Y sẽn tõe n maan to-to n moon koɛɛgã wʋsgo

A ZEEZI sẽn wa n na n tʋm a karen-biisã tɩ b tɩ moon Rĩungã koɛɛgã, a yeel-b lame: “Tigsgã yaa wʋsgo, la tʋm-tʋmdbã sõor paoodame.” Tʋʋmdã sẽn da yaa wʋsgã yĩnga, a paasame: “Bɩ y kos tigsgã Soab t’a tʋm tʋm-tʋmdb tɩ b wa a tigsgẽ wã.” (Mat. 9:37, 38) A Zeezi wilga karen-biisã b sẽn segd n moon to-to. A yeela bũmb sẽn wilgd tɩ yaa tʋʋm-yãgdem. Ad a sẽn yeelã: “Yãmb pa na n gilg Israyɛll tẽnsã n sa la ninsaal Biigã wa ye.”—Mat. 10:23.

² Rũndã-rũndã me, d tõe n yeelame tɩ koɛɛgã mooneg wɛɛngẽ, tʋʋmdã yaa wʋsgo. B segd n deng n moona koe-no-kãngã nand tɩ saabã ta, tɩ wakatã yaool n zoetẽ. (Mark 13:10) Sẽn mik tɩ pʋʋgã yaa dũniyã, d tõe n yeelame tɩ tʋʋmd ning tõnd sẽn segd n tʋmã wõnda a Zeezi ne a karen-biisã sẽn da segd n tʋmã, pa rẽ bɩ yɩɩda rẽ menga. D sã n mak tõnd sõorã ne ninsaalbã sẽn yaa milyaar-dãmbã, d sõorã paoodame, la d tõe n kɩsa sɩd t’a Zeova na n sõnga tõndo. Rĩungã koe-noogã na n moona dũniyã gill fãa. La wakat ning a Zeova sẽn yãkã sã n ta, saabã na n taame. Rẽ yĩnga d na n dengd n baooda Wẽnnaam Rĩungã, sẽn na yɩl n tõog n moon koɛɛgã sõma bɩ? Rẽ wɛɛngẽ, bõe la d tõe n yãk n modg n maane?

³ A Zeezi wilga a Zeova sẽn dat tɩ neb nins sẽn dɩk b mens n kõ-a wã ned kam fãa maane, n yeele: “Fo tog n nonga a Zeova sẽn yaa fo Wẽnnaamã ne f sũurã fãa, ne f sɩɩgã fãa, ne f yamã fãa, la ne f pãngã fãa.” (Mark 12:30) Wẽnnaam datame tɩ d tʋmd a tʋʋmdã ne d sũur fãa. Woto rat n yeelame tɩ d segd n maanda d sẽn tõe fãa a Zeova tʋʋmdã pʋgẽ, n wilgdẽ tɩ d sɩd sakd-a lame, la tɩ d sɩd rɩka d mens n kõ-a. (2 Tɩm. 2:15) Bũmb toor-toor la tõnd ned kam fãa tõe n maan wa sẽn zems a yɛlã sẽn yaa to-to, la a sẽn tõe n maane. Ges-y bõn-kãens kẽere, n yãk y sẽn na n wa maan a soab koɛɛgã mooneg wɛɛngẽ.

Y TÕE N YƖƖ KOE-MOONDA

⁴ Neb nins fãa sẽn sak sɩdã tõe n paam n moonda koe-noogã. Rẽ n yaa tʋʋmd ning a Zeezi sẽn kõ a karen-biisã. (Mat. 24:14; 28:19, 20) Naoor wʋsgo, a Zeezi Kirist karen-biig sɩngda koe-noogã yell goama, a sẽn wʋm-a wã poor bala. Yɩɩ woto la a Ãndere, a Filip, a Korney la neb a taab maan-yã. (Zã 1:40, 41, 43-45; Tʋʋ. 10:1, 2, 24; 16:14, 15, 25-34) Woto rat n yeelame tɩ ned tõe n sɩnga koɛɛgã mooneg t’a nan pa reeg lisg bɩ? N-ye! B sã n sak tɩ ned lebg koe-moond sẽn nan pa reeg lisgu, a tõe n naagda tigingã neb n moond zak-zaka. Sẽn paase, a tõe n moona koɛɛgã ne manesem a taaba, wa sẽn zems a sẽn tõe, la a yɛlã sẽn yaa to-to wã.

