D nand vɩɩmã sẽn yaa Wẽnnaam kũunã

1. Ãnd n kõ tõnd vɩɩmã?

A ZEOVA n “yaa Wẽnnaam sẽn vɩ.” (Zeremi 10:​10) Yẽ la tõnd Naanda. Yaa yẽ n kõ tõnd vɩɩmã. Biiblã yetame: “Yãmb n naan bũmb fãa, la yaa yãmb daab yĩng la y naan-b tɩ b beẽ.” (Vẽnegre 4:​11) Vɩɩmã yaa a Zeova kũuni. A ratame tɩ d vɩɩmd n kaoose.—Karm-y Yɩɩn-sõamyã 36:​10.

2. D sã n dat tɩ d vɩɩmã tall barka, bõe la d tog n maane?

² A Zeova kõta tõnd bũmb nins sẽn yaa tɩlɛ ne-dã, wala makre, rɩɩb la koom. (Tʋʋmã 17:​28) La sẽn yɩɩda, a ratame tɩ d vɩɩmã yɩ noogo. (Tʋʋmã 14:​15-​​17) D sã n dat tɩ d vɩɩmã tall barka, d tog n saka Wẽnnaam noyã.​​—​Ezayi 48:​17, 18.

WẼNNAAM NANDA VƖƖMÃ

3. A Kayẽ sẽn kʋ a Abɛllã, a Zeova maana bõe?

³ Biiblã wilgdame t’a Zeova nanda ninsaal buudã fãa vɩɩm. Wala makre, a Ãdem ne a Hawa bi-ribl a Kayẽ sũur sẽn wa n yik ne a yao a Abɛllã, a Zeova keoog-a lame t’a gũus t’a sũ-yikrã ra wa kɩt t’a maan yell ye. La a Kayẽ pa kelg ye. A “yika zabr ne a Abɛlle, n kʋ-a.” (Sɩngre 4:​3-​8) A Zeova sɩbga a Kayẽ, a sẽn kʋ a Abɛllã.​​ (Sɩngre 4:​9-​​13) Dẽnd sũ-yikr ne kisgr tõe n waa ne yelle. Bala tõe n kɩtame tɩ ned lebg wẽnem soab bɩ nin-kʋʋda. Ned a woto pa tõe n paam vɩɩm sẽn kõn sa wã ye. (Karm-y 1 Zã 3:15.) D sã n dat t’a Zeova sũur noom ne-do, d segd n modg n nonga neba fãa.—1 Zã 3:11, 12.

4. Wẽnnaam sẽn kõ Israyɛll nebã noor ning vɩɩmã wɛɛngẽ wã wilgda tõnd bõe?

⁴ Yʋʋm wʋsg poore, a Zeova kõo a Moyiis tõod piiga, n wilg tõ-kãens pʋgẽ t’a nanda vɩɩmã. Tõogã noor a yembr yetame: “Da kʋ ned ye.” (Tõodo 5:​17) Ned sã n da yãk yam n kʋ a to, b ra segd n kʋʋ a soabã.

5. Bõe n wilgd tɩ Wẽnnaam kisa pʋg-yiisgu?

⁵ Pʋg-yiisg yaa wẽng Wẽnnaam nifẽ bɩ? Baa biig sẽn nan ket a ma pʋgẽ vɩɩm tara yõod wʋsg Wẽnnaam nifẽ. A Moyiis tõogã pʋgẽ, a Zeova ra yeelame tɩ ned sã n fão pag sẽn tʋt tɩ yɩ sabab t’a bi-pɛɛlgã ki, b segd n kʋʋ a soabã. (Karm-y Yikr 21:​22, 23; Yɩɩn-sõamyã 127:​3.) Woto wilgdame tɩ pʋg-yiisg yaa wẽnga.—Ges-y Vẽnegr 27 wã.

6, 7. Bõe la d tõe n maan n wilg a Zeova tɩ d nanda vɩɩmã?

⁶ Wãn to la d tõe n wilg a Zeova tɩ d nanda tõnd mengã vɩɩm la d taabã vɩɩm? Yaa d sẽn na n gũus n da maan bũmb sẽn tõe n tũ ne d mengã yõore, bɩ sẽn tõe n yɩ sabab tɩ ned yõor yãkã. Rẽnd d pa segd n yũ sɩgaare, dorg wall n dɩ taba, bala sãamda d yĩnsã, leb n tõe n kʋ-d lame.

