Saam-biis sẽn zemsd taaba

SẼN na maan yʋʋm 1 500, Wẽnnaam a Zeova gesa Israyɛll nebã sẽn da yaa nin-buiid a sẽn yãk a yʋʋrã yĩngã yelle. Rẽ zugẽ, a Zeova wa n ‘gesa bu-zẽmsã yelle, sẽn na yɩl n yãk neb bãmb sʋk tɩ b yɩ buud a yʋʋrã yĩnga.’ (Tʋʋ. 15:14) Nin-buiid a Zeova sẽn yãk a yʋʋrã yĩng segd n yɩɩ a kaset rãmba, n tar tagsg a yembre, n naagd taab yam a yembr n tʋmdẽ la b zemsd taaba, baa b sẽn yit dũniyã zĩig ninga. Yaa tʋʋmd ning a Zeezi sẽn kõ a karen-biisã n da na n yɩ sabab tɩ b tigim nin-buiid Wẽnnaam yʋʋrã yĩnga. A yeel-b lame yaa: “Bɩ y kẽng n tɩ sõng buud fãa neb tɩ b lebg mam karen-biisi, n lis bãmb ne Ba wã la Biigã la vʋʋsem sõngã yʋʋre, la y zãms bãmb tɩ b sak bũmb nins fãa mam sẽn yeel yãmbã. La tẽeg-y tɩ mam bee ne yãmb daar fãa, hal tɩ ta dũniyã saabo.”—Mat. 28:19, 20.

² Fo sẽn dɩk f meng n kõ a Zeova n deeg lisgã, fo lebga a Zeezi karen-biiga. Fo naaga kiris-nebã sẽn yaa wa zag-yɛng neb n be dũniyã gill zug n zemsd taaba, n pa basdẽ tɩ b tẽnga, b buud wall b tarem welg-bã. (Yɩɩn. 133:1) Woto kɩtame tɩ f nong f tẽed-n-taasã sẽn be tigingã pʋgã, la f waoogd-ba. B kẽer tõe n yaa bu-zẽmse, tẽng a to neb wall neb sẽn karem kareng sẽn yaa toor ne foo, tɩ tõe tɩ pĩndã, f ra pa na n sak n naag neb a woto ye. Y nonga taab wa saam-biisi, tɩ nonglem-kãng pãngã yɩɩd nonglem ning sẽn be zo-rãmba, tũudum a ye neb wall zak a ye neb sʋkã.—Mark 10:29, 30; Kolo. 3:14; 1 Pɩy. 1:22.

D TOEEMA D SẼN TAGSD TO-TO WÃ

³ Sã n yaa toog ne neb kẽer tɩ b tõog n bas tags-kɛg b sẽn tar b taabã wɛɛngẽ, b buudã, politikã, tarem wall bũmb a taab yĩnga, yɩta sõma tɩ b tags pĩnd wẽndẽ zʋɩf-rãmb nins sẽn lebg kiris-nebã yelle. Bala b maoome n bas tags-kɛg nins zʋɩf-rãmbã tũudmã sẽn da kɩt tɩ b tar buud a taabã neb zugã. A Zeova sẽn wa n tʋm a Pɩyɛɛr Rom soda-naab a Korney zakẽ wã, a maaga a yĩng n sõng a Pɩyɛɛr sẽn na yɩl t’a tall tagsg sẽn zemse.—Tʋʋma, sak 10.

⁴ Wẽnnaam vẽnega a Pɩyɛɛr t’a yã rũms toor-toor sẽn da yaa rẽgd zʋɩf-rãmbã nifẽ, n yeel-a t’a kʋ n dɩ. A Pɩyɛɛr sẽn zãgsã, a wʋma koɛɛg sẽn yi saasẽ n yeel-a yaa: “Da le bool bũmb nins Wẽnnaam sẽn yɩlgã tɩ rẽgd ye.” (Tʋʋ. 10:15) Yɩɩ tɩlɛ tɩ Wẽnnaam maan bõn-kãngã n segl a Pɩyɛɛr yamã tʋʋmd ning a sẽn da na n kõ-a yĩnga, sẽn yaa kẽng bu-zẽng ned zakẽ wã. A Pɩyɛɛr sẽn sak a Zeova noor n kẽngã, a yeela neb nins sẽn da tigim be wã yaa: “Yãmb mii vẽeneg tɩ pa zems ne tõogã tɩ Zʋɩf naag bu-zẽng ned bɩ n kolg-a ye. La baasgo, Wẽnnaam wilga maam tɩ m pa segd n bool ned tɩ rẽgd ye. Rẽ n so tɩ fo sẽn tʋm tɩ b bool maamã, m sɩd waame n pa zãgs ye.” (Tʋʋ. 10:28, 29) Bilf poore, a Pɩyɛɛr yãa a Zeova sẽn maan bũmb n wilg t’a Korney ne a zakã rãmb taa a yam.

