Ra bas-y tɩ y nonglmã boog ye

1, 2. a) Ãnd dãmb n bas tɩ b nonglmã boog wa a Zeezi sẽn wilg Matye 24:12? b) Bõe la b yeel Tʋʋm sebrã pʋgẽ tɩ wilgdẽ tɩ pipi kiris-nebã fãa la bal pa bas tɩ b nonglmã booge? (Ges-y fotã sẽn be yĩngrã.)

A ZEEZI sẽn wa n be tẽngã zugã, a sõdga bũmb toor-toor sẽn na n yɩ bãnd n wilg tɩ dũniyã sɛɛb kolgame. Wala makre, a yeelame tɩ “neb wʋsg nonglem na n boogame.” (Mat. 24:3, 12) Pipi kiris-nebã wakat menga, zʋɩf-rãmbã sẽn da yet tɩ b yaa Wẽnnaam nin-buiidã ra pa le nong Wẽnnaam ye.

² La kiris-nebã fãa la bal yẽ ra ‘moonda a Zeezi Kiris koe-noogã’ ne yẽesem, la b maand bũmb wʋsg sẽn wilgd tɩ b nonga Wẽnnaam la b tẽed-n-taasã, la baa sẽn pa-b kiris-nebã. (Tʋʋ. 2:44-47; 5:42) Bʋko, kẽer basame tɩ b nonglmã booge. Bõe n wilgd rẽ?

3. Tõe tɩ yaa bõe n kɩt tɩ pipi kiris-neb kẽer nonglem booge?

³ A Zeezi ra yeela Efɛɛz kiris-nebã yaa: “Yell ning mam sẽn tar ne yãmba, yaa tɩ yãmb basa y pipi nonglmã.” (Vẽn. 2:4) Yellã sɩnga wãna? Tõe tɩ yaa b zãmaanã neb sẽn da baood b mens nafr balã togs-n-taar la b rɩk-yã. (Efɛ. 2:2, 3) Sɩd me, Efɛɛz ra yaa galʋ-tẽng sẽn tar laogo, tɩ sẽn da pak tẽngã neb n tɩ yɩɩd yaa arzɛgsã la naarã. Nebã wʋsg ra yaa yoaadba, tɩ b toog kae ne Wẽnnaam noyã ye. B mensã raab n da pak-ba. B ra pa nong Wẽnnaam, b ra pa nong b taabã.

4. a) Bõe n wilgd tɩ neb wʋsg nonglem boogame? b) Bõe yell la d na n gom sõs-kãngã pʋgẽ?

⁴ Rũndã-rũndã me, neb wʋsg basame tɩ b nonglmã boog wa a Zeezi sẽn da pĩnd n togsã. Sẽn pa nong-b Wẽnnaamã sõor tara paasg bala. Neb milyõ-rãmb basa Wẽnnaam teegre, n teeg ninsaalba, n tagsdẽ tɩ yaa bãmb n na n welg ãdem-biisã zu-loeesã. Nebã ne taab nonglmã me tara boogre. Wa Efɛɛz kiris-neb kẽer sẽn bas tɩ b nonglmã boogã, rũndã-rũndã me, kiris-ned sã n pa gũusi, a nonglmã tõe n wa boogame. Sõs-kãngã pʋgẽ, d na n yãa d sẽn tõe n maan to-to 1) n ket n nong a Zeova ne d sũur fãa, 2) n ket n nong a Gomdã, la 3) n ket n nong d tẽed-n-taasã.

BƖ D KET N NONG A ZEOVA

5. Bõe yĩng tɩ d segd n nong Wẽnnaam?

⁵ Ãnda la d tog n nong n tɩ yɩɩda? A Zeezi wilgame tɩ yaa a Zeova. Ad a sẽn yeele: “‘Nong Zu-soaba fo Wẽnnaam ne f sũur fãa, la ne f sɩɩgã fãa, la ne f tagsgã fãa.’ Yẽnda n yaa pipi tõogo, n leb n yɩɩd b fãa.” (Mat. 22:37, 38) Tõnd sã n nong Wẽnnaam sõma, sõngda tõnd tɩ d tũud a noyã, n tõogd toogo, la d kis sẽn yaa wẽnga. (Karm-y Yɩɩn-sõamyã 97:10.) La a Sʋɩtãan ne a dũniyã maanda b sẽn tõe fãa n na n kɩt tɩ d ra le nong Wẽnnaam ye.

