Kiris-nebã tigingã sẽn sigl to-to, la b sẽn get a yell to-to

A POLL pipi lɛtr ning a sẽn tool Korẽnt kiris-nebã pʋgẽ, a yeela bũmb sẽn yaa sɩd Wẽnnaam zugu. A Poll yeelame: “Wẽnnaam pa zũnd-zãnd Wẽnnaam ye. A yaa laafɩ Wẽnnaam.” Rẽ poore, a goma tigissã sẽn segd n yɩ to-to wã yelle, n yeel yaa: “Bɩ bũmb fãa maan wa sẽn segde, la ra yɩ ne zũnd-zãnd ye.”—1 Kor. 14:33, 40.

² Lɛt-kãng sɩngrẽ, a Poll kõo sagls mo-yõsã sẽn da be Korẽnt tigingã pʋgẽ wã wɛɛngẽ. A sagla saam-biisã tɩ b ‘naag taab noor a yembre,’ la tɩ b ‘zems taab sõma n tall yam a ye la tagsg a ye.’ (1 Kor. 1:10, 11) Rẽ poore, a sagl-b-la yɛl toor-toor sẽn da tõe n sãam tigingã zems-n-taarã wɛɛngẽ. A rɩka makr ne ninsaal yĩngã, n wilg tɩ yaa tɩlɛ tɩ tigingã neb zems taab n tʋme. A yeel-b lame tɩ b ges taab yell ne nonglem, baa b tʋʋmd sẽn yaa a soab tigingã pʋgẽ. (1 Kor. 12:12-26) Sẽn na yɩl tɩ tigingã neb tõog n zems taab n tʋme, rẽndame tɩ b sigl bũmba fãa sõma.

³ La wãn to la b ra segd n sigl kiris-nebã tigingã? Ãnd n da na n sigl-a? B ra na n sigl-a lame t’a yɩ wãn-wãna? Ãnd rãmb n da na n yɩ taoor lʋɩtba? Biiblã sõngd-d lame tɩ d paam sogs-kãensã leoore.—1 Kor. 4:6.

B SIGL-A-LA WA WẼNNAAM SẼN DATÃ

⁴ Yɩɩ yʋʋmd 33 Pãntekotã daar la b lugl kiris-nebã tigingã. Bõe la d tõe n bãng pipi kiris-nebã tigingã sẽn da yaa to-to wã wɛɛngẽ? Yaa Wẽnnaam n lugl-a, t’a bũmba fãa ra sigl sõma. Bũmb ning sẽn zĩnd Zerizalɛm na maan yʋʋm 2 000 woto wã wilgda vẽeneg tɩ yaa Wẽnnaam n da lugl pipi kiris-nebã sẽn da paam vʋʋsem sõng zaeebã tigingã. (Tʋʋ. 2:1-47) Ra yaa a roogo, la a zakã neba. (1 Kor. 3:9; Efɛɛ. 2:19) Rũndã-rũndã, tõnd rɩkda pipi kiris-nebã tigingã sẽn da sigl to-to n tʋmd b tʋʋmã togs-n-taare.

⁵ Pipi kiris-nebã tigingã sɩngrẽ, a nebã sõor da yaa na maan karen-biis 120. Nin-kãens paama vʋʋsem sõngã zaeebo, tɩ pids Zowɛll 2:28, 29 goamã. (Tʋʋ. 2:16-18) La baraare, na maan neb 3 000 n deeg lisgu, n naag tigingã neb sẽn paam vʋʋsem sõng zaeebã. B saka koɛɛgã sẽn gomd Kiristã yellã, “la b ra ket n wɩngda ne tẽn-tʋmdbã zãmsgã kelgre.” Rẽ poore, “a Zeova ra paasd-b-la neb nins sẽn paamd fãagrã daar fãa.”—Tʋʋ. 2:41, 42, 47.

⁶ Tigingã sẽn da be Zerizalɛmmã nebã sõor fɩɩgame hal tɩ maan-kʋʋdbã kãsem zab karen-biisã tɩ b pidsa Zerizalɛm ne b zãmsgã. Zʋɩf-rãmbã maan-kʋʋdb wʋsg wa n lebga Kiristã karen-biisi, n naag Zerizalɛm tigingã nin-paalsã.—Tʋʋ. 5:27, 28; 6:7.

