D sẽn tõe n lak d mens ne dũniyã to-to

1. Yaoolem yʋng ning a Zezi sẽn zĩnd tẽng zugã, bõe la a wilg a karen-biisã vẽenega?

A ZEZI yaoolem yʋngã tẽng zug ka wã, a wilgame t’a karen-biisã beoog-daar yell pak-a lame. A pʋd n pʋʋsa a Ba wã rẽ wɛɛngẽ n yeel woto: “Mam ka kot yãmb tɩ y yiis bãmb dũniyã pʋgẽ ye, m kotame tɩ y gũ-b tɩ wẽng soabã ra tõog-b ye. Bãmb ka dũniyã rẽnd wa mam sẽn ka dũniyã rẽndã.” (Zã 17:15, 16) A Zezi sẽn yeel bũmb ning a pʋʋsgã pʋgẽ wã wilgame t’a nonga a karen-biisã wʋsgo, la tɩ bũmb ning a sẽn da togs bãmb kẽer yʋn-kãngã wã pa reem yell ye. A ra yeela woto: “Yãmb ka dũniyã rẽnd ye.” (Zã 15:19) Vẽenega, sã n yaa ne a Zezi, ra yaa tɩlae t’a karen-biisã lak b mens ne dũniyã!

2. Dũni ning yell a Zezi sẽn gomã yaa bõe?

² Dũni ning yell a Zezi sẽn gomã yaa neb nins fãa sẽn pa maand Wẽnnaam daabã, t’a Sʋɩtãan so-ba, n kɩt tɩ b yaa wuk-m-mens rãmba, tɩ yaa bãmb mensã yell bal n pak-bã. (Zã 14:30; Efɛɛz rãmba 2:2; 1 Zã 5:19) Rẽ n so tɩ “zood ne dũniyã yaa beem ne Wẽnnaam.” (Zak 4:4) La neb nins sẽn dat n kell n pa Wẽnnaam nonglmã pʋgẽ wã sẽn be dũniyã pʋgẽ wã, b yɩta wãn n lak b mens ne-a? Yaa b sẽn na n 1) kell n sak Wẽnnaam Rĩungã la b ra kẽes b toog politikã pʋgẽ, 2) n kɩɩs dũniyã sɩɩgã bɩ a yamã, 3) n ningd fut sẽn yaa sõma la b manegd b mensã sõma, 4) n tall nif sẽn yaa sõma, 5) la b bob Wẽnnaam zab-teedã fãa. D na n goma bõn-kãensã a nu wã yell masã.

D SAK WẼNNAAM LA D RA KẼES D TOOG POLITIKÃ PƲGẼ YE

3. a) Bõe yĩng t’a Zezi lak a meng ne politikã? b) Bõe yĩng tɩ d tõe n yeel t’a Zezi karen-biis nins sẽn paam vʋʋsem sõng zaeebã yaa tʋm-tʋmdb bɩ ãmbasadɛɛr dãmba? (Ges-y tẽngr vẽnegrã.)

³ A Zezi pa kẽes a toog politikã pʋgẽ ye. A rɩka a sẽkã fãa n moon Wẽnnaam Rĩungã sẽn yaa saasẽ goosneemã. Yẽ n da na n wa yɩ Wẽnnaam Rĩungã Rĩma. (Daniɛll 7:13, 14; Luk 4:43; 17:20, 21) Rẽ n so t’a sẽn wa n be guvɛrneer a Põns Pɩlat taoorã, a yeela woto: “Mam soolem ka dũniyã rẽnd ye.” (Zã 18:36) A Zezi karen-biis hakɩkã wilgdame tɩ b bee Kirist la a Rĩungã poorẽ, n dɩkd Kirist togs-n-taar n moond Rĩungã dũniyã gill zugu. (Matɩe 24:14) Tʋm-tʋmd a Poll yeela woto: “Dẽ yĩnga, tõnd yaa Kirist tʋm-tʋmdb wa Wẽnnaam sẽn togsd yãmbã . . . , tõnd kota yãmb ne Kirist yʋʋr tɩ y sak Wẽnnaam paasgã.”a—2 Korẽnt dãmba 5:20.

