WẼNNAAM GOMDÃ SẼN YETE

Bõe n na n maan bʋ-kaoorã daare?

Sõs-kãngã pʋgẽ, b leokda sogsg nebã sẽn mi n sokd b mense, la b wilgd Biiblã zĩis nins d sẽn tõe n yã b leoorã. Y sã n dat t’a Zeova Kaset soab wa tɩ y sõs rẽ zugu, a na n saka ne yamleoogo.

1. Bʋ-kaoorã daar yaa bõe?

Wʋsg tagsdame tɩ bʋ-kaoorã daare, neb milyaar-dãmb n na n kolg Wẽnnaam geerã, t’a tik ned kam fãa tʋʋm n kao a bʋʋdo, tɩ kẽer paam n vɩɩmd saasẽ, tɩ sãnda sɩbgr yɩ namsg sẽn pa sate, wa nug rɩtg fotã sẽn wilgdã. La Biiblã yaool n wilgame tɩ bʋ-kaoorã yõod yaa sõng nebã tɩ b paam b mens ne wẽgbã. (Yɩɩl Sõamyã 96:13b) Wẽnnaam yãka a Zezi t’a na n kao ãdem-biisã bʋʋdo.—Karm-y Ezai 11:1-5; Tʋʋm 17:31.

2. Wãn to la bʋ-kaoorã daar na n wa ne tɩrlem?

D yaab a Ãdem sẽn kɩɩs Wẽnnaamã, a kambã la yagensã fãa rogd ne yel-wẽndã, n namsdẽ la b kiidẽ. (Rom dãmba 5:12) Sẽn na yɩl n maneg yel-kãnga, a Zezi na n vʋʋga neb milyaar-dãmba. Wilgr sebrã yeelame tɩ rẽ na n zĩnda a naamã sẽn na n kaoos yʋʋm tusrã sasa.—Karm-y Wilgr 20:4, 11, 12.

B pa na n tik sẽn na n vʋʋg-bã sẽn tʋm tʋʋm nins nand tɩ b ki wã zug n kao bʋʋdã ye. (Rom dãmba 6:7) Wilgr sak 20 wã pʋgẽ, b goma sɛb b sẽn lak yelle. B na n wilg-b-la bũmb nins sẽn gʋls seb-kãens pʋsẽ wã, la b tik ned fãa manesem sẽn na n yɩ to-to wã n kao a bʋʋdo. Tʋm-tʋmd a Poll yeelame tɩ neb nins sẽn na n vʋʋg n paam tɩ b zãms-b tɩ b bãng Wẽnnaamã na n yɩɩ neb sẽn pa tɩrs ne ‘nin-tɩrse.’—Karm-y Tʋʋm 24:15.

3. Bõe n na n maan bʋ-kaoorã daare?

Neb nins sẽn ki n pa paam n bãng Wẽnnaam a Zeova wã fãa na n tõog n bãng-a lame la b tũ-a. B sã n maan woto, b na n “paama vɩɩm.” La kẽer n pa na n sak n zãms a Zeova noyã. Bãmb dãmbã na n “paama bʋʋdo.”—Karm-y Zã 5:28, 29; Ezai 26:10; 65:20.

Bʋ-kaoorã daar sẽn na n kaoos yʋʋm tusrã saabẽ t’a Zeova sõnga ãdem-biisã tɩ b zems zãnga, wa d yaab a Ãdem sẽn da yaa to-to nand t’a beegã. (1 Korẽnt dãmba 15:24-28) Ad sakdbã sɩd na n paama bark tɛkẽ! La yaoolem makr n na n zĩndi. Wẽnnaam na n yiisa a Sʋɩtãan b sẽn da lob bog-zulungã pʋgẽ t’a zĩnd be yʋʋm tusrã. A Sʋɩtãan na n le bao n belga nebã. La sẽn na n kell n sak-b a Zeova wã na n paam n vɩɩmda tẽngã zug wakat sẽn kõn sa.—Karm-y Ezai 25:8; Wilgr 20:7-9.

4. Bʋ-kaoor daar a to n be bɩ?

Biiblã boonda dũni-kãngã sãoongã me tɩ ‘bʋ-kaoor daare.’ Ra-kãng na n linga nebã wa a Nowe wakatẽ sa-kãsengã sẽn ling nin-wẽnsã n menes-bã. La “wẽn-kɩɩsdbã” sãoongã na n paka sor tɩ b lugl dũni-paalga, “tɩrlem sẽn na n zĩnd a pʋgẽ.”—Karm-y 2 Pɩɛɛr 3:6, 7, 13.

[Foto seb-neng 17]

Y sã n dat vẽnegr n paase, bɩ y karem Biiblã sɩd yetame tɩ bõe? sebrã neng 213-215 wã. A Zeova Kaset rãmbã n yiis-a.

[Foto seb-neng 16]

A Gustave Doré (1832-1883) sẽn bilg bʋ-kaoorã daare. A Doré n maan desẽ wã