Teeg-y Wẽnnaam, tɩ y kãadmã yɩ sõma

Yaa Wẽnnaam a Zeovaa n lugl kãadem. Biiblã yetame tɩ yaa yẽ n naan d yaab a Hawa n “tall-a n wa raoã nengẽ.” D yaab a Ãdem sũur yɩɩ noog hal t’a yeele: “Ada yaa mam kõabã kõbre, la mam yĩngã nemdo.” (Sɩngre 2:22, 23) A Zeova ket n datame tɩ sẽn kẽ-b kãadmã sũy yɩ noogo.

Tõe tɩ y kãadmã daare, y ra magdame tɩ bũmb fãa na n yɩɩ wa yãmb sẽn datã. La sɩd-sɩdã, baa rao ne a pag sã n nong taab wʋsgo, zu-loees pa tõe n pa zĩnd ye. (1 Korẽnt dãmba 7:28) Seb-kãngã pʋgẽ, y na n paama Biiblã sagls a wãn sẽn tõe n sõng-yã. Y sã n tũ, y kãadmã na n yɩɩ sõma, tɩ y zakã rãmb vɩɩm yɩ noogo.—Yɩɩl Sõamyã 19:9-12.

1 MAAN-Y A ZEOVA SẼN YEEL TƖ Y SEGD N MAANAME WÃ

BIIBLÃ SẼN YETE: Sɩdã n yaa zakã zu-soaba.—Efɛɛz rãmba 5:23.

Y sã n yaa pʋg-sɩda, bɩ y bãng t’a Zeova ratame tɩ y get y pagã yell ne bʋgsem. (1 Pɩɛɛr 3:7) A naana pag t’a yaa rao sõngda, n dat tɩ rao fãa nong a pag la a waoogd-a. (Sɩngre 2:18) Yãmb tog n nonga y pagã, hal n tõe n sak n mong y meng bũmb a yĩnga.—Efɛɛz rãmba 5:25-29.

Y sã n yaa paga, bɩ y bãng t’a Zeova ratame tɩ y waoogd y sɩdã hal sõma, la y sõng-a zakã zãab pʋgẽ. (1 Korẽnt dãmba 11:3; Efɛɛz rãmba 5:33) A sã n yãk yam n na n maan bũmb bɩ y sõng-a, n sak n teel-a ne y sũur fãa. (Kolos rãmba 3:18) Y sã n maand woto, y wilgdame tɩ y yaa pʋg-sõngo. Y sɩdã na n nong-y lame, a Zeova me sũur na n yɩɩ noog ne-yã.—1 Pɩɛɛr 3:1-6.

Y SẼN TÕE N MAANE:

• Sok-y y pagã bɩ y sɩdã n bãng y sẽn tõe n maan n yɩ pʋg-sõng bɩ sɩd-sõngo, la y kelg-a neere, n maan y sẽn tõe fãa n tũ a sẽn yeelã.

• Tall-y sũ-mare. Bala na n kaoosame tɩ y ned kam fãa yaool n bãng a sẽn na n maaneg t’a to wã sũur yɩ noogo.

2 NED FÃA BAO SẼN NOOM A TO WÃ

BIIBLÃ SẼN YETE: Yaa tɩlae tɩ ned fãa bao a to wã neere. (Filip rãmba 2:3, 4) Y tog n nanda y pagã bɩ y sɩdã wʋsgo, n tẽegdẽ t’a Zeova ratame tɩ y yɩ “sũ-bʋgsem soab ne nebã fãa.” (2 Tɩmote 2:24) “Ned sẽn ka gũusd goam zabda wa sʋʋg sẽn wãag neda. La yam soab goam wata ne laafɩ.” Dẽnd y tog n gũusa ne y goamã. (Yelbũna 12:18) A Zeova vʋʋsem sõngã na n sõng-y lame, tɩ y goamã pʋgẽ bɩ y wilgdẽ tɩ y nonga y to wã, n dat n maan-a neere.—Galat dãmba 5:22, 23; Kolos rãmba 4:6.

Y SẼN TÕE N MAANE:

• Pʋʋs-y-yã a Zeova n kos-a t’a sõng-yã, tɩ y sã n wa na n welg yell bɩ y tõog n bʋk y meng n kelg y to wã, la y ra yãg n tags t’a ka bʋʋm ye.

• Reng-y n tags-y y sẽn dat n yeel bũmb ningã zug neere, la y sẽn na n yeel to-to wã.

3 MODG-Y N TALL-Y YAM A YEMBRE

BIIBLÃ SẼN YETE: Yãmb sẽn kẽ kãadmã tɛka, y lebga “yĩng a yembre.” (Matɩe 19:5) La y ket n yaa neb a yiibu, tɩ y tagsa wã mi n yaa toor-toore. Dẽnd y segd n tõogame tɩ y tagsa wã la y yamã lokd taaba. (Filip rãmba 2:2) Y sã n dat n yãk yam n maan bũmbu, yaa tɩlae tɩ y zems taaba. Biiblã yetame tɩ “yẽsg sã n kaẽ, ned ka tõe n maan bũmb ye.” (Yelbũna 15:22) Sã n yaa bũmb sẽn tar yõod wʋsgo, bɩ y bao n bãng Biiblã sẽn yet rẽ zugu.—Yelbũna 8:32, 33.

Y SẼN TÕE N MAANE:

• Y sã n wa yẽsdẽ, bɩ y ra togsd y sẽn mi wall y tagsg bal ye. Modg-y tɩ y to wã bãng sẽn be yãmb sũurẽ wã fãa.

• Nand tɩ y pʋlem tɩ y na n maana bũmbu, bɩ y reng n sok y to wã n bãng a sẽn tagsde.