Vẽnegre

Koɛɛg kiris-neb nins sẽn yaa roagdbã yĩnga:

Yãmb a roagdbã raab yaa y sõng y kambã y sẽn nong wʋsgã, tɩ b wa nong a Zeova la b rɩk b mens n kõ-a. Bõe la y tõe n maan n sõng-b tɩ b wa tõog n deeg lisgu? Wakat bʋg la b na n segl n sa n tõog n deeg lisgã sẽn tar yõod wʋsgã?

A Zeezi yeela a karen-biisã yaa: “Bɩ y . . . sõng buud fãa neb tɩ b lebg mam karen-biisi, n lis bãmb.” (Mat. 28:19) Sã n yaa ne a Zeezi gom-kãensã, yɩl tɩ ned wa tõog n deeg lisgu, a segd n deng n yɩɩ karen-biiga, rat n yeel tɩ ned sẽn wʋmd Kiristã zãmsg toor-toorã võore, n tẽed-ba, la a tũud-b neere. Baa kamb nins sẽn paoodã tõe n maana rẽ.

Kõ-y y kambã mak-sõngo, la y sõng-b t’a Zeova goamã kẽ b sũurã. (Tõo. 6:6-9) Y tõe n tika Vɩɩmd-y wakat sẽn kõn sa! sebrã n zãms y kambã Biiblã zãms-nana wã, la y sõng-b tɩ b bʋgsd Biiblã saglsã zut la b tũudẽ. Sõng-y y kambã tɩ b wa tõog n bilg b sẽn tẽed bũmb ninsã ne b mens goama. (1 Pɩy. 3:15) Bãngrã la sagls nins b sẽn paamd yãmb nengẽ wã, n paas b meng Biiblã zãmsgã, zak pʋgẽ Biibl zãmsgã, tigissã, la tũud-n-ta-sõma wã na n sõng-b lame tɩ b wa tõog n deeg lisgu, la sõng-b b lisgã poor me. Sõng-y-b tɩ b yãk bũmb ning b sẽn dat n wa maan a Zeova tũudmã pʋgẽ.

Yel-bũn 20:11 yetame: “Baa biig meng tʋʋm-tʋmdɩ tõe n kɩtame tɩ b bãng-a, rat n yeel tɩ n bãng a manesmã sã n yaa sõma la tɩrga.” Bõe la bi-ribl wall bi-pugl tõe n maane, tɩ wilgdẽ t’a lebga a Zeezi Kirist karen-biiga, la t’a segl n saame n na n deeg lisgu?

Biig sẽn modgd n dat n wa reeg lisg segd n sakda a roagdbã. (Tʋʋ. 5:29; Kolo. 3:20) Biiblã yeelame t’a Zeezi sẽn wa n tar yʋʋm piig la a yiibã, “a kell n saka [a roagdbã].” (Luk 2:51) Yaa vẽeneg tɩ y pa na n bao tɩ y biigã zems zãng ye. La biig sẽn dat n deeg lisg na n modg n dɩkda a Zeezi togs-n-taare, tɩ b neẽ me t’a sakda a roagdbã.

A na n wilgdame me t’a nonga sɩdã sẽn be Biiblã pʋgẽ wã zãmsgo. (Luk 2:46) Rẽ yĩnga, yãmb biigã nonga tigissã kẽnde, la a rat n kẽesd a toog bɩ? (Yɩɩn. 122:1) A nong n karemda Biiblã wakat fãa la a zãmsd-a a toor bɩ?—Mat. 4:4.

Biig sẽn modgd n dat n wa reeg lisg lʋɩɩsda Wẽnnaam Rĩungã yɛl taoore. (Mat. 6:33) A sak n deegame tɩ yaa tɩlɛ t’a taas neb a taabã bũmb nins a sẽn tẽedã. A kẽesda a toog koe-moonegã nens toɛy-toɛyã pʋsẽ, la a wilgd a karen-saam-dãmbã ne a karen-bi-taasã t’a yaa a Zeova Kaset soab n pa zoet yãnd ye. B sã n kõ-a tʋʋmd Kiris-nebã vɩɩm la b tʋʋma tigsgã sasa, a tʋmd-a-la ne a sũur fãa.