4. Wãn to la kiris-neb hakɩkã fãa wilgd tɩ b bee Wẽnnaam Rĩungã poorẽ? (Ges-y seb-neng 52 zĩ-gũbrã.)

⁴ Ãmbasadɛɛr sẽn yaa ned tẽng a to goosneem sẽn tʋmã yĩnga, a pa kẽesd a toog tẽng ning a sẽn be wã politik yɛlẽ ye. A tʋmda a meng tẽngã nafr yĩnga. Yaa woto me ne Kirist karen-biis nins sẽn paam vʋʋsem sõng zaeebã. Bãmb yir yaa saasẽ. (Filip rãmba 3:20) B sẽn moond Rĩungã ne yẽesmã yĩnga, b sõnga “piis a taab” milyõ rãmb tɩ b “sak Wẽnnaam paasgã.” (Zã 10:16; Matɩe 25:31-40) “Piis a taabã” me sõngda a Zezi karen-biis nins sẽn paam vʋʋsem sõng zaeebã. Sul-kãensã a yiibã naaga taab n moond Wẽnnaam Rĩungã. B laka b mens fasɩ ne politikã yɛl me.—Ezai 2:2-4.

5. Zĩ-bʋg wɛɛngẽ la kiris-nebã pa wa Israɛll nebã, la rẽ kɩtame tɩ kiris-nebã pa maand bõe?

⁵ Pa b sẽn segd n sak Kiristã bal n kɩt tɩ kiris-neb hakɩkã pa kẽesd b toog politikã yɛlẽ ye. Tõnd pa wa Israɛll nebã Wẽnnaam sẽn da kõ tẽng a ye tɩ b be beenẽ wã ye. Tõnd yaa saam-biisi, la d bee dũniyã gill zugu. (Matɩe 28:19; 1 Pɩɛɛr 2:9) Woto yĩnga, tõnd sã n kẽes d toog politikã yɛlẽ, d pa na n tõog n moon Rĩungã koɛɛg ne raood la pʋ-peelem, welgr me na n zĩnda tõnd ne d tẽed-n-taasã sʋka. (1 Korẽnt dãmba 1:10) Sẽn paase, yaa vẽeneg tɩ zabr wakate, d na n kʋʋ d tẽed-n-taase. La Wẽnnaam yaool n yeelame tɩ d nong-ba. (Zã 13:34, 35; 1 Zã 3:10-12) Rẽ n so t’a Zezi yeel a karen-biisã tɩ b sui b sʋʋsã b wʋʋdẽ, sẽn dat n yeel tɩ b bas zabre. A pʋd n yeelame tɩ b nong b bɛɛbã.—Matɩe 5:44; 26:52; ges-y seb-neng 55 zĩ-gũbrã sẽn sok tɩ: “Mam lakda m meng ne dũniyã yɛl bɩ?”

6. Y sã n dɩka y meng n kõ Wẽnnaam, y manesem segd n yɩɩ wãn a Sezaar sakrã wɛɛngẽ?

⁶ Tõnd sẽn yaa kiris-neb hakɩkã, d rɩka d mens n kõ Wẽnnaam, lakae pa ninsaala, pa ninsaalb siglga, pa tẽng me ye. Pipi Korẽnt dãmb 6:19, 20 yeela woto: “Yãmb ka so yãmb mens [ye]. Tɩ bõe, b raa yãmb ne raab sẽn yaa toogo.” Rẽ n so t’a Zezi karen-biisã kõt a “Sezaar” bũmb nins sẽn yaa a “Sezaar” dẽndã, sẽn dat n yeel tɩ b yaooda lampo rãmbã, la b sakd nanambsã wa Wẽnnaam sẽn datã. La b kõta “Wẽnnaam bũmb nins sẽn yaa Wẽnnaam dẽndã.” (Mark 12:17; Rom dãmb 13:1-7) Bũmb nins sẽn yaa Wẽnnaam dẽndã yaa bõe? Yaa a sẽn dat tɩ d pʋʋs yẽ a ye bala, n nong-a ne d sũur fãa la d sak-a zãng-zãngã. Sã n wa yaa tɩlae, kiris-neb hakɩkã saka kũum Wẽnnaam yĩnga.—Luk 4:8; 10:27; Tʋʋma 5:29; Rom dãmb 14:8.