⁵ Koe-moond sã n deeg lisgu, yaa vẽeneg t’a na n data ne a sũur fãa n sõng neb a taabã tɩ b bãng koe-noogã. Rapã ne pagbã fãa tõe n moona koɛɛgã. D sẽn paam n tõe n maan baa yaa bũmb bilf n teel Wẽnnaam Rĩungã yaa barka. Sɩd me, ned ning fãa sẽn na n tõog n tũnug ne manesem a taab n moon koɛɛgã wʋsg na n paama sũ-noogo.

Y TÕE N TƖ MOONA ZĨIG KOE-MOONDB SẼN PA WAOOGẼ

⁶ Tõe tɩ b moona yãmb tigingã koe-moonegã zĩigẽ n yɩlme, hal tɩ neb wʋsg wʋme. Sã n yaa woto, tõe tɩ y na n dat n kẽnga zĩig koe-moondb sẽn pa waoogẽ, n paam n moon koɛɛgã wʋsgo. (Tʋʋ. 16:9) Yãmb sã n yaa kãsem-soab wall kãsem-sõngda, y tõe n tɩ sõnga tiging a to neb tɩ b sũy yɩ noog wʋsgo. Yãmb tigims sull yel-gɛtã tõe n wilg-y-la bũmb toor-toor y sẽn tõe n maan n sõng tigims sullã tiging a to. Sã n yaa yãmb tẽngã zĩig a to la y rat n tɩ sõng n moone, filiyallã tõe n kõ-y-la sagls sẽn na n naf-yã.

⁷ Yãmb dat n tɩ sõng n moona tẽn-zẽng bɩ? Sã n yaa woto, y segd n deng n tagsa neere. Y tõe n sõsa ne y tigingã kãsem-dãmb rẽ wɛɛngẽ. Y sẽn na n yik n kẽng tẽn-zẽngã tõe n toeema bũmb wʋsg yãmb vɩɩmã pʋgẽ, wall ned ning fãa sẽn na n yãag yãmb vɩɩm pʋgẽ. (Luk 14:28) La y sã n pa magd n na n tɩ kaoose, yɩta sõma tɩ y ges y sã n pa tõe n tɩ moon yãmb tẽngã babg a ye pʋgẽ.

⁸ Zĩis kẽere, kãsem-dãmb nins sẽn wa n na n sõngã kaoosa sɩdã pʋgẽ n yɩɩd kãsem-dãmb nins sẽn sɩng n be be wã. Zĩ-kãens kãsem-dãmbã sẽn yaa sik-m-mens rãmbã basdame tɩ kãsem-dãmb nins sẽn yi zĩig a to n wa, n tar minim n yɩɩdã lʋɩt taoor tigingã pʋgẽ. Yãmb sã n yaa kãsem-soab n magd n na n yik n kẽng tẽn-zẽnga, ning-y y yamẽ tɩ pa sẽn na n tɩ reeg saam-biis nins sẽn be be wã zĩig ye. Yaa sẽn na n tɩ naag-b n tʋme. Sõng-y-b tɩ b bao tʋʋm tigingã pʋgẽ, la b sak tɩ b kõ-b tʋʋma. (1 Tɩm. 3:1) Yãmb sã n mik tɩ b sẽn maand yɛl kẽer to-to wã pa wa yãmb tẽngẽ wã bɩ y tall sũ-mare. Sõng-y saam-biisã, tɩ y minimã sɩd naf-ba. Woto, yãmb sã n wa na n leb y ba-yirã, zĩ-kãng kãsem-dãmbã na n tõog n yõdg n gesa tigingã yell sõma.

