Yãmb nanda vɩɩmã wa Wẽnnaam sẽn nand-a to-to wã bɩ?

1, 2. a) Bõe la Wẽnnaam kõ tõnd tɩ tar yõod wʋsgo? b) Bõe yĩng tɩ d sẽn tõe n tags Biiblã noyã zugã tar yõod rũndã-rũndã?

TÕND saasẽ Ba wã kõo tõnd bũmb sẽn tar yõod wʋsgo. A naana tõnd n kõ-d yam tɩ d tõe n dɩk a togs-n-taare. (Sɩngre 1:27) Yamã kɩtame tɩ d tõe n tags n bãng Biiblã sagls sẽn tõe n naf tõnd to-to. D sã n tũud Biiblã saglsã, d yɩta neb tẽeb sẽn tar pãnga, sẽn nong a Zeova, la “sẽn mi sõma ne wẽng n bake.”—Hebre dãmba 5:14.

² Rũndã-rũndã, tara yõod wʋsg n yɩɩd tɩ d tags Biiblã noyã zugu, bala dũniyã yɛl tara toeeng hal tɩ d pa tõe n yã noy takɩ sẽn na n sõng tõnd bũmba fãa pʋgẽ ye. Bãngrã logtoeemdã wɛɛngẽ wã wilgda rẽ vẽenega, sẽn yɩɩd fãa b sẽn tʋmd ne zɩɩmã tɩbsgã pʋgẽ wã. Yel-kãngã paka neb nins fãa sẽn dat n sak a Zeova wã. La d sã n wʋmd Biiblã sẽn yet bũmb ning rẽ wɛɛngẽ wã võore, d na n tõog n yaka yam tɩbsgã wɛɛngẽ tɩ d sũur-kasetã pa ning d taale, d na n tõogame me n pa Wẽnnaam nonglmã pʋgẽ. (Yelbũna 2:6-11) D ges no-kãensã kẽere.

VƖƖMÃ LA ZƖƖMÃ YAA SÕNG WẼNNAAM NIFẼ

3, 4. Sasa bʋg la Wẽnnaam wilg tɩ zɩɩmã yaa sõngo, la no-bʋg n wilgd rẽ?

³ Yaa a Kayẽ sẽn kʋ a Abɛllã poor bilf la a Zeova wilg tɩ vɩɩmã bee zɩɩmã pʋgẽ, la tɩ vɩɩmã la zɩɩmã yaa sõng a nifẽ. Wẽnnaam yeela a Kayẽ woto: “Fo yao wã zɩɩm kelemdame n yit tẽnga pʋgẽ n boond maam.” (Sɩngre 4:10) Ne a Zeova, a Abɛll zɩɩmã yaa a vɩɩmã bɩ a yõorã a Kayẽ sẽn yãkã. Dẽnd yaa wa a Abɛll zɩɩmã ra kelemdame n dat tɩ Wẽnnaam sɩbg nin-kʋʋdã.—Hebre dãmba 12:24.

⁴ A Nowe wakatẽ sa-kãsengã poore, Wẽnnaam kõo ninsaalbã sor tɩ b wãb rũmsã nemdo, la a wilgame tɩ b ra rɩ b zɩɩmã ye. Wẽnnaam yeela woto: “Bɩ y ra rɩ nemd ne a vɩɩm ye, sẽn dat n togs t’a zɩɩm. La sẽn paase, ned sã n daag yãmb zɩɩm, mam na n sɩbga a soaba.” (Sɩngre 9:4, 5) A Nowe, a kambã ne a yagensã la baa rũndã nebã fãa segd n tũu no-kãngã. Sẽn mik tɩ bõn-vɩɩsã vɩɩm bee b zɩɩmã pʋgẽ wã, no-kãngã sõngda tõnd tɩ d wʋmd Wẽnnaam sẽn yeel a Kayẽ wã võore. No-kãng leb n wilgdame t’a Zeova sẽn yaa vɩɩmã kõtã na n kaoa neb nins manesem sẽn wilgd tɩ b pa nand vɩɩmã la b pa get zɩɩmã wa bũmb sẽn yaa sõngã bʋʋdo.—Yɩɩl Sõamyã 36:10.