D KƖƖS “DŨNIYà SƖƖGÔ

7, 8. “Dũniyã sɩɩgã” bɩ a yamã yaa bõe, la a kɩtdame tɩ ned lebg wãn-wãna?

⁷ Bũmb a to me sẽn na n wilg tɩ kiris-nebã laka b mens ne dũniyã yaa b sẽn na n kɩɩs a sɩɩgã bɩ a yamã. A Poll yeelame tɩ “tõnd ka reeg dũniyã sɩɩg ye, tõnd deega Sɩɩg Sõng sẽn yit Wẽnnaam nengẽ.” (1 Korẽnt dãmba 2:12) A yeela Efɛɛz kiris-nebã woto: “Yãmb da kẽnda bãmb pʋgẽ wa dũniyã nebã sẽn kẽndã, n sakd sẽn tar-a noor ne yĩngr yellã, la yãmb da sakda sɩɩg ninga sẽn tʋmd zãgsdbã fãa pʋsã.”—Efɛɛz rãmba 2:2, 3.

⁸ Yaa dũniyã yamã la sẽn tusd nebã tɩ b kɩɩsd Wẽnnaam la kɩtdẽ tɩ b sakd “yĩng ratem wẽngã la nin datem wẽngã.” (1 Zã 2:16; 1 Tɩmote 6:9, 10) Bũmb ning sẽn kɩt tɩ dũniyã yamã tar pãngã yaa a sẽn kɩtd tɩ yĩngã ratem wẽngã be yamleoog wʋsgã. Sẽn paase, a kẽed-f lame tɩ f pa bãnge, la a sã n paam n kẽ-fo, a soogd-f lame hal t’a yiisg lebg toogo. La bilf-bilfu, a kɩtdame t’a soabã rɩkd zʋg-wẽnse. A soab tõe n wa geta a meng yell bala, n lebg wuk-m-meng soaba, soog-m-meng soaba, tõta, bɩ n dat naam bɩ yʋʋre.b Koɛɛg-koɛɛga, d tõe n yeelame tɩ yaa bilf-bilf la dũniyã yamã kɩtd tɩ ned rɩk a Sʋɩtãan zʋgdã.—Zã 8:44; Tʋʋma 13:10; 1 Zã 3:8, 10.

9. Wãn to la dũniyã yamã kẽed neda?

⁹ Dũniyã yamã sã n kẽ ned yamẽ la a sũurẽ, a tõe n kɩɩ yẽg bɩ? N-ye! La yaa a soabã sã n pa maan gũusgu. (Yelbũna 4:23) Naoor wʋsgo, sɩngda bilf-bilfu. Tõe n tũu ne tũud-n-taas sẽn wõnd b yaa nin-sõmse, n yaool n pa nong a Zeova ye. (Yelbũna 13:20; 1 Korẽnt dãmba 15:33) A tõe n kẽe foo, f sã n karemd seb-yoodo, n get yoob yɛl bɩ n get bũmb nins sẽn be sɩdã kɩɩsdbã sit rãmbẽ ẽntɛrnetã pʋgẽ, n nong reem-yoodo, la f nong ɛspoor nins pʋsẽ wags-taabã sẽn loog noorã. Dẽnd d segd n laka d mens ne neb la bũmb nins fãa sẽn tar a Sʋɩtãan bɩ a dũniyã yamã.

