Ned baa a ye ra zãmb a to ye

A Zeova ratame tɩ d “wilg nonglem daar fãa.” (Miise 6:8) Sẽn yɩɩd fãa, kãadmã pʋgẽ la f tog n nong f to wã wakat fãa. Sã n pa rẽ, y pa tol n tõe n kɩs taab sɩd ye. Y sã n pa kɩs taab sɩd me, y nonglmã ne taabã pa tõe n paasdẽ ye.

Rũndã-rũndã, wʋsg tagsdame tɩ pa tɩlae tɩ y nong y to wã n da tol n zãmb-a ye. La y sã n dat tɩ y kãadmã ra sãame, bũmb a yiib la y segd n maane.

1 MODG-Y TƖ Y KÃADMÃ YƖ NEERE

BIIBLÃ SẼN YETE: Bɩ y bao n “bãng bũmb nins sẽn yaa sõma n yɩɩdã.” (Filip rãmba 1:10) Yãmb kãadmã me yaa bõn-sõng y sẽn paam y vɩɩmã pʋgẽ. Dẽnd y tog n modgame, y kãadmã na yɩ neer yĩnga.

A Zeova ratame tɩ y to wã yell pak yãmb n yɩɩd neb a taabã, tɩ y kãadmã pʋgẽ bɩ y “maan sũ-noog” ne taaba. (Koɛɛg Soaba 9:9) A pa rat tɩ y maan y toog kae ne-a abada. A pʋd n datame tɩ ned fãa bao a to sũ-noogo. (1 Korẽnt dãmba 10:24) Modg-y tɩ y to wã bãng t’a sõngrã tara yõod wʋsgo.

Y SẼN TÕE N MAANE:

• Bao-y weer n sõsd ne taab wakat fãa, tɩ ned fãa kelgd a to wã sõma.

• Y goamã pʋgẽ, bɩ y tẽeg tɩ y pa le yaa y yembr ye. Ra yet-y tɩ “maam” ye. Yet-y tɩ “tõndo.”

2 GŨUS-Y NE Y SŨURÃ TAGSGO

BIIBLÃ SẼN YETE: “Ned ninga fãa sẽn get pag ne datem wẽnga, a maana yoob ne yẽnda a sũur pʋgẽ.” (Matɩe 5:28) Ned sẽn kẽ kãadem sã n nong n tagsd yoob yelle, yaa wa a sẽn zãmb a pagã bɩ a sɩdã.

A Zeova yeelame tɩ yaa tɩlae tɩ d ‘gũus ne d sũurã tagsgo.’ (Yelbũna 4:23; Zeremi 17:9) Dẽnd yaa tɩlae tɩ d gũus ne d sẽn get bũmb ninsã. (Matɩe 5:29, 30) D rɩk a Zoob togs-n-taare. A ra maana kaool ne a ninã, t’a ka na n tol n ges pag a to, n tʋlg-a ye. (Zoob 31:1) Maan-y y sẽn tõe fãa, n da tol n ges sebr bɩ filim wall bũmb a to sẽn wilgd yoob ye. Gũus-y tɩ y yamã ra wa kẽ ned a to sẽn pa yãmb sɩdã bɩ y pagã ye.

Y SẼN TÕE N MAANE:

• Maan-y tɩ neb a taabã bãng vẽeneg tɩ y pa rat n tol n zãmb y pagã bɩ y sɩdã ye.

• Ning-y y meng y to wã zĩigẽ. Sã n mik tɩ y yõga zood sẽn tõe n wa kɩt t’a yam yoaada, bɩ y bas zoodã tao-tao.