⁹ Nand tɩ filiyallã wilg yãmb tigims y sẽn tõe n tɩ sõng tɩ naf-b wʋsgo, yãmb tigingã kãsem-dãmbã sull ning sẽn get koe-moonegã yellã segd n gʋlsa filiyallã lɛtr n wilg tɩ b sakame tɩ y na n tɩ sõnge. B segd n gʋlsa lɛtrã, baa y sã n yaa kãsem-soaba, kãsem-sõngda, so-pakd wall koe-moonda. Sull ning sẽn get koe-moonegã yellã segd n toola lɛtrã ne yãmb demandã tẽng ning pʋgẽ y sẽn dat n tɩ sõngã filiyalle.

Y TÕE N SÕNG N MOONA BUUD-GOM-ZẼNG PƲGẼ

¹⁰ Sẽn na yɩl n moon koɛɛgã wʋsgo, tõe tɩ y na n dat n zãmsa buud-gom-zẽnga, wala makre, mugsã goama. Y sã n dat n zãms buud-gomd a to sẽn na yɩl n moon koɛɛgã, y tõe n goma ne kãsem-dãmbã, la tigims sull yel-gɛtã. B tõe n kõ-y-la saglse, la b keng y raoodo. Filiyallã kõo tigims sul kẽer saglse, tɩ b lugl buud-goam a taab zãmsg na-kẽndre, sẽn na yɩl n sõng koe-moondb la so-pakdb sẽn tar minim tɩ b moond buud-gom-kãens pʋsẽ.

Y TÕE N YƖƖ SO-PAKDA

¹¹ Koe-moondbã fãa segd n mii b sẽn baood tɩ ned maane, tɩ b yaool n sak t’a yɩ sõngr so-pakda, wakat fãa so-pakda, zall so-pakda, wall ned sẽn kẽes a meng zãng Wẽnnaam tʋʋmdã pʋgẽ n tʋmd tʋʋm a taaba. So-pakd segd n yɩɩ ned sẽn deeg lisg n kõt mak-sõngo, la sẽn tõe n sigl a sẽkã n tõog n moond koɛɛgã lɛɛr sõor takɩ b sẽn yãk n kõ-a. Yaa tigingã kãsem-dãmbã sull ning sẽn get koe-moonegã yellã n wilgd tɩ b sakame tɩ ned na n yɩ sõngr so-pakd wall wakat fãa so-pakda. La yaa filiyallã n yãkd zall so-pakdbã.

¹² Ned tõe n yɩɩ sõngr so-pakd kiuug a ye, kiis a wãn sẽn pʋg taaba, wall a yeel t’a rat n yɩɩ sõngr so-pakda, n pa yãk wakat a sẽn na n bas ye. Bee ne ned kam fãa yɛl sẽn yaa to-to wã. Rĩungã koe-moondb wʋsg nong n yaa sõngr so-pakdb wakat sãnda, wala makre, a Zeezi kũumã tẽegr wakate, wall kiuug ning yel-gɛtã sẽn kaagd b tigingã. Neb kẽer yaa kõnze-rãmbã sasa. Koe-moondb nins sẽn deeg lisg n ket n karemdẽ wã mi n yɩɩ sõngr so-pakdb vakãas-rãmbã sasa. Tʋʋlg kiuugã, tʋʋl-nif kiuugã la tigims sull yel-gɛtã kaagr kiuugã, b booga lɛɛr-dãmb nins sõngr so-pakdbã sẽn segd n moonã, tɩ koe-moondbã tõe n yɩ sõngr so-pakdb ki-kãense. Baa yãmb yɛlã sẽn yaa a soaba, yãmb sã n kõt mak-sõngo, n tõe n sigl y sẽkã n moon lɛɛr sõor ning b sẽn yãkã, la y tagsdẽ tɩ y tõe n yɩɩ sõngr so-pakd kiuug a ye wall sẽn yɩɩd rẽ, y tõe n gʋlsa demand n kõ kãsem-dãmbã. B na n deeg-a ne sũ-noogo.

