‘Bʋʋdã kaoob wakat’ taame

WILGR sebrã sẽn yaa Biiblã yaoolem sebrã togsda tõnd tɩ malɛk n yɩgd yĩngr n tar “koe-noog sẽn ka sɛt n na n moone.” Yẽ zẽka a koɛɛgã n yeele: “Bɩ y zoe Wẽnnaam la y waoog bãmba; tɩ bõe, bãmb bʋʋd kaoob wakat taame.” (Wilgri 14:6, 7) Wẽnnaam bʋ-kaoorã togsg la a pidsg bee ‘bʋʋdã kaoob wakat’ pʋgẽ. Bʋ-kaoorã pidsg wakat na n yɩɩ ‘yaoolem wakatã’ sasa tõnd sẽn vɩ masã wã zug tẽn-sʋka.—2 Tɩmote 3:1.

‘Bʋʋdã kaoob wakat’ yaa koe-noog n kõ neb nins sẽn nong tɩrlmã. Yaa sasa ning Wẽnnaam sẽn na n wa ne yolsg n kõ a sõgen dãmbã sẽn paam namsg zãmaan kãngã neb sẽn yaa nen-kɛglem dãmb la sẽn ka nonglmã nusẽ wã.

Masã, sẽn deng tɩ ‘bʋʋdã kaoob wakat’ baas ne zãmaan-wẽng kãngã sãoongã, b sagenda tõnd woto: “Bɩ y zoe Wẽnnaam la y waoog bãmba.” Yaa woto la yãmb maand bɩ? Rẽ pa y sẽn na n yetẽ bal tɩ “mam tẽeda Wẽnnaam” ye. (Matɩe 7:21-23; Zak 2:19, 20) Wẽn-zoeer hakɩkã segd n kɩtame tɩ d waoog Wẽnnaam wʋsgo. A segd n kɩtame tɩ d zãag d mens ne wẽnga. (Yelbũna 8:13) A segd n sõnga tõnd tɩ d nong sẽn yaa neere, la d kisg sẽn yaa wẽnga. (Amos 5:14, 15) Tõnd sã n waoogd Wẽnnaam, d na n kelg-a-la neere. D pa na n bas tɩ bũmb a taab rɩ tõnd sẽkã tɩ d ye pa tõe n karem a Gomdã sẽn yaa Biiblã wakat fãa ye. D na n teeg-a-la wakat fãa la ne d sũur fãa. (Yɩɩl Sõamyã 62:9; Yelbũna 3:5, 6) Neb nins sẽn sɩd waoogd-a wã miime t’a sẽn yaa saasã la tẽngã Naandã, a yaa ãndũniyã Naab sẽn ka to, la b sakd-a-la ne nonglem, a sẽn yaa b vɩɩmã Soaala yĩnga. D sã n mik tɩ d segd n modga zĩ-kãng wɛɛngẽ n paase, bɩ d maan woto n da bas tɩ kaoos ye.

B leb n boonda bʋ-kaoor pidsg wakat ning yell malɛkã sẽn goma t’a ‘Zeova daarã.’ Ra-kãng buud waa pĩnd wẽndẽ Zerizalɛmã zug yʋʋmd 607 sẽn deng Kirist zãmaanã, a nebã sẽn pa kelg a Zeova keoogr ning a no-rɛɛsdbã sẽn togsã yĩnga. B sẽn tags t’a Zeova daarã ket n zãrame wã yĩnga, b ninga b vɩɩmã yell pʋgẽ n paase. A Zeova ra keoog-b-la woto: “Zusoaba ra-kãsenga kolgame, a wata tao-tao wʋsgo.” (Sofoni 1:14) ‘A Zeova daar’ a to n wa pĩnd Babilonnã zug yʋʋmd 539 sẽn deng Kirist zãmaanã. (Ezai 13:1, 6) Babilon nebã sẽn da kɩs sɩd ne b pãens zĩisã la b wẽnnaam dãmbã yĩnga, b pa kelg keoogr ning a Zeova no-rɛɛsdbã sẽn taasã ye. La yʋʋn-yɛnga, Babilon sẽn da yaa tẽn-kãsengã lʋɩɩ Meed ne Pɛrs rãmbã nugẽ.

