D bao n bãng Wẽnnaam sõma

1, 2. Sogs-bʋs la nebã mi n sokdẽ?

KAMBÃ nonga sogsgo. Naoor wʋsgo, y sã n wilg biig bũmbu, a sokda yãmb yaa: ‘Bõe yĩnga?’ La baa y sã n leoke, n tẽed tɩ y leokrã yaa vẽenega, a tõe n sokame yɛs tɩ: ‘La bõe yĩng tɩ yaa woto?’

² Pa kambã bal n nong n sokdẽ ye. Kãsembã me mi n sokdame n na n bãng b sore, bɩ n bãng lɛɛre. B mi n tagsa b vɩɩmã bɩ beoogã yelle, n sokd b mens sogsgo. B sã n paam leoorã tɩ pa ta b yam, tõe n sãama b sũuri, tɩ b pa le rat n sok n bãng ye.

3. Bõe yĩng tɩ neb wʋsg tẽed tɩ b pa tõe n paam sogsg kẽer leoore?

³ La rẽ yĩnga, Biiblã tõe n sõnga tõnd tɩ d paam d sogsg kẽer leoor bɩ? Neb kẽer tagsdame tɩ Biiblã tõe n sõng-b lame, la b tẽedame tɩ yaa toog tɩ d wʋm Biiblã goam võore. B tagsdame tɩ yaa tũudmã taoor dãmb bal n tar sogsg kẽer leoore. Sãnda me tagsdame tɩ b sã n pa mi leoorã, yaa yãnde. La yãmb yẽ tagsda wãna?

4, 5. a) Sogs-bʋs la yãmb wae n sokdẽ? b) Bõe yĩng tɩ y segd n ket n baood b leoorã?

⁴ Tõe tɩ y sokda y meng yaa: Bõe yĩng tɩ ninsaal be tẽngã zugu? Ned sã n ki, a tɩ vɩɩ zĩig a to bɩ? Bõe la ned tõe n maan n paam sũ-noogo? Wẽnnaam yaa wãn to? A Zeezi sẽn yaa karen-saamb kãsengã yeelame: “Kos-y tɩ b na n kõ-y lame. Bao-y tɩ y na n yãndame. Kabs-y tɩ b na n paka kʋɩlengã tɩ y kẽ.” (Matye 7:7) Woto yĩnga, bɩ y ket n baood y sogsgã leoore, hal n wa paam leoor sẽn yaa sɩda.

⁵ Hakɩɩka, y sã n kell n bao y sogsgã leoor Biiblã pʋgẽ, y na n paamame. (Yel-bũnã 2:​1-​5) B leoorã pa toog wʋsg ye. Y sã n bãnge, y sũur na n yɩɩ noog masã menga, leb n na n sõng-y lame tɩ y bãng tɩ beoog na n yɩɩ neere. Bɩ d reng n leok sokr a ye sẽn namsd neb wʋsgo.

NINSAALBÃ YELL PAKA WẼNNAAM BƖ?

6. Bõe yĩng tɩ neb kẽer tagsd tɩ b yell ka pak Wẽnnaam?

⁶ Neb wʋsg tagsdame tɩ ninsaalbã yell pa pak Wẽnnaam ye. B yetame tɩ nebã yell sã n da pakẽ Wẽnnaam, dũniyã kõn yɩẽ woto ye. Dũniyã pida ne zaba, kisgr la naongo. Nebã bẽedame, n namsd wʋsgo, la b kiidẽ. Rẽ kɩtame tɩ neb kẽer sokdẽ tɩ: ‘Tõnd yell sã n paka Wẽnnaam, bõe yĩng t’a pa kɩtd tɩ namsgã sa?’

7. a) Bõe la tũudmã taoor dãmb yeta, tɩ rẽ kɩt tɩ nebã tagsdẽ tɩ Wẽnnaam pa zoet nebã nimbãanega? b) Bõe yĩng tɩ d tõe n kɩs sɩd tɩ pa Wẽnnaam n kɩtd tɩ bõn-wẽnsã maandẽ?

