Sugr kũun yaa tɩlɛ

A Zeezi sẽn wilg ned sẽn tog n maan bũmb ninga, a sã n wa tar yell ne a tẽed-n-taagã, a Pɩyɛɛr wʋmame. La a baoome n na n bãng naoor a wãn la ned tog n sak n kõ a ba-biig sugri.

A Pɩyɛɛr soka a Zeezi yaa: “Zu-soaba! Naoor a wãn la m ba-biig na n beeg maam tɩ mam kõ-a sugri? Hal tɩ ta naoor a yopoe bɩ?” Bãmb wakatẽ wã, tũudmã taoor dãmb kẽer ra yetame tɩ b segd n kõo sugr naoor a tãab bala. Dẽnd tõeeme t’a Pɩyɛɛr tagsame t’a sã n sak n kõ ned sugr “hal tɩ ta naoor a yopoe,” a maana neer wʋsgo.—Matye 18:21.

La a Zeezi pa rat tɩ ned sã n beeg-d fãa, bɩ d sõt ye. Pa woto la a zãmsd nebã ye. Rẽ n so t’a yeel a Pɩyɛɛr yaa: “Mam ka yet foom tɩ hal tɩ ta naoor a yopoe ye, la yaa hal tɩ ta naoor pis-yopoe naoor a yopoe.” (Matye 18:22) A Zeezi rat n yeelame tɩ d segd n kõta sugr wakat fãa. Dẽnd a Pɩyɛɛr segd n kõta a tẽed-n-taasã sugr n pa sõt ye.

A Zeezi rɩka makr sẽn na yɩl t’a Pɩyɛɛr la neb a taabã bãng tɩ yaa tɩlɛ tɩ b kõt sugri. A goma yamb ne a zu-soab yelle. Zu-soabã yaa nimbãan-zoeta, la yambã yẽ ka rɩk a togs-n-taar ye. Zu-soabã sẽn yaa rĩmã boola a yembsã n na n sok a sama. A ye n da tar denie 60000000 samde, tɩ b tall-a n wa rĩmã taoore. A pa tol n tõe n yao samdã ye. Rĩmã kõo noor tɩ b koos yambã, a pagã la a kambã n yao samdã. La yambã lʋɩɩ rĩmã taoore, n fõgen a neng tẽnga, n bõos-a yaa: “Maan-y sũ-mar ne maam tɩ m na n yaoo y samdã zãnga.”—Matye 18:26.

Yambã nimbãaneg yõka rĩmã, t’a sak n bas samdã taale. Raoã sẽn yi rĩmã nengẽ wã bala, a tɩ yãa a yem-taag sẽn tar yẽ denie 100 samde. A soga a yem-taagã kokoɛy n yeel-a yaa: “Yao maam m samdã.” La a yem-taagã wõgemda a taoor n bõos-a woto: “Maan sũ-mar ne maam tɩ m na n yaoo f samdã zãnga.” (Matye 18:28, 29) La a pa zoe a yem-taagã nimbãaneg wa rĩmã sẽn zoe yẽ nimbãanegã ye. Baa ne samdã sẽn pa waoogã, a kɩtame tɩ b kẽes a yem-taagã roogo, n gũud t’a yao samdã zãnga.

A Zeezi yeelame tɩ yembs a taabã sẽn yã tɩ raoã pa zoe a yem-taagã nimbãanegã, b tɩ togsa rĩmã. La rĩmã sũur puugame, t’a kɩt tɩ b bool-a. A yeel-a lame yaa: “Tʋmtʋmd-wẽnga! Mam da basa fo samdã fãa taale fo sẽn bõos maamã yĩnga. Dẽ, fo ra ka tog n zoe f tʋmd-n-taagã nimbãaneg wa mam sẽn zoe fo nimbãanegã sɩda?” La rĩmã kɩtame tɩ b kẽes-a bãens roogo, hal n tãag a sẽn na n wa yao samdã zãnga. A Zeezi baasa a goamã, n yeel woto: “Mam ba sẽn be arzãnã [“saasẽ,” MN] na n maana yãmb a woto me, yãmb ned kam fãa sã n ka kõ a ba-biig sugr ne a sũur fãa.”—Matye 18:32-35.

Bõe la a Zeezi makrã zãmsda tõnd sugrã wɛɛngẽ? Tõnd yel-wẽnã yaa wʋsgo, la Wẽnnaam kõta tõnd sugri. Tõnd tẽed-n-taasã sẽn beegd tõndã yaool n ka zem baa fʋɩ. Sẽn paase, a Zeova kõta tõnd sugr naoor ka tɛka, pa vugr bal ye. Rẽ wã, d tẽed-n-taag sã n beeg tõnd naoor ka tɛka, baa d tar bʋʋm, tõnd me pa segd n kõ-a sugr sɩda? A Zeezi sẽn zãms nebã tãngã zugã, a yeelame tɩ Wẽnnaam na n kõo tõnd “sugr d beegr yĩnga, a wa tõnd me sẽn kõt d bɛɛgdbã sugrã.”—Matye 6:12.