5, 6. Wãn to la a Moiiz tõogã wilg tɩ zɩɩmã yaa sõng Wẽnnaam nifẽ? (Ges-y seb-neng 78 zĩ-gũbrã me.)

⁵ A Moiiz tõogã pʋgẽ me, b wilgame tɩ vɩɩmã bee zɩɩmã pʋgẽ, la tɩ b yaa sõng Wẽnnaam nifẽ. Maankʋʋr 17:10, 11 yeta woto: “Israɛll ned bɩ sãan . . . sã n dɩ zɩɩm, baa sẽn yaa [zɩɩm] buud ninga fãa, mam na n loba m neng kɛɛng ne-a, a sẽn dɩ zɩɩmã yĩnga. La mam na n yiisa yẽ a buud sʋkã. Tɩ bõe, yĩng vɩɩm bee zɩɩm pʋgẽ. La mam kõo yãmb zɩ-kãngã tẽn-kugrã zug tɩ y maan paasg y vɩɩmã yĩnga. Tɩ bõe, yaa zɩɩm n maand paasg ned vɩɩm yĩnga.”a—Ges-y seb-neng 76 zĩ-gũbrã sẽn yet tɩ: “Zɩɩm tõe n yẽesa yel-wẽna.”

⁶ B sã n da kʋ rũng n pa na n ning a zɩɩmã tẽn-kugrã zugu, b ra segd n daag-a-la tẽnga. Woto wilgdame tɩ vɩɩmã leba vɩɩm kõtã nengẽ. (Tõodo 12:16) D bãng tɩ Israɛll ned sã n da kʋ rũnga, Wẽnnaam ra pa baood t’a yiis zɩɩmã fãa tɩ baa bilf ra pa rũngã pʋgẽ ye. A sã n kodg-a n daag a zɩɩmã, rẽ bal sekame. A sã n maan woto, a wilgdame t’a saka vɩɩm kõtã noyã, t’a tõe n wãb nemdã t’a sũur-kasetã pa ning-a taal ye.

7. Wãn to la a Davɩɩd wilg t’a miime tɩ zɩɩmã yaa sõng Wẽnnaam nifẽ?

⁷ A Davɩɩd sẽn yɩ “rao sẽn ta [Wẽnnaam] yamã” ra wʋmda noy nins Wẽnnaam sẽn gãneg zɩɩmã wɛɛngẽ wã võor sõma. (Tʋʋma 13:22) Daar a yembre, ko-yũud n yõk-a, t’a gãndaad a tãab gẽneg b yõy n tɩ kẽ bɛɛbã sik zĩigẽ n yãk koomã bulgẽ n wa kõ-a. A Davɩɩd maana wãna? A pa sak n yũ ye. A yeelame tɩ: “Mam sã n maan woto, na n yɩɩ wa m sẽn yũud neb nins sẽn gẽneg b yõy n kẽngã zɩɩm.” A Davɩɩd ra getame tɩ koomã yaa wa gãndaadã zɩɩm. La baa ne ko-yũudã sẽn da tar-a wʋsgã, a “raag-a-la Zusoabã taoore.”—2 Sãmwɛll 23:15-17.

8, 9. Kiris-neb tigingã luglg tɛka, Wẽnnaam sẽn get vɩɩmã la zɩɩmã to-to wã toeemame bɩ? Wilg-y y leoorã võore.

⁸ A Zeova yeela a Nowe t’a ra rɩ zɩɩm ye. Yʋʋm 900 rẽ poore, a wilga a Moiiz tõogã pʋgẽ tɩ b ra rɩ zɩɩm ye. La yʋʋm 1 500 rẽ loogr poor me, a Zeova ra ket n getame tɩ zɩɩmã yaa sõngo. A vẽnega pipi kiris-nebã taoor lʋɩtb sullã sẽn da be wakat kãngã wã tɩ b yeel woto: “Sɩɩg Sõng la tõnd me tẽedame tɩ yaa neer tɩ tõnd da paas yãmb zɩɩb sẽn yɩɩd bõn-kãensã sẽn yaa tɩlae wã ye. A yaa tɩ yãmb da rɩ maand nemd neb sẽn kõ bõn-naands b sẽn pʋʋsd wa Wẽnnaam, la zɩɩm, la bũmb nins sẽn sãrge, la y ra maan yoob ye.”—Tʋʋma 15:28, 29.