⁷ Wakat ninga, yaa tũudmã taoor dãmb n kɩt tɩ nebã tagsd tɩ Wẽnnaam pa zoet nebã nimbãanegã. Yel-beed sã n maane, b yetame tɩ yaa Wẽnnaam daabo. B sẽn yet woto wã, b ningda Wẽnnaam taale. Biiblã yaool n wilgdame tɩ pa Wẽnnaam n wat ne yel-beedã ye. Zak 1:13 wilgame tɩ pa Wẽnnaam n kɩtd tɩ yɛlã paamd nebã sẽn na yɩl n mak-b ye. Be, b yetame yaa: “Bɩ ned baa a yembr sẽn paamd makr da yeel tɩ yaa Wẽnnaam n makd yẽnda ye. Bala, wẽng ka tõe n mak Wẽnnaam, la bãmb mengã ka makd ned baa a yembr ye.” Gom-kãensã wilgdame tɩ baa Wẽnnaam sã n basdame tɩ bõn-wẽns maandẽ, pa yẽ n kɩtd tɩ maandẽ ye.—Karm-y Zoob 34:10, 12.

8, 9. Bõe yĩng tɩ pa zems tɩ d yeel tɩ d zu-loeesã la d yɛlã fãa yaa Wẽnde? Rɩk-y makr sẽn wilgd rẽ.

⁸ D rɩk makr ne bi-bɩɩg sẽn be ne a roagdba. A ba wã nong-a-la wʋsgo, n wub-a sõma, t’a tõe n bãng n yãk yam-sõng bũmb fãa pʋgẽ. La biigã wa n lebga tõata, n yi n bas a ba wã zaka, n tɩ tʋm tʋʋm-wẽns n paam zu-loeese. Rẽ yĩnga yãmb na n yeelame t’a ba wã sẽn pa gɩdg-a t’a ra yi zakẽ wã yĩnga, yaa a ba wã yell sɩda? Y pa na n yeel rẽ ye! (Luk 15:​11-​13) Woto me, ned sã n yãk yam n lebg tõat n maand wẽnga, Wẽnnaam pa gɩdgd a soab ye. Dẽnd bũmb sẽn yaa wẽng sã n maane, d segd n tẽegame tɩ pa Wẽnnaam yell ye. D sã n ning-a taale, pa zems ye.

⁹ Wẽnnaam sẽn sĩnd n getẽ tɩ namsgã la yel-beed toor-toor beẽ wã pa zaalem ye. Sak 11 wã pʋgẽ, y na n bãnga rẽ võore. La bãng-y vẽeneg tɩ Wẽnnaam nonga tõndo, la tɩ d zu-loeesã pa yẽ yell ye. Sɩd-sɩda, yaa yẽ bal la d tõe n teege, n paam d zu-loeesã tɩɩm.—​Ezayi 33:​2.

10. Bõe yĩng tɩ d tõe n kɩs sɩd tɩ Wẽnnaam na n kɩtame tɩ nin-wẽnsã sẽn wa ne yɛl ninsã fãa sa?

¹⁰ Wẽnnaam yaa sõngo. (Vẽnegre 4:8) A sẽn maand fãa yaa sõma la tɩrga, tɩ kɛgr kae ye. Dẽnd d tõe n teeg-a lame. La d pa tõe n teeg ninsaalb ye. Bala wakat ninga b tʋʋmã yaa wẽnse. Baa nanambs nins sẽn yaa pʋ-peelem dãmbã pa tar tõog n na n dems yɛl nins nin-wẽnsã sẽn maandã ye. La ned kae t’a pãng ta Wẽnnaam ye. A tõeeme tɩ nin-wẽnsã sẽn wa ne yɛl ninsã fãa sa. A na n kɩtame tɩ tʋʋm-wẽnsã sa wakat fãa yĩnga.​—Karm-y Yɩɩn-sõamyã 37:9-11.

