Yãmb tagsg yaa bõe ne Biiblã?
Sã n yaa ne yãmba, Biiblã . . .
yaa ninsaalb n tags n gʋls bɩ?
yaa soalem sebr bɩ?
bɩ a yaa Wẽnnaam sebre?
BIIBLÃ SẼN YETE
“Gʋls-sõamyã tõr yaa Wẽnnaam n vẽneg tɩ b gʋlse.”—2 Tɩmote 3:16.
RẼ SẼN TÕE N NAF-Y TO-TO
Biiblã leokda sogsg sẽn tar yõod wʋsg ne ãdem-biig fãa.—Yel-bũnã 2:1-5.
A kõta sagls sẽn tõe n sõng-d vɩɩmã nens fãa pʋgẽ.—Yɩɩn-sõamyã 119:105.
A sõngda tõnd tɩ d tõe n tẽ tɩ manegr n wate.—Rom dãmbã 15:4.
D TÕE N TẼE BIIBLÃ SẼN YETÃ BƖ?
N-ye. Ad bʋʋm a tãabo:
A goamã sẽn pa kɩɩsd taabã yaa bõn-kãsenga. Yaa na maan neb 40 n gʋls Biiblã. B rɩka sẽn yɩɩd yʋʋm tusr la kobs-yoob n gʋls-a. A gʋlsdbã wʋsg pa bãng taab meng ye. La ne rẽ fãa, a sɩngrẽ wã n tɩ ta a baasgã, a goamã fãa tũuda taaba!
Biiblã sẽn togs kʋdem-wẽndẽ yɛl ninsã yaa sɩda. Kʋdemd yɛl-mitbã sɛbẽ, b mi n pa togsd b buudã neb kongr ye. La Biiblã gʋlsdb yẽ sak n wilga bãmb mensã la b buudã neb kongre.—2 Kibayã 36:15, 16; Yɩɩn-sõamyã 51:1-4.
A bãngr-goamã pidsdame. Yʋʋm kobs-yi nand tɩ b sãam Babilonne, no-rɛɛs a Ezayi reng n togsame tɩ b na n wa sãam-a lame. (Ezayi 13:17-22) A Ezayi togsa b sẽn na n tõog Babilon to-to wã, la a wilg naab ning sẽn na n deeg tẽngã yʋʋr menga.—Ezayi 45:1-3.
Biiblã bãngr-goam wʋsg me zoe n pidsa ball-balle. Rẽ yĩnga woto pa wilgd t’a yaa sebr sẽn yit Wẽnnaam nengẽ sɩda?—2 Pɩyɛɛr 1:21.
AD SOKRE:
Wãn to la Wẽnnaam Gomdã tõe n maneg yãmb vɩɩmã?
Biiblã leokda sok-kãngã EZAYI 48:17, 18 la 2 TƖMOTE 3:16, 17 wã pʋgẽ.