Bʋkaoorã Daar yaa bõe?

YÃMB tagsdame tɩ Bʋkaoorã Daar na n yɩɩ wãn to? Neb wʋsg tagsdame tɩ neb milyaar dãmbã na n kolga Wẽnnaam naam geerã yembr-yembre, tɩ b kao ned kam fãa bʋʋdo, tɩ kẽer paam vɩɩm saasẽ tɩ neb a taabã paam namsg sẽn pa sate. La Biiblã pa gomd ra-kãng yell woto ye. Wẽnnaam Gomdã pa bilgd-a wala rabeem wakat ye, a wilgdame t’a yaa saagr la lebs-n-maneg wakate.

Wilgri 20:11, 12 pʋgẽ, d karemda tʋm-tʋmd a Zã sẽn bilg Bʋkaoorã Daar woto: “Mam yãa geer pɛɛlg sẽn yaa kãsenga la ned ninga sẽn zao-a zugã. Dũniyã ne saasã zoe n looga bãmb taoore. La zĩig ka le be bãmb yĩng ye. La mam yãa kũum nin-tals ne nin-kãsems sẽn yas geera taoore. La sɛb lakame, la sebr a to lakame sẽn yaa vɩɩm sebre. La kũum bʋʋd kaoome sẽn zems bãmb tʋʋma sẽn gʋls seb-kãens pʋsã.” Ãnd soab la Bʋkaood ning b sẽn bilg ka wã?

Yaa Wẽnnaam a Zeova la ãdem-biisã Bʋkaood kãseng sẽn ka to wã. La a rɩka bʋ-kaoorã meng n bobl neda. Sã n yaa ne Tʋʋma 17:31, tʋm-tʋmd a Poll yeelame tɩ Wẽnnaam “yãka raare tɩ rao ninga bãmb sẽn yãka na n kao dũniyã bʋʋd tɩrga.” Bʋkaood kãng yaa a Zezi Kirist sẽn vʋʋgã. (Zã 5:22) La yaa wakat bʋg la Bʋkaoorã Daar sɩngda? Wakat a wãn la a na n kaoose?

Wilgr sebrã pʋgẽ, b yetame tɩ Bʋkaoorã Daar sɩngda Armagedõ zabrã poore, b sã n wa sãam a Sʋɩtãan dũniyã sẽn be tẽng zugã.a (Wilgri 16:14, 16; 19:19–20:3) Armagedõ poore, b na n kẽesa a Sʋɩtãan ne a zĩn dãmbã bog-zulung pʋgẽ tɩ maan yʋʋm tusri. Wakat kãnga, neb 144000 na n zĩnda saasẽ n yɩ bʋ-kaoodba, la b na n dɩɩ “naam ne Kirist yʋʋm tusri.” (Wilgri 14:1-3; 20:1-4; Rom dãmba 8:17) Bʋkaoorã Daar pa yell sẽn maand lɛɛr 24 pʋgẽ bal ye. A na n kaoosa sẽn ta yʋʋm tusri.

Yʋʋm tusrã wakate, a Zezi Kirist n na n “kao sẽn vɩ-ba la sẽn ki-ba bʋʋdo.” (2 Tɩmote 4:1, Sebr Sõngo) “Nin-vɩɩsa” na n yɩɩ ‘kʋʋn-kãsengã’ sẽn na n põs Armagedõ wã. (Wilgri 7:9-17) Tʋm-tʋmd a Zã leb n yãa sẽn ki-bã sẽn yas bʋ-kaoorã geer taoore. Wala a Zezi sẽn kãabã, ne vʋʋgrã maasem, neb nins “fãa sẽn be yaad pʋsẽ wã na n wʋma [Kirist] koɛɛgã n yi.” (Zã 5:28, 29; Tʋʋma 24:15) La b na n tika bõe n kao nebã fãa bʋʋdo?

Sã n yaa ne tʋm-tʋmd a Zã yãabã, “sɛb lakame,” la “kũum bʋʋd kaoome sẽn zems bãmb tʋʋma sẽn gʋls seb-kãens pʋsã.” Yaa nebã pĩnd tʋʋmã n gʋls seb-kãens pʋsẽ bɩ? Ayo, b pa na n tik nebã sẽn maan bũmb nins n yaool n ki wã zug n kao b bʋʋd ye. Wãn to la d mi rẽ? Biiblã yetame: “Ned sã n ki, yel-wẽna ka le tar pãng ne-a ye.” (Rom dãmba 6:7) Nin-kãensã sẽn vʋʋgã, b pĩnd yel-wẽnã pa na n zĩnd b zut yɛs ye. Rẽnd seb-pindmã segd n yaa sɛb sẽn tar Wẽnnaam noy a taaba. Sẽn na yɩl n vɩɩmd wakat sẽn pa sate, Armagedõ põsdbã la b sẽn vʋʋg-b rãmbã segd n saka Wẽnnaam noyã, n paas noy nins fãa a Zeova sẽn na n wa wilg yʋʋm tusrã sasa wã. Rẽnda, b na n kaoa nebã bʋʋd tɩ zems ne b sẽn na n maan bũmb ning Bʋkaoorã Daar sasa wã.

Bʋkaoorã Daar na n kõo neb milyaar dãmb sẽn da pa mi Wẽnnaam sor tɩ b bãng a raabã la b sak-a. Woto rat n yeelame tɩ zãmsg tʋʋm kãseng n na n zĩndi. Sɩda, ‘dũniyã rãmb na n zãmsa tɩrlem.’ (Ezai 26:9) La pa nebã fãa n na n tʋlg n sak Wẽnnaam daabã ye. Ezai 26:10 yetame: “F sã n maand nin-wẽng neere, yẽ ka zãmsd tɩrlem maaneg ye. Yẽ maanda wẽng tẽn-sõnga pʋgẽ. La yẽ ka yãt [a Zeova] ziira ye.” B na n kʋʋ nin-kãensã wakat fãa yĩng Wẽnnaam Bʋkaoorã Daare.—Ezai 65:20.

Neb nins sẽn na n kell n vɩɩmd tɩ ta Bʋkaoorã Daar saabã, na n yɩɩ neb sẽn paam vɩɩm hakɩkã n lebg ninsaalb sẽn zems zãnga. (Wilgri 20:5) Woto, bʋ-kaoorã daar pʋgẽ la b na n lebs n maneg ãdem-biisã tɩ b zems zãng wa sẽn da yaa to-to sɩngrẽ wã. (1 Korẽnt dãmba 15:24-28) Rẽ poore, baasg makr n na n zĩndi. B na n yiisa a Sʋɩtãan bog-zulungã pʋgẽ n bas-a t’a bao n belg ãdem-biisã a tɛkem-tɛkem. (Wilgri 20:3, 7-10) Biiblã kãab-kãngã na n pidsa neb nins sẽn na n kɩɩs a Sʋɩtãanã zutu: “Nin-tɩrs na n sooga dũniyã la bãmb na n zĩnda a zug wakat sẽn ka sɛta.” (Yɩɩl Sõamyã 37:29) N-ye, Bʋkaoorã Daar na n yɩɩ bark n kõ sakdbã fãa!

[Tẽngr note]