NEBÃ SẼN NAMSDÃ PA NOOM WẼNNAAM YE

11. Bõe n wilgd tɩ yãmb sã n namsdẽ, pa noom Wẽnnaam?

¹¹ Bũmb nins sẽn maand dũniyã zug la yãmb mengã sẽn namsdã pa noom Wẽnnaam ye. Biiblã wilgdame tɩ Wẽnnaam “nonga tɩrlem.” (Yɩɩn-sõamyã 37:​28) Rẽnd bũmb sã n maane, sã n yaa sõma noom-a lame, la sã n yaa wẽnga sãamda a sũuri. Nebã sã n namsdẽ, pa noom-a ye. Biiblã yetame tɩ tʋʋm-wẽnsã sẽn da wa n pid dũniyã, Wẽnnaam “sũur sãama wʋsgo.” (Sɩngre 6:​5, 6) Wẽnnaam pa toeem ye. (Malasɩ 3:​6) Biiblã yetame tɩ d yell pak-a lame.—Karm-y 1 Pɩyɛɛr 5:7.

12, 13. a) Bõe yĩng tɩ ninsaal tõe n nong a to? b) Nebã sẽn namsdã maanda yãmb bõe? d) Bõe yĩng tɩ y tõe n kɩs sɩd tɩ Wẽnnaam na n kɩtame tɩ namsgã la yel-kɛgã sa?

¹² Biiblã yetame me tɩ Wẽnnaam naana ninsaal a meng wẽnego. (Sɩngre 1:​26) Woto rat n yeelame tɩ Wẽnnaam naana tõnd tɩ d tõe n tall zʋg-sõma n wõneg yẽ. Yãmb sã n yã tɩ bʋʋm soab namsdẽ, pa zabd yãmb sɩda? Bãng-y tɩ sãamda Wẽnnaam sũur n yɩɩda. Bõe n wilgd rẽ?

¹³ Biiblã yetame tɩ “Wẽnnaam yaa nonglem.” (1 Zã 4:​8) Wẽnnaam sẽn maandã fãa yaa ne nonglem. Yaa Wẽnnaam sẽn yaa nonglmã yĩng la ninsaal sẽn tõe n nong a to wã. Yãmb sã n da tarẽ pãng n tõe tɩ namsgã la wẽgbã sa, y kõn maan sɩda? Yaa vẽeneg tɩ y sẽn nong nebã yĩnga, y na n maaname. La Wẽnnaam yẽ? A tõee bũmb fãa. A leb n nonga tõndo. Dẽnd a na n wa kɩtame tɩ namsgã la yel-kɛgã sa. Y tõe n kɩsa sɩd tɩ kãab-nood nins yell b sẽn gom seb-neng a naas ne a nu pʋgẽ wã na n pidsame. La sẽn na yɩl n kɩs sɩd ne rẽ, yaa tɩlɛ tɩ y bao n bãng Wẽnnaam sõma n paase.

WẼNNAAM DATAME TƖ Y BÃNG-A

14. Wẽnnaam yʋʋrã la bʋgo? Bõe n wilgd tɩ Wẽnnaam ratame tɩ d pʋt a yʋʋrã?

¹⁴ Yãmb sã n dat n yõg zood ne neda, naoor wʋsgo yaa y yʋʋr la y rengd n togs-a. La Wẽnnaam tara yʋʋr bɩ? Tũudum wʋsg pʋgẽ, b yetame t’a yʋʋrã yaa “Wẽnnaam,” bɩ “Zu-soaba.” La baa a yembr pa yʋ-peell ye. Yaa naam yʋy. Yaa wa b sẽn na n boond ned tɩ “naaba” bɩ “perzidã.” Pa a yʋʋr ye. Wẽnnaam yeta tõnd t’a yʋʋr la a Zeova. Yɩɩn-sõamyã 83:​19 yetame: “Yãmb y yembr bal yʋʋr la Sẽn-Ka-Saabo [“a Zeova,” MN], n yaa Sẽn-Ka-To sẽn so dũniyã gilli.” Sẽn gʋls-b Biiblã gʋlsa Wẽnnaam yʋʋrã sɛbã pʋsẽ naoor tusa. A Zeova ratame tɩ y bãng a yʋʋrã la y pʋt-a. A sẽn togs yãmb a yʋʋrã yaa a sẽn dat tɩ y yɩ a zoa wã.