⁵ Yɩɩ tɩlɛ ne Tars rao a Soll sẽn da yaa Fariziẽ sẽn karem n zãagã, t’a sik a meng n sak n naag neb a sẽn da get t’a pa tog n naag ye. A pʋd n sakame tɩ b wilg-a a sẽn segd n maane. (Tʋʋ. 4:13; Gal. 1:13-20; Fili. 3:4-11) D pa tõe n bãng toeeng nins fãa sẽn yɩ tɩlɛ tɩ neb kẽer toeem b tagsa wã pʋgẽ, n sak koe-noogã n lebg a Zeezi Kirist karen-biisã ye. Wala makre, neb wa a Serziyus Polus, a Dionisiyus, a Damarisi, a Filemo, a Onezɩm la neb a taaba.—Tʋʋ. 13:6-12; 17:22, 33, 34; File. 8-20.

D KOGL ZEMS-N-TAAR NING SẼN BE D SƲK DŨNIYÃ GILL ZUGÃ

⁶ Sãmbg sẽn ka be, yaa fo sẽn yã tigingã neb sẽn nong taab to-to wã n kɩt tɩ fo tʋlg n na n pẽneg a Zeova la a siglgã. Fo yãa nonglmã sẽn yaa bãnd ning sẽn kɩtd tɩ b bãng a Zeezi Kirist karen-biis hakɩɩkã, wa a meng sẽn yeelã. A yeelame yaa: “Mam kõta yãmb tõ-paalga: Bɩ y nong taaba. Nong-y taaba, wa mam sẽn nong yãmb to-to wã. Yãmb sã n nong taaba, nebã fãa na n bãngame tɩ yãmb yaa mam karen-biisi.” (Zã 13:34, 35) Fo sẽn yã tɩ yaa nonglem ning sẽn be tigingã pʋgẽ wã n be d tẽed-n-taasã sẽn be dũniyã gill zug sʋkã, kɩtame tɩ f maneg n nong a Zeova ne a siglgã. Fo nee Biiblã bãngr-gomd sẽn pidsdi. Yaa a soab ning sẽn wilgd tɩ yaoolem wakatã a Zeova na n tigma neb tɩ b tũ-a ne laafɩ la zems-n-taarã.—Mii. 4:1-5.

⁷ Yɛl nins sẽn kɩt tɩ nebã pa tõe n zems taabã sõor sẽn tar paasg rũndã-rũndã wã, ãnd n da tõe n tags tɩ b tõe n tigma neb “sẽn yit tẽnsã fãa pʋsẽ, buud fãa pʋsẽ, la sẽn gomd buud-goamã fãa”? (Vẽn. 7:9) Ges-y welgr ning sẽn be sẽn nong-b minund paalã la neb nins sẽn ket n nong b pĩnd minundã sʋkã. Ges-y tũudmã sẽn kɩt tɩ neb sẽn yaa buud a ye la b yit tẽn-yɛng pa zemsd taabã. Tẽng-n-biilmã sẽn paamd pãngã kɩtame tɩ politikã maneg n welgd nebã. Sẽn paase, nebã tarmã sẽn pa yembrã sẽn welgd-b ne taabã la yɛl a taab sẽn wat ne welsgã yĩnga, tõog n tigim buud toɛy-toɛy neba, sẽn gomd goam toor-toore, tɩ b tarem la b minund me pa yembr yaa yel-solemd Wẽnnaam bal sẽn tõe n maane.—Zaka. 4:6.