⁹ Vẽenega, pipi kiris-nebã wakatẽ, siglgã taoor lʋɩtb sullã bãngame tɩ zɩɩmã yaa sõng Wẽnnaam nifẽ, la tɩ ned sã n maan bũmb ne zɩɩmã tɩ pa zems ne Wẽnnaam sẽn wilgã, a maana yel-wẽnd wala bõn-naands pʋʋsg bɩ yoobo. Rũndã-rũndã me, kiris-neb hakɩkã saka woto. Sẽn paase, b sẽn sakd n tũud Biiblã noyã yĩnga, yam-yãkr nins fãa b sẽn maand zɩɩmã wɛɛngẽ wã tata a Zeova yam.

ZƖƖMÃ TALL N TƖPÃ

10, 11. a) Wãn to la a Zeova Kaset rãmbã get zɩɩmã reegre, la globill ruuz, globill blã, plakɛt rãmba, la plasma wã tall n tɩpã? b) Zɩɩmã wɛɛngẽ, zĩ-bʋs la kiris-nebã tagsg tõe n yɩ toor-toore?

¹⁰ A Zeova Kaset rãmbã miime tɩ “lak ne . . . zɩɩm” rat n yeelame tɩ b ra sak tɩ b ning-b zɩɩm, b ra kõ neb b zɩɩm, la b ra sak tɩ b yãk b meng zɩɩm n bĩng n wa rɩk n ning-b ye. B sẽn sakd Wẽnnaam noyã yĩngã, b pa sakd tɩ b rɩk globill ruuz, globill blã, plakɛt rãmba, la plasma b sẽn yãkd zɩɩmã pʋgẽ wã n tɩp-b ye.

¹¹ Rũndã-rũndã, logtoɛɛmbã tõe n kẽe bõn-kãensã a naasã pʋgẽ n le yãk bõn-kɩds n tall n tɩp neda. Kiris-ned tõe n sakame tɩ b tɩp-a ne bõn-kɩds kãensã bɩ? Rẽ yĩnga rẽ yaa zɩɩm bɩ? Yel-kãngã yaa ned kam fãa ne a yam-yãkre. Yaa woto me ne emodialiizã, emodilisɩõ wã, la rekiperasɩõ de sã epãnse b sẽn maand n pa reng n yãk f zɩɩmã n bĩngã.—Ges-y seb-neng 215-18 vẽnegrã.

12. Sã n wa yaa ned fãa ne a yam-yãkre, d segd n maana wãna?

¹² Sẽn yaa ned fãa ne a yam-yãkrã rat n yeelame t’a Zeova toor kae bɩ? Pa woto ye! A mii tõnd tagsgã, la bũmb ning sẽn kɩt tɩ d maand yɛlã. (Yelbũna 17:3; 21:2; 24:12) Dẽnd d sã n pʋʋs a Zeova n kos-a sor-wilgr la d bao n bãng yɛl wʋsg tɩbsg ning d sẽn na n yãkã wɛɛngẽ wã, rẽ poore d segd n kelga d sũur-kasetã d sẽn kibl ne Biiblã. (Rom dãmb 14:2, 22, 23) Ned a to pa segd n modg tõnd tɩ d tũ yẽ tagsg ye. Tõnd me pa segd n sok ned n ges sã n yaa yẽ n be tõnd zĩigẽ a maanda wãn ye. Yel-kãensã pʋgẽ, kiris-ned fãa segd n “tʋka a meng zɩɩbo.”b—Galat dãmba 6:5; Rom dãmb 14:12; ges-y seb-neng 81 zĩ-gũbrã sẽn sok tɩ: “Mam tagsg zɩɩmã zug yaa wa Wẽnnaam sẽn tagsd to-to wã bɩ?”