Bõe n be d taoor rũndã-rũndã? A Zeova daar sẽn yaa kãseng wʋsg n yɩɩd a taabã n wate. (2 Pɩɛɛr 3:11-14) Wẽnnaam kaoa “Babilon Kãsengã” bʋʋdo. Sã n yaa ne Wilgri 14:8, malɛk n togs woto: “Babilon kãsenga lʋɩɩme!” Rẽ zoe n yaa bũmb sẽn zĩndi. Babilon pa ye tõe n gɩdg a Zeova balemdbã ye. A sẽn kẽesd a meng wẽngã maaneg pʋgẽ, la a kẽesd a toog zabã pʋsẽ wã yaa bũmb b sẽn puk zĩig fãa. A sãoong zãng-zãngã kolgame masã, yaa rẽ n so tɩ Biiblã sagend nebã sẽn be zĩig ning fãa woto: “Bɩ y yi [Babilon Kãsengã] pʋgẽ n da lagem ne yẽ yel-wẽna la y paam a tooda ye. Tɩ bõe, yẽ yel-wẽna lebga wʋsgo n ta [saasẽ], la Wẽnnaam tẽega yẽ tʋʋm wẽnsa yelle.”—Wilgri 18:4, 5.

Babilon Kãsengã yaa bõe? Yaa dũniyã tũudum nins fãa sẽn wõnd pĩnd wẽndẽ Babilonnã. (Wilgri sak 17, 18) Ges-y zĩis kẽer b sẽn wõnd taaba.

• Pĩnd wẽndẽ Babilon maan-kʋʋdbã ra kẽesda b toog wʋsg tẽngã politik yɛlẽ. Yaa woto me ne tũudum wʋsg rũndã-rũndã.

• Babilon maan-kʋʋdbã ra nong n teenda tẽngã zaba. Rũndã-rũndã, tẽnsã sã n wa zabd taaba, tũudma nong n lʋɩta taoor n ningd sodaasã barka.

• Pĩnd Babilonnã zãmsg la a minund kẽesa tẽngã raglem tʋʋm pʋsẽ. Rũndã-rũndã tũudmã nanambs sẽn pa tũud Biiblã noy sẽn gɩdg yoobã kɩtame tɩ tũudmã taoor dãmb la b poorẽ dãmbã yood wʋsgo. Rẽnd sɩd zemsame me la Wilgr sebrã sẽn bilgd Babilon Kãsengã wa pʋg-yoodre, a sẽn tar pʋg-yoodr manesem ne dũniyã la a politik siglsã yĩngã.

• Biiblã yetame me tɩ Babilon Kãsengã ‘paama bõn-neeb wʋsg’ tɩ loog nugu. Pĩnd Babilonnẽ wã, tũudmã paama zĩ-yalemse, tɩ maan-kʋʋdbã yʋy ra yi, b sẽn maand leebgã yĩnga. Rũndã-rũndã, balengã zĩis toor sẽn ka be, Babilon Kãsengã tara leebg zĩis la paoong wʋsgo. A zãmsgã la a tigã kõta yẽ la dũniyã ligd baoodb me arzɛk wʋsgo.

• Yimaas rãmbã pʋʋsgo, tɩɩm maanegã la sõodã yaa bũmb sẽn da piuug pĩnd Babilonnẽ wã, la yaa rẽ me n be zĩis wʋsg rũndã-rũndã. B geta kũumã wala vɩɩm toeeng bala. Babilon da pida ne pʋʋsg ro-bɛd la ro-bõoneg wẽnnaam dãmbã waoogr yĩnga, la Babilon nebã ra yaool n kɩɩsda a Zeova balemdbã. Tẽeb la minund kãensã kɩtdame tɩ d bãng Babilon Kãsengã sẽn ya a soaba.

Pĩnd wẽndẽ wã, a Zeova kɩtame tɩ politik pãens rãmb ne b tãb-biisã tɩ sɩbg neb nins sẽn kell n wilg tɩ b toog kae ne yẽ la a raabã. Yaa woto la Asiri nebã sãam Samari yʋʋmd 740 sẽn deng Kirist zãmaanã. Babilon nebã sãama Zerizalɛm yʋʋmd 607 sẽn deng Kirist zãmaanã tɩ Rom dãmbã wa sãam-a yʋʋmd 70 Kirist zãmaanã pʋgẽ. Yaa Meed ne Pɛrs rãmbã n tõog Babilon yʋʋmd 539 sẽn deng Kirist zãmaanã. Biiblã reng n togsame tɩ tõnd wakatã, guvɛrnema rãmbã b sẽn bilg wa we-rũngã na n zaba ne “pʋg-yoodrã” n piid-a zaal tɩ nebã bãng a sẽn sɩd ya a soaba. B na n sãam-a-la zãnga.—Wilgri 17:16.

Dũniyã guvɛrnema rãmb na n sɩd maana woto bɩ? Biiblã yetame tɩ ‘yaa Wẽnnaam n na n ning rẽ b sũyã pʋsẽ.’ (Wilgri 17:17) Rẽ na n maana zĩig pʋgẽ, ne lingri, hal tɩ sãam nebã sũyã, la pa bũmb nebã sẽn na n deng n bãnge, bɩ n neẽ tɩ wat bilf-bilf ye.