⁷ Tõnd yĩngã ne d vɩɩmã yaa Wẽnnaam n kõ-do. Rẽ n so tɩ d pa segd n maan yaal-yaal d yĩngã yɩlemd wɛɛngẽ me ye. Sã n pa rẽ, d na n yɩɩ rẽgd Wẽnnaam nifẽ. (Rom-dãmbã 6:​19; 12:​1; 2 Korẽnt-rãmbã 7:​1) Tõnd sã n pa nand vɩɩmã Wẽnnaam sẽn kõ-dã, d pa tõe n ta a yam ye. Yaa sɩd tɩ minim-wẽnsã basg tõe n yɩɩ toogo. La d sã n mao n base, d sẽn nand vɩɩmã yĩnga, a Zeova na n sõng-d lame.

8. Bõe la d segd n maane, sẽn na yɩl n da bao yell n kõ d mens la d taabã?

⁸ D bãngame tɩ vɩɩmã yaa a Zeova kũuni. A Zeova miime tɩ d na n modgame n da maan bũmb sẽn tõe n tũ ne d yõore, bɩ sẽn tõe n yɩ sabab tɩ ned yõor yãk ye. Rẽnd d sã n wa zao montɛɛr bɩ n wẽnd mobilli, d tog n gũusa wʋsgo. D na n zãaga d mens me ne yĩn-wɩsgr la reem buud fãa sẽn tõe n tũ ne d yõore. (Yɩɩn-sõamyã 11:​5) D segd n gũusame tɩ d zakã pʋgẽ bũmb ra wa ne yell ye. A Zeova ra yeela Israyɛll nebã yaa: “Fo sã n me ro-paalga, bɩ f ning a zugã kogre, tɩ ned ra wa rʋ a zug n lʋɩ t’a zɩɩmã taal wa be fo roogã zug ye.”—Tõodo 22:​8.

9. D manesem segd n yɩɩ wãn ne rũmsã?

⁹ Baa tõnd sẽn get rũmsã yell to-to wã tara yõod wʋsg a Zeova nifẽ. Wẽnnaam kõo sor tɩ d tõe n kʋ rũmsã n wãbe, bɩ n sɩ b gãndã n maan futu. D tõe n kʋʋ rũng me, sẽn na yɩl n kogl d menga. (Sɩngre 3:​21; 9:​3; Yikri 21:​28) La Wẽnnaam pa rat tɩ d namsd rũmsã bɩ n kʋʋd-b zaalem yĩng ye.—​Yel-bũnã 12:​10.

D TŨ WẼNNAAM NOYÃ ZƖƖMÃ WƐƐNGẼ

10. Bõe n wilgd tɩ zɩɩm yaa vɩɩm?

¹⁰ Zɩɩmã tara yõod wʋsg a Zeova nifẽ. Bala zɩɩm yaa vɩɩm. A Kayẽ sẽn kʋ a Abɛllã, a Zeova yeel-a lame yaa: “Fo yao wã zɩɩm bee tẽn-gãongã zug n kelemdẽ tɩ tat maam.” (Sɩngre 4:​10) A Abɛll zɩɩmã yaa a vɩɩmã bɩ a yõorã. Rẽ n so t’a Zeova sɩbg a Kayẽ, a sẽn kʋ a Abɛllã. A Nowe wakatẽ sa-kãsengã poore, Wẽnnaam leb n wilgame tɩ zɩɩm yaa vɩɩm. A kõo a Nowe ne a zakã rãmb sor tɩ b tõe n kʋ rũmsã n wãbe. A yeelame: “Bõn-kẽnds nins fãa sẽn vɩ wã na n yɩɩ yãmb dɩɩbo. Mam kõt-b-la yãmba, wa mam sẽn kõ yãmb bõn-vãadã.” La a Zeova wilg-b-la bũmb a ye b sẽn ka tog n dɩ. A yeelame: “Yãmb ka tog n dɩ rũng ne a vɩɩm ye. Rat n yeelame tɩ y ra rɩ-a ne a zɩɩmã ye.”—Sɩngre 1:​29; 9:​3, 4.