A ZEOVA NOYÃ WILGDAME T’A NONGA TÕNDO

13. Noy la sagls nins sẽn be Biiblã pʋgẽ wã wilgda bõe a Zeova zugu? Rɩk-y makre.

¹³ Noy la sagls nins sẽn be Biiblã pʋgẽ wã wilgdame t’a Zeova yaa noy lugund sẽn tar yam, la Ba sẽn nong a kamb wʋsg n dat b neere. (Yɩɩl Sõamyã 19:8-12) A Zeova sẽn kõ noor tɩ d “lak ne . . . zɩɩmã,” pa d laafɩ wã yĩng ye. Yaa zɩɩmã sẽn yaa sõng a nifẽ wã yĩnga. La d sã n sɩd lak d meng ne zɩɩmã, nafda tõndo. Wala makre, sõngda tõnd tɩ d gind yɛl wʋsg sẽn paamd neb nins sẽn sakd tɩ b ningd-b zɩɩmã. (Tʋʋma 15:20) Rũndã-rũndã, logtoɛɛmb wʋsg yetame tɩ b sã n wopeer ned n pa ning-a zɩɩm, rẽ la sõma n yɩɩda. La sã n yaa ne kiris-neb hakɩkã, woto wilgdame bal t’a Zeova yamã ka koaka, la t’a nonga tõnd wʋsgo.—Ezai 55:9; Zã 14:21, 23.

14, 15. a) No-bʋs n wilgd tɩ Wẽnnaam nonga a nin-buiidã? b) Bõe la d tõe n maan n wilg tɩ d tũuda no-kãense?

¹⁴ Noy wʋsg Wẽnnaam sẽn kõ Israɛll nebã wilgdame t’a rata a nin-buiidã neere. Wala makre, a yeelame tɩ b sã n me roog bɩ b ning a zug kogre, sẽn na yɩl tɩ ned sã n dʋ bɩ a ra wa lʋɩ ye. Bala nebã ra nong n dʋʋda b rotã zut n maand yɛl wʋsgo. (Tõodo 22:8; 1 Sãmwɛll 9:25, 26; Nehemi 8:16; Tʋʋma 10:9) Wẽnnaam leb n yeelame tɩ b segdame n loe lol-tãadsã. (Yikri 21:28, 29) Ned sã n zãgs n pa maan woto, wilgdame t’a pa rat neb a taabã neer ye. Tõe n kɩtame me t’a paam zɩɩm samde.

¹⁵ Wãn to la y tõe n wilg tɩ y tũuda no-kãensã? Y segd n gũus n gesa y wiidã bɩ y mobilã sõmblem, la y gũus ne y sẽn kẽnd ne-b to-to wã. Y segdame me n tags n ges y rũmsã, y zakã, y tʋʋmã zĩig la reem nins y sẽn nongã sã n pa tõe n wa ne yelle. Tẽns kẽer pʋsẽ, yaa agsɩdã rãmbã n kʋʋd kom-bɩɩsã n yɩɩda, b sẽn pa gũusdi, la b baood yɛl n kõt b mens zaalmã yĩnga. Kom-bɩɩs nins sẽn dat n pa Wẽnnaam nonglmã pʋgẽ wã getame tɩ vɩɩmã tara yõodo, tɩ kɩt tɩ b lakd b mens ne reem nins fãa sẽn tõe n kɩt tɩ b paam yellã. B pa tagsd tɩ yell pa tõe n paam bi-bɩɩg ye. B sẽn lakd b mens ne reem-yood buud fãa wã kɩtame tɩ b paamd sũ-noog vɩɩmã pʋgẽ.—Koɛɛg Soaba 11:9, 10.