¹³ Sẽn na yɩl tɩ b sak tɩ y yɩ wakat fãa so-pakda, yãmb segd n tõe n moona lɛɛr sõor ning b sẽn yãk rẽ yĩngã. Y sã n lebg wakat fãa so-pakda, y na n moonda ne y tigingã neb n yɩɩda. So-pakdb sẽn tar yẽesem sã n be tiging pʋgẽ, nafda tigingã wʋsgo. Kɩtdame tɩ koe-moondbã tar yẽesem koɛɛgã mooneg pʋgẽ, la kɩtdẽ me tɩ neb a taabã rat n lebg so-pakdba. La nand tɩ y kos n na n lebg wakat fãa so-pakda, y segd n yɩɩ koe-moond sẽn kõt mak-sõngo, la sẽn deeg lisg tɩ ta kiis a yoobe.

¹⁴ Naoor wʋsgo, b yãkda zall so-pakdbã wakat fãa so-pakdb nins sẽn tʋmd sõma wã sʋka. B segd n yɩɩ neb sẽn na n sak n tɩ moon zĩig ning fãa filiyallã sẽn na n tʋm-ba. B mi n tʋmd-b-la zĩis koe-moondb sẽn kaẽ, sẽn na yɩl tɩ b bao neb sẽn dat n bãng sɩdã, la b lugl tigimsi. Wakat ninga, b tʋmd-b-la tigims kẽer mooneg zĩis sẽn yalem wʋsg pʋsẽ tɩ b tɩ sõng n moone. Zall so-pakdb sẽn yaa kãsem-dãmb me la b mi n tʋm tigims neb sẽn pa waoog pʋgẽ, baa b sã n pa baood sõngr koɛɛgã mooneg wɛɛngẽ. B kõta zall so-pakdbã ligd bilf sẽn na yɩl tɩ b ges b meng yelle. B mi n yãka neb tɩ b yɩ zall so-pakdb wakat a wãn bala.

Y TÕE N LEBGA MISIONEERE

¹⁵ Yaa Siglgã taoor lʋɩtbã sull ning sẽn get koe-moonegã yellã n yãkd ned t’a lebg misioneere. Rẽ poore, tẽng ning pʋgẽ b sẽn tʋm-a wã filiyallã kɩtdame t’a tɩ moond zĩig nebã sẽn waoogẽ. B sõngda sẽn na yɩl tɩ tigimsã sigl sõma. B kengda neb a taabã raood koɛɛgã mooneg wɛɛngẽ, la tigingã tʋʋm a taabã wɛɛngẽ. Naoor wʋsgo, misioneer-dãmbã yaa neb sẽn kẽng Rĩungã koe-moondb lekolle. B kõt-b-la ro-gãase, la ligd bilf sẽn na yɩl tɩ b ges b meng yelle.

Y TÕE N LEBGA TIGIMS SULL YEL-GƐTA

¹⁶ Neb nins Siglgã taoor lʋɩtb sull sẽn yãkd tɩ b lebgd tigims sull yel-gɛtbã paamda zãmsgo. B rengd n kɩtame tɩ b lebg tigims sull yel-gɛtbã lɛdgdba. Yaa rap sẽn nong koɛɛgã moonego, la b nong b tẽed-n-taasã. B yaa so-pakdb sẽn tar yẽesem, neb sẽn zãmsd Biiblã sõma, la sẽn tõe sõsg la nebã zãmsgo. B wilgdame tɩ b bɩɩsda vʋʋsem sõngã biisã sõma. B sẽn vɩ to-to wã wilgdame tɩ b yaa neb sẽn yaa wʋmdba, la sẽn tar yam-vẽenem. Sã n yaa saam-biig sẽn kẽ kãadem, a pagã segd n yɩɩ so-pakd sẽn kõt mak-sõngo, tɩ yẽ ne neb a taabã me moor noome. A segd n moonda koɛɛgã sõma. A segd n sulgda a meng n sakd a sɩdã a sẽn yaa pagã yĩnga. A pa segd n deegd a sɩdã zĩig n gomda, wall a gomd wʋsg ye. Tigims sull yel-gɛtbã ne b pagbã tʋʋm yaa wʋsgo. Rẽ n so tɩ neb nins sẽn baood tʋʋm-kãngã segd n yɩ neb sẽn tar keelem. So-pakdbã pa gʋlsd n kos n na n lebg tigims sull yel-gɛtb ye. La b sã n data, b togsda tigims sull yel-gɛtã, t’a kõ-b saglse.

