A Zoziyas ra nonga Wẽnnaam tõogã

A Zoziyas sẽn wa n tar yʋʋm a nii, a lebga Zida rĩma. Wakat kãnga, nebã ra tʋmda zĩn-dãmb tʋʋma, la b pʋʋsd bõn-naandse. A Zoziyas sẽn wa n tar yʋʋm 16, a baoome n na n tũ a Zeova sõma. A sẽn wa n tar yʋʋm 20, a sɩnga tẽngã bõn-naandsã la tẽn-kugã fãa sãoongo. A sẽn wa n tar yʋʋm 26, a kɩtame tɩ b maneg a Zeova roogã.

Maan-kʋʋdb kãsem a Hilkiya yãa a Zeova tõogã sebr wẽnd-doogẽ wã. Tõe tɩ yaa a Moyiiz sẽn gʋls a soabã. A Safan sẽn yaa rĩmã sekertɛɛrã rɩka sebrã n wa karem t’a Zoziyas kelge. A sẽn wʋmã, a bãngame tɩ yʋʋm wʋsg la woto nebã sẽn kɩɩsd a Zeova. A yeela a Hilkiya yaa: ‘A Zeova sũur yika wʋsg ne tõndo. Tɩ sok-a t’a na n togsa foom tõnd sẽn segd n maane.’ A Zeova tũnuga ne no-rɛɛs-poak a Ulda n yeel yaa: ‘Zida nebã basa maam. Mam na n sɩbg-b lame. La pa na n yɩ a Zoziyas naamã sasa ye. Bala a yaa sik-m-meng soaba.’

Rĩm a Zoziyas sẽn wʋmã, a kẽnga wẽnd-doogẽ wã n tigim Zida nebã. A zẽka a koɛɛg n karem a Zeova tõogã tɩ b fãa kelge. Yẽ ne nebã pʋlmame tɩ b na n saka a Zeova ne b sũy fãa.

Yʋʋm wʋsg la woto Zida nebã sẽn da pa maan Pak kibsã ye. La a Zoziyas sẽn karem tõogã n bãng tɩ b segd n maanda Pakã yʋʋmd fãa wã, a yeela nebã yaa: ‘Tõnd na n maana Pakã a Zeova yĩnga.’ A Zoziyas kɩtame tɩ b bao rũms wʋsg n na n maan maando, la a kɩt tɩ b bao yɩɩn-yɩɩndb sẽn na n wa yɩɩl wẽnd-doogẽ wã. Rẽ poore, b maana Pakã, la b kell n maan bur sẽn ka ning rabɩll kibsã, n kaoos rasem a yopoe. Sã n pa a Sãmwɛll wakatẽ wã, b pa tol n maan Pak a woto buud ye. A Zoziyas sɩd ra nonga Wẽnnaam tõogã. Fo sẽn zãmsd bũmb nins a Zeova zugã nooma foo bɩ?