16. Bõe la Biiblã yet pʋsã yiisg wɛɛngẽ? (Ges-y tẽngr vẽnegrã.)

¹⁶ Wẽnnaam nanda baa biig sẽn nan ket a ma pʋgẽ vɩɩm. A Moiiz tõogã ra yeelame tɩ rap sã n zab taab n fão pag sẽn tʋte, pagã bɩ biigã sã n ki, sẽn yɩ-a sabab tɩ yõor yãkã na n yaoa “vɩɩm, vɩɩm yĩnga.”c (Yikri 21:22, 23) Ned sã n da maan tɩ pag sẽn tʋt ki wall t’a pʋgã sãame, Wẽnnaam ra geta a soabã wa nin-kʋʋda, t’a segd n yao “vɩɩm, vɩɩm yĩnga.” Tags-y n ges-y a Zeova sẽn tagsd to-to, a sẽn ne tɩ yʋʋmd fãa, pagb ka tɛk n yiisd b pʋsã. Nebã yiisda pʋse, b sẽn dat n maand b yam, bɩ b sẽn dat n ket n yoodã yĩnga.

17. Wãn to la y tõe n bels ned sẽn yiis a pʋg n yaool wa bãng Biiblã sẽn yet bũmb ning rẽ wɛɛngẽ wã?

¹⁷ La pag sã n yiis a pʋg n yaool n wa bãng bũmb ning Biiblã sẽn yet rẽ wɛɛngẽ wã, a maanda wãna? Woto rat n yeelame tɩ Wẽnnaam pa tõe n kõ-a sugr bɩ? Pa woto ye! Ned sẽn maan yel-wẽnd sã n sɩd tek yam n kos sugri, a tõe n kɩsa sɩd tɩ Wẽnnaam na n tika a Zezi zɩɩmã zug n kõ a sugri. (Yɩɩl Sõamyã 103:8-14; Efɛɛz rãmba 1:7) Kirist meng yeela woto: “Mam ka wa n na n bool nin-tɩrs tɩ b tek yam n kos sugr ye, yaa yel-wẽna rãmba.”—Luk 5:32.

D BAS BEEM

18. Biiblã wilgdame tɩ yaa bõe n kɩt tɩ neb wʋsg kʋʋd taabã?

¹⁸ A Zeova yeelame tɩ d ra maan ned wẽng ye. La pa tek woto bal ye. A ratame tɩ d yiis beem bɩ kisgr buud fãa d sũurã pʋgẽ, bala yaa rẽ n kɩt tɩ nebã kʋʋd taabã. Tʋm-tʋmd a Zã yeelame tɩ “ned ning fãa sẽn kis a ba-biiga, a yaa nin-kʋʋda.” (1 Zã 3:15) Ned sã n kis a ba-biiga, pa rat n yeel bal t’a pa nong-a ye. A pʋd n data a kũum. Beem woto buud tõe n kɩtame t’a rõd a ba-biigã t’a maana bũmb sẽn segd ne Wẽnnaam bʋʋdo. (Maankʋʋre 19:16; Tõodo 19:18-21; Matɩe 5:22) Woto sɩd wilgdame tɩ tara yõod wʋsg tɩ d modg n yiis beem buud fãa d sũurã pʋgẽ.—Zak 1:14, 15; 4:1-3.

19. Ned sẽn tũud Biiblã noy sã n karem Yɩɩl Sõamyã 11:5 la Filip rãmb 4:8, 9 wã, segd n kɩtame t’a maan bõe?

¹⁹ Neb nins sẽn get vɩɩmã wa a Zeova sẽn get-a to-to wã, la b rat n pa a nonglmã pʋgẽ wã lakda b mens me ne wẽnem buud fãa. Yɩɩl Sõamyã 11:5 yetame t’a Zeova “kisa ned sẽn nong [wẽnem, NW ].” Vɛrse kãngã pa wilgd tõnd Wẽnnaam sẽn kis bal ye. A wilgda tõnd d sẽn pa segd n maane. Sõngda neb nins sẽn nong Wẽnnaamã tɩ b lak b mens ne reem buud fãa sẽn tõe n wa kɩt tɩ b nong wẽnem. B sẽn yeel t’a Zeova yaa “Wẽnnaam sẽn so laafɩ” wã, segd n kɩtame tɩ neb nins sẽn tũud-a wã modg tɩ sẽn kẽed b yamẽ wã yɩ bũmb sẽn segd ne nonglem, sẽn tar kaset sõma, sẽn zems pẽgre, tɩ woto fãa wat ne laafɩ.—Filip rãmba 4:8, 9.