A na n modgame n zãag a meng ne tũud-n-ta-wẽnse, sẽn na yɩl n kell n yɩ yɩlemde. (Yel. 13:20; 1 Kor. 15:33) Mizik nins a sẽn kelgdã, filim nins a sẽn getã, bũmb nins a sẽn get televiziyõ wã pʋgẽ wã, ze-video nins a sẽn tãoodã, la a sẽn tʋmd ne ẽntɛrnetã to-to wã n na n wilg rẽ.

Kamb wʋsg saka b roagdbã sẽn maan modgr ning n sõng-bã, n sak sɩdã n maan bũmb nins fãa b sẽn segd n maan sẽn na yɩl n tõog n deeg lisgã, tɩ b ket n paoodẽ. Bɩ a Zeova ning-y barka, modgr ning fãa y sẽn maand sẽn na yɩl n sõng y kambã tɩ b wa tõog n maan bõn-kãngã sẽn tar yõod wʋsg bãmb ne a Zeova zoodã wɛɛngẽ wã.

Koɛɛg koe-moondb sẽn nan pa reeg lisgã yĩnga:

Y sẽn paam n yaa koe-moond sẽn nan pa reeg lisg n be tigingã pʋgẽ wã yaa zu-zẽkre. D pẽgd-y-la modgr ning y sẽn maan tɩ y tẽebã paasã yĩnga. Yãmb zãmsa Wẽnnaam Gomdã n bãng-a la y tẽed a pʋlemsã.—Zã 17:3; Ebre. 11:6.

Nand tɩ y sɩng Biiblã zãmsg ne a Zeova Kaset rãmbã, tõe tɩ y ra zoe n tara tũudum, wall y ra pa tar tũudum meng ye. Tõe me tɩ y ra maanda bũmb sẽn pa zems ne Biiblã goamã. La masã, y sẽn tẽed bũmb ninsã kɩtame tɩ y tek yam, rat n yeel tɩ y maana y bãngẽ yel-kɛg nins fãa y sẽn da maandã yĩnga. Sẽn paase, y tuubame, rat n yeel tɩ y basa manesem-wẽnsã, n yãk yam n na n maan sẽn yaa tɩrg Wẽnnaam nifẽ.—Tʋʋ. 3:19.

La tõe me tɩ y ra mii Gʋls-sõamyã ‘hal y yãadmẽ.’ Rẽ kɩtame tɩ y zãag y meng ne manesem kẽer kiris-ned sẽn pa segd n talle, la yel-wẽn-kãsemse. (2 Tɩm. 3:15) Y bãnga y sẽn tõe n maan to-to tɩ y taabã ra tõog n kʋɩɩb-yã, la y zãag y meng ne bũmb a taab sẽn tõe n wa kɩt tɩ y maan sẽn yaa wẽng a Zeova nifẽ. Y wilgame tɩ y tara tẽebo, n teend tũudum hakɩɩkã la y moond neb a taabã bũmb nins y sẽn tẽedã. B zãms-y-la y sẽn tõe n moon koɛɛgã to-to. Masã, y yãka yam n na n lebg koe-moond sẽn nan pa reeg lisgu, n tũ a Zeova.

Y bãnga a Zeova hal y yãadmẽ wall kaoosg zugẽ me, masã, tõe tɩ y tagsd n na n maana bũmb a yiib y tẽebã bɩɩsg yĩnga: Yaa y sẽn na n dɩk y meng n kõ a Zeova la y reeg lisgã. Y sã n na n dɩk y meng n kõ a Zeova, y pʋʋsd-a lame n wilg-a tɩ y yãka yam n na n tũ yẽ a ye tãa wakat fãa yĩnga. (Mat. 16:24) Rẽ poore, y reegda lisg n wilg tɩ y sɩd rɩka y meng kõ a Zeova. (Mat. 28:19, 20) Y sã n dɩk y meng n kõ a Zeova la y reeg lisgu, y lebga Wẽnnaam a Zeova tʋm-tʋmda. Ad yaa zu-zẽkr tɛkẽ!