⁷ A Zeezi ra yeelame: “Yãmb na n yɩɩ mam kaset rãmb Zerizalɛm ne Zide soolmã fãa pʋgẽ la Samari, la hal n tãag dũniyã zĩig ning sẽn zãr n yɩɩdã.” (Tʋʋ. 1:8) La sɩd yɩɩ woto: A Etɩɛn kʋʋbã poore, nams-toaag n yik Zerizalɛm hal tɩ karen-biis nins sẽn da be be wã sãeeg n kẽ Zide ne Samari. La b sẽn kẽngẽ fãa, b ra ket n moonda koe-noogã n sõngd nebã tɩ b lebgd Kiristã karen-biisi, hal baa Samari neba. (Tʋʋ. 8:1-13) La kaoosg zugẽ, b wa n moona koe-noogã bu-zẽmsã neb sẽn pa kẽ bãongã sʋka, tɩ b sake. (Tʋʋ. 10:1-48) B sẽn moon koɛɛgã woto fãa wã sõngame tɩ neb wʋsg lebg Kiristã karen-biisi, tɩ b lugl tigims a taab Zerizalɛm kɛɛnga.—Tʋʋ. 11:19-21; 14:21-23.

⁸ Bõe la b maan sẽn na yɩl tɩ tigims nins b sẽn nan luglã sigl sõma, tɩ b sẽn get b yell to-to wã zems wa Wẽnnaam sẽn datã? Ne vʋʋsem sõngã maasem, b ra yãkda rap tɩ b get tigingã neb yelle. A Poll ne a Barnabas sẽn kaag tigims nins b misioneer pipi so-toakã sasa wã pʋsẽ, b yãka rap tɩ b lebg kãsem-dãmba. (Tʋʋ. 14:23) A Luk sẽn yaa Biibl-gʋlsdbã nin-yendã sõnga tõnd tɩ d bãng bũmb ning a Poll sẽn yeele, a sẽn wa n tigim ne Efɛɛz tigingã kãsem-dãmbã. A Poll yeel-b lame yaa: “Gũus-y ne yãmb mense, la ne bãgrã fãa, bala vʋʋsem sõngã yãka yãmb tɩ y yaa bãgrã yel-gɛtba, sẽn na yɩl tɩ y kɩɩm Wẽnnaam tigingã a sẽn da ne a meng Biigã zɩɩmã.” (Tʋʋ. 20:17, 28) B yãk-b lame tɩ b lebg kãsem-dãmba, bala b ra tara zʋg-sõma nins Biiblã sẽn dat tɩ b bɩɩsã. (1 Tɩm. 3:1-7) A Poll ra kõo a tʋmd-n-taag a Tɩt sor t’a yãk kãsem-dãmb Kɛrɛt tigingã pʋgẽ.—Tɩt 1:5.

⁹ Tigim-paalsã sõorã sẽn da tar paasgã, tẽn-tʋmdbã ne kãsem-dãmb sẽn da be Zerizalɛmmã n da ket n get pipi kiris-nebã tigingã neb sẽn fɩɩgdã yelle. Bãmb n da yaa siglgã taoor lʋɩtb sulli.

¹⁰ Tẽn-tʋmd a Poll sẽn gʋls Efɛɛz tigingã nebã, a wilg-b lame tɩ tigingã neb sã n tʋmdẽ tɩ zemsd Wẽnnaam vʋʋsem sõngã sẽn wilgd-b sorã, la b sakd a Zeezi Kirist sẽn yaa b zu-soabã, zems-n-taar na n kell n zĩnda b sʋka. A yeel-b lame tɩ b modg n bɩɩs sik-m-menga, la b modg tɩ zems-n-taar la laafɩ kell n zĩnd tigingã neb fãa sʋka. (Efɛɛ. 4:1-6) Rẽ poore, a togsa goam sẽn wõnd Yɩɩn-sõamyã 68:18 goamã, n yeel t’a Zeova sẽn yãkd rap sẽn tar zʋg-sõma tɩ b get tigingã neb yellã pidsda vɛrse-kãng goamã. A Zeova yãka kẽer tɩ b yaa tẽn-tʋmdba, tɩ sãnda yaa no-rɛɛsdba, koe-moondba, pe-kɩɩmb la karen-saam-dãmba. Nin-kãens sẽn yaa kũun a Zeova sẽn kõ wã segd n gesa tigingã neb yelle, tɩ b tẽebã bɩ sõma n ta Wẽnnaam yam.—Efɛɛ. 4:7-16.