11. No-bʋg la Wẽnnaam kõ Israyɛll nebã zɩɩmã wɛɛngẽ?

¹¹ A Zeova sẽn yeel a Nowe tɩ b ra rɩ zɩɩmã, yʋʋm 800 poore a leb n kõo Israyɛll nin-buiidã noore, n yeel yaa: “Ned sã n kẽng tãoosg n tɩ paam rũng bɩ bõn-​yɩgdre, b sẽn tar noor n tõe n wãb a nemdã, bɩ b raag a zɩɩmã tẽng n bus-a ne tom.” A paasame: “Da rɩ-y bũmb zɩɩm ye.” (Maan-kʋʋre 17:​13, 14) A Zeova ra ratame t’a nin-buiidã tẽeg tɩ zɩɩmã tara yõod wʋsgo. B ra tõe n wãba rũmsã nemdo, la b pa segd n dɩ b zɩɩmã ye. B sã n da kʋ rũng n na n wãbe, b segd n daaga a zɩɩmã tẽnga.

12. Kiris-nebã manesem segd n yɩɩ wãn ne zɩɩm?

¹² Yʋʋm a wãn a Zeezi kũumã poore, tʋm-tʋmdbã ne Zeruzalɛm kiris-nebã kãsem-dãmb sɛga taab n dɩk sardo, n wilg a Moyiis tõogã noy nins kiris-nebã sẽn segd n ket n tũudẽ wã. (Karm-y Tʋʋm 15:​28, 29; 21:​25.) A Zeova sõng-b lame tɩ b bãng tɩ zɩɩmã ket n tara yõod wʋsg a nifẽ, la tɩ segd n yɩɩ woto me ne bãmba. Pipi kiris-nebã ra pa tog n dɩ zɩɩm, wall b wãb rũng nemd b sẽn kʋ n pa raag a zɩɩmã ye. Sã n pa rẽ, bãmb ne neb nins sẽn pʋʋsd bõn-naandsã la yoaadbã fãa yaa a ye. Hal baa ne rũndã, kiris-neb hakɩɩkã pa rɩt zɩɩm ye. A Zeova ket n datame tɩ d tũ yẽ sẽn yeel bũmb ning zɩɩmã wɛɛngẽ wã.

13. Bõe yĩng tɩ kiris-nebã pa sakd tɩ logtor ning-b zɩɩm?

¹³ Woto rat n yeelame me tɩ kiris-ned pa tog n sak tɩ logtor ning-a zɩɩm ye. A Zeova yeelame tɩ d ra rɩ zɩɩm ye. Logtor sã n yeel yãmb tɩ y ra yũ rãam, rẽ yĩnga y na sak tɩ b vʋdg y yĩngã n ning rãamã sɩda? Woto me, Wẽnnaam sẽn yeel tɩ d ra rɩ zɩɩmã, rat n yeelame tɩ d pa segd n sak tɩ b ning-d zɩɩm ye.—Ges-y Vẽnegr 28 wã.

14, 15. Baa kiris-nebã sẽn nand vɩɩmã, bõe yĩng tɩ b pa na n kɩɩs Wẽnnaam b sẽn dat n wogl b yõor yĩnga?

¹⁴ La logtor sã n yeel-y tɩ y sã n zãgs zɩɩmã y na n kiime, y maanda wãna? Yaa ned kam fãa n yãkd a sã n na n saka noor ning Wẽnnaam sẽn kõ zɩɩmã wɛɛngẽ wã. Kiris-nebã nanda vɩɩmã sẽn yaa Wẽnnaam kũunã. Rẽ n so tɩ d sã n wa ka laafɩ, d baooda tɩbsg sẽn na n sãoog d bãagã. La d kõn tol n sak tɩ b ning-d zɩɩm ye.

¹⁵ D modgdame n get d laafɩ wã yelle, la d pa sakd tɩ b ning-d zɩɩm, bala Wẽnnaam nanda vɩɩmã. D sẽn na n sak a Zeova n tar yõod n yɩɩd d sẽn na n kɩɩs-a n dat n wogl d yõorã. A Zeezi yeelame: “Ned ning sẽn baood tɩ kogl a vɩɩm, a vɩɩm na sãame, la ned ning sẽn na n bas a vɩɩm mam yĩnga, a na leb n paam-a.” (Matye 16:​25) D tũuda a Zeova sẽn yeelã, bala d nong-a lame. Yẽ n mi sẽn yaa sõma ne-d n yɩɩda. Sẽn paase, d miime t’a Zeova nanda vɩɩmã, tɩ tõnd me rat n maan wa yẽ.—​Ebre-rãmbã 11:​6.