10. Bõe la d tõe n maan tɩ dũniyã yamã ra kẽ-do?

¹⁰ Bõe la d tõe n maan tɩ dũniyã yamã ra kẽ-do, tɩ d kell n pa Wẽnnaam nonglmã pʋgẽ? Yaa d sẽn na n dɩt bũmb nins fãa a Zeova sẽn sigl tõnd neer yĩngã nafa, wala makre, Biiblã karengo, tigissã kẽnd la yɛl a taaba, la d pʋʋsd Wẽnnaam wakat fãa n kot vʋʋsem sõngã. A Zeova yɩɩda a Sʋɩtãan ne a dũniyã fãa zĩig sẽn zãre. (1 Zã 4:4) Dẽnd sɩd tara yõod wʋsg tɩ d pʋʋsd a Zeova wakat fãa, tɩ sõng-d tɩ d kell n pẽneg-a.

D NINGD FUT SẼN YAA SÕMA LA D MANEGD D MENS SÕMA

11. Dũniyã yamã kɩtame tɩ nebã fu-yerdɩ wã yaa wãn-wãna?

¹¹ Ned fu-yerdɩ la a sẽn manegd a mengã to-to wã tõe n kɩtame tɩ b bãng dũniyã yamã sã n kẽ-a lame bɩ pa kẽ-a. Tẽns wʋsg pʋsẽ, nebã fu-yerdɩ wã pa lebd be ye. Rẽ kɩtame tɩ televiziõ wã pʋgẽ kiba-kɩt a yembr yeel tɩ ka la bilfu, d ka na n tõog n ges futã n bãng pʋg-yoaadbã n bak ye. Zʋrnall a ye me yeelame tɩ baa pʋg-sadb sẽn pa ta yʋʋm piig la a tãab nagda wa pʋg-yoaadbã, n basd b yĩngã wʋsgo. Neb kẽer me ningda b futã yaare, tɩ wilgdẽ tɩ b yaa tõtba, la tɩ b toor kae ne ned ye.

12, 13. Sagl-bʋs la d pa segd n yĩm d fu-yerdɩ wã la d mensã manegr wɛɛngẽ?

¹² D sẽn yaa a Zeova Kaset rãmbã, d segd n manegda d mens sõma, n ningd fut sẽn yaa yɩlem la sakd gesgo, la d modg tɩ zemsd ne zĩig ning d sẽn debde. Wakat fãa, tõnd sẽn manegd d mensã to-to wã segd n wilgame tɩ d yaa sik-m-mens rãmb la gũus-m-mens rãmba. D sã n maand woto, la d tʋmd tʋʋm-sõma me, rẽ n wilgd tɩ d yaa rap bɩ pagb “sẽn sakd Wẽnnaam.” Sẽn pak tõnd n yɩɩdã pa nebã sẽn na n get tõndã ye. D ratame n pa Wẽnnaam nonglmã pʋgẽ. (1 Tɩmote 2:9, 10; Ziid 21) N-ye, tõnd ratame tɩ sẽn yɩɩd fãa, tõnd neermã yɩ “sũur dẽnda, sẽn lilli, . . . sẽn yaa paoong kãseng Wẽnnaam nifẽ.”—1 Pɩɛɛr 3:3, 4.

¹³ D ra yĩm tɩ tõnd fu-yerdɩ wã, la d sẽn manegd d mensã to-to wã tõe n kɩtame tɩ nebã tall tags-sõma bɩ tags-kɛg tũudum hakɩkã zug ye. Tõnd sẽn manegd d mensã to-to wã pa segd n yɩ ne wilg-m-meng ye. D pa segd n tags tɩ fu-yerdɩ wã wɛɛngẽ d tõe n maana d sẽn dat ye. Sẽn segd n pak tõndã yaa rẽ sẽn tõe n maan neb a taabã sũur-kaset bũmb ningã. Sẽn yɩɩd fãa, d ratame tɩ kɩt t’a Zeova ne a nin-buiidã paam pẽgre, la wilg tɩ d yaa Wẽnnaam tʋm-tʋmdb sẽn maand bũmb fãa “Wẽnnaam waoogr yĩnga.”—1 Korẽnt dãmba 4:9; 10:31; 2 Korẽnt dãmba 6:3, 4; 7:1.