⁸ La zems-n-taar a woto n sɩd be a Zeova nin-buiidã sʋka. Fo sẽn dɩk f meng n kõ a Zeova n deeg lisg n lebg a Kaset soabã tɛka, f rɩta zems-n-taarã yõodo. Woto kɩtame tɩ fo-me segd n sõng n kogl-a. Yaa f sẽn na n tũud tẽn-tʋmd a Poll saglg ning sẽn be Galat rãmb 6:10 pʋgẽ wã. Be, b yetame yaa: “D sã n paam weer fãa, bɩ d maan nebã fãa neere, la sẽn yɩɩd fãa, neb nins sẽn kĩ ne tõnd tẽebã pʋgẽ wã.” La ad saglg a to me d sẽn tũudi: “Da maan-y baa fʋɩ ne no-baoodem wall ne wilg-m-meng ye. La bɩ y ned kam fãa sik a menga, n tagsdẽ t’a taabã yɩɩda yẽ. Ra bao-y y mens nafr bal ye. Bao-y y taabã nafr me.” (Fili. 2:3, 4) D sã n maand d sẽn tõe fãa n get d tẽed-n-taasã wa a Zeova sẽn get-b to-to wã n da tekd nif sẽn ne wã bala, laafɩ la sũ-noog na n kell n zĩnda tõnd ne b fãa sʋka.—Efɛɛ. 4:23, 24.

D GET TAAB YELLE

⁹ Tẽn-tʋmd a Poll rɩka makr n sõng-d tɩ d bãng tɩ welsg pa segd n zĩnd tigingã neb sʋka, la tɩ d segd n geta taab yelle. (1 Kor. 12:14-26) D tõe n zãra ne d tẽed-n-taas kẽer sẽn be dũniyã gill zugu, la pa rat n yeel tɩ b yell pa maneg n pak tõnd ye. B sã n namsd tõnd tẽed-n-taas sãnda b tũudmã yĩnga, reeg n namsda tõnd fãa. Kẽer sã n wa rat sõngre, pa rẽ bɩ sabab-wẽng sã n paam-ba, wall yaa zabr n yik b tẽngã pʋgẽ, d maanda d sẽn tõe fãa n keng b tẽebã la d sõng-b ne manesem a taaba.—2 Kor. 1:8-11.

¹⁰ Tõnd fãa segd n pʋʋsda d tẽed-n-taasã yĩng daar fãa. Kẽer maooda ne yɛl sẽn dat n kʋɩɩb-ba. B namsda sãnda tɩ nebã fãa miẽ. La a taab me yaa b tʋmd-n-taas wall b zagsã neb n zabd ne-b b tũudmã yĩnga, tɩ wʋsg pa miẽ ye. (Mat. 10:35, 36; 1 Tes. 2:14) Zu-loe-kãensã reeg n namsda tõnd fãa, bala d yaa saam-biis sẽn be dũniyã gill zugu. (1 Pɩy. 5:9) Neb n be tõnd sʋkã n tʋmd wʋsg a Zeova tʋʋmdã pʋgẽ, n lʋɩt taoor koɛɛgã mooneg pʋgẽ la tigimsã pʋsẽ. Kẽer me geta koɛɛgã mooneg yell dũniyã gill zugu. Nin-kãensã fãa ratame tɩ d pʋʋsd Wẽnnaam b yĩnga, tɩ wilgdẽ tɩ d nong-b lame la tɩ d rata b neere, baa bũmb a to sã n kae d sẽn tõe n maan n sõng-ba.—Efɛɛ. 1:16; 1 Tes. 1:2, 3; 5:25.

