Sak piig la a yopoe
D yɩ wẽn-sakdb d zakã pʋgẽ
1. Wãn to la Wẽnnaam Gomdã sagls tũub maneg neb wʋsg kãadem?
YA A ZEOVA n yaa kãadem Lugenda, t’a Gomdã kõt zagsã neb sagls nins sẽn yaa sõma n yɩɩdã. Neb wʋsg sẽn tũud sagl-kãensa wã yĩnga, b kãadmã yaa sõma. Kẽer da vɩɩ ne taab bal n pa kẽ kãadem ye. La b sẽn wa n sak tɩ b gʋls b kãadmã tɩ zems ne laloa wã zemsa pẽgre. A taab ra kẽe kãadem la b ket n yooda, la masã, b pa le yood ye. Rap sẽn da maand b pagb la b kamb pãng lebga nin-sõms la sũ-bʋgsem dãmb masã.
2. Kiris-ned zak pʋgẽ vɩɩmã tɩ loee ne bõe?
2 Kiris-neb zak pʋgẽ vɩɩmã tɩ loee ne bũmb wʋsgo. Wala makre, d sẽn tagsd to-to kãadmã kaoosg wɛɛngẽ wã. Sẽn paase, yɛl la d segd n maan d zakã pʋgẽ. Sẽn na n baase, manesem sẽn zems la d segd n tall ne d zakã neba. (Efɛɛz rãmba 5:33-6:4) D tõe n mii sagls nins Biiblã sẽn kõt zak pʋgẽ vɩɩmã zugã, la yaa b tũubã la goamã. Tõnd ned ba a yembr pa rat n yɩ wa neb nins a Zezi sẽn ning taale, b sẽn basd Wẽnnaam noyã tũubã yĩng ye. B tagsdame tɩ f sã n tar yẽesem tũudum pʋgẽ bala sekame, la woto yaool n yaa tudgri. (Matɩe 15:4-9) D pa rat n maan wa d yaa wẽn-sakdba, n yaool n pa woto d mengã zakẽ ye. La d segd n talla wẽn-sakr hakɩkã sẽn tar ‘yõod wʋsgã.’—1 Tɩmote 5:4; 6:6; 2 Tɩmote 3:5.
Kãadem segd n kaoosa wakat a wãna?
3. a) Kãadem wʋsg baasda wãn to, la bõe la tõnd segd n bao n maan ne d sũy fãa? b) Tũnug-y ne Biiblã n leok sogsg nins sẽn be sul-kãngã baasgẽ wã.
3 Kãadmã pa leb n tar pãng ye. Kẽed-n-taas sẽn zĩnd ne taab tɩ maan yʋʋm wat n yikame n kao b kãadmã n tɩ rɩk ned a to. D nong n wʋmdame tɩ kom-bɩɩs me sẽn kẽ kãadem paalem welgda taaba. La tõnd pa segd n maan wa neb a taabã ye, d segd n bao n taa a Zeova yam. Bɩ d ges sogsg nins sẽn pʋgdã la verse rãmbã, n ges Wẽnnaam Gomdã sẽn yet bũmb ning kãadmã kaoosg zugu.
Rao ne pag sã n kẽ kãadem, b segd n tagsame tɩ yaa wakat a wãn la b tog n zĩnd ne taaba? (Mark 10:6-9; Rom dãmba 7:2, 3)
Yaa bõe zug bal la ned tõe n tik n kao kãadem la a lebs n kẽ kãadem tɩ zems ne Wẽnnaam noyã? (Matɩe 5:31, 32; 19:3-9)
A Zeova tagsg yaa bõe ne kãadem nins b sẽn kaood tɩ pa zems ne a Gomdã? (Malaki 2:13-16)
Biiblã sagenda kẽed-n-taasã tɩ b sã n welg taab la b kãadmã zu-loees na n sa bɩ? (1 Korẽnt dãmba 7:10-13)
Bõe n tõe n kɩt tɩ kẽed-n-taas welg taaba? (Yɩɩl Sõamyã 11:5; Luk 4:8; 1 Tɩmote 5:8)