Y TÕE N KẼNGA SIGLGÃ LEKOLL-DÃMBA

¹⁷ Rĩungã koe-moondb lekolle: B rata koe-moondb wʋsg sẽn na n tɩ moon koɛɛgã zĩis nins b sẽn pa wae n moondẽ wã, la b sõng tigingã neb tɩ b tẽebã tall pãnga. Rẽ n so tɩ pagb la rap nins sẽn pa kẽ kãadmã ne sẽn kẽ-b kãadmã tõe n gʋls n kẽng Rĩungã koe-moondb lekolle, n tɩ paam zãmsg sõma. Lekollã poore, b kɩtdame tɩ karen-biisã tɩ zĩnd b tẽngã zĩis nins koe-moondb sẽn pa waoogẽ, n yɩ wakat fãa so-pakdba. La b kõta karen-biis nins sẽn tõe wã tʋʋm a taab b tẽngã pʋgẽ, wall tẽn-zẽnga. B tõe n yãka bãmb bilf tɩ b lebg zall so-pakdb n kaoos kiis a wãna, wall wakat fãa yĩnga. So-pakdb nins sẽn dat n kẽng lekoll-kãngã tõe n kẽnga tigsg ning b sẽn maand rẽ wɛɛngẽ rasem a tãab tigs-kãsengã sasa wã, n tɩ bãng bũmb nins b sẽn segd n maan n paam tɩ b bool-bã.

¹⁸ Gileyaad lekollã: Pagb la rap nins sẽn pa kẽ kãadmã ne sẽn kẽ-b kãadmã b sẽn yãkd tɩ b kẽnd lekoll-kãngã wã wʋmda ãngilindi, la b kẽes b meng zãng Wẽnnaam tʋʋmdã pʋgẽ. B tõe n tɩ sõng n tʋma koɛɛgã mooneg yĩng filiyallẽ wã, la b sõng tɩ yɛlã sigl sõma. B zoe n wilgame tɩ b nonga b tẽed-n-taasã sõngre, la tɩ b tõe n sõnga neb a taabã sõma tɩ b tũ Biiblã noyã la siglgã saglse. Yaa filiyallã n kot neb nins sẽn tõe n kẽngã tɩ b gʋls demande. B tʋmda sẽn kẽng-b Gileyaad lekollã koɛɛgã mooneg zĩisẽ, tẽng a to filiyallẽ, wall bãmb mengã tẽngã filiyallẽ.

Y TÕE N TƖ TƲMA BETƐLLẼ

¹⁹ Paam n tɩ tʋmd Betɛllẽ wã yaa zu-zẽkr tɛkẽ! Betɛll rat n yeelame tɩ “Wẽnnaam doogo.” Sẽn yaa Wẽnnaam tʋʋm la b tʋmd be wã yĩnga, yʋʋrã sɩd zemsame. Tʋʋm nins saam-biis la saam-bi-pogs nins sẽn be be wã sẽn tʋmdã tara yõod wʋsgo, bala sõngdame tɩ b yiisd sɛb sẽn tik Biiblã zugu, n lebgd seb-kãense, la b toond-b tigimsã pʋsẽ. B tʋʋmã nafda Siglgã taoor lʋɩtb sullã wʋsgo. Yaa Siglgã taoor lʋɩtb sullã n get tigimsã yell dũniyã gill zugu, la b wilgd-b sore. Betɛllẽ tʋm-tʋmdb nins sẽn lebgd sɛbã wʋsg bee zĩis nins nebã sẽn gomd buud-gomd ning pʋgẽ b sẽn lebgd sɛbã. Rẽ kɩtdame tɩ b tõe n wʋm nebã sẽn gomd buud-gomdã to-to daar fãa. B leb n tõe n bãnga nebã sã n wʋmda b sẽn wʋgd goamã to-to sɛbã pʋsẽ wã võore.