14. D mensã manegr wɛɛngẽ, sogs-bʋs la d segd n sok d mense?

¹⁴ Yaa koɛɛgã mooneg sasa la tigissã sasa la d segd n maan gũusg ne d fu-yerdɩ wã la d mensã manegr n yɩɩda. Sok-y y meng woto: ‘Mam fu-yerdɩ wã la m sẽn maneg m mengã to-to wã kɩtame tɩ nebã sãbsd maam bɩ? Sakda gesg bɩ? Mam getame tɩ m sẽn manegd m mengã to-to wã sã n kɩt tɩ b pa tõe n kõ maam tʋʋmd tigingã pʋgẽ ka yell bɩ?’—1 Pɩɛɛr 5:6.

15. Bõe yĩng tɩ Biiblã pa yiis noy takɩ sẽn wilgd d sẽn segd n maneg d mensã to-to?

¹⁵ Biiblã pa yiis noy takɩ sẽn wilgd kiris-nebã sẽn segd n ning fut ninsi, la b sẽn segd n maneg b mensã to-to ye. A Zeova pa naan tõnd tɩ d pa tõe n yãk yam n maan d sẽn dat ye. La a ratame tɩ bũmb fãa pʋgẽ bɩ d tagsd Biiblã sẽn yet bũmb ningã zugu, n yɩ neb “sẽn mi sõma ne wẽng n bake.” (Hebre dãmba 5:14) Sẽn tar yõod n yɩɩda, Wẽnnaam ratame tɩ d maan bũmb fãa d sẽn nong yẽ la neb a taabã yĩnga. (Mark 12:30, 31) Baa ne rẽ, d ket n tõe n ninga fut buud toor-toore, la d yãk d sẽn na n maneg d mensã to-to me. D nee rẽ zĩis nins fãa a Zeova Kaset rãmbã sẽn tigimd taabã, bala nebã fut yaa toor-toore.

D TALL NIF SẼN YAA SÕMA

16. Bõe n wilgd tɩ dũniyã yamã ne a Zezi sẽn yeel bũmb ningã pa tũud taaba, la sogs-bʋs la d segd n sok d mense?

¹⁶ Dũniyã yamã belga neb milyõ rãmb tɩ b tagsdẽ tɩ b sã n paam ligd la arzɛk la b na n paam sũ-noogo. La a Zezi yeelame tɩ “ned ka tar vɩɩm a paoong sẽn yaa wʋsg yĩng ye.” (Luk 12:15) A Zezi ra pa rat n yeel tɩ ned segd n monga a meng bũmb fãa ye. A ra rat n yeelame tɩ yaa neb nins sẽn mi tɩ “b segd n baoa Wẽnnaamã,” ne neb nins sẽn tar nif sẽn yaa sõma wã n tar sũ-noog hakɩka. (Matɩe 5:3, NW; 6:22, 23) Sok-y y meng woto: ‘Mam sɩd tẽeda a Zezi sẽn yeel bũmb ninsã bɩ, bɩ m basame tɩ “ziri ba” wã tudg-ma?’ (Zã 8:44) ‘Mam goamã, bũmb nins yell sẽn pak maam n yɩɩdã, la m sẽn vɩ to-to wã wilgda bõe?’—Luk 6:45; 21:34-36; 2 Zã 6.