4. Bõe yĩng tɩ kãadem kẽer kaoosdẽ?
4 Bõe yĩng tɩ kẽer kãadem yaa sõma la kaoosdẽ? Yaa neb a yiibã sẽn bɩ sõma n yaool n kẽ kãadmã yĩnga. Sẽn paase, tara yõod tɩ kẽed-n-taasa tall bũmb wʋsg b yiiba fãa sẽn nonge, la b tõe n pelg b pʋs n gom ne taaba. La sẽn tar yõod n yɩɩdã yaa f sẽn na n yã kẽed-n-taag sẽn nong a Zeova la sẽn waoogd a Gomdã n get-a wa bũmb b sẽn tõe n tik a zug n paam b zu-loeesã tɩɩm. (Yɩɩl Sõamyã 119:97, 104; 2 Tɩmote 3:16, 17) Nin-kãng buudã pa na n tags tɩ sã n wa wɩng bala, a tõe n welga ne a kẽed-n-taagã bɩ a kao kãadmã ye. A pa na n ges t’a kẽed-n-taagã kongr kõt-a-la sor t’a pa maan yẽ mengã sẽn segd n maanã ye. Ayo, a na n maoã ne zu-loeesã la a bao b tɩɩm.
5. a) Bõe yĩng t’a Zeova sakr tar yõod kãadem pʋgẽ? b) Baa b sã n kɩɩsd tõndo, nafa bʋs la d tõe n paame, d sã n ket n tũud a Zeova noyã?
5 A Sʋɩtãan yetame tɩ d sã n namsdẽ, d na n basa a Zeova noyã tũubu. (Zoob 2:4, 5; Yelbũna 27:11) La a Zeova Kaset rãmb wʋsg sẽn namse, b kẽed-n-taag sẽn da kɩɩsd-b yĩng pa bas b kãadmã pʋleng ye. B ket n sakda a Zeova la b tũud a noyã. (Matɩe 5:37) Kẽer sẽn tall sũ-marã sũy yɩɩ noogo, b sẽn paam tɩ b kẽed-n-taagã wa naag-b n balemd a Zeova, baa yʋʋm wʋsg kɩɩsg poorã. (1 Pɩɛɛr 3:1, 2) Sã n yaa ne kiris-neb nins kẽed-n-taas sẽn pa wilgd ne b manesem tɩ b na n toeemame wã, bɩ kiris-neb nins kẽed-n-taas sẽn bas-b b sẽn balemd a Zeova wã yĩngã, bãmb fãa me miime tɩ b na n paama barka, b sẽn wilgd tɩ b yaa wẽn-zoɛtb b zagsẽ wã yĩngã.—Yɩɩl Sõamyã 55:23; 145:16.
Ned fãa maan a sẽn segd n maanega
6. Sẽn na yɩl tɩ d kãadmã yɩ sõma, yaa segl-bʋs la d segd n sake?
6 Yaa sɩda, kãadem sẽn yaa sõma pa neb sẽn na n be ne taab bal ye. Tara yõod wʋsg tɩ kẽed-n-taag fãa sak a Zeova seglsã sẽn tɩ loe ne zu-sobendã. Rẽ kɩtdame tɩ zũnd-zãnd kaẽ, tɩ bãan be zakã pʋgẽ. D karemda woto 1 Korẽnt dãmba 11:3 (Sebr Sõngo) pʋgẽ: “Rao tara zu-soaba, yaa Krista; la pag me zu-soaba la raoa, tɩ Krista Zu-soaba yaa Wẽnnaam.”
7. Zakã pʋgẽ zu-sobendã segd n yɩɩ wãn to?
7 Yãmb nee verse kãngã sẽn deng n gom bũmb ning yellã bɩ? N-ye, rao fãa tara Zusoaba, sẽn yaa Kirist, a sẽn segd n sake. Woto rat n yeelame tɩ sɩdã segd n yɩɩ zu-soab sẽn tar zʋg-sõma wa a Zezi rẽndã. Kirist sakda a Zeova, n nong tigingã wʋsg la a get a yelle. (1 Tɩmote 3:15) A tol n ‘kõo a meng a yĩngã.’ A Zezi pa wukd a meng la a pa maand a toor kae ne neb a taabã ye. La a ‘yaa sũ-mar soaba, la nin-nana.’ Neb nins sẽn da sakd a zu-sobendã ra ‘paamda vʋʋsgo.’ Sɩd sã n maand woto ne a zakã neba, a wilgdame tɩ yẽ mengã sakda Kirist. Rẽ, kiris-nin-poak na n yãame t’a sã n teend a sɩdã la a sakd a zu-sobendã, bee nafr la kõt yolsgo.—Efɛɛz rãmba 5:25-33; Matɩe 11:28, 29; Yelbũna 31:10, 28.