D LAK D MENS NE SIGLS NINS SẼN DAAGD ZƖƖMÃ

20-22. Kiris-nebã manesem yaa wãn to ne dũniyã, la bõe yĩnga?

²⁰ Wẽnnaam nifẽ, a Sʋɩtãan dũniyã gill tara zɩɩm samde. A politik siglsã b sẽn mak ne rũms Biiblã pʋgẽ wã kʋʋ neb milyõ rãmba, a Zeova Kaset rãmb wʋsg sẽn naage. (Daniɛll 8:3, 4, 20-22; Wilgri 13:1, 2, 7, 8) Toandbã bɩ omdafɛɛr dãmbã la bãngdbã ne politikã pãn-soaadbã sẽn tar wẽnem wa rũmsã naaga taab n maand zab-teed tɩ kẽesd-b ligd wʋsgo. Woto wilgda vẽeneg tɩ “dũniyã fãa bee wẽng soabã nugẽ”!—1 Zã 5:19.

²¹ A Zezi karen-biisã sẽn “ka dũniyã rẽnd” n lakd b mens zãng fasɩ ne politikã yɛl la zabã yĩnga, b ka tar zɩɩm samd ye.d (Zã 15:19; 17:16) B sẽn dɩkd Kiristã togs-n-taarã yĩnga, neb a taabã sã n namsd-b b tũudmã yĩnga, b pa maand-b wẽng n lebs ye. B wilgdame tɩ b nonga b bɛɛbã, la b pʋʋsda b yĩng menga.—Matɩe 5:44; Rom dãmb 12:17-21.

²² Sẽn yɩɩd fãa, kiris-neb hakɩkã lakda b mens ne “Babilon kãsengã” sẽn yaa dũni gill ziri tũudmã sẽn tar zɩɩm samd n yɩɩd sigls a taabã fãa wã. Wẽnnaam Gomdã yetame tɩ yẽ “pʋgẽ la b yã Wẽnnaam no-rɛɛsdbã ne Wẽnnaam nebã la neb nins fãa b sẽn da kood dũniyã zugã zɩɩm.” Rẽ n so tɩ b keoogd tõnd woto: “Mam neba, bɩ y yi yẽ pʋgẽ.”—Wilgri 17:6; 18:2, 4, 24.

23. Yi Babilon kãsengã pʋgẽ rat n yeelame tɩ bõe?

²³ Babilon kãsengã pʋgẽ yiibã pa f sẽn na n kɩt tɩ b yẽes f yʋʋrã b sɛbã pʋsẽ bal ye. F segdame me n kisg tʋʋm-beed nins ziri tũudmã taoor dãmbã sẽn bas tɩ nebã maandẽ wã, la tʋʋm-beed nins bãmb mensã sẽn maandã. Wala makre, yoobã, politikã, la ligdã nonglmã. (Yɩɩl Sõamyã 97:10; Wilgri 18:7, 9, 11-17) Naoor wʋsgo, nebã kʋʋ taab rẽ poorẽ!

24, 25. Ned sẽn tar zɩɩm samd sã n tek yam n kos sugri, bõe zug la Wẽnnaam tikd n zoe a nimbãanega, la bõe n da be pĩnd wẽndẽ wã n makd rẽ?

²⁴ Nand tɩ tõnd fãa wa tũudum hakɩkã pʋgẽ, d maana yɛl kẽer n teel a Sʋɩtãan siglgã tɩ kɩt tɩ d tar zɩɩm samde. La d sẽn lak d mens ne a Sʋɩtãan siglgã, n tẽ Kirist maoongã, la d rɩk d meng n kõ Wẽnnaamã yĩnga, d paamame tɩ Wẽnnaam zoe d nimbãaneg n kõ-d sugri, la a sõngd tõnd tɩ zood ning sẽn be tõnd ne yẽ sʋkã ra sãam ye. (Tʋʋma 3:19) D tõe n dɩka koglg ning d sẽn paamdã n mak ne tẽns nins b sẽn da yãk Israɛll tɩ yaa zĩ-solgdsã.—Sõdbo 35:11-15; Tõodo 21:1-9.

