Zãms-y y kambã

A Zeremi pa bas a tʋʋmdã ye

RẼ YĨNGA bũmb zoe n sãama fo sũur hal tɩ f wa rat n bas a Zeova raabã maaneg bɩ?—a A buud zoe n paama neb wʋsgo. Wala makre, bi-bɩɩg a Zeremi. La a pa bas tɩ nebã goam wall b manesem kɩt t’a bas Wẽnnaam daabã maaneg ye. D ges sẽn sɩng to-to tɩ Wẽnnaam wa yãk a Zeremi, la a nong-a baa a sẽn da mi n koms raood n dat n bas a tʋʋmdã.

Hal a Zeremi sẽn da wa n nan pa rog menga, Wẽnnaam a Zeova ra zoe n yãk-a lame t’a na n wa yɩ a no-rɛɛsa, n wilg nin-buiidã tɩ b tʋʋmã pa tat Wẽnnaam daab ye. La fo mii a Zeremi sẽn wa n yeel a Zeova bũmb ning bɩ?— A yeela woto: “Zusoab a Wẽnnaam, mam ka mi goam ye, mam nan yaa biig bala.”

Fo tagsdame t’a Zeremi sẽn yeel woto wã, a Zeova leok-a lame tɩ bõe?— A Zeova bʋka a sũur n dems a Zeremi tagsgã. A yeel-a-la woto: ‘Ra yeel tɩ f yaa biig ye. Kẽng mam sẽn tʋm foom neb nins nengẽ wã n tɩ togs bũmb nins fãa mam sẽn yeel foomã. Ra zoe bãmb ye.’ Bõe yĩng t’a pa segd n zoe rabeem? A Zeova paasa woto: “Mam bee ne foom n na n fãag foom.”—Zeremi. 1:4-8.

La wa d sẽn yã sõsgã sɩngrẽ wã, a Zeremi wa n komsa raoodo. Bala a sẽn da moond Wẽnnaam koɛɛgã, nebã ra yaand-a lame. A meng yeela woto: ‘Nebã fãa yaanda maam la b paoogd maam wakat fãa.’ Rẽ kɩtame t’a ra rat n bas tʋʋmdã. A yeela woto: “M ka na n le togs Zusoabã yell wall m gom bãmb yʋʋr” yĩng ye. La rẽ yĩnga a sɩd basame bɩ?

A Zeremi yeelame t’a Zeova koɛɛgã lebga wa bugum yẽ sũurã pʋgẽ, n be a kõabã pʋsẽ. La a paas woto: “Mam maoodame n dat n sĩndi, la m ka tõe ye.” (Zeremi 20:7-9) Dẽnd baa rabeem sẽn da mi n yõk a Zeremi wã, a sẽn da nong a Zeova wã yĩng kɩtame t’a pa tõe n sĩnd ye. D ges a Zeova sẽn kogl a Zeremi to-to, a sẽn pa bas tʋʋmdã yĩnga.

A Zeova ra yeela a Zeremi t’a keoog Zerizalɛm nebã tɩ b sã n pa bas b tʋʋm-wẽnsã, a na n sãama tẽngã. A Zeremi sẽn taas nin-buiidã koe-kãngã wã, b sũy puuga ne-a tɩ b yeel woto: ‘Ra-kãngã toga ne kũum.’ La a Zeremi sagl-b lame tɩ b maan sugr la b “sak Zusoab a Wẽnnaam noorã.” Rẽ poore, a paasa woto: “Yãmb sã n kʋ maam, bʋʋm soab zɩɩm daagr yell na n zĩnda yãmb ne tẽn-kãngã la a nebã fãa zutu. Bala, yaa Zusoabã n tʋm maam tɩ m wa togs yãmb gom-kãensã fãa.” La fo mii bũmb ning sẽn maan dẽ zugẽ bɩ?—

Biiblã yeela woto: “Nanambsã ne nebã fãa yeela bãngdbã ne maan-kʋʋdbã yaa: ‘Ra-kãngã ka tog ne kũum ye. Bala, a goma ne tõnd ne Zusoab a Wẽnnaam yʋʋre.’ ” Dẽnd a Zeremi sẽn pa yɛɛs n bas a Zeova tʋʋmdã, a kogl-a lame. La bɩ d ges a Uri me sẽn yɩ a Zeova no-rɛɛs n yaool n pa maan wa a Zeremi wã baasg sẽn yɩ to-to.

Biiblã yeela woto: ‘A Uri goma Zerizalɛm ne tẽn-kãngã fãa yell wa a Zeremi sẽn gomã.’ La naab a Zehoyakim sũur sẽn puug ne-a wã, fo mii a Uri sẽn maan to-to bɩ?— Rabeem yõk-a lame t’a bas Wẽnnaam daabã maanego, n zoe n kẽng Ezipte. La naabã tʋma neb tɩ b tɩ yõk-a Ezipt n wa. B sẽn wa ne-a wã, fo mii na-wẽngã sẽn maan-a bũmb ning bɩ?— A kɩtame tɩ b kʋ-a ne sʋʋga!—Zeremi 26:8-24.

Fo mii bũmb ning sẽn kɩt t’a Zeova kogl a Zeremi la a yaool n pa kogl a Uri wã bɩ?— Yaa sɩd tɩ rabeem yõka a Zeremi me wa a Uri, la a Zeremi pa bas a Zeova raabã maaneg n zoe ye. A pa bas tʋʋmdã ye. Fo tagsdame t’a Zeremi kibarã kõta tõnd sagl-bʋgo?— Kiba-kãngã wilgdame tɩ sasa ninga, d tõe n wa getame tɩ Wẽnnaam daabã maaneg yaa toogo, la baasgo, d segd n kell n teeg-a lame, la d sak n maan a sẽn datã.

[Tẽngr note]

Sogsgo:

○ Wẽnnaam da bobla a Zeremi tʋʋm bʋgo?

○ Bõe n kɩt t’a Zeremi wa rat n bas a tʋʋmdã?

○ Bõe yĩng t’a Zeova kogl a Zeremi la a pa kogl a Uri?

○ Sagl-bʋg la a Zeremi kibarã kõ foo?