A Zeremi goma a Zeova yell n ka bas ye

Wakat ninga, d sã n gomd a Zeova yell ne nebã, b laada tõndo. Kẽer sũy yikdame menga. Woto tõe n kɩtame tɩ d pa le rat n gom a Zeova yell ye. A buud zoe n paama foo bɩ?— Kibar a ye n be Biiblã pʋgẽ n gomd bi-bɩɩg a yembr yelle. A yʋʋr la a Zeremi. A ra nonga a Zeova wʋsgo. La ra kella bilf t’a bas n pa le gom a Zeova yell ne nebã ye. D ges sẽn yɩ to-to.

A Zeremi sẽn wa n yaa bi-bɩɩga, a Zeova yeel-a lame t’a yeel nebã tɩ b bas b tʋʋm-wẽnsã. A Zeremi ra tagsdame t’a pa tõe ye. A ra yɛɛsdame. A yeela a Zeova yaa: ‘Mam pa na n tõog n tɩ gom ne-b ye. Mam nan yaa biiga.’ La a Zeova leok-a lame yaa: ‘Ra yɛɛs ye. Mam na n sõnga foo.’

A Zeremi sɩd kẽngame n tɩ yeel nebã tɩ b sã n ka bas b tʋʋm-wẽnsã, a Zeova na n sɩbg-b lame. Fo tagsdame tɩ nebã sak n maana wa a Zeremi sẽn yeelã bɩ?— Nebã ra laad-a lame. Kẽer sũy yika ne-a, tɩ sãnda meng ra rat n kʋ-a. A Zeremi ra na n maana a wãna?— A yɛɛsame, n yeel yaa: ‘Mam ka na n tol n le gom a Zeova yell ye.’ A sɩd basame bɩ?— Ayo. A pa bas ye. A ra nonga a Zeova wʋsgo, hal tɩ yaa toog t’a sĩnd n pa gom a yell ye. A Zeremi sẽn kell n gom a Zeova yellã, a fãag-a lame.

Daar a yembre, nin-wẽns n yõk a Zeremi n tɩ lob bulg pʋgẽ. Bulgã pʋg ra yaa bɛgdo. A ra pa tõe n paam dɩɩb n dɩ, bɩ koom n yũ ye. B basa a Zeremi be, n dat t’a ki. La ne a Zeova sõngre, neb n wa n yiis-a.

A Zeremi kibarã zãmsda foo bõe?— Baa ne a sẽn da mi n yɛɛsdẽ wã, a kell n goma a Zeova yell n ka bas ye. Fo sã n gom a Zeova yelle, nebã tõe n laa foo, bɩ n yik b sũy ne-fo. Yãndã tõe n yõka foo. Rabeem me tõe n yõk-f lame. La baa ne rẽ, kell n gom a Zeova yell n da bas ye. A na n sõnga foo wa a sẽn sõng a Zeremi wã.