SAK A 6

Koe-no-bʋg n be sẽn ki-bã yĩnga?

1. Koe-noog n be sẽn ki-bã yĩng bɩ?

A Lazaar sẽn vʋʋge t’a Mart ne a Maari seg-a tɩ b sũur noomẽ

Daar a ye, a Zezi zoa a Lazaar sẽn da be Betani sẽn pẽ Zerizalɛmmã maana kaalem. A Zezi kẽnga be, la rẽ t’a kaalmã taa rasem a naase. A tũu a Mart ne a Maari sẽn yaa kiidã tãopã n kẽng yaoogẽ wã, la tao-tao tɩ nebã tigmame. A Zezi vʋʋga a Lazaare. A Mart ne a Maari sũur yɩɩ noog wʋsgo.—Karm-y Zã 11:21-24, 38-44.

A Mart ra miime tɩ koe-noog n be sẽn ki-bã yĩnga. A ra miime t’a Zeova na n wa vʋʋga sẽn ki-bã, tɩ b le vɩɩmd tẽngã zugu.—Karm-y Ezai 26:19.

2. Ned sã n ki, a le mii bũmb bɩ?

Wẽnnaam sẽn wã n naanda a Adema, la a sẽn wa n ki wã — Wẽnnaam yeela a Ãdem: “Fo yaa tẽng tom, la fo na le lebga tẽng tom yɛsa.”—SƖNGRE 3:19.

Wẽnnaam naana ninsaal ne tẽng tom. (Sɩngre 2:7; 3:19) Ninsaal pa tar sɩɩg sẽn ket n vɩ kũum poor ye. Ned sã n ki, a kalkõtã sãamdame, a pa le tõe n tags ye. Rẽ n so t’a Lazaar vʋʋgrã poore, a pa yeel t’a yãa bũmb ye. Bala kũum pa mi baa fʋɩ ye.—Karm-y Yɩɩl Sõamyã 146:4; Koɛɛg Soab 9:5, 6, 10.

Wẽnnaam sɩbgda neb bugum-yir bɩ? Biiblã sẽn yet tɩ kũum pa mi bũmbã yĩnga, rẽnd b sẽn yet tɩ Wẽnnaam sɩbgda neb bugum-yirã yaa ziri fasɩ. B sãamda Wẽnnaam yʋʋre. Yõog ned bugum pʋd n yaa bũmb Wẽnd sẽn kisi.—Karm-y Zeremi 7:31.

Ges-y video wã Ned sã n ki, a le mii bũmb bɩ?

3. Sẽn ki-bã tõe n goma ne tõnd bɩ?

Ned sẽn ki pa tõe n gome, a pa wʋmde. (Yɩɩl Sõamyã 115:17) La malɛgs kẽer n lebg wẽnse, n tõe n gom ne nebã tɩ yaa wa sẽn ki-bã n gomda. (2 Pɩɛɛr 2:4) A Zeova gɩdgame tɩ d ra bao n gom ne sẽn ki-bã ye.—Karm-y Tõod 18:10, 11.

4. Ãnd dãmb n na n vʋʋge?

Rao sẽn vʋʋg arzãnã pʋgẽ n paam tɩ b zãms-a tɩ yẽ me naag n zãmsd neb sẽn vʋʋge.

Neb milyõ rãmb sẽn ki n na n vʋʋg n soog dũniyã. Baa kẽer sẽn tʋm tʋʋm-wẽns b sẽn da pa mi Wẽnnaam sõma wã yĩng na n vʋʋgame.—Karm-y Yɩɩl Sõamyã 37:29; Tʋʋm 24:15, MN.

Sẽn na n vʋʋg-bã na n paamame tɩ b zãms-ba, tɩ b bãng Wẽnnaam la b sak a Zezi n wilg tɩ b tẽed-a lame. (Wilgri 20:11-13) Sẽn na n sak-b n maan Wẽnnaam daabã na n vɩɩmda tẽngã zug wakat sẽn kõn sa.—Karm-y Zã 5:28, 29.

5. Kũum vʋʋgrã wilgda tõnd bõe a Zeova zugu?

Yaa Wẽnnaam sẽn sak t’a biigã wa ki tõnd yĩngã n kɩt tɩ sẽn ki-bã tõe n wa vʋʋgã. Dẽnd kũum vʋʋgrã yaa bark tɛkẽ! La leb n wilgdame t’a Zeova nonga ninsaalbã. Ãnda la y yãgd n dat n yã sẽn ki-bã vʋʋgr sasa?—Karm-y Zã 3:16; Rom dãmb 6:23.

Y sã n dat vẽnegr n paase, bɩ y karem Bõe la d tõe n bãng Biiblã pʋgẽ? sebrã sak a 6, a 7 la 10.