²⁰ Tʋʋm nins b sẽn tʋmd Betɛllẽ wã wʋsg baooda pãnga. Rẽ n so tɩ wae n yaa kom-bɩɩs sẽn dɩk b mens n kõ Wẽnnaam n deeg lisgu, n tar laafɩ la pãng la b boond Betɛllẽ wã. Filiyall ning sẽn get koɛɛgã mooneg yell yãmb tẽngẽ wã sã n dat neb sẽn na n wa sõng n tʋm Betɛllẽ wã tɩ y rat n tɩ sõnge, yãmb tigingã kãsem-dãmb tõe n sõng-y lame tɩ y bãng bũmb ning b sẽn baood tɩ y maanã.

Y TÕE N TƖ SÕNGD N META SIGLGÃ ROTO

²¹ Siglgã rot meeb me yaa Wẽnnaam tʋʋmde, wa wẽnd-doog ning a Salomo sẽn me wã. (1 Rĩm. 8:13-18) Saam-biis la saam-bi-pogs wʋsg kẽesda b sẽkã la b tarmã tʋʋm-kãng pʋgẽ ne b sũy fãa.

²² Yãmb tõe n tɩ sõngame bɩ? Yãmb sã n deega lisgu, la y rat n tɩ sõng n tʋme, saam-biis nins sẽn get meebã yell yãmb babgẽ wã sũur na n yɩɩ noog y sẽn dat n wa sõng-bã. B na n zãms-y-la tʋʋmdã ne yamleoogo, baa y sã n pa tar minim wʋsgo. Y tõe n togsa y tigingã kãsem-dãmb tɩ y rat n tɩ sõngame. Koe-moondb kẽer sẽn deeg lisg la sẽn tar minim paamame tɩ b sake, tɩ b tɩ sõngd n met siglgã rot tẽns a taab pʋsẽ.

²³ Meebã wɛɛngẽ, tʋʋm toor-toor la y tõe n paam n tʋme. Koe-moondb nins sẽn deeg lisg n kõt mak-sõng la sẽn tar minim bilfu, n tõe n sõng ne meebã tʋʋm bãmb babgẽ wã tõe n paamame tɩ b yãk-b tɩ b lebg Ɛldese (LDC) wã tʋm-tʋmdba. Sãnda tõe n kẽnga zĩig sẽn zãr ne b zakã n tɩ sõng wakat bilf pʋgẽ. Filiyallã yãkda neb a woto tɩ b lebg sẽn wat n sõngd-b wakat bilf ne siglgã rot meebã, n tʋm semen a yiib bɩ sẽn yɩɩd rẽ. La pa yɩɩgd kiuug a tãab ye. B boonda neb nins b sẽn yãk tɩ b na n tʋm n woglã tɩ sẽn sõngd-b n met siglgã rotã. B sã n kos ned sẽn sõngd n met siglgã rot t’a kẽng tẽn-zẽng n tɩ sõng n tʋme, a lebgda ned sẽn tɩ be tẽn-zẽng n sõngd n met siglgã roto. Yaa sẽn sõngd-b n met siglgã rotã, ne sẽn wat n sõngd-b wakat bilf ne siglgã rot meebã sẽn naag taab la b boond tɩ Sull sẽn gilgd n met siglgã roto. B sã n na n me roog zĩig ninga, yaa bãmb n lʋɩt taoore, tɩ Ɛldese (LDC) wã tʋm-tʋmdbã ne zĩ-kãng tigimsã neb sõngd-ba. Sull sẽn gilgd n met siglgã rot neb tʋmda tẽns nins pʋsẽ b filiyallã sẽn get koɛɛgã mooneg yellã.