17. Wilg-y nafa nins neb nins sẽn tar nif sẽn yaa sõma wã sẽn paamde.

¹⁷ A Zezi yeelame tɩ “yam soab tʋʋm n wilgd t’a tara yam.” (Matɩe 11:19) D ges neb nins sẽn tar nif sẽn yaa sõma wã sẽn paamd nafa ninsi. Rĩungã tʋʋmdã kõt-b-la sũ-noog hakɩka. (Matɩe 11:29, 30) B sẽn pa maand yɩɩr wʋsg ne vɩɩmã yĩng kɩtame tɩ b yamã gãe bãane. (1 Tɩmote 6:9, 10) B sẽn pa baood bũmb wʋsg vɩɩmã pʋgẽ wã yĩng kɩtame tɩ b tar sẽk n get b zakã rãmb yelle, la b tõe n sõs ne b tẽed-n-taasã. B gõeemã me nong n yaa sõma. (Koɛɛg Soaba 5:11) B maanda b sẽn tõe tɛk n sõngd neb a taabã, tɩ rẽ me kõt-b sũ-noogo. (Tʋʋma 20:35) B sẽn ‘gũud b tẽebã pidsg’ ne b sũy fãa wã kɩtame tɩ b yamã gãe bãane. (Rom dãmb 15:13; Matɩe 6:31, 32) Ad wã yaa bark tekẽ!

D BOB “WẼNNAAM ZAB-TEEDÃ FÃA”

18. Wãn to la Biiblã bilgd tõnd bɛ wã, a sẽn zabd to-to, la zabrã sẽn yaa zabr ning buudã?

¹⁸ Neb nins sẽn paad Wẽnnaam nonglmã pʋgẽ wã paamda koglgo, t’a Sʋɩtãan pa tõe n gɩdg-b tɩ b ra paam sũ-noogo, la vɩɩm sẽn kõn sa wã me ye. (1 Pɩɛɛr 5:8) A Poll yeelame tɩ “tõnd zabr ka be ne ninsaal ye, la a yaa ne sɩ-wẽns buud fãa sẽn be yĩngri, la bãmb dĩm dãmba, la pãens rãmba, la lik soaadbã sẽn so pãng masã.” (Efɛɛz rãmba 6:12) Gɛrk gom-bil ning b sẽn lebg ka tɩ “zabrã” yaa maoore. Sẽn paase, b sẽn gom “dĩm dãmb” la “pãens rãmb” yellã wilgdame tɩ zĩn-dãmbã sigla sõma n na n zabe.

19. Bilg-y Wẽnnaam zab-teedã kiris-nebã sẽn segd n bobã.

¹⁹ Baa d sẽn tar pãn-komsmã, d tõe n tõoga a Sʋɩtãana, d sã n “bob Wẽnnaam zab-teed fãa.” (Efɛɛz rãmba 6:13) Efɛɛz rãmb 6:14-18 pʋgẽ, b bilgda Wẽnnaam zab-teedã sẽn yaa bũmb ninsi, n yet woto: “Dẽ yĩnga, bɩ y yalse, la y sẽb sɩdã tɩ yɩ yãmb sẽbdga, la y bob tɩrlmã tɩ yɩ gãntika, la y wid laafɩ koe-noogã . . . tɩ yɩ yãmb neooda. La wakat fãa, bɩ y tall tẽebã tɩ yɩ gãongo, tɩ yãmb tõe n kok wẽng soabã pɛɛmã fãa sẽn yaa wa bugmã. La bɩ y fõgen fãagrã me tɩ yɩ kut pugla, la y bob Wẽnnaam goamã Sɩɩg Sõng sẽn kõt yãmbã wa sʋʋga. Bɩ y maan pʋʋsgo la kosg wakat fãa ne Sɩɩg Sõng pãng n da bas ye, la y bao weer n pʋʋs Wẽnnaam nebã fãa yĩnga.”

