Baasg sõsg ne neb nins sẽn dat n deeg lisgã

Naoor wʋsgo, yaa a Zeova Kaset rãmbã tigis-kãsemsã sasa la nebã reegd lisgu. Lisgã sõsg baasgẽ, sõsdã na n kosa sẽn dat-b n deeg lisgã tɩ b yiki, n zẽk b koees n leok sogsg a yiibu. Sogsgã yaa:

1. Rẽ yĩnga, yãmb teka yam n kos y yel-wẽnã sugri, n dɩk y meng n kõ a Zeova, la y sak tɩ yaa ne a Zeezi Kirist maasem la a fãagd nebã bɩ?

2. Rẽ yĩnga, yãmb miime tɩ y sẽn na n deeg lisgã, wilgdame tɩ y lebga a Zeova Kaset soaba, la a siglgã ned bɩ?

Sẽn dat-b n deeg lisgã sã n leok sogs-kãensã tɩ n-ye vẽenega, b ‘kõta kaset’ zãma wã taoore, tɩ b sɩd tẽeda a Zeezi maoongã, la tɩ b rɩka b mens zãng n kõ a Zeova n na n maan a raabã. (Rom. 10:9, 10) Rẽ n so tɩ neb nins sẽn dat n deeg lisgã segd n deng n tags sogs-kãensã zug neer la b pʋʋs rẽ wɛɛngẽ, sẽn na yɩl n tõog n leok ne pʋ-peelem.

Yãmb pʋʋsa a Zeova n dɩk y meng n kõ-a, n pʋlm-a tɩ y na n tũu yẽ a ye tãa, la tɩ yaa a raabã maaneg n na n tall yõod n yɩɩd ne yãmb bɩ?

Masã, yãmb kɩsa sɩd zãng tɩ y segd n deega lisg tigis-kãseng ning sẽn watã sasa bɩ?

Fu-bʋs buud la ned segd n ning a lisgã reegr sasa? (1 Tɩm. 2:9, 10; Zã 15:19; Fili. 1:10)

D segd n manega d mens ne sik-m-meng la gũusgu, sẽn na yɩl n wilg tɩ d “tũuda Wẽnnaam.” Sẽn dat n deeg-b lisgã pa segd n ning fut sẽn wõnd fut nins dũniyã neb sẽn wae n ningd n deemd koomã wall fut sẽn tar piblisite-rãmb bɩ bũmb a taab ye. B segd n ninga fut sẽn yaa sõma, yɩlma, sẽn sakd gesg la sẽn zems ne yɛlã sẽn yaa to-to wã.

Manesem-bʋg la ned segd n tall a lisgã reegr sasa? (Luk 3:21, 22)

A Zeezi kõo kiris-nebã mak-sõng lisgã reegr wɛɛngẽ. A ra miime tɩ lisgã pa reem yell ye. Sẽn paase, a yel-manesmã la a tʋʋm-tʋmdɩ wã wilga rẽ. Woto yĩnga, lisgã zĩigẽ ka kʋʋsem zĩiga, reem zĩiga, koom deeng zĩiga, wall zĩig b sẽn na n maan bũmb tɩ lisgã lebg wa reem yell ye. Sẽn deegd-a lisgã pa segd n maan tɩ yaa wa a paama tõogr sẽn yaa kãseng ye. Baa ne lisgã sẽn yaa sũ-noog sasa wã, f segd n wilga f sũ-noogã ne manesem sẽn waoogd Wẽnnaam.

Fo sã n kẽnd tigissã wakat fãa la f nong n be ne f tẽed-n-taasã, wãn to la na n sõng foo tɩ f pids bũmb ning f sẽn pʋlem a Zeova wã?

F lisgã poore, bõe yĩng tɩ yaa tɩlɛ tɩ f ket n zãmsd Biiblã la f moond koe-noogã wakat fãa?

SAGLS KÃSEM-DÃMBÃ YĨNGA

Koe-moond sã n wa togs kãsem-dãmbã t’a rat n deega lisgu, b segd n sagl-a lame t’a tɩ ges seb-kãngã neng 185-207 wã zĩigẽ. Be, gom-zugã yetame tɩ “Sogsgo, neb nins sẽn dat n deeg lisgã yĩnga.” B segd n togs-a lame t’a sɩng karengã seb-neng 182 wã, zĩig ning b sẽn gʋls tɩ “Koɛɛg koe-moondb sẽn nan pa reeg lisgã yĩnga.” Zĩ-kãnga, b wilgda a sẽn tõe n segl a meng to-to kãsem-dãmbã sẽn na n wa sõs ne-a wã yĩnga. Sõsgã sasa, sẽn dat-a n deeg lisgã tõe n geta sebrã pʋgẽ, la a not-rãmbã n leokdẽ, wa b sẽn wilg be wã. La pa tɩlɛ tɩ ned reng n sõs ne-a sogs-kãens zug t’a yaool n tɩ sõs ne kãsem-dãmbã ye.