8. a) Bõe yĩng tɩ tõe n wõnd Biiblã noy tũub pa womd biis nins b sẽn gũudã zags kẽer pʋsẽ? b) Bõe la d segd n maane, zu-loe-kãngã buud sã n wa paam-do?
8 Baasg zãnga, zu-loees na n pukame. Zakã ned ba a yembr sẽn wa n nan pa sɩng Biiblã noy tũubu, tõe tɩ zaka neb ra kisa ned a to sẽn na n wilgd-b b sẽn segd n maan bũmb ningã. Baa b sã n kos nin-kãens buudã ne sõmblem la nonglem tɩ b maan bũmbu, b pa rat n sak ye. Tõnd miime tɩ Biiblã yetame tɩ d bas ‘sũ-yikr la no-koɛɛm la kãnegre.’ (Efɛɛz rãmba 4:31) La sã n wõnd zakã neb kẽer pa sakd tɩ sã n pa tũ ne gom-kãensã buudu, d segd n maana bõe? La a Zezi pa maan wa neb nins sẽn da zabd la b tʋʋd-a wã ye, la a ra teega a Ba wã. (1 Pɩɛɛr 2:22, 23) Woto, zu-loees sã n wa puk zakã pʋgẽ, wilg-y tɩ y yaa wẽn-sakda, n pʋʋs a Zeova n kos a sõngre, la y ra maan wa dũniyã rãmb ye.—Yelbũna 3:5-7.
9. Bõe la sɩdb wʋsg sẽn yaa kiris-neb zãms maanego, n pa nin-sãbsdba?
9 Pa wakat fãa la toeengã maand tao-tao ye, la Biiblã sagls sɩd tara pãnga, b sã n tũ-b neer ne sũ-mare. Sɩdb wʋsg yãame tɩ b kãadma sɩng n lebgda sõma, b sẽn wa n bãng yel-manesem ning Kirist sẽn tar ne tigingã. Tigingã neb pa zems zãng ye. Ne rẽ fãa, a Zezi nong-b lame, n kõt-b mak-sõngo, la a tũnugd ne Gʋlsg Sõamyã n sõngd-b tɩ b yɩ sõma n paase. A kõo a vɩɩmã tigingã yĩnga. (1 Pɩɛɛr 2:21) A Zezi mak-sõngã kɩtame tɩ sɩdb wʋsg sẽn yaa kiris-neb lebg zak soben dãmb sẽn yaa sõma la b sõng ne nonglem tɩ b kãadmã lebg sõma n paase. Rẽ womda biis sẽn yaa sõma n yɩɩd f sẽn na n yaa nin-sãbsa, bɩ f sẽn na n gẽed n pa gomda.
10. a) Wãn to la sɩd bɩ pag sẽn yet t’a yaa kiris-ned tõe n kɩt tɩ neb a taabã vɩɩm lebg toog zakã pʋgẽ? b) Bõe la b tõe n maan tɩ yellã maneg n paase?
10 Yaa wãn to yẽ, sɩdã sã n pa baood a zakã neb sũ-noogo, bɩ a pa sõsd ne a zakã neb Biiblã zug la a maan bũmb a taab ne-ba? Bɩ yaa wãn to, pagã sã n pa teend a sɩdã la a pa pʋg-sakd wa Wẽnnaam sẽn datã? Kẽer tõogd n welgda b zu-loeesã sõma, b sã n sõsd zakã pʋgẽ zu-loees yell ne zakã neb ne waoogre. (Sɩngre 21:10-12; Yelbũna 15:22) La baa rẽ sã n pa womd biis nins d sẽn tẽedã, d sã n tall Wẽnnaam vʋʋsem sõngã biis d vɩɩmã pʋgẽ, la d wilg tɩ d nandame la d nonga zakã neb a taabã, d na n sõngame n kɩt tɩ zakã pʋgẽ vɩɩm tall yamleoogo. (Galat dãmba 5:22, 23) Pa d sẽn na n gẽegdẽ tɩ ned a to wã maan a sẽn segd n maanã la zakã pʋgẽ vɩɩm na n maneg n paas ye, la yaa tõnd mengã sẽn na n maan d sẽn segd n maan la d wilgd tɩ d yaa wẽn-sakdba.—Kolos rãmba 3:18-21.
