Wẽnnaam Gomdã sẽn yete

Sẽn ki-bã tõe n vʋʋgame bɩ?

Sõs-kãngã pʋgẽ, b leokda sogsg nebã sẽn mi n sokd b mense, la b wilgd Biiblã zĩis nins d sẽn tõe n yã b leoorã. Y sã n dat t’a Zeova Kaset soab wa tɩ y sõs rẽ zugu, a na n saka ne yamleoogo.

1. Ned sã n ki, a tõe n vʋʋgame bɩ?

A Zezi ra wa n taa Betani sẽn pẽ ne Zerizalɛmmã, n wʋm t’a zoa a Lazaar maana kaalem tɩ rab-naasẽ. A tũu kiidã tãop a Mart ne a Maari n kẽng yaoogẽ wã, tɩ neb wʋsg babs-ba. A Zezi vʋʋga a Lazaare. Tags-y n ges-y rẽ sẽn noog a Mart ne a Maari sũur to-to wã.—Karm-y Zã 11:20-24, 38-44.

A Mart ra sɩng n tẽedame tɩ sẽn ki-bã na n wa vʋʋgame. Hal daar zãra, Wẽnnaam a Zeova nin-buiidã ra miime tɩ wakat n wat t’a na n vʋʋg sẽn ki-bã, tɩ b le vɩɩmd tẽngã zug yɛsa.—Karm-y Daniɛll 12:13.

2. Ned sã n ki, a le mii bũmb bɩ?

Baa tõnd a ninsaalbã ne rũmsã fãa sẽn vʋʋsd ne yõorã, d baa a ye pa tar sɩɩg ye. (Koɛɛg Soaba 3:19; Sɩngre 7:21, 22) B naana tõnd ne tẽng tom. (Sɩngre 2:7; 3:19) D sã n ki, d pa le tõe n tags ye. Rẽ n so t’a Lazaar vʋʋgrã poore, a pa yeel nebã t’a sẽn ki wã, a yãa bũmb ye.—Karm-y Yɩɩl Sõamyã 146:4; Koɛɛg Soab 9:5, 10.

Vẽenega, ned sã n ki, a pa le wʋmd toog ye. Rẽnd tũudum kẽer taoor dãmb sẽn wilgd nebã tɩ Wẽnnaam sɩbgda neb kẽer b kũum poorã yaa ziri, leb n yaa Wẽnnaam kãnegre. Bala Biiblã wilgame tɩ neb namsg bugmẽ yaa bũmb Wẽnnaam sẽn kisi.—Karm-y Zeremi 7:31.

3. D tõe n goma ne sẽn ki-bã bɩ?

Ned sã n ki, a pa le tõe n gom ye. (Yɩɩl Sõamyã 115:17) La malɛg-wẽnsã bɩ zĩn-dãmbã mi n dɩkda neb sẽn ki wõneg n gomd ne neba, sẽn na yɩl n tũdg-ba. (2 Pɩɛɛr 2:4) Yaa rẽ n so t’a Zeova gɩdg tɩ d ra bao n gom ne sẽn ki-bã.—Karm-y Tõod 18:10, 11.

4. Ãnd dãmb n na n vʋʋge?

Dũni-paalg ning sẽn watã pʋgẽ, neb milyõ rãmb sẽn maan kaalem n na n vʋʋge. Baa neb kẽer sẽn da maan wẽng b sẽn da pa mi a Zeova wã yĩnga, n na n vʋʋge.—Karm-y Luk 23:43, MN; Tʋʋm 24:15, MN.

Sẽn na n vʋʋg-bã na n paam n zãms n bãnga Wẽnnaam, la b paam n sak a Zezi, n wilg tɩ b tẽed-a lame. (Wilgri 20:11-13) B sʋkã, sẽn na n sak-b Wẽnnaamã na n paam n vɩɩmda tẽngã zug wakat sẽn kõn sa yĩnga. La sẽn na n vʋʋg-bã kẽer pa na n sak Wẽnnaam ye. Bãmb dãmbã na n “paama bʋʋdo.”—Karm-y Zã 5:28, 29.

5. Kũum vʋʋgrã wilgda tõnd a Zeova sẽn yaa Wẽnnaam ning buudã

Yaa Wẽnnaam sẽn tʋm a Bi-riblã t’a wa sak n dɩk a vɩɩmã n kõ ãdem-biisã yĩnga, n kɩt tɩ b na n tõog n vʋʋg sẽn ki-bã. Rẽnd kũum vʋʋgrã wilgda a Zeova sõmblmã, la a sẽn nong ãdem-biisã tɩ ta zĩig ninga.—Karm-y Zã 3:16; Rom dãmb 6:23.

Y sã n dat vẽnegr n paase, bɩ y karem Biiblã sɩd yetame tɩ bõe? sebrã sak a 6 ne a 7 soabã. A Zeova Kaset rãmbã n yiis-a.

[Foto, seb-neng 22]

B naana a Ãdem ne tẽng tom