Ned sã n dat n deeg lisgu, a segd n togsa kãsem-dãmbã sull yel-gɛtã. Sẽn dat-a n deeg lisgã sã n tõog n paama weer n karem zĩis nins b sẽn gʋls tɩ “Sogsgo, neb nins sẽn dat n deeg lisgã yĩnga,” kãsem-dãmbã sull yel-gɛtã na n sok-a lame n ges a sã n pʋʋsa a Zeova n dɩk a meng n kõ-a n na n maan a raabã. A sã n dɩka a meng n kõ a Zeova, kãsem-dãmbã sull yel-gɛt na n gesame tɩ kãsem-dãmb a yiib tik zĩis nins b sẽn gʋls tɩ “Sogsgo, neb nins sẽn dat n deeg lisgã yĩnga” n sõs ne-a. B segd n yãka kãsem-soab zĩig fãa yĩnga. Pa tɩlɛ tɩ y gũ tɩ b wa togs tɩ tigis-kãseng n kolge, tɩ y yaool n sõs ne-a ye.

Naoor wʋsgo, b segda taab naoor a yiibu, n sõs babs a yiibã zutu. Y tõe n dɩka lɛɛr a ye n sõs babg fãa zugu, la y sã n wa mik tɩ yaa tɩlɛ, tõe n yɩɩga woto. Seg-taab fãa segd n sɩnga ne pʋʋsgo, la baas ne pʋʋsgo. Sẽn dat n deeg-a lisgã bɩ kãsem-dãmbã pa segd n maan var-var ye. Kãsem-dãmb nins b sẽn yãk tɩ b sõs ne sẽn dat-a n deeg lisgã segd n naaga rẽ bũmb nins sẽn tar yõod n yɩɩdã sʋka.

Yɩta sõma tɩ b sõs sogsgã zug ne sẽn dat-b n deeg lisgã yembr-yembre, la b ra naag-b taab ye. Woto, kãsem-dãmbã na n tõog n bãnga ned fãa sã n sɩd wʋmda Biiblã goam võor sõma, la a sã n sɩd segla a meng n sa n tõe n deeg lisgu. Sẽn paase, a sã n yaa a yembre, a na n tõog n leokame n pa zoe yãnd ye. B tõe n kɩtame tɩ rao ne a pag naag taab tɩ b sõs ne-ba.

Sẽn dat-a n deeg lisgã sã n yaa paga, kãsem-soabã segd n sõsa ne-a zĩig neb sẽn tõe n yã-ba, la b sẽn pa tõe n wʋm b goamã. Sã n yaa tɩlɛ tɩ ned tũ-a, segd n yɩɩ kãsem-soab bɩ kãsem-sõngda. La sã n na n yɩɩ kãsem-soab bɩ kãsem-sõngdã, bee ne babg ning zug b sẽn na n sõsã, wa sull ning sẽn pʋgdã sẽn wilgdã.

Kãsem-dãmbã sã n pa waooge, b tõe n yãka kãsem-sõngd sẽn tar minim la yam-vẽenem, t’a sõs ne sẽn dat n deeg-a lisgã pipi babgã zugu. Bab-kãng gom-zug yaa: “Kiris-nebã sẽn tẽed bũmb ninsã.” La sã n yaa ne babg a yiib-n-soabã sẽn yet tɩ “Kiris-nebã sẽn segd n vɩɩmd to-to” wã, segdame tɩ yɩ kãsem-soab bala. Saam-biis sẽn tar minim sã n pa waooge, b tõe n togsa tigims sull yel-gɛtã, t’a ges tiging sẽn pẽ beenẽ sã n tõe n sõngame.

Sẽn dat n deeg-a lisgã sã n yaa biiga, a roagdbã sẽn yaa a Zeova Kaset rãmbã segd n zĩnda sõsgã sasa. A roagdbã sã n pa tõe n zĩndi, kãsem-dãmb a yiib n segd n naag taab n sõs ne-a babg fãa zugu. (Leb n tõe n yɩɩ kãsem-soab ne kãsem-sõngda, la rẽ bee ne sẽn yaa babg ning zug la b na n sõsã.)

