnaam saasẽ Rĩungã. Yaa sɩda, d sẽn pa dũniyã rẽndã yĩnga, b yaanda tõnd la b namsd-do. La ka la bilfu, rẽ na n saame, bala b na n sãama a Sʋɩtãan dũni wẽng kãngã wakat fãa yĩnga. La neb nins sẽn maand a Zeova raabã na n vɩɩmda wakat sẽn kõn sa a dũni paalgã pʋgẽ Wẽnnaam Rĩungã sẽn na n dɩ naam a zugã.—2 Pɩɛɛr 3:10-13; 1 Zã 2:15-17.
Lebg-n-gese
• Wãn to la a Zezi wilg ra ‘yɩ dũniyã rẽndã’ sẽn dat n yɛɛlga?
• Pipi kiris-nebã tagsg ra yaa wãn to ne a) dũniyã yam-wẽnga, b) dũniyã nanambse, la d) yõor yaoodã yaoobo?
• Rũndã-rũndã, wãn to la a Zeova Kaset rãmbã wilgd tɩ b yaa kiris-neb sẽn pa kẽesd b toog dũniyã yɛlẽ?
[Foto, seb-neng 165]
A Zezi wilgame tɩ yẽ ne a karen-biisã ra “ka dũniyã rẽnd ye”