16. Bõe yĩng tɩ kiris-neb hakɩɩkã sakd Wẽnnaam noorã?

¹⁶ Wẽn-sakdbã tũuda Wẽnnaam noorã zɩɩmã wɛɛngẽ ne b sũy fãa. B kõn tol n dɩ zɩɩm, b kõn sak me tɩ b ning-b zɩɩm ye.a La b sakda tɩbsg a taaba, sẽn na yɩl n paam laafɩ. B kɩsa sɩd tɩ yaa sẽn naan-a vɩɩmã ne zɩɩmã n mi sẽn yaa sõma ne bãmb n yɩɩda. La yãmb yẽ? Y kɩsa sɩd tɩ Wẽnnaam n mi sẽn yaa sõma ne-y bɩ?

A ZEOVA SẼN DA KÕ SOR TƖ B TÕE N MAAN NE ZƖƖMÃ

17. Bõe bal la Israyɛll nebã ra tar sor n maan ne zɩɩmã?

¹⁷ A Moyiis tõogã pʋgẽ, a Zeova yeela Israyɛll nebã yaa: “Yĩngã vɩɩm bee zɩɩmẽ wã. Mam kõt-a-la yãmb tɩ y raag-a tẽn-kugrã zugu, tɩ yãmb tõe n paam y yel-wẽnã sugri. Bala, yaa vɩɩm sẽn be zɩɩmã pʋgẽ wã yĩng n kɩt tɩ zɩɩm tõe n pek yel-wẽnã.” (Maan-kʋʋre 17:​11) Israyɛll ned sã n da maan yel-wẽnde, n dat a Zeova sugri, a segd n kosa maan-kʋʋd t’a kʋ rũng n maan maoongo, n yãk zɩɩmã n daag wẽnd-doogã tẽn-kugrã zugu. Yaa rẽ bal la Israyɛll nebã ra tõe n tall zɩɩmã n maane.

18. A Zeezi sẽn ki tɩ yɩ maoongã kɩtame tɩ tõnd tõe n paam bõe?

¹⁸ A Zeezi sẽn wa tẽngã zug n ki wã, a kõo a zɩɩmã sẽn yaa a vɩɩmã tɩ yɩ maoong sẽn ledgd rũmsã maoongã, tɩ tõnd tõe n paam d yel-wẽnã sugri. (Matye 20:​28; Ebre-rãmbã 10:​1) A Zeezi vɩɩmã yõod ka to ye. Rẽ n so t’a sẽn vʋʋg n leb saasẽ wã poore, a Zeova kõo ãdem-biisã sor tɩ b tõe n paam vɩɩm sẽn kõn sa wã, a Zeezi maoongã maasem yĩnga.—Zã 3:​16; Ebre-rãmbã 9:​11, 12; 1 Pɩyɛɛr 1:​18, 19.

19. Bõe la d segd n maan n da wa paam taale?

¹⁹ D sũur yaa noog wʋsg ne a Zeova, a sẽn kõ-d vɩɩmã. D rat n wilga nebã tɩ b sã n tẽ a Zeezi, b tõe n wa paam n vɩɩmda wakat sẽn kõn sa. Tõnd sẽn nong nebã, d maanda d sẽn tõe n sõngd-ba, sẽn na yɩl tɩ b bãng b sẽn tõe n maan n fãag b vɩɩmã. (Ezekɩyɛll 3:17-21) Dẽ, wa tʋm-tʋmd a Polle, d na n tõog n yeelame yaa: “Yãmb ned a yembr sã n sãame, a taalã ka be ne maam ye. Bala, mam togsa yãmb Wẽnnaam daabã fãa n ka solg bũmb ye.” (Tʋʋmã 20:​26, 27) D sã n sõng nebã tɩ b bãng a Zeova, la b bãng t’a nanda vɩɩmã, d wilgdame tɩ tõnd me nanda vɩɩmã.