15. Zeova wã võor yaa bõe?

¹⁵ Wẽnnaam sẽn kõ a meng yʋʋr ningã võor tagmame. Zeova wã rat n yeelame t’a tõe n pidsa bũmb ning fãa a sẽn kãabe, la t’a tõe n pidsa a raab buud fãa, tɩ bũmb pa gɩdg-a ye. Yẽ bal n zems ne yʋ-kãnga.a

16, 17. a) B sẽn boond a Zeova tɩ “Sẽn-Tõe-Fãa” wã wilgda bõe? b) ‘Zãmaan fãa Rĩmã’? d) Naandã?

¹⁶ D sẽn karem Yɩɩn-sõamyã 83:​19 wã, b yeela be t’a Zeova a yembr bal n yaa “Sẽn-Ka-To.” Vẽnegr 15:​3 me yetame: “Wẽnnaam Sẽn-Tõe-Fãa, yãmb tʋʋmã yaa kãsemse la b bee neere! Soolem dãmbã rĩmã, yãmb tʋʋmã zemsame la b yaa sɩda.” Wẽnnaam “Sẽn-Tõe-Fãa” wã võor yaa bõe? Wilgdame t’a Zeova n tar pãng n yɩɩd bõn-vɩɩsã fãa. B leb n boonda a Zeova 1 Tɩmote 1:​17 pʋgẽ tɩ “rĩm ning sẽn be-a wakat sẽn kõn sa.” Tẽegda tõnd t’a pa tall sɩngre, la t’a pa na n tall saab ye. Yɩɩn-sõamyã 90:​2 yetame t’a sɩng n yaa Wẽnnaam zamaan woo zamaane. Ad a sɩd ka tar to ye!

¹⁷ A Zeova n leb n yaa bũmb fãa Naanda. Vẽnegr 4:​11 yetame: “Tõnd Zu-soab la d Wẽnnaam, yãmb n zems tɩ reeg ziiri, la waoogre, la pãnga. Bala, yãmb n naan bũmb fãa, la yaa yãmb daab yĩng la y naan-b tɩ b beẽ.” Bũmb nins fãa sẽn be wã, sẽn sɩng ne malɛgsã sẽn be saasẽ wã, ãdsã yãmb sẽn tõe n yã yʋngã, tɩɩsã ne b biisã, zĩmã sẽn be ko-kãsemsẽ wã la kʋɩlsẽ wã, fãa sẽn be wã yaa a Zeova n naane.

Y TÕE N YƖƖ A ZEOVA ZOA BƖ?

18. Bõe yĩng tɩ neb kẽer tagsd tɩ b pa tol n tõe n yɩ Wẽnnaam zoa? Bõe la Biiblã yet rẽ wɛɛngẽ?

¹⁸ Neb kẽer sã n karem Biiblã n bãng a Zeova sẽn yaa a soabã, b yɛɛsdame. A pãngã, a naamã ne a ziirã sẽn ka to wã, n paas a sẽn zãr ne tõndã kɩtame tɩ b tagsdẽ tɩ d yell pa pak-a ye. La Wẽnnaam datame tɩ tõnd tags woto bɩ? A bada! A Zeova ratame tɩ d yɩ a zo-rãmba. Biiblã yetame tɩ “Wẽnnaam ka zãr ne tõnd ned ba a yembr ye.” (Tʋʋmã 17:​27) Wẽnnaam datame tɩ yãmb lebg a zoa. A yeelame tɩ y sã n kolg-a, a “na pẽneg yãmba.”​—​Zak 4:8.

19. a) Bõe la y tõe n maan n paam n yɩ Wẽnnaam zoa? b) Bõe la Biiblã yet Wẽnnaam zug tɩ noom yãmba?

