‘Sẽn yɩɩda, bɩ y tall nonglem wʋsgo’
“Bũmb fãa sɛɛb wakat kolgame. . . . Sẽn yɩɩda, bɩ y paam nonglem wʋsg yãmb sʋka.”—1 PƖƐƐR 4:7, 8.
A ZEZI ra miime tɩ yaoolem lɛɛr dãmb nins a sẽn da na n zĩnd ne a tʋm-tʋmdbã ra tara yõod wʋsgo. A ra mii bũmb ning sẽn da gũud-bã. A tʋm-tʋmdbã ra segd n tʋma wʋsgo, la b ra na n kisg-b lame la b nams-b wa b sẽn nams yẽ me wã. (Zã 15:18-20) Yaoolem yʋʋn-kãng b sẽn zĩnd ne taabã sasa, a togs-b lame n yɩlem tɩ b segd n ‘nonga taaba.’—Zã 13:34, 35; 15:12, 13, 17.
2 Tʋm-tʋmd a Pɩɛɛr sẽn da be be yʋʋn-kãngã wã bãnga a Zezi saglgã yõodo. Yʋʋm wʋsg loogr poore, Zerizalɛm sãangã ket tɩ bilfu, a Pɩɛɛr gʋlsame n wilg vẽeneg tɩ nonglmã tara yõodo. A sagla kiris-nebã woto: “Bũmb fãa sɛɛb wakat kolgame. . . . Sẽn yɩɩda, bɩ y paam nonglem wʋsg yãmb sʋka.” (1 Pɩɛɛr 4:7, 8) A Pɩɛɛr goama võor tagma wʋsg ne neb nins sẽn vɩ tõnd zãmaanã ‘yaoolem wakatã.’ (2 Tɩmote 3:1) “Nonglem wʋsg” yaa bõe? Bõe yĩng tɩ tar yõod tɩ d tall nonglem kãng ne taaba? La wãn to la d tõe n wilg tɩ d tar-a lame?
“Nonglem wʋsg” yaa bõe?
3 Neb wʋsg tagsdame tɩ nonglem yaa zʋg-sõng f sẽn wilgd nana-nana bala. La a Pɩɛɛr da pa gomd nonglem kãng buudã yell ye. A ra gomda nonglem buud ning sẽn be rasãnd n yɩɩdã yelle. Yaa gɛrk gom-biig ning sẽn yaa agapɛ wã la b lebg tɩ “nonglem” 1 Pɩɛɛr 4:8 pʋgẽ. Gom-bi-kãngã bilgda nonglem sẽn pa baood a meng nafre, sẽn tik noy zutu. Sebr a yembr yetame: “Nonglem ning sẽn yaa agapɛ wã pa nonglem sẽn lut f yam ye, bala a pa sũur pʋgẽ yĩn-sidg bal ye, la yaa yam-yãkr sẽn kɩtd tɩ f maand bũmbu.” Tõnd sẽn dog ne rat-m-yembrã yĩnga, d ratame tɩ b tẽeg-d tɩ d tall nonglem ne taaba, n maand woto tɩ zems ne Wẽnnaam noyã sor-wilgri.—Sɩngre 8:21; Rom dãmba 5:12.
4 Woto pa rat n yeel tɩ d segd n nonga taaba, b sẽn kõ noor tɩ d maan woto wã yĩng bal ye. Agapɛ wã pa nonglem sẽn ka pãng ye. A Pɩɛɛr yeelame tɩ d segd n talla ‘nonglem wʋsg tõnd ne taab sʋka.’a La nonglem kãng baoodame tɩ d maan modgre. Mit a yembr yeta woto gɛrk gom-biig ning b sẽn lebg tɩ ‘wʋsgã’ wɛɛngẽ: “A bilgda zoɛt gĩin sẽn wɩke, a zoeesã sã n wa kolg saab t’a modgd wʋsg n dat n baas a zoeesã.”