6. Nebã sẽn pa nong Wẽnnaamã, kɩtame tɩ b maand bõe?

⁶ Dũniyã nebã nonglmã pa nonglem hakɩɩk ye. B pʋd n pa mi nonglem ye. Wala makre, b ra tog n nonga Wẽnnaam, la b bas n nonga b mense. (2 Tɩm. 3:2) Sẽn pak-b yaa ‘yĩngã ratem wẽngã, ninã sẽn get bũmb nins n datã, la wilg-m-meng arzegs sẽn wat ne wã.’ (1 Zã 2:16) Tʋm-tʋmd a Poll keooga kiris-nebã tɩ yĩngã ratem sakr baasda wẽnga. A yeelame: “Yĩngã ratem sakr wata ne kũum. . . . Bala, yĩngã ratem sakr yaa beem ne Wẽnnaam.” (Rom. 8:6, 7) Sɩd me, ned sã n lʋɩɩs ligdã baoob taoore, wall a nong yoobo, baasda ne sũ-sãamse.—1 Kor. 6:18; 1 Tɩm. 6:9, 10.

7. Bõe n tõe n wa kɩt tɩ kiris-ned sẽn nong Wẽnnaam to-to wã booge?

⁷ Neb n be n yetẽ tɩ Wẽnd kae, tɩ kẽer yetẽ tɩ ned ka tõe n bãng a sã n beeme ye. Sãnda me yetame tɩ bũmb fãa wa n bee woto bala. Nin-kãensã fãa ratame tɩ nebã ra tẽ Wẽnnaam, pa sokd b na nong-a ye. B kɩtame tɩ neb wʋsg tagsdẽ tɩ yaa neb nins yam sẽn pa waooge, tɩ b belgr yaa nana wã n tẽed tɩ Wẽnnaam beeme, la tɩ yaa yẽ n naan bũmb fãa. B waoogda siãnsã bãngdba, n yaool n bas n pa waoogd Naandã ye. (Rom. 1:25) D sã n kelgd neb a woto, d sẽn nong Wẽnnaam to-to wã na n boogame, wall na n pʋd n sãama tõnd ne yẽ zoodã.—Ebre. 3:12.

8. a) Bõe n tõe n wa kɩt tɩ ned sẽn tũud a Zeova raood komse? b) Bõe la b yet Yɩɩn-sõamyã 136 pʋgẽ tɩ kengd pɛlga?

⁸ D sẽn be a Sʋɩtãan dũniyã pʋgẽ wã, bũmb wʋsg n tõe n koms raoodo. (1 Zã 5:19) La d sã n bas tɩ d raood komse, tõe n booga d tẽebã pãnga, la kɩt me tɩ d pa le nong Wẽnnaam wa pĩndã ye. Wala makre, tõe tɩ d kʋʋlame, tɩ rẽ kɩt tɩ yɛl kẽer pa nana ne-do, pa rẽ bɩ d laafɩ wã pa waooge, wall d tara ligd zu-loeese. Tõe me tɩ bũmb kẽer la d pa tõogd n maand wa d sẽn datã, wall yaa d vɩɩmã yɛl kẽer n pa wa d sẽn da magã, tɩ sãamd d sũuri. Sẽn yaa zu-loɛɛg ning fãa la d tara, d pa segd n tags t’a Zeova bas-d lame ye. D bʋgsd Yɩɩn-sõamyã 136:23 goamã zug tɩ kengda pɛlga. Be, yɩɩn-gʋlsdã yeelame: “Tõnd sẽn wa n be d yembdã pʋgã, Sẽn-Ka-Saab tẽega tõnd yelle, bala, bãmb nonglmã paada wakat fãa!” Sɩd me, a Zeova nonglmã ne a nin-buiidã ka saab ye. Rẽnd d tõe n basa d yam tɩ d sẽn yõkd a sɛɛg n kõt sõngrã, a wʋmdame, la a na n leokame.—Yɩɩn. 116:1; 136:24-26.

9. Bõe n sõng a Poll t’a sẽn nong Wẽnnaam to-to wã pa booge?

⁹ Wa yɩɩn-gʋlsdã, tʋm-tʋmd a Poll ra bʋgsda a Zeova sẽn sõngd a nin-buiidã to-to wã zugu, tɩ ra kõt-a pãnga. A yeelame: “Zu-soabã yaa mam sõangda, mam kõn zoe rabeem ye. Bõe la ninsaal tõe n maan maam?” (Ebre. 13:6) A Poll sẽn da kɩs sɩd t’a Zeova bee yẽ sõngr yĩngã, a paama pãng n tõog n mao ne a zu-loeesã. A pa bas t’a zu-loeesã koms a raood ye. Baa a sẽn wa n be bãens roogẽ wã, a gʋlsa lɛta n tool tigimsi, n keng b raoodo. (Efɛ. 4:1; Fili. 1:7; Fɩl. 1) A Poll paama zu-loe-kɛgemse, la a ra ket n nonga a Zeova ne a sũur fãa. Bõe n sõng-a? Yaa a sẽn kell n teeg a Zeova sẽn yaa “Wẽnnaam sẽn belsd nebã,” b “yel-pakrã fãa pʋgẽ” wã. (2 Kor. 1:3, 4) Bõe n na n sõng-d tɩ d rɩk a Poll togs-n-taare?