²⁵ Wãn to la tẽn-kãensã ra nafd nebã? Israɛll ned sã n da kʋ ned ne yĩdgu, a segd n zoe n kẽnga tẽn-kãensã a ye pʋgẽ. Bʋ-kaoodbã sã n wa vaees yellã n mik t’a sɩd pa maan ne pʋ-toogo, b basd-a lame t’a pa be hal n tãag maan-kʋʋdbã kãsmã kũum. Rẽ masã a tõe n tɩ zĩnda a sẽn datẽ. Woto sɩd wilgdame tɩ Wẽnnaam yaa nimbãan-zoɛta, la tɩ ninsaal yõor tara yõod wʋsg a nifẽ! Bũmb la a Zeova maan rũndã-rũndã tɩ wõnd a sẽn da kɩt tɩ tẽns sẽn yaa zĩ-solgds ra be pĩnd wẽndẽ wã. Yaa a sẽn tũnug ne Kirist maoongã n kɩt tɩ baa ne d sẽn kɩɩs a noorã vɩɩmã la zɩɩmã wɛɛngẽ n pa bãngã, d pa na n ki rẽ yĩngã. Yãmb getame tɩ rẽ tara yõod wʋsg bɩ? Wãn to la y tõe n wilg rẽ? Yaa y sẽn na n bool neb a taabã tɩ b wa naag yãmb n dɩ bõn-kãngã Wẽnnaam sẽn maanã nafa, sẽn yɩɩd fãa “to-kãsengã” sẽn kolgd tao-tao wã.—Matɩe 24:21; 2 Korẽnt dãmba 6:1, 2.

D MOON RĨUNGÃ KOƐƐGÃ N WILG TƖ D MIIME TƖ NINSAAL YÕOR TARA YÕODO

26-28. Bõe la tõnd maand rũndã-rũndã tɩ wõnd no-rɛɛs a Ezekɩɛll sẽn maanã, la bõe la d tõe n maan n pa Wẽnnaam nonglmã pʋgẽ?

²⁶ Tʋʋmd ning Wẽnnaam nin-buiidã sẽn tʋmd rũndã-rũndã wã tẽegda tõnd no-rɛɛs a Ezekɩɛll sẽn maan bũmb ningã. A Zeova tʋm-a lame t’a tɩ keoog Israɛll nebã. Wẽnnaam yeel-a-la woto: “Fo sã n wʋm mam goamã bɩ f sagl bãmb n kõ-ma.” A Ezekɩɛll sã n da zãgse, Zerizalɛm sãoongã sasa a ra na n paama taal nebã kũum pʋgẽ. (Ezekɩɛll 33:7-9) La a sakame, tɩ kɩt t’a pa paam zɩɩm samd ye.

²⁷ A Sʋɩtãan dũniyã rebda a saab zĩigẽ. Rẽ n so tɩ rũndã-rũndã, a Zeova Kaset rãmbã getẽ tɩ moon Wẽnnaam ‘sũ-dokrã daar’ la a Rĩungã koɛɛgã yaa tɩlae la zu-zẽkr bũmbu. (Ezai 61:2; Matɩe 24:14) Yãmb moonda Rĩungã koɛɛg sẽn tar yõod wʋsgã ne yẽesem bɩ? Tʋm-tʋmd a Poll yẽ pa reem ne koɛɛgã moonegã b sẽn da bobl-a wã ye. Rẽ n so t’a tõog n yeel woto: “Zɩɩm ka be mam zug ye. Tɩ bõe, mam togsa yãmb Wẽnnaam daab zãnga n ka solg bũmb ye.” (Tʋʋma 20:26, 27) Woto sɩd yaa mak-sõng d sẽn segd n tũ!

²⁸ Sẽn na yɩl n pa a Zeova nonglmã pʋgẽ, rɩk a togs-n-taar n nand vɩɩmã la f sak n deeg tɩ zɩɩmã yaa sõng a nifẽ wã pa sek ye. D segd n kell n yɩɩ yɩlem a nifẽ me. Sak ning sẽn pʋgdã gomda rẽ yelle.