Yãmb mii Wẽnnaam sõma bɩ?

1. Bõe yĩng tɩ d segd n tũ Wẽnnaam?

Yaa Wẽnnaam n naan bũmb fãa. A pa tall sɩngre, a pa na n tall saab me ye. (Yɩɩl Sõamyã 90:2) Yẽ n kɩt tɩ b gʋls koe-noodã sẽn be Biiblã pʋgẽ wã. (1 Tɩmote 1:11) Sẽn yaa yẽ la vɩɩmã kõtã, yẽ bal la d segd n pʋʋs la d tũ.—Karm-y Wilgr 4:11.

2. Wẽnnaam yaa wãn-wãna?

Ned nan pa yã Wẽnnaam ye. Bala a bee saasẽ. Ninsaal yaool n pa tõe n yã sẽn be-b saasẽ wã ye. (Zã 1:18; 2 Kibaya 6:27) La a sẽn naan bũmb ninsã kɩtame tɩ d tõe n bãng a sẽn yaa a soaba. Wala makre, d sã n ges tɩɩsã biis la tɩ-puudã, d bãngdame tɩ Wẽnnaam yaa nonglem la yam-kãseng soaba. Saasã la tẽngã sẽn yalem to-to wã me wilgda tõnd t’a yaa pãn-kẽeng soaba.—Karm-y Rom dãmb 1:20.

D sã n karemd Biiblã, d bãngda bũmb wʋsg Wẽnnaam zug n paase. Biiblã wilgda tõnd Wẽnnaam sẽn nonge, la a sẽn kisi, a manesem sẽn yaa to-to ne ninsaalbã, la a sẽn maand to-to yɛl kẽer pʋgẽ.—Karm-y Yɩɩl Sõamyã 103:7-10.

3. Wẽnnaam tara yʋʋr bɩ?

A Zezi yeela woto: ‘Tõnd Ba sẽn be arzãna [bɩ saasẽ], tɩ yãmb yʋʋr yɩ ne waoogre.’ (Matɩe 6:9) Baa ne Wẽnnaam sẽn tar naam yʋy wʋsgã, a tara yʋ-peelle. B sẽn boond a yʋʋrã to-to buud-goam toor-toorã pʋgẽ wã pa yembr ye. Ne moorã, d yetame tɩ “Zeova.” Biiblã wilgame tɩ Wẽnnaam ning “yʋʋr sẽn yaa a Zeova wã . . . bal n ka to dũniyã tɛk fãa.” (Yɩɩl Sõamyã 83:18, MN) Wilgr 19:6 pʋgẽ, b yetame tɩ “Aleluia!” sẽn dat n yeel tɩ pẽg-y-yã a Yah bɩ a Zeova.

Biibl dãmb wʋsg pʋgẽ, b yãka Wẽnnaam yʋ-peellã n ning Zu-soaba, bɩ Wẽnnaam. La bãng-y tɩ b sẽn wa n gʋls Biiblã n sa wã, Wẽnnaam yʋʋrã ra bee a pʋgẽ sẽn na ta zĩis 7000. A Zezi sã n da zãmsd nebã, a wilgd-b-la Wẽnnaam yʋ-peellã.—Karm-y Zã 17:26.

Ges-y video wã Wẽnnaam tara yʋʋr bɩ?

4. Tõnd yell paka a Zeova bɩ?

Namsgã sẽn yaa wʋsgã wilgdame t’a Zeova yaa Wẽnnaam toog sẽn kae ne tõnd bɩ? Kẽer yetame tɩ yaa yẽ n kɩt tɩ d namsdẽ, sẽn na yɩl n mak-d n gese. La woto pa sɩd ye.—Karm-y Zak 1:13.

Wẽnnaam naana ninsaal t’a tõe n yãk a yam. A sẽn pa modgd tõnd tɩ d tũ-a wã pa noom yãmb sɩda? (Zozue 24:15) Yaa neb wʋsg sẽn yãk yam n maand b taabã wẽngã yĩng la namsgã sẽn yaa wʋsgã. Yel-kɛgã sãamda a Zeova sũuri.—Karm-y Sɩngr 6:5, 6.

Tõnd yell paka Wẽnnaam a Zeova. A ratame tɩ d vɩɩmã yɩ noogo. Ka la bilfu, a na n menesa nin-wẽnsã tɩ namsgã sa. Baasgo, a sẽn bas tɩ namsgã ket n beẽ wã tara võore. D na n bãnga rẽ zãmsg a 8 soabã pʋgẽ.—Karm-y 2 Pɩɛɛr 2:9; 3:7, 13.

5. D maanda wãn n yɩ Wẽnnaam zoa?

A Zeova ratame tɩ d pʋʋsd-a, n togsd-a sẽn be-d sũurẽ, tɩ rẽ la d na n paam n yɩ a zoa. Ned kam fãa yell pak-a lame. (Yɩɩl Sõamyã 65:3; 145:18) A kõta sugri. A nee d sẽn modgd n na n maan sẽn tat a yamã, baa d sẽn mi n pa tõogdẽ wã. Dẽnd baa d sẽn yaa koangdbã, d tõe n yɩɩ Wẽnnaam zoa.—Karm-y Yɩɩl Sõamyã 103:12-14; Zak 4:8.

Sẽn yaa a Zeova n kõ-d vɩɩmã, yẽ la d tog n nong n yɩɩda. (Mark 12:30) Yãmb sã n bao n bãng-a n paas la y maan a sẽn datã, y wilgdame tɩ y nong-a lame, rẽ na n kɩtame tɩ y paam a zoodo.—Karm-y 1 Tɩmote 2:4; 1 Zã 5:3.