¹⁹ Bõe la y tõe n maan n paam n yɩ Wẽnnaam zoa? A Zeezi yeelame: “Vɩɩm sẽn kõn sa wã yaa tɩ nebã na bãng yãmb sẽn yaa y yembre, n yaa sɩd Wẽnnaamã, la b bãng a Zeezi Kirisi, yãmb sẽn tʋm a soabã.” (Zã 17:​3) Ket-y n zãmsd-y Biiblã, n paam n bãng a Zeova ne a Zeezi sõma. Rẽ, y na n wa paama vɩɩm sẽn kõn sa. Y zoe n bãngame tɩ “Wẽnnaam yaa nonglem.” (1 Zã 4:​16) Biiblã yetame me t’a Zeova yaa ‘Wẽnnaam sẽn yaa nimbãan-zoeta, la bark kõata, t’a sũur ka yikd tao-tao, t’a yaa nonglem soaba, la a maanda sɩda.’ (Yikri 34:​6) A ‘yaa sõmblem soaba, la a kõt sugri.’ (Yɩɩn-sõamyã 86:​5) A maanda sũ-mare. (2 Pɩyɛɛr 3:​9) A yaa sɩd soaba. (Yɩɩn-sõamyã 117:​2) Y sã n wɩng ne Biiblã karengo, y na n bãnga a Zeova sõma n paase.

20, 21. a) Baa y sẽn pa tõe n yã Wẽnnaamã, y maanda wãn n yɩ a zoa? b) Bõe yĩng tɩ Biiblã yeel tɩ Wẽnnaam yaa tõnd Ba?

²⁰ Y sẽn pa tõe n yã Wẽnnaamã, y maanda wãn n yɩ a zoa? (Zã 1:​18; 4:​24; 1 Tɩmote 1:​17) Y sã n zãmsd Biiblã, y na n wa bãng-a-la sõma, n mi a sẽn nong la a sẽn kisi. (Yɩɩn-sõamyã 27:4; Rom-dãmbã 1:​20) Y sã n bãngd a Zeova n paasdẽ, y na n nong-a lame n yɩɩda, tɩ y zoodã pãng me paasdẽ.

²¹ Y na n bãngame t’a Zeova yaa tõnd Ba. (Matye 6:​9) Yẽ n kõ tõnd vɩɩmã, la a rat tɩ d vɩɩmã tall barka. A rata tõnd neere, wa ba sẽn nong a kamb n dat-b neerã. (Yɩɩn-sõamyã 36:​10) Biiblã wilgda vẽeneg tɩ yãmb tõe n yɩɩ a Zeova zoa. (Zak 2:​23) A Zeova sẽn yaa bũmb fãa naandã ratame tɩ y lebg a zoa. Bõe n be n yɩɩd woto?

22. Nebã sã n dat tɩ y bas Biiblã zãmsgã, bõe la y segd n maane?

²² Yãmb sẽn zãmsd Biiblã, neb kẽer tõe n datame tɩ y base. B tõe n yɛɛsda y na n wa toeem tũudum. La ra bas-y tɩ ned baa a yembr gɩdg-y tɩ y pa tõog n yɩ a Zeova zoa ye. Zood kae sẽn zem rẽ ye.

23, 24. a) Bõe yĩng tɩ y segd n ket n sokdẽ? b) Bõe la d na n bãng sak ning sẽn pʋgdã pʋgẽ?

²³ Yãmb sẽn zãmsd Biiblã, bũmb kẽer võor la y pa na n wʋm zĩig pʋgẽ ye. La ra zoe-y yãnd ne sokr ye. Kos-y sõngre. A Zeezi wilgame tɩ d tog n yɩɩ sik-m-mens rãmb wa kom-bõonego. (Matye 18:2-4) Kambã yaool n nonga sogsgo. Wẽnnaam datame tɩ y paam y sogsgã leoore. Zãms-y Biiblã ne y sũur fãa, n bãng y sẽn zãmsdã sã n yaa sɩda.—​Karm-y Tʋʋm 17:11.

²⁴ Yaa ne Biiblã zãmsg la d tõe n bãng a Zeova sõma n yɩɩda. Sak ning sẽn pʋgdã pʋgẽ, d na n bãnga bũmb ning sẽn kɩt tɩ Biiblã yaa toor ne sɛb a taabã.