¹¹ D sẽn be dũniyã saab wakat tɩ yaa gudgr zĩig zãngã, a Zeova Kaset rãmbã segd n segla b mens n sõngd taaba. Sabab-wẽns wala, tẽn-digimdgu, pa rẽ bɩ sa-bɛd mi n kɩtame tɩ d segd n maan modgr la d paam teed wʋsg n sõng d tẽed-n-taase. Pipi kiris-nebã kõ-d-la mak-sõng zu-loe-kãensã buudã wɛɛngẽ. Ãntiyoos tigingã neb ra tẽega a Zeezi saglga, n tool b tẽed-n-taas nins sẽn be Zide soolmẽ wã sõngr ne sũ-noogo. (Tʋʋ. 11:27-30; 20:35) Tẽn-tʋmd a Poll wa n sagla Korẽnt tigingã neb tɩ b teel tʋʋmd b sẽn da sigl n na n sõng b tẽed-n-taas sẽn da rat sõngre. (2 Kor. 9:1-15) Rũndã-rũndã, sabab-wẽng sã n paam d tẽed-n-taas tɩ b rat sõngre, siglgã la kiris-nebã yembr-yembr yɩta tao-tao n sõnge.

D WELGA TOOR A ZEOVA RAABÃ MAANEG YĨNGA

¹² Tõnd sẽn yaa tẽed-n-taas sẽn be dũniyã gill zugã, d sigla sõma a Zeova raabã maaneg yĩnga. Rũndã-rũndã, a raabã yaa d moon Rĩungã koe-noogã dũniyã tɛk fãa tɩ yɩ kaset buud fãa yĩnga. (Mat. 24:14) A Zeova ratame tɩ d sẽn tʋmd tʋʋm-kãngã wã, bɩ d tũud a noyã sõmblem sẽn ka to wã. (1 Pɩy. 1:14-16) D segd n sulgda d mens n sakd taaba, la d modgdẽ tɩ koe-moonegã kẽngd taoore. (Efɛɛ. 5:21) Yaa masã la d segd n maneg n lʋɩɩs Wẽnnaam Rĩungã taoor n yɩɩd pĩndã, la d ra bao d meng nafr ye. (Mat. 6:33) D sã n ning rẽ d yamẽ, n naagd taab n tʋmd koe-noogã na ta zĩig zãnga, d na n paama sũ-noog masã, la d na n wa paama bark toor-toor wakat fãa yĩnga.

¹³ D sẽn yaa a Zeova Kaset rãmbã, d yaa toor fasɩ, neb Wẽnnaam sẽn welg ãdem-biisã sʋk tɩ b yaa yɩlma, sẽn na yɩl tɩ b tʋmd tʋʋm-sõma ne yẽesem. (Tɩt 2:14) Tõnd sẽn tũud a Zeova wã kɩtame tɩ d pa wõnd neb a taabã ye. D naaga d tẽed-n-taasã sẽn be dũniyã gill zugã n tʋmdẽ. La pa rẽ bal ye. D fãa gomda sɩdã buud-gomdã tɩ d tʋʋm-tʋmdɩ wã me zemsd ne rẽ. A Zeova ra pĩnd n kɩtame t’a no-rɛɛs a Sofoni togs rẽ n yeele: “Mam na n toeema buud toɛy-toɛyã buud-goamã tɩ lebg buud-gomd sẽn yaa yɩlemde, sẽn na yɩl tɩ b fãa tõog n bool maam a Zeova yʋʋrã, la b naag taab yam a yembr n tũ maam.”—Sof. 3:9.

¹⁴ Rẽ poore, a Zeova kɩtame t’a Sofoni gom tẽed-n-taas sẽn na n zĩnd dũniyã gill zug yell wa sẽn yaa to-to rũndã-rũndã wã, n yeele: “Israyɛll neb nins sẽn ketã pa na n maan sẽn pa tɩrg ye. B pa na n yag ziri, wall b tall b zɩlma wã n zãmb ned ye. B na n dɩɩme la b gãande, tɩ ned kae n na n kẽes-b rabeem ye.” (Sof. 3:13) D sẽn paam bãngr hakɩɩk a Zeova Gomdã sẽn yaa sɩdã zugã, n toeem d tagsa wã la d vɩɩmã tɩ zems ne a noyã, d tõog n naaga taab n tʋmd yam a yembre. D tõog n maanda bũmb sẽn wõnd pa tõe ninsaal nif gesgẽ. Sɩd me, d yaa nin-buiid sẽn yaa toore, Wẽnnaam nin-buiid sẽn zẽkd a zug dũniyã gill zugu.—Mii. 2:12.