BÕE LA Y YÃK N NA N WA MAANE?

²⁴ Yãmb sã n dɩka y meng n kõ a Zeova, y sẽn dat yaa y tũ-a wakat sẽn kõn sa yĩnga. La bõe la y yãk n na n wa maan a Zeova tʋʋmdã pʋgẽ? Y sã n tar bũmb y sẽn dat n wa maane, na n sõng-y lame tɩ y bãng y sẽn tõe n tʋm ne y pãngã la y tarmã ne yam to-to. (1 Kor. 9:26) Y sã n yãk y sẽn na n wa maane, na n sõng-y lame tɩ y tẽebã bɩ, la kɩt tɩ y tagsd bũmb nins sẽn tar yõod n yɩɩdã yelle, n modgd n baood tʋʋm tigingã pʋgẽ n paasdẽ.—Fili. 1:10; 1 Tɩm. 4:15, 16.

²⁵ Tẽn-tʋmd a Poll kõo tõnd mak-sõng Wẽnnaam tʋʋmdã wɛɛngẽ. (1 Kor. 11:1) A Poll tʋma a Zeova tʋʋmdã ne a pãng fãa. A bãngame t’a Zeova ra paka sor t’a tõe n maan bũmb wʋsgo. A yeela Korẽnt kiris-nebã yaa: “Kʋɩleng sẽn yaa yaleng la b pak mam yĩnga.” Pa woto ne yãmb me sɩda? N-ye. Bũmb wʋsg la d tõe n naag tigingã neb n maan a Zeova yĩnga, sẽn yɩɩd fãa Rĩungã koɛɛgã mooneg wɛɛngẽ. La tõnd me nengẽ wã yaa wa a Poll nengẽ wã. D sã n dat n tũ “kʋɩleng sẽn yaa yalengã” n kẽ, d segd n maoo ne “bɛɛb wʋsgo.” (1 Kor. 16:9) A Poll sak n wõra a menga. Ad a sẽn yeele: “Mam pãbda m yĩngã, la m kɩtdẽ t’a lebgd mam yamba.” (1 Kor. 9:24-27) Tõnd me maanda woto bɩ?

²⁶ B sagenda tõnd ned kam fãa t’a modg n yãk bũmb a sẽn na n maan Wẽnnaam tʋʋmdã pʋgẽ, wa sẽn zems a yɛlã sẽn yaa to-to wã. Neb wʋsg kẽesa b meng zãng Wẽnnaam tʋʋmdã pʋgẽ rũndã-rũndã, b sẽn pa bas tɩ kaoos tɩ b yaool n yãk bũmb ning b sẽn na n maanã yĩnga. B roagdbã ne neb a taab sagl-b lame tɩ b maan woto, baa b sẽn wa n ket n yaa bõonesã. Rẽ kɩtame tɩ b tõog n tʋm a Zeova tʋʋmã yʋʋm wʋsgo, n pa maand b bãngẽ ye. (Yel. 10:22) Bũmb a taab d sẽn tõe n yãk n maan tɩ naf-d yaa moond koɛɛgã semen fãa, sɩng Biibl zãmsg ne neda, wall bao sẽk sõma n segend tigissã. Sẽn tar yõod n yɩɩd yaa d sẽn na n modg tɩ d tẽebã kell n tall pãnga, la d tʋmd Wẽnnaam tʋʋmdã sõma. D sã n maand woto, d na n waooga a Zeova, la d wa tõog n maan bũmb ning d sẽn dat n yɩɩdã, rat n yeel tɩ n tũ-a wakat sẽn kõn sa yĩnga.—Luk 13:24; 1 Tɩm. 4:7b, 8.