A Zozɩas ra tara zo-rãmb sẽn yaa sõma

Fo tagsdame tɩ yaa nana tɩ f maan sẽn yaa sõma bɩ?— Neb wʋsg tagsdame tɩ pa nana ye. Biiblã pʋgẽ, b goma biig a yembr yelle, n wilg tɩ pa yɩ nana ne-a t’a maan sẽn yaa sõma ye. A yʋʋr la a Zozɩas. La a ra tara zo-rãmb sẽn da sõngd-a. D gom a Zozɩas ne a zo-rãmbã yelle.

A Zozɩas baaba yɩɩ Zida rĩma. A yʋʋr da yaa a Amon. Ra yaa rĩm-wẽnga, n da pʋʋsd bõn-naandse. A Amon sẽn wa n ki wã, a Zozɩas n lebg Zida rĩma. La rẽ t’a ra tara yʋʋm a nii bala! Fo tagsdame t’a yɩɩ rĩm-wẽng wa a ba wã bɩ?— Ayo, a pa yɩ rĩm-wẽng ye!

Baa a Zozɩas sẽn da yaa bi-kɩdgã, a ra ratame n sak a Zeova. Rẽ n so t’a bao zo-rãmb sẽn nong a Zeova. B sõng-a lame t’a maan sẽn yaa sõma. D bao n bãng a Zozɩas zo-rãmbã kẽere.

A zoa a ye ra yaa a Sofoni. A Sofoni yɩɩ a Zeova no-rɛɛsa. A ra yeta Zida nebã tɩ b sã n pʋʋs bõn-naandsã, toog n na n paam-ba. A Zozɩas kelga a Sofoni goamã, n pa pʋʋs bõn-naandsã ye. A tũu a Zeova.

A Zozɩas zoa a to me yɩɩ a Zeremi. B ra yaa rog-taase. B sẽn wa n yaa kambã, b zagsã ra pẽe taaba. B kell n yɩɩ zo-rãmba, hal t’a Zozɩas sẽn wa n ki wã, a Zeremi gʋlsa yɩɩll n wilg t’a zoa wã kũum sãama a sũurã wʋsgo. A Zeremi ne a Zozɩas sõnga taaba, n maan sẽn yaa sõma, n kell n sak a Zeova.

A Zozɩas kibarã zãmsda foo bõe?— Baa a Zozɩas sẽn da yaa bi-kɩdgã, a ra ratame n maan sẽn yaa sõma. A ra miime t’a zo-rãmbã segd n yɩɩ neb sẽn nong a Zeova. Mogd tɩ fo-me zo-rãmbã yɩ neb sẽn nong a Zeova, la sẽn tõe n sõng foo tɩ f maan sẽn yaa sõma.