10. Bõe la d tõe n maan tɩ sõng-d tɩ d ket n nong a Zeova ne d sũur fãa?

¹⁰ A Poll wilga bũmb a ye sẽn tõe n sõng-d tɩ d ket n nong a Zeova ne d sũur fãa. Ad a sẽn yelle: “Pʋʋs-y n da bas ye.” A yeelame me: “Wɩng-y ne pʋʋsgo.” (1 Tes. 5:17; Rom. 12:12) D sã n pʋʋsd Wẽnnaam wakat fãa, sõngdame tɩ tõnd ne yẽ zoodã tar pãnga. (Yɩɩn. 86:3) D sã n pelgd d pʋg n gomd ne d saasẽ Ba wã, n togsd-a sẽn be d sũurẽ wã, kɩtdame tɩ d zoodã paasdẽ. (Yɩɩn. 65:3) Sẽn paase, d sã n neẽ t’a reegda d pʋʋsgã, kɩtdame tɩ d maneg n nong-a. D na n basa d yam, n miẽ t’a “pẽe ne neb nins sẽn boond bãmbã.” (Yɩɩn. 145:18) D sã n kɩs sɩd woto t’a Zeova nong-d lame la t’a bee d sõngr yĩnga, d tõogd n maoo ne zo-loɛɛg buud fãa.

BƖ D KET N NONG WẼNNAAM GOMDÃ

11, 12. Bõe la d tõe n maan tɩ sõng-d tɩ d maneg n nong Wẽnnaam Gomdã?

¹¹ Tõnd sẽn yaa kiris-nebã, d nonga Biiblã sẽn yaa Wẽnnaam Gomdã. Yaa Biiblã n sõngd ned t’a bãng sɩdã Wẽnnaam la a raabã zugu. A Zeezi ra yeela a Ba wã yaa: “Yaa yãmb goamã la sɩdã.” (Zã 17:17) D sã n bãng Biiblã sẽn yetã, d na n nonga Wẽnnaam goamã sẽn yaa sɩdã. (Kol. 1:10) Yɩɩn-sõamyã 119 gʋlsdã wilga bũmb a to me d sẽn segd n maane. (Karm-y Yɩɩn-sõamyã 119:97-100.) D segd n tagsda d sẽn karem bũmb nins Biiblã pʋgẽ wã yelle. D sã n bʋgsd Biiblã goamã, n tagsd n get d sẽn tõe n tũ a saglsã to-to, na n kɩtame tɩ d maneg n nong Wẽnnaam Gomdã.

¹² Yɩɩn-gʋlsdã paasame: “Yãmb goamã nooma mam noorẽ, n yɩɩd sɩɩd sẽn be mam dagsendakẽ.” (Yɩɩn. 119:103) A Zeova siglgã sẽn yiisd sɛb ninsã yaa wa rɩ-noodo. Ned sã n dɩt rɩɩb sẽn noome, a maagda a yĩng sẽn na yɩl n wʋm rɩɩbã noom. Woto me, d sã n wa zãmsd siglgã sɛbã, d segd n maaga d yĩnga. Rẽ, ‘gom-noodã’ sẽn be be wã na n kẽe d sũurã, tɩ d tõe n wa tẽeg nana, la d tõog n sõng neb a taab me.—Koɛ. 12:10.

13. Bõe n kɩt t’a Zeremi ra nong Wẽnnaam goamã? Rẽ kɩtame t’a maan bõe?

¹³ No-rɛɛs a Zeremi ra nonga Wẽnnaam Gomdã. A yeelame: “Mam sẽn wʋm y goamã, mam deegame. Saasẽ-Pãng-Soab a Wẽnnaam, yaa yãmb n so maam, la y goamã kõo maam sũ-noog n kɩt tɩ m kɩdemdẽ.” (Zer. 15:16) A Zeremi sẽn wʋm Wẽnnaam goamã, a bʋgsa b zugu, hal tɩ kõ-a sũ-noogo. Kɩtame t’a sũur da noom a sẽn paam n yaa Wẽnnaam kaset soaba, n moond a koeesã. Tõnd me sã n nong bũmb nins Biiblã sẽn yetã, d sũur na n yɩɩ noog d sẽn paam n yaa a Zeova Kaset rãmba, n moond Rĩungã koe-noog yaoolem wakatã.