Bõe la y segd n maane? Sok-y y menga: ‘Mam ket n bee tũudum sẽn tar Babilon Kãsengã zãmsg la a minund pʋgẽ bɩ?’ Baa y sã n pa be a pʋgẽ, bɩ y sok y menga: ‘Mam basame t’a yamã tall pãn-tusdg m zug bɩ?’ Yam bʋg buudu? Ya a sẽn sak tɩ yoobã pa wẽnga, la a sẽn nong laogã la yõ-noogrã n yɩɩd Wẽnnaamã, bɩ a sẽn yãk yam n pa tũud a Zeova Gomdã (baa yaa yɛl sẽn wõnd b pa tar yõodã pʋsẽ). Tags-y y leokrã zug neere.

Tõnd sã n dat n ta a Zeova yam, yaa tɩlae tɩ d wilg ne d tʋʋmã la ne d sũurã tʋlsem tɩ d sɩd pa be Babilon Kãsengã pʋgẽ ye. D pa segd n kaoos n yaool n maan rẽ ye. Biiblã keoogda tõnd tɩ saabã na n waa zĩig pʋgẽ. A yetame tɩ: “Yaa [zĩig pʋgẽ] woto la b na n sãam Babilon sẽn yaa tẽn-kãsenga ne pãnga, la a kõn le zĩnd abada.”—Wilgri 18:21.

La yɛl a taab n pʋgde. Bʋʋda wakat kãnga pʋgẽ, Wẽnnaam a Zeova na n kaoa dũniyã gill politik siglsi, a nanambsã, la neb nins fãa sẽn kɩɩsd a naamã a sẽn dɩt ne a saasẽ Rĩungã sẽn be a Zezi Kirist nugẽ wã maasem yĩngã bʋʋdo. (Wilgri 13:1, 2; 19:19-21) Wẽnd vẽnegr ning sẽn yaa bãngr-gomd sẽn be Daniɛll 2:20-45 pʋgẽ wã bilgda dũniyã pãn-soaadb naam, sẽn sɩng ne pĩnd wẽndẽ Babilonnã wakat n wa tõk masã, wala bõn-naandg kãseng sẽn maan ne sãnem, wanzuri, zũudu, kut la yagdo. Bãngr-gomdã reng n togsa woto tõnd wakatã wɛɛngẽ: ‘Wẽnnaam sẽn be yĩngra na n kɩtame tɩ soolem sẽn ka tõe n sãam zĩndi.’ La Biiblã togsda Rĩung kãng sẽn na n maan bũmb ning a Zeova ‘bʋʋdã kaoob’ wakatã: “A na n wãa [ninsaalbã] soolem kãens fãa tɩ b menem n bas-a t’a yaas wakat fãa.”—Daniɛll 2:44.

Biiblã keoogda Wẽnnaam balemdb hakɩkã tɩ b gũus n da nong “bũmb nins sẽn be dũniyã pʋgẽ wã,” sẽn dat n yeel tɩ vɩɩm manesem ning dũni kãngã sẽn zãr ne sɩd Wẽnnaamã sẽn tarã ye. (1 Zã 2:15-17) Yãmb yam-yãkrã la y tʋʋmã wilgda vẽeneg tɩ y bee Wẽnnaam Rĩungã poorẽ bɩ? Yãmb sɩd ningd-a-la pipi zĩigẽ y vɩɩmã pʋgẽ bɩ?—Matɩe 6:33; Zã 17:16, 17.

[Zĩ-gũbri, seb-​neng 14]

Wakat bʋg la saabã na n wa?

“Ninsaal Biiga wata wakat ninga yãmb sẽn ka tẽeda.”—Matɩe 24:44.

“Bɩ y gũ, tɩ bõe, yãmb ka mi daar la wakat me ye.”—Matɩe 25:13.

“A na n maaname n ka vaal ye.”—Habakuk 2:3.

[Zĩ-gũbri, seb-​neng 14]

Yãmb sã n da mi a daarã, na n toeema y sẽn vɩ to-to wã bɩ?

Yãmb sã n da mi vẽeneg tɩ Wẽnnaam bʋ-kaoorã pidsg sẽn kolgã ra pa na n wa yʋʋm a wãn pʋgẽ bala, woto ra na n toeema y sẽn vɩ to-to wã bɩ? Dũni wẽng kãngã saabã sã n pa wa tao-tao wa yãmb sẽn da tẽedã, rẽ na n booga modgr ning yãmb sẽn maand a Zeova tʋʋmdã pʋgẽ wã bɩ?—Hebre dãmba 10:36-38.