20. Bõe n kɩt tɩ kiris-nebã zabr pa wa sodaasã rẽnda?

²⁰ Sẽn yaa zab-teed Wẽnnaam sẽn kõtã yĩnga, d sã n ning-b wakat fãa, na n sɩd kogla tõndo. Pa wakat fãa la sodaas be zabr pʋgẽ ye. La sã n yaa ne kiris-nebã, d zabrã yaa wakat fãa, hal n na n tãag sasa ning Wẽnnaam sẽn na n sãam a Sʋɩtãan dũniyã, la a lob yẽ ne a zĩn-dãmbã bog-zulungã pʋgẽ wã. (Wilgri 12:17; 20:1-3) Dẽnd y sã n maooda ne pãn-komsem bɩ tʋls-wẽnse, bɩ y ra koms raood n bas ye. Bala tõnd fãa segd n ‘modga d mense,’ sẽn na yɩl n ket n sakd a Zeova wakat fãa. (1 Korẽnt dãmba 9:27) Tõnd sã n wa tẽed tɩ d pa tar zabr n zabdẽ, bɩ d bãng tɩ rẽ yaa yelle!

21. Bõe n tõe n sõng tõnd tɩ d tõog zabrã?

²¹ D bãng tɩ d pa tõe n tõog zabrã ne d meng pãng ye. Rẽ n so t’a Poll yet tõnd tɩ d segd n pʋʋsa a Zeova wakat fãa. Sẽn paas me, d segd n kelgda a Zeova, rat n yeel tɩ d zãmsd Biiblã la d tigimd ne d ‘soda-taasã’ wakat fãa, bala bãmb me naaga zabrẽ wã. (Filemo 2; Hebre dãmba 10:24, 25) Neb nins sẽn sakd n maand woto fãa wã na n tõoga a Sʋɩtãana, la b na n tõogame me n yals kãn-kãe, b sã n wa namsd-b b tẽebã yĩnga.

SEGL-Y Y MENS N WILG NEBÃ Y SẼN TẼED BŨMB NINSÃ

22, 23. a) Bõe yĩng tɩ d segd n segl d mens n wilg nebã d sẽn tẽed bũmb ninsã wakat fãa, la sogs-bʋs la d segd n sok d mense? b) Bõe yell la d na n gom sak ning sẽn pʋgdã pʋgẽ?

²² A Zezi yeelame: “Yãmb ka dũniyã rẽnd ye. . . . Yaa woto n kɩt tɩ dũniyã kis yãmba.” (Zã 15:19) Woto yĩnga, kiris-nebã segd n segla b mens n wilg nebã b sẽn tẽed bũmb ninsã wakat fãa, la segd n yɩɩ ne sũ-maasem la sik-m-menga. (1 Pɩɛɛr 3:15) Sok-y y meng woto: ‘Rẽ yĩnga mam mii bũmb ning sẽn kɩt tɩ wakat ninga a Zeova Kaset rãmbã manesem yaa toor ne neb wʋsg manesmã bɩ? Mam sã n wa segd n tall manesem sẽn yaa toor ne neb a taabã, m kɩsa sɩd tɩ yaa Biiblã ne tʋm-tʋmd sẽn tũud sɩdã sẽn yet rẽ wɛɛngẽ wã la sõma bɩ?’ (Matɩe 24:45; Zã 17:17) ‘Maan sẽn yaa tɩrg Wẽnnaam nifẽ sã n na n kɩtame tɩ m yɩ toor ne neb a taabã, mam sakame n na n maane, la m getẽ tɩ rẽ yaa zu-zẽkr bũmb bɩ?’—Yɩɩl Sõamyã 34:3; Matɩe 10:32, 33.

²³ Naoor wʋsgo, yɛl buud toor-toor kɩtdame tɩ yaa toog tɩ d lak d mens ne dũniyã. Wala makre, reem-yoodã. Wala d sẽn togs tɩ loogã, a Sʋɩtãan makdame n dat n tũnug ne reem-yoodã n kẽes a Zeova nin-buiidã dũniyã pʋgẽ. Wãn to la d tõe n bãng n yãk reem sẽn yaa sõma, sẽn na n kõ-d sũ-noogo, la sẽn pa na n nams d sũur-kasetã? D na n bãnga rẽ sak ning sẽn pʋgdã pʋgẽ.