5 Rẽnd tõnd nonglmã pa tek bũmb sẽn yaa nana maanego, bɩ nonglem d sẽn tar ne neb a wãn bal ye. Kiris-ned nonglmã baoodame tɩ d nong neb a taab n paase, tɩ baa sã n yaa toog me bɩ d maan woto. (2 Korẽnt dãmba 6:11-13) Vẽenega, d segd n modg n paasa nonglem kãngã buud wa zoɛtã sẽn segd n tʋm n minim la a modg n paas a zoeesã sõmblmã. Tara yõod wʋsg tɩ d tall nonglem kãng ne taaba. Bõe yĩnga? Yɛl sẽn na ta a tãab yĩnga.
Bõe yĩng tɩ d segd n nong taaba?
6 Pipi, yaa tɩ “nonglem yita Wẽnnaam nengẽ.” (1 Zã 4:7) A Zeova sẽn yaa nonglmã yẽgrã yɩɩ pipi n nong tõndo. Tʋm-tʋmd a Zã yeelame: “Wẽnnaam sẽn tʋm bãmb Biiga sẽn ka to dũniyã pʋgẽ tɩ tõnd paam vɩɩm bãmb maasem yĩnga wilgdame tɩ bãmb nonga tõndo.” (1 Zã 4:9) Wẽnnaam ‘tʋma’ a Biriblã t’a wa lebg ninsaala, n moon koe-noogã, n ki namsg ra-luk zugu, la rẽ fãa yaa sẽn na yɩl tɩ ‘tõnd tõog n paam vɩɩmã.’ Tõnd manesem segd n yɩɩ wãn to Wẽnnaam nonglmã sẽn ka to wã taoore? A Zã yeelame: “Mam kom-nongdse, Wẽnnaam sã n nong tõnd woto, a zemsame tɩ tõnd me nong taaba.” (1 Zã 4:11) Bãng-y t’a Zã gʋlsame tɩ ‘Wẽnnaam sã n nong tõnd woto.’ A pa yeel tɩ foo bal ye, la a yeelame tɩ tõndo. Tags-kãngã yaa vẽenega: Wẽnnaam sã n nong neb nins sẽn balemd-a wa tõndã, rẽnd tõnd me segd n nong-b lame.
7 Yiib-n-soaba, yaa tɩlae tɩ d nong taab n yɩɩd masã, sẽn na yɩl n sõng d saam-biis nins sẽn dat sõngrã me, bala “bũmb fãa sɛɛb wakat kolgame.” (1 Pɩɛɛr 4:7) Tõnd vɩɩ ‘toog wakate.’ (2 Tɩmote 3:1) Dũniyã yɛla, sabaab rãmbã, la kɩɩsgã d sẽn segd d tẽebã yĩngã wata ne toog tõnd zutu. Yel-tood pʋsẽ, d segd n pẽnega taab n paase. Nonglem wʋsg na n lagma tõnd taab la a kɩt tɩ d ‘ges taab yelle.’—1 Korẽnt dãmba 12:25, 26.
8 Tãab-n-soaba, d segd n nonga taaba, bala d pa rat n “kõ Sʋɩtãana weer” t’a kʋɩɩb-d ye. (Efɛɛz rãmba 4:27) A Sʋɩtãan yɩta tao-tao n dat n kɩt tɩ tõnd tẽed-n-taasã sẽn pa zems zãngã, sẽn dat n yeel tɩ b pãn-komsmã, b kongrã la b tudgrã, yɩ kug-lakds ne tõndo. Yãmb na n basame tɩ ned sẽn pa tags tɩ bɩ la a gom bɩ a sẽn maan bũmb sẽn pa zems kɩt tɩ y lak n bas tigingã bɩ? (Yelbũna 12:18) Tõnd sã n tar nonglem wʋsg ne taaba, d pa na n maan woto ye. Nonglem kãngã sõngda tõnd tɩ d kell n tall laafɩ la zems-n-taar sẽn na yɩl n maan Wẽnnaam daabã ne “yam a yembre.”—Sofoni 3:9.
Y sẽn na n wilg tɩ y nonga y taabã to-to
9 Nonglmã wilgr segd n sɩnga zakã pʋgẽ. A Zezi yeelame tɩ b na n bãnga a karen-biis hakɩkã, nonglem ning b sẽn tar ne taabã yĩnga. (Zã 13:34, 35) Nonglmã segd n yɩɩ vẽenega, pa tigingã pʋgẽ bal ye, la yaa zakã pʋgẽ me. A segd n zĩnda kẽed-n-taas ne taab la roagdba ne b kambã sʋka. Nong d zakã neb d sũurã pʋgẽ bal pa sek ye. D segd n wilg-a-la vẽenega.