Y Biiblã zãmsg sasa, y bãngame me tɩ y tõe n wa sega zu-loees buud toor-toore. Tẽeg-y t’a Zeezi lisgã poor bilf bala, ‘vʋʋsem sõngã tall-a lame n kẽng weoogẽ, sẽn na yɩl tɩ Sʋɩtãanã mak bãmba.’ (Mat. 4:1) Y sã n deeg lisg n lebg Kiristã karen-biiga, y tõe n wa paama makre. (Zã 15:20) Na n yɩɩ makr buud toor-toore. Y zakã neb tõe n wa namsd-y-la y tũudmã yĩnga. (Mat. 10:36) Y karen-bi-taase, y tʋmd-n-taase, wall y pĩnd zo-rãmb tõe n wa yaand-y lame. Wakat fãa bɩ y tẽeg a Zeezi goam nins sẽn be Mark 10:29, 30 wã. A yeelame: “Sɩd-sɩda, mam yeta yãmb tɩ ned sã n bas roog wall ba-bi-rap bɩ ba-bi-pogse, pa rẽ bɩ ba wall ma, bɩ kamb wall pʋt mam yĩnga, la koe-noogã yĩnga, masã menga, a na n paama sẽn yɩɩd rẽ naoor koabga, (roto, ba-bi-rapa, ba-bi-pogse, ma-rãmba, kamba, la pʋto, ne namsgo,) la dũni ning sẽn watã pʋgẽ, a na n paama vɩɩm sẽn ka sɛta.” Woto yĩnga, bɩ y kell n modg n pẽnegd a Zeova, la y tũud a noyã sẽn yaa tɩrsã.

Y sã n tʋll n deega lisgu, bɩ y togs kãsem-dãmbã sull yel-gɛtã. Kãsem-dãmbã na n tika sogsg nins sẽn pʋgd sõs-kãngã wã, n sõs ne yãmb n bãng y sã n maanda bũmb nins fãa y sẽn segd n maan sẽn na yɩl n wa tõog n deeg lisgã. Y tõe n zoe n bʋgsda sogs-kãens zut y meng Biibl zãmsgã wakate.

Y sã n wa segend y meng sõssã yĩnga, bɩ y bao sẽk n karem vɛrse-rãmb nins b sẽn sõdgã, la y bʋgs b zutu. Y tõe n gʋlsa bũmb kẽer sebrã pʋgẽ wall zĩig a to. Kãsem-dãmbã sã n wa sõsd ne-yã, y tõe n tika y sẽn gʋlsã n leok sogsgã, la y zãad seb-kãngã me. Sã n wa yaa toog ne-y tɩ y wʋm sogsg kẽer võore, y tõe n kosa sẽn zãmsd-a Biiblã ne yãmbã wall kãsem-dãmbã sõngre.

Kãsem-dãmbã sã n wa sõsd ne-yã, ra tags-y tɩ y segd n kõo leoor sẽn yaa woko, wall a võor wʋmb sẽn yaa toog ye. Y sã n kõ leoor sẽn yaa koɛɛg la takɩ ne y meng goama, yaa sõma n yɩɩda. Sã n yaa ne sogsg wʋsg leoore, yɩta sõma tɩ y tik Biiblã vɛrse a ye bɩ a yiib n leoke.

Y sã n nan pa wʋmd Biiblã zãms-nana wã võor tɩ seke, kãsem-dãmbã na n gesame tɩ y paam sõngre, sẽn na yɩl n wa tõog n bilgd Biiblã vɛrse-rãmb ne y meng goama, la y maan bũmb nins y sẽn segd n maan n wa tõog n deeg lisgã.

[Kãsem-dãmbã yĩnga: Sagls sẽn wilgd y sẽn tõe n sõs to-to ne sẽn dat-b n deeg lisgã bee seb-neng 208-212.]