D TIGIMSÃ SIGLA WA PIPI KIRIS-NEBÃ SẼN DA SIGL TO-TO WÃ

¹¹ Rũndã-rũndã, a Zeova Kaset rãmbã tigimsã fãa sẽn sigl to-to wã yaa wa pipi kiris-nebã wakatẽ wã. Tigimsã fãa sẽn be dũniyã gill zugã sẽn naag taab yam a yembrã lebga tigin-yɛnga, tɩ sẽn paam-b vʋʋsem sõng zaeebã be b sʋka. (Zaka. 8:23) Yaa a Zeezi Kirist n kɩt tɩ bõn-kãngã tõoge. Wa a sẽn pĩnd n pʋlmã, a kell n paa ne a karen-biisã sẽn paam vʋʋsem sõng zaeebã “daar fãa, hal tɩ ta dũniyã saabo.” Neb nins sẽn naagd tigingã neb sẽn tar fɩɩgrã saka Wẽnnaam koe-noogã, n dɩk b mens n kõ a Zeova zãng-zãnga, la b reeg lisg n lebg a Zeezi karen-biisi. (Mat. 28:19, 20; Mark 1:14; Tʋʋ. 2:41) B sak n deegame t’a Zeezi Kirist sẽn yaa “pe-kɩɩm-sõngã” n yaa bãgrã fãa Zu-soaba, rat n yeel tɩ sẽn paam-b vʋʋsem sõng zaeebã ne “piis a taabã.” (Zã 10:14, 16; Efɛɛ. 1:22, 23) ‘Yãgr a yembrã’ nebã ket n zemsda taaba, bala b sakda Kiristã zu-sobendã ne b sũur fãa la b sulgd b mens n sakd “tʋm-tʋmd sẽn tũud sɩd la sẽn tar yamã” sẽn yaa tʋʋm-teoog Kiristã sẽn tũnugd n get a nin-buiidã yellã. Bɩ d kell n teeg tʋm-tʋmdã ne d sũur fãa la d basd d yam ne-a.—Mat. 24:45.

D ASOSIASIÕ-RÃMBÃ YÕODO

¹² Sẽn na yɩl tɩ d paam bũmb nins sẽn yaa tɩlɛ d tẽebã kengr yĩngã wakat sẽn zemse, la d moon Rĩungã koe-noogã nand tɩ saabã ta, b lugla asosiasiõ-rãmba. Tẽns wʋsg pʋgẽ, b sak n deegame tɩ asosiasiõ-kãensã zemsa ne laloa wã. B teenda taab b tʋʋmdã pʋgẽ. B sõngdame me tɩ d tõogd n moond koe-noogã dũniyã gill zugu.

FILIYALL-DÃMBÃ SẼN SIGL TO-TO

¹³ Filiyall sẽn be zĩig ning fãa, b yãkda kãsem-dãmb a tãab bɩ sẽn yɩɩd rẽ tɩ b yaa filiyallã taoor lʋɩtb sulli, n get koe-moonegã yell tẽns nins fãa filiyallã sẽn so wã pʋgẽ. B yãkda b nin-yend t’a yaa filiyallã taoor lʋɩtb sull yel-gɛta.

¹⁴ Filiyall fãa pʋgẽ, b sigla tigimsã sul-sula. Tigims sull fãa bedrem bee ne a sẽn be zĩig ningã, a buud-gomdã, n paas filiyallã tigimsã fãa sõor sẽn yaa to-to. B yãkda tigims sull yel-gɛt t’a gilgd n kaagd sullã tigims fãa. Wakat fãa, filiyallã kõta tigims sull yel-gɛtã sagls sẽn sõngd-a a tʋʋmdã pʋgẽ.

¹⁵ Tigimsã tũuda siglgã sẽn sigl yɛlã to-to wã, tɩ nafd nebã fãa. B sakda kãsem-dãmbã b sẽn yãk tɩ b get filiyall-dãmbã, tigims sulã la tigimsã yellã. B teega tʋm-tʋmd sẽn tũud sɩd la sẽn tar yamã, n paamd bũmb nins sẽn yaa tɩlɛ b tẽebã kengr yĩngã wakat sẽn zemse. Tʋm-tʋmd sẽn tũud sɩdã me sakda Kiristã zu-sobendã ne a sũur fãa, a tũuda Biiblã noyã, la a basdẽ tɩ vʋʋsem sõngã wilgd-a sore. D fãa sẽn naagd taab n tʋmdẽ wã, d tʋʋmdã womda biis wa pipi kiris-nebã wakatẽ wã. Sɩd me, “tigimsã neb tẽeb pãng ra paasdame, tɩ b sõorã me ra fɩɩgd wʋsg daar fãa.”—Tʋʋ. 16:5.