Tõnd sẽn pa mi wakatã takɩ wã kõta tõnd sor tɩ d wilg tɩ d maanda Wẽnnaam daabã ne yam-sõngo. Neb nins sẽn mi a Zeova wã miime tɩ tall yẽesem wakat bilf sẽn deng saaba pa na n ta Wẽnnaam yam ye, bala a nee sẽn be sũurã pʋgẽ wã.—Zeremi 17:10; Hebre dãmba 4:13.

Sã n yaa ne neb nins sẽn sɩd nong a Zeova wã, b lʋɩɩsda a raabã maaneg taoor wakat fãa. Tõe tɩ kiris-neb hakɩkã tara nug tʋʋmd dũniyã pʋgẽ wa neb a taabã. La b bõn-datlã pa b yɩ arzɛk rãmb ye, la yaa sẽn na yɩl n paam sẽn sek b mens zãabo, la bilf n paas sẽn na yɩl n sõng b taaba. (Efɛɛz rãmba 4:28; 1 Tɩmote 6:7-12) B leb n kokda pemsem, la b sẽn baoodã yaa b tõog n paam n vʋʋse, la pa sẽn na yɩl n maan wa neb a taabã bal ye. (Mark 6:31; Rom dãmba 12:2) Wẽnnaam daabã maaneg kõta bãmb sũ-noog wala a sẽn kõt a Zezi Kirist sũ-noog to-to wã.—Yɩɩl Sõamyã 37:4; 40:9.

Kiris-neb hakɩkã rat n vɩɩmdame n balem a Zeova wakat sẽn kõn sa. B ket n tara b saagrã kãn-kãe, baa b sẽn segd n gũ bark nins neb sãnda sẽn ges tɩ kaoosa waoongã.

[Zĩ-gũbri/Foto, seb-​neng 15]

Gomd ning sẽn tɩ loe ne naam sẽn ka to wã

Sẽn na yɩl n bãng bũmb ning sẽn kɩt tɩ Wẽnnaam bas namsg wʋsg tɩ beẽ wã, d segd n wʋma gomd ning sẽn tɩ loe ne naam sẽn ka to wã võore.

A Zeova sẽn yaa Naandã yĩnga, a tara sor n na n dɩ naam tẽngã la a nebã fãa zutu. La Biiblã wilgdame tɩ ninsaalbã naaneg sɩngrẽ, b kɩɩsa a Zeova naam sẽn ka to wã. A Sʋɩtãan yeelame t’a Zeova ra zɩsgda nebã ne noy zaalem, la a yeel t’a yaga tõnd pipi yaab rãmbã ziri, a sẽn yeel bũmb ning sẽn da na n wa, b sã n da pa tũ Wẽnnaam noorã la b maan yɛlã wa bãmb sẽn datã. A yeel-b lame me tɩ sẽn são yaa b sẽn na n soog b mens n pa kelg Wẽnnaam ye.—Sɩngre, sak a 2, 3.

Wẽnnaam sã n da sãamẽ tõatbã zĩig pʋgẽ, a ra na n wilga a pãngã, la rẽ ra pa na n welg goam nins b sẽn da wa ne wã ye. A Zeova pa sãam tõtbã zĩig pʋgẽ ye, a basa malɛgsã ne ninsaalbã fãa tɩ b yã tõdgrã biisi. Baa rẽ sã n waa ne namsgã, woto kɩtame tɩ b tõog n dog tõndo.

Sẽn paase, ne nonglem, a Zeova yaoa yaood sẽn yaa toog wʋsgo, n kõ ãdem-bi-sakdbã kũuni. Kũun kãng kɩtame tɩ ãdem-biis nins sẽn na n tẽ a Biriblã maoong sẽn yaa rondã wa tõog n paam b mens ne yel-wẽnã la a biisã la b vɩɩmd Arzãn pʋgẽ. Sã n yaa tɩlae, rẽ tõe n yɩɩ ne vʋʋgrã maasem.

Wẽnnaam sẽn kõ sẽk tɩ b welg gom-kãsengã leb n kõo a sõgen dãmbã sor tɩ b wilg tɩ b tõe n wilga b mi-beoog ne Wẽnnaam nonglmã la b wilg b burkĩnd ne a Zeova yɛl buud fãa pʋsẽ. Yaa tɩlae tɩ gomd ning sẽn tɩ loe ne Wẽnnaam naam sẽn ka to wã la gomd ning sẽn tɩ loe ne ninsaal burkĩndã me paam welgre, sẽn na yɩl tɩ ninsaalbã la malɛgsã sak a noyã ãndũniyã gill pʋgẽ. Sã n pa yɩ woto fãa, laafɩ hakɩkã pa tõe n tol n zĩnd ye.a

[Tẽngr note]

[Foto, seb-​neng 15]

Dũniyã naam fãa na n menemame