Kãsem-dãmbã segd n kɩsa sɩd tɩ ned ning sẽn dat n deeg lisgã wʋmda Biiblã zãms-nana wã võor sõma. Sẽn paase, b segd n bao n bãnga a soabã sã n nonga sɩdã wʋsgo, la a sã n wilgdame t’a nanda a Zeova siglgã. Kãsem-dãmbã sã n mik t’a pa wʋmd Biiblã zãms-nana wã võor sõma, b na n gesame t’a paam sõngr n paase, n wa tõog n deeg lisgu. B segd n kõo neb kẽer weer tɩ b wilg tɩ b nonga koe-noogã moonego, bɩ tɩ b sakda a Zeova sẽn sigl yɛlã to-to wã. Sẽn mik tɩ kãsem-dãmbã segd n dɩka lɛɛr a ye bɩ sẽn yɩɩd rẽ bilf n sõs ne sẽn dat-a n deeg lisgã babg fãa zugã, b segd n gesa b sẽn na n kaoos to-to sokr fãa zugu, sẽn na yɩl tɩ b sõsgã sõng-b tɩ b bãng a sã n sɩd tõe n deega lisgu. Baa ne b sẽn tõe n kaoos sogsg kẽer zut n yɩɩd b taabã, b segd n soka sogsgã fãa.

B sã n wa sõs babs a yiibã zut n sa, kãsem-dãmb nins b sẽn yãk tɩ b sõs ne sẽn dat-a n deeg lisgã segd n sega taaba, n ges a sã n tõe n deega lisgu. Kãsem-dãmbã segd n gesa sẽn dat-a n deeg lisg fãa minim la a yɛlã sẽn yaa to-to wã. D sẽn dat n bãng yaa a soabã sã n tara zood sõma ne a Zeova, la a sã n sɩd wʋmda Biiblã sẽn yet bũmb ninsã võore. Y sã n wilg tɩ y nonga sẽn na n deeg-b lisgã, n sõng-ba, b na n wa paama minim n tõog n moon koe-noogã sẽn yaa tʋʋmd sẽn tar yõod wʋsg Wẽnnaam sẽn kõ-dã.

Rẽ poore, kãsem-dãmb nins sẽn sõs ne-a wã nin-yende, wall bãmb b yiibã segd n tɩ togs-a-la a sã n tõe n deega lisg bɩ a pa tõe. A soabã sã n tõe n deega lisgu, kãsem-dãmbã na n sõsa ne-a “Baasg sõsg ne neb nins sẽn dat n deeg lisgã” sẽn be seb-neng 206-207 wã zugu. A soabã sã n nan pa zãms Vɩɩmd-y wakat sẽn kõn sa! sebrã n sa, kãsem-dãmbã segd n sagl-a lame t’a lisgã poor bɩ a kell n zãms seb-kãng n baase. Y segd n wilg-a lame tɩ b na n gʋlsa a sẽn deeg lisgã daar ningã a koe-moonegã kart zugu. Tẽeg-y-yã-a tɩ kãsem-dãmbã reegda kibay yẽ mengã zugu, sẽn na yɩl tɩ siglgã tõog n kell n ges a Zeova Kaset rãmbã tʋʋm yell dũniyã gill zugu, la sẽn na yɩl tɩ yẽ mengã tõog n naag n moond koɛɛgã, la a paamd sõngr a tẽebã kengr yĩnga. Sẽn paase, kãsem-dãmbã tõe n tẽega koe-moond-paalã tɩ b na n tʋma ne kibay nins b sẽn tar b zutã, tɩ zems ne Règles mondiales des Témoins de Jéhovah en matière de protection des données sẽn be jw.org pʋgẽ wã. Naoor wʋsgo, sõs-kãng pa zʋʋgd minit piig ye.

Ned sã n deeg lisgu, yʋʋmd poore kãsem-dãmb a yiib n tog n tɩ sõs ne-a, n keng a raood la b kõ-a saglse. B nin-yend segd n yɩɩ sẽn deeg-a lisgã sẽn be sull ning pʋgẽ wã yel-gɛta. Sẽn deeg-a lisgã sã n yaa biiga, a roagd sẽn yaa a Zeova Kaset soab segd n zĩnda sõsgã sasa. Sõsgã segd n talla yamleoogo, la keng a raoodo. Kãsem-dãmbã na n goma a sẽn modgd a Zeova tũubã pʋgẽ wã yelle, la b kõ-a sagls sẽn na n sõng-a t’a ket n zãmsd Biiblã n pa vaandẽ, n karemd-a daar fãa, n maand zak pʋgẽ Biibl zãmsgã, n kẽnd tigissã n pa vaandẽ la a kẽesd a toogo, la a moond koɛɛgã semen fãa. (Efɛɛ. 5:15, 16) A sã n nan pa zãms Vɩɩmd-y wakat sẽn kõn sa! sebrã n sa, kãsem-dãmbã segd n baoo ned t’a sõng-a t’a baase. Kãsem-dãmbã segd n pẽg-a lame. Naoor wʋsgo, b sã n tik bũmb a ye bɩ a yiib zug n sagl-a sekame.