D sẽn tõe n paam leoor zĩis ninsi
11, 12. Bõe la a Zeova kõ sẽn na yɩl n sõng tõnd tɩ d zakã pʋgẽ vɩɩm yɩ sõma?
11 Zĩis wʋsg n be tɩ nebã tõe n paam sagls zak pʋgẽ vɩɩmã zugu. La tõnd miime tɩ Wẽnnaam Gomdã tara sagls nins sẽn yaa sõma n yɩɩdã, la d tara mi-beoog ne Wẽnnaam, a sẽn tũnugd ne a tẽng zug siglgã n sõngd tõnd tɩ d bãng d sẽn na n tũ saglsã to-to wã. Yãmb rɩta sõng-kãng nafa sõma-sõma bɩ?—Yɩɩl Sõamyã 119:129, 130; Miise 4:2.
12 Tigingã tigissẽ kẽnd toor sẽn ka be, yãmb yãka sẽk zak pʋgẽ Biiblã zãmsg yĩng bɩ? Zags nins sẽn maand woto wã paamda lagem-n-taar Wẽnnaam balengã pʋgẽ. B zak pʋgẽ vɩɩmã paamda barka, b sẽn tũud Wẽnnaam Gomdã tɩ zems ne b vɩɩmã yɛlã yĩnga.—Tõodo 11:18-21.
13. a) D sã n tar sogsg kãadem pʋgẽ yɛlã zutu, yɛ la d tõe n paam sõngr sõma? b) Bõe la d segd n wilg bũmb nins fãa tõnd sẽn yãkd yam n na n maanã pʋgẽ?
13 Y tõe n tara sogsg zak pʋgẽ yɛlã zutu. Wala makre, wãn to la d segd n ges rogmã yaagre? Pʋg yiisg zemsame bɩ? Biig sã n pa nong tẽebã yɛl sõma, hal sẽn ta zĩ-bʋg la b na n bao t’a kẽes a meng Wẽnnaam balengã tʋʋmẽ sẽn maand zakã pʋgẽ wã? B leoka sogs-kãensã buud wʋsg sɛb a Zeova Kaset rãmbã sẽn yiis pʋsẽ. Zãms-y n tũnug-y ne sɛb sẽn sõngd ne Biiblã võor wʋmb la ẽndɛgs rãmbã, sẽn na yɩl n paam sogs-kãensã leoore. Y sã n pa tar sebr ning ẽndɛgsã sẽn wilgd-y tɩ y tɩ gesã, bɩ y ges Rĩungã Roog sɛb bĩngr zĩigẽ. Y sã n tar ordinatɛɛre, y tõe n bao-b-la be me. Y leb n tõe n sõsa sogs-kãensã zut ne rap bɩ pagb sẽn yaa kiris-neb sẽn bɩ tẽebã pʋgẽ. La ra tẽ-y tɩ y na n paama sokr fãa leokr vẽeneg wakat fãa ye. Naoor wʋsgo, yaa yãmb menga, bɩ yãmb ne y kẽed-n-taagã n segd n yãk yam ne y sẽn na n maanega. Rẽ poor bɩ y tall manesem sẽn wilgd tɩ pa yɩng bal la y yaa wẽn-sakdb ye, la yaa zakẽ wã me.—Rom dãmba 14:19; Efɛɛz rãmba 5:10.
Lebg-n-gese
• Wãn to la a Zeova sakr wakat fãa tɩ loe ne kɩs taab sɩd kãadem pʋgẽ?
• D sã n wa tar yɩɩr kãadem pʋgẽ zu-loees yĩnga, bõe n na n sõng-d tɩ d maan sẽn tat Wẽnnaam yam?
• Baa zaka neb a taab sã n kongdẽ, bõe la tõnd mengã tõe n maan tɩ yellã manege?
[Foto, seb-neng 155]
Sɩdã segd n yɩɩ zu-soab sẽn pukd a Zezi zʋg-sõma wã
[Foto, seb-neng 157]
Maan Biibl zãmsg ne zakã neb n pa vaandẽ sõngda a nebã tɩ b paam lagem-n-taare