10 Wãn to la kẽed-n-taasã tõe n wilg tɩ b nonga taaba? Sɩd sẽn nong a pag ne nonglem hakɩk wilgda rẽ ne a goam la a tʋʋm zãma sʋka, la b sã n wa be ne taab b yiib bala, tɩ rẽ wilgdẽ t’a sɩd nand-a-la wʋsgo. A waoogda a pagã, la a kelgd-a, a sã n tar a sũur gomd n na n togs-a. (1 Pɩɛɛr 3:7) A lʋɩɩsda a pagã yɩ-neer a meng rẽndã taoore, la a maanda a sẽn tõe fãa n na n ges a yell yĩngã la tẽebã wɛɛngẽ, la a nong-a. (Efɛɛz rãmba 5:25, 28) Pag sẽn sɩd nong a sɩd ‘waoogd-a-la’ wʋsgo, ba a sɩdã sã n pa maand a sẽn datã wakat fãa. (Efɛɛz rãmba 5:22, 33) A sõngda a sɩdã la a sakd-a, n pa kot-a bõn-kãsems ye. A segdame n teend-a tɩ sẽn pak-b n yɩɩd yaa tẽebã yɛla.—Sɩngre 2:18; Matɩe 6:33.
11 Roagdba, wãn to la y tõe n wilg tɩ y nonga y kamba? Y sẽn sak n tʋmd wʋsg n kõt-b bũmb nins sẽn yaa tɩlae wã, wilgda vẽeneg tɩ y nong-b lame. (1 Tɩmote 5:8) La kambã rata sẽn yɩɩd rɩɩbo, fut la ro-gãaga. Yãmb sã n dat tɩ b sã n wa lebg kãsemb bɩ b nong sɩd Wẽnnaamã la b maan a raabo, y segd n zãms-b-la tẽebã wɛɛngẽ. (Yelbũna 22:6) Woto rat n yeelame tɩ y bao sẽk tɩ y zakã neb fãa lagem taab n zãms Biiblã, tɩ b kẽes b meng koe-moonegã pʋgẽ la b kẽnd kiris-neb tigissã. (Tõodo 6:4-7) Bõn-kãensã maaneg wakat fãa baooda modgr wʋsgo, sẽn yɩɩd fãa wakat tood kãensã sasa. Yãmb sẽn modgd n get y kambã tẽebã yellã wilgdame tɩ y nong-b lame, bala ne rẽ y wilgdame tɩ y rata b neer wakat sẽn pa sat yĩng ne y sũur fãa.—Zã 17:3.
12 Tara yõod wʋsg tɩ roagdbã wilg me tɩ b nonga b kambã, n ges tɩ b paam sũ-noogo. Kambã pa tar pãng wʋsg ye. B sẽn yaa yãasã yĩnga, b ratame tɩ y wilg-b wakat fãa tɩ y nong-b lame. Yeel-y-b tɩ y nong-b lame, la y wilg-b tɩ y nong-b-la wʋsgo, bala rẽ kɩtdame tɩ b tall bas-m-yam tɩ b zemsa ne y nonglmã la b tara yõod y nifẽ. Pẽg-y-b sõma-sõma la ne pʋ-peelem, bala rẽ kɩtdame tɩ b bãng tɩ y nee b modgrã, la tɩ y nanda rẽ. Kibl-y-b ne nonglem, bala rems-kãng wilgd-b lame tɩ bãmb sẽn na n yɩ ned ning buudã pak-y lame. (Efɛɛz rãmba 6:4) Nonglem wilgr kãensa fãa sẽn yaa sõma wã sõngdame tɩ y zakã neb tall sũ-noog la zems-n-taare, n tõe n mao ne yaoolem day kãensã yɩɩr n yɩɩda.