14. Bõe me n na n sõng-d tɩ d maneg n nong Biiblã?

¹⁴ Bõe me n na n sõng-d tɩ d maneg n nong Biiblã? Yaa d sẽn na n kẽnd tigissã n pa vaandẽ. Bala be la d paamd zãmsg sẽn yit a Zeova nengẽ. Semen fãa, ne Gũusg Gasgã maasem d zãmsda Biiblã d tigimsẽ wã. D sã n dat tɩ Gũusg Gasgã zãmsg naf-do, d segd n deng n segla zãmsgã sõma. Bũmb sẽn na n sõng-d yaa d sẽn na n karem vɛrse-rãmbã fãa. Gũusg Gasgã bee ne buud-goam wʋsg jw.org sẽn yaa tõnd sɩtã pʋgẽ, tɩ d tõe n paam n karem wall n telesaarze. D tõe n kẽe JW Library wã pʋgẽ me n paam Gũusg Gasgã. B maaname tɩ d tõe n paam vɛrse-rãmbã nana-nana n karme. Sẽn yaa to-to fãa la d maand n paamd Gũusg Gasgã, d sã n wa segend zãmsgã bɩ d karem vɛrse-rãmbã la d bʋgs sõma, tɩ na n kɩtame tɩ d maneg n nong Biiblã.—Karm-y Yɩɩn-sõamyã 1:2.

BƖ D KET N NONG D TẼED-N-TAASÃ

15, 16. a) No-bʋg la a Zeezi kõ tõnd Zã 13:34, 35 wã pʋgẽ? b) Yaa d sã n nong Wẽnnaam ne a Gomdã la d na n nong d tẽed-n-taasã. Bõe yĩnga?

¹⁵ Yʋng ning b sẽn yõk a Zeezi wã, a ra yeela a karen-biisã yaa: “Mam kõta yãmb tõ-paalga: ‘Nong-y taaba. Nong-y taab me wa mam sẽn nong yãmbã. Yãmb sã n nong taaba, nebã fãa na bãng tɩ yãmb yaa mam karen-biisi.’”—Zã 13:34, 35.

¹⁶ D sẽn nong a Zeova wã kɩtame tɩ d nong d tẽed-n-taasã me. Sɩd me, ned sã n pa nong Wẽnnaam, a pa tõe n nong a tẽed-n-taasã ye. A sã n pa nong a tẽed-n-taasã me, a pa tõe n nong Wẽnnaam ye. Tʋm-tʋmd a Zã yeelame: “Ned ning sẽn ka nong a ba-biig a sẽn ne wã, a ka tõe n nong Wẽnnaam yẽ sẽn ka ne wã ye.” (1 Zã 4:20) D sã n nong Biiblã, d na n nonga a Zeova la d tẽed-n-taasã. Bõe yĩnga? Bala yaa Biiblã n yet tɩ d tog n nonga Wẽnnaam la d tẽed-n-taasã. D sã n nong Biiblã, d na n data ne d sũur fãa n tũ a sẽn yetã.—1 Pɩy. 1:22; 1 Zã 4:21.

17. Bõe la y tõe n maan tɩ wilg tɩ y nonga y tigingã neba?

¹⁷ Karm-y 1 Tesalonik-rãmb 4:9, 10. Bõe la y tõe n maan tɩ wilg tɩ y nonga y tigingã neba? Y tõe n tũud n dɩkda y tẽed-n-taag sẽn kʋʋle, n dat sõngr sẽn na yɩl n ta tigissã zĩigẽ. Y tõe n sõnga pʋg-kõor n maneg a roogã bũmb ninga. (Zak 1:27) D tẽed-n-taag ning sũur sã n sãame, wall a komsa raoodo, pa rẽ bɩ a tara zu-loeese, d tõe n maana bũmb n wilg t’a yell pak-d lame, n bels-a, la d keng a raoodo. (Yel. 12:25; Kol. 4:11) Rẽnd yaa ne d no-goamã la d tʋm-tʋmdɩ wã la d wilgd tɩ d nonga d “tẽeb pʋgẽ ba-biisã.”—Gal. 6:10.

18. Tõnd ne d tẽed-n-taag moor sã n yõsge, bõe n na n sõng-d tɩ d welg yellã?

¹⁸ Biiblã ra pĩnd n togsame tɩ yaoolem wakatã, neb wʋsg na n yɩɩ rat-wʋsg rãmba, tɩ yaa b mensã yell bal n pak-ba. (2 Tɩm. 3:1, 2) La tõnd sẽn yaa kiris-nebã, d segd n maana d sẽn tõe fãa n ket n nong Wẽnnaam ne d sũur fãa, n maneg n nong a Gomdã, la d nong d tẽed-n-taasã. Yaa sɩd tɩ tõnd ne d tẽed-n-taag moor tõe n wa yõsgame. La d sẽn nong taabã, d maoodame n welgd mo-yõsr fãa ne nonglem. (Efɛ. 4:32; Kol. 3:14) D ra tol n bas tɩ d nonglmã boog ye! Bɩ d ket n nong a Zeova ne d sũur fãa, n nong a Gomdã, la d nong d tẽed-n-taasã.