13 Nonglmã kɩtdame tɩ d kõ neb a taabã kongr sugri. Tẽeg-y t’a Pɩɛɛr sẽn da wa n sagend a sebrã karemdb tɩ b ‘tall nonglem wʋsg ne taabã,’ a wilga bũmb ning sẽn kɩt tɩ woto tar yõod wʋsgã. A yeelame: “Tɩ bõe, nonglem luta yel-wẽn wʋsgo.” (1 Pɩɛɛr 4:8) Yel-wẽn ‘ludb’ pa rat n yeel tɩ ‘lud’ yel-wẽn-kãsems ye. B segd n togsa yel-wẽn-kãsemsã tigingã taoor dãmb tɩ b ges-b yelle. (Maankʋʋre 5:1; Yelbũna 29:24) Na n yɩɩ nonglem kaalem menga, la bũmb sẽn kɩɩsd Gʋlsg Sõamyã, d sã n bas yel-wẽn-kãsems maandb tɩ b ket n maand ka yell dãmbã wẽng la b namsd-ba.—1 Korẽnt dãmba 5:9-13.
14 Yɛl wʋsg pʋsẽ, tẽed-n-taasã kongr la b tudgr pa zem baa fʋɩ ye. Tõnd fãa kongda ne d no-goam la d tʋʋm wakat-wakate, n sãamd taab sũyã bɩ n maand taab wẽng menga. (Zak 3:2) D segd n yɩɩ tao-tao n gomd neb a taabã kongr yell bɩ? Woto wata ne mo-yõs bal tigingã pʋgẽ. (Efɛɛz rãmba 4:1-3) Tõnd sã n maand bũmb fãa ne nonglem, d pa na n “puk pãn-komsem” d saam-biig sẽn tar ye. (Yɩɩl Sõamyã 50:20, NW ) Wala b sẽn bolg lalg wall b ning-a pẽntiir tɩ lud a bogdã, woto me, nonglmã luta neb a taabã pãn-komsem.—Yelbũna 17:9.
15 Nonglmã na n kɩtame tɩ d sõng neb nins sẽn sɩd rat sõngrã. Yɛlã sẽn kengd n paasd yaoolem day kãensã wã, wakat tõe n wa zĩndame tɩ d tẽed-n-taasã rat sõngr laogã bɩ yĩngã wɛɛngẽ. (1 Zã 3:17, 18) Wala makre, tõnd tigingã ned n tar ligd zu-loees hal tɩ pa nana bɩ yaa a tʋʋm n sãame? Sã n yaa woto, d tõe n sõnga a soabã ne ligd wa d sẽn tõe tɛka. (Yelbũna 3:27, 28; Zak 2:14-17) Pʋg-kõor sẽn kʋʋl roog n dat manegr bɩ? Sã n yaa woto, d tõe n yãka yam n sõng-a n manege.—Zak 1:27.
16 Tõnd nonglmã wilgr pa tekd neb nins sẽn pẽ tõndã bal ye. Wakat-wakate, d tõe n wʋmame tɩ Wẽnnaam sõgen dãmb n be tẽns a taabẽ n be toog pʋgẽ, seb-kãsemse, tẽn-digimds bɩ tẽn-dãmbg yĩnga. B tõe n data rɩɩbo, fut bɩ bũmb a taaba. Baa b sẽn yaa buud ning fãa neba, tõnd ‘nonga ba-biisã’ fãa sẽn be dũniyã gill zugã. (1 Pɩɛɛr 2:17) Woto, wala pipi kiris-neb tigimsã, d yɩta tao-tao n kõ kũun n teel segls nins b sẽn dɩk saam-biisã sõngr yĩngã. (Tʋʋma 11:27-30; Rom dãmba 15:26) Tõnd sã n wilg d nonglmã ne manesem kãensã fãa, d paasda d zems-n-taarã pãng yaoolem day kãensã pʋsẽ.—Kolos rãmba 3:14.
17 Nonglmã kɩtdame tɩ d moon neb a taabã Wẽnnaam Rĩungã koe-noogo. Ges-y a Zezi makrã. Bõe yĩng t’a moon la a zãms nebã? Kʋʋngã ‘nimbãaneg yõk-a lame,’ b sẽn da rat sõngr tẽebã wɛɛngẽ wã yĩnga. (Mark 6:34) Tũudmã pe-kɩɩm-wẽns ra pa get b yell sõma ye, sẽn paase, b tudg-b-la ne b zãmsgã. B yaool n da segd n zãmsa nin-kãensã sɩdã la b keng b pelse. Rẽ, nonglem kãseng la nimbãan-zoeer yĩng kɩtame t’a Zezi bels nebã ne ‘Wẽnnaam soolem koe-noogã.’—Luk 4:16-21, 43.
18 Rũndã-rũndã me, neb wʋsg la b raag n bas tẽebã wɛɛngẽ la b tudg-ba, tɩ b pa tar saagr ye. Wala a Zezi, tõnd me sã n tags neb nins sẽn nan pa mi sɩd Wẽnnaamã tẽeb ratem yelle, nonglem la nimbãan-zoeer na n kɩtame tɩ d rat n taas-b Wẽnnaam Rĩungã koe-noogo. (Matɩe 6:9, 10; 24:14) Sẽn mik tɩ wakatã sẽn ketã yaa bilfã, koe-kãngã sẽn fãagd yõyã mooneg lebga yãgb bũmb n yɩɩd pĩndã.—1 Tɩmote 4:16.
“Bũmb fãa sɛɛb wakat kolgame”
19 Tẽeg-y tɩ nand t’a Pɩɛɛr sagl tɩ d nong taaba, a yeelame: “Bũmb fãa sɛɛb wakat kolgame.” (1 Pɩɛɛr 4:7) Ka la bilfu, dũni wẽng kãngã na n loogame tɩ Wẽnnaam dũni paalgã lɛdg-a. (2 Pɩɛɛr 3:13) Rẽnd rũndã-rũndã pa laas-laas wakat ye. A Zezi keooga tõnd woto: “Bɩ y gũus y mense n da sak tɩ yão-beed ne rã-yũur la vɩɩm kãnga yɛla pak yãmb tɩ ra-kãng wa ling yãmb ye. Tɩ bõe, a na n wa linga neba fãa sẽn be dũniyã zuga wa kũusri.”—Luk 21:34, 35.
20 Bɩ d maan d sẽn tõe fãa n ket n ‘gũusdẽ,’ n bãng tɩ tõnd wakatã yaa saabã wakate. (Matɩe 24:42) Bɩ d gũus t’a Sʋɩtãan kʋɩɩbg ba a ye ra kɩt tɩ d bʋdg ye. Bɩ d ra tol n bas dũni kãngã sẽn pa tar nonglma t’a kɩt tɩ d pa wilg tɩ d nonga d taabã ye. Sẽn yɩɩd fãa, bɩ d pẽnegd sɩd Wẽnnaam a Zeova n paasdẽ, a soab ning Mesi Rĩung sẽn na n wa ka la bilf n pids a raabã ne ziir tẽngã zugã.—Wilgri 21:4, 5.
[Tẽngr note]
a Biibl lebgr a taab yeta 1 Pɩɛɛr 4:8 pʋgẽ wã tɩ d segd n nonga taab “ne pʋ-peelem,” ne nonglem sẽn “zulum,” bɩ ne d “sũur fãa.”
ZÃMSGÃ SOGSGO
• Sagl-bʋg la a Zezi kõ a karen-biisã la a yaool n looge, la bõe n wilgd t’a Pɩɛɛr bãnga saglgã yõodo. (Sull a 1-2)
• “Nonglem wʋsg” yaa bõe? (Sull a 3-5)
• Bõe yĩng tɩ d segd n nong taaba? (Sull a 6-8)
• Wãn to la y tõe n wilg tɩ y nonga taaba? (Sull a 9-18)
• Bõe yĩng tɩ masã pa laas-laas wakate, la bõe la d segd n dɩk sard ne d sũur fãa n maane? (Sull 19-20)
[Foto, seb-neng 29]
Zems-n-taar sã n be zak pʋgẽ, b tõe n maoo ne yaoolem day kãensã yɩɩr n yɩɩda
[Foto, seb-neng 30]
Nonglmã kɩtdame tɩ d sõng neb nins sẽn sɩd rat sõngrã
[Foto, seb-neng 31]
Moon neb a taabã Wẽnnaam Rĩungã